تيمٿيس رَي نون ٻيجو خط
جَئي پرڀُو رِي ھانَ پراٿنا
1
اَي خط مھَي پولُوس رَي طرفون ھَي جڪو ايشوَر رِي مرضِي ݾون مَسيح يسُوع رِي خُوشِي رِي خبر ݾُڻاوڻ آݪو سنت ھون، ھُون اُوئي واعدَي ڪيئوڙِي زندگِي رو پرچار ڪرون جڪو آپون نَي مَسيح يسُوع ۾ ملَي ھَي۔ 2 اَي خط تيمٿيس رَي نون ھَي جڪو مھارَي ڏيڪرَي آݪِي ڪار ھَي۔ايشوَر پِتا ھانَ آپڻَي پرڀُو مَسيح يسُوع رِي ڪِرپا، دايا ھانَ ݾُک ٿَي ماٿَي ھوتو رَي۔
ايشوَر رو شُڪر ھانَ تيمٿيس نَي حوصلو
3 جڪَي ايشوَر رِي ڀگتي مھارَي ٻاپ ڏاڏون ڪِي، ھُون ڀِي اُوئون آݪِي ڪار صاف دِل ݾون اُوئي رِي ڀگتي ڪرون ھون ھانَ ڏِن رات آپرِي پراٿنا ۾ ٿنَي ھميشا ياد ڪري ايشوَر رو شُڪر ڪرون ھون۔ 4 مھارو من ٿارِي ݾِڪ ۾ ٿَي ݾون مِلڻ رَي ݾارُو تڙپَي ھَي ڪہ ھُون ٿَي ݾون مِلي خُوشِي ݾون ڀريجي جائُون ڪيونڪہ مھنَي ياد ھَي ڪہ تُو مھارَي جاوڻ رَي ٽيم تي ڪِترو رُونو ھتو۔ 5 مھنَي ٿارو ݾاچو وِشواس ياد ھَي ھانَ مھنَي ڀروسو ھَي ڪہ ٿارو وِشواس اوج ھوشَي جھڙَي نمُونَي ٿارِي نونِي لُوئيس ھانَ ٿارِي ما يُونيڪي رو ھتو۔ 6 اِيئي رَي ڪري ھُون ٿنَي ياد ڏيرائُون ھون ڪہ تُو ايشوَر رِي ڏينوڙِي نعمت نَي اِستعمال ڪرتو رَي، جڪو ٿنَي مھارَي ھاٿ راکڻ ݾون ملِي ھتِي۔ 7 ڪيونڪہ ايشوَر آپون نَي پويتر آتما اِيئي رَي ڪري ڪونھي ڏينو ڪہ آپي ٻيئاجون پڻ اِيئي رَي ݾارُو ڏينو ھَي ڪہ آپون نَي طاقت ملَي، آپي پريم ݾون بون ھانَ آپنَي ڪاٻُو راکون۔
8 اِيئي رَي ڪري تُو آپڻَي پرڀُو يسُوع رِي گواھِي ڏيوَڻ ݾون شرما نِي، ھانَ نِي مھَي ݾون شرما جڪو اُوئي رَي ڪري قيدي ھون۔ اِيئي ݾون ٽاݪ تُو خُوشِي رِي خبر ݾُڻاوڻ رَي ݾارُو مھَي آݪِي ڪار ايشوَر ݾون مِلڻ آݪِي طاقت ݾون ڏُک تڪليف برداش ڪرتو رَي۔ 9 ڪيونڪہ اُوئي آپون نَي مُگتي ڏي پويتر زندگِي گُذارڻ رَي ݾارُو اَڻايا ھَي ھانَ او آپڻَي ڪومون رَي ڪري نا، پڻ ايشوَر رَي خاص اِرادَي ھانَ ڪِرپا ݾون ملِي ھَي۔ اَي ڪِرپا جگت رَي ٺھيجڻ ݾون پيل مَسيح يسُوع ۾ آپون نَي ملِي ھَي۔ 10 پڻ ھمَي آپڻَي مُگتي داتا مَسيح يسُوع رَي آوڻ ݾون ظاھر ھوئِي جڪَي موت نَي مِٽائي آپرِي خُوشِي رِي خبر رَي وسيلَي اِيئي زندگِي ھانَ اَمر جيوَن نَي اُجاݪَي ۾ لائي آپون تي ظاھر ڪيئو۔
11 ايشوَر مھنَي خُوشِي رِي خبر ݾُڻاوڻ آݪو سنت ھانَ اُستاد چُونڊيو ھَي، 12 اِيئي رَي ڪري ھُون ڏُک ڏيکون پڙيو، پڻ تو ڀِي ھُون شرماوتو ڪونھي ڪيونڪہ جڪَي تي مھَي وِشواس راکيو ھَي اُوئي نَي ھُون اوݪکون ھون۔ مھنَي ڀروسو ھَي ڪہ جڪَي خُوشِي رِي خبر نَي اِمونت آݪِي ڪار مھَي اُوئي رَي حوالي ڪِي ھَي او اُوئي رِي رُکاݪِي آپرَي پاڇَي آوڻ آݪَي ڏِن توڻي ڪري ݾگھَي ھَي۔
13 جڪو ݾُٺَي باتون ٿَي مھَي ݾون ݾُڻئَي ھَي او مھارَي نمُونَي تي بَئي ݾيکاوتو رَي ھانَ مَسيح يسُوع ۾ وِشواس ھانَ پريم ݾون بيتو رَي۔ 14 او خُوشِي رِي خبر جڪو ايشوَر ݾُٺِي اِمونت آݪِي ڪار ٿارَي حوالي ڪِي ھَي، پويتر آتما جڪو آپون ۾ رَي ھَي اُوئي رِي مدد ݾون اُوئي رِي ݾنڀال ڪر۔
15 ٿنَي اَي خبر ھَي ڪہ فوگلُس ھانَ ھرمُگنيس ݾُوڌا آسيا صُوبَي را ݾجائِي مِنک مھَي ݾون ڦِري گيا ھَي۔ 16 پرڀُو، اُنيسفرُس رَي خاندان تي دايا ڪرَي ڪيونڪہ اُوئي مھنَي تموم گھڻا گُھمرا حوصلو ڏينو ھَي۔ او اِيئي بات ݾون ڪڏي ڀِي شرميدو ڪونھي ھويو ڪہ ھُون قيد ھون 17 پڻ جڏي او رُوم شھر ۾ پُگو، تو اُوئي مھنَي تموم گھڻو جويو ھانَ آئي مھَي ݾون مِليو۔ 18 مھارِي پراٿنا ھَي ڪہ پرڀُو رَي آوڻ آݪَي ڏِن پرميشوَر اُوئون تي دايا ڪرَي۔ ٿنَي خبر ھَي ڪہ اُوئي اِفسِس شھر ۾ آپڻِي ڪترِي تو شيوا ڪِي ھتِي۔