فِلپيون 1

فِلپيون رَي نون خط

جَئي پرڀُو رِي

اَي خط پولُوس ھانَ تيمٿيس رَي طرفون ھَي جڪو مَسيح يسُوع را ٻونھا ھون۔ اَي خط فِلپي شھر رَي مَسيح يسُوع ۾ ݾجَي نيڪ مِنکون، وِشواسي مَنڊلِي رِي ݾنڀال ڪرڻ آݪون ھانَ شيوادارون رَي نون ھَي۔

‏2 آپڻَي ايشوَر پِتا ھانَ پرڀُو يسُوع رَي طرفون ٿون تي ڪِرپا ھانَ ݾُک ھوتو رَي۔

سنت پولُوس رِي پراٿنا

‏3 ھُون جڏي ڀِي ٿونَي ياد ڪرون ھون، تو آپرَي ايشوَر رو شُڪر ڪرون ھون ‏4 ھانَ ھر ھيڪ پراٿنا جڪو ٿونرَي ݾارُو ڪرون ھون، تو ھميشا خُوشِي ݾون ٿون ݾجون رَي ݾارُو مِنٿ ڪرون ھون۔ ‏5 اِيئي رَي ڪري ڪہ ٿي شرُوع ݾون لي آج توڻي خُوشِي رِي خبر رو پرچار ڪرڻ ۾ مھون ڀيڙا ھتا۔ ‏6 مھنَي اِيئي بات رو ڀروسو ھَي ڪہ ايشوَر جڪَي ٿون ۾ اَي نيڪ ڪوم شرُوع ڪيئو ھَي اُوئي نَي او يسُوع مَسيح رَي ڀڙي آوڻ توڻي پُورو ڪرشَي۔ ‏7 اَي ݾُٺو ھَي ڪہ ھُون ٿون ݾجون رَي بارَي ۾ اِيئون ݾوچون ھون ڪيونڪہ ٿي مھارَي من ۾ رو ھو۔ جڏي ھُون قيد ھتو، جون ھُون ايشوَر رِي خُوشِي رِي خبر نَي ݾاچِي ثابت ڪرتو پڙيو ھانَ مُخالفون نَي مُونھ ڏيتو پڙيو، تو ٿي ڀِي ايشوَر رِي ڪِرپا ۾ مھَي ڀيڙا شامل ھتا۔ ‏8 ايشوَر مھارو گواھ ھَي ڪہ ھُون مَسيح يسُوع جھڙو پريم راکي ٿون ݾون مِلڻ رِي تموم گھڻِي ݾِڪ ۾ ھون۔

‏9 مھارِي پراٿنا ھَي ڪہ ٿي ڄاڻ ھانَ ھر نمُونَي رِي ݾمجھ ݾون پريم ۾ اَڃون ڀِي وڌيڪ بڌتا جائو ‏10 جڪَي ݾون ٿي ݾُٺَي باتون پَرکي ݾگھو ھانَ مَسيح رَي ڀڙي آوڻ آݪَي ڏِن توڻي صاف من رو ھانَ ٿون تي ڪو ڀِي الزوم نِي ھووَي۔ ‏11 اِيئي نمُونَي ٿي نيڪِي رَي ڦلون ݾون ڀريجوڙا رو جڪو مَسيح يسُوع رَي ڪري ھَي ڪہ ايشوَر رِي مھما ظاھر ھووَي ھانَ اُوئي رِي بکوڻ ھووَي۔

مَسيح ۾ زندگِي گُذارڻ

‏12 اي وِشواسيون، مھارِي مرضِي ھَي ڪہ ٿونَي خبر پڙَي ڪہ جڪو ڏُک مھَي تي آيا اُوئون رَي ڪري خُوشِي رِي خبر اَڃون ڀِي وڌيڪ ھوئِي ھَي۔ ‏13 اترِي توڻي ڪہ بادشاھ رَي ٽولَي رَي ݾجَي فوجيون ھانَ باقي ݾجَي مِنکون ۾ اَي مشھُور ھويو ڪہ ھُون مَسيح رَي پرچار رَي ڪري قيد ۾ ھون۔ ‏14 مھارَي قيد ۾ ھوئڻ رَي ڪري تموم گھڻَي وِشواسيون رو پرڀُو تي وِشواس پڪو ھويو ھانَ اُوئون ۾ اَڃون ڀِي وڌيڪ ھِمت آئِي اِيئي رَي ڪري او دليرِي ݾون ايشوَر رو پرچار ڪرَي ھَي۔

‏15 بيشڪ اُوئون ۾ ڪئين ݾاݪ ھانَ مُخالفت رَي ڪري مَسيح رو پرچار ڪرَي ھَي، پڻ ٻيجا نيڪ نيت ݾون پرچار ڪرَي ھَي۔ ‏16 نيڪ نيت ݾون پرچار ڪرڻ آݪا مھَي ݾون پريم ڪرَي ھَي۔ او جوڻَي ھَي ڪہ ھُون ايشوَر رِي خُوشِي رِي خبر نَي ثابت ڪرڻ رَي ݾارُو راکيوڙو ھون۔ ‏17 پڻ ٻيجا مِنک نيڪ نيت ݾون نا، پڻ آپرو مطلب راکي اَي ݾمجھي مَسيح رو پرچار ڪرَي ھَي ڪہ مھَي تي قيد ۾ وڌيڪ ڏُک آوَي۔

‏18 مھارَي ݾارُو اَي ڪو موٽِي بات ڪونھي پڻ موٽِي بات اَي ھَي ڪہ مَسيح رِي خُوشِي رِي خبر رو پرچار ھر نمُونَي ھووَي پڙيو، بيشڪ او خراب نيت ݾون جون ݾاچِي نيت ݾون۔ اِيئي رَي ڪري ھُون تموم گھڻو خُوش ھون ھانَ خُوش رئين ‏19 ڪيونڪہ مھنَي خبر ھَي ڪہ ٿونرَي پراٿنائون ھانَ يسُوع مَسيح رَي طرفون ڏينوڙَي پويتر آتما رِي مدد ݾون آزاد ھوئي جائين۔ ‏20 مھنَي پُورَي دِل ݾون پڪِي اُميد ھَي ڪہ ھُون ڪَي ڀِي بات ۾ شرميدو ڪونھي ھوئون پڻ موٽِي دليرِي ݾون ھميشا آݪِي ڪار ھڻون ڀِي ھُون آپرَي ݾَرير رَي وسيلَي مَسيح رِي مھما ظاھر ڪرتو رئين، بيشڪ ھُون مرون جون جيئون۔ ‏21 ڪيونڪہ مھارَي جيتَي ريوَڻ رو مقصد مَسيح رو پرچار ڪرڻ ھَي پڻ جي ھُون مري ڀِي جائُون، تو اِيئي ۾ فائدو ھَي۔ ‏22 جي ھُون جيتو رھيو، تو شيوا رَي ڪوم رَي ݾارُو فائدو ھَي۔ اِيئي رَي ڪري مھنَي خبر ڪونھي ڪہ ڪِي صحيح ھَي۔ ‏23 ھُون ٻيئي باتون ۾ ڦاٿوڙو ھون۔ مھارِي خواھش تو اَي ھَي ڪہ اَي دُنيا ڇوڙي مَسيح ڪڍي جائي رون ڪيونڪہ اَي ݾجون ݾون وڌيڪ ڀلو ھَي۔ ‏24 پڻ ٿونرَي ݾارُو مھارو جيئڻ وڌيڪ ضرُوري ھَي۔ ‏25 مھنَي اِيئي بات رو ڀروسو ھَي ھانَ مھنَي خبر ھَي ڪہ ھُون جيتو رئين پڻ ٿون ݾجون ڀيڙو رئين ڪہ ٿي وِشواس ۾ بڌتا جائو ھانَ اُوئي ۾ خُوش رو۔ ‏26 ٿونَي جڪو بڏائو مَسيح يسُوع ۾ مھَي تي ھَي، جڏي ھُون ڀڙي ٿون ڪڍي آئين، تو او بڏائو اَڃون ڀِي وڌيڪ ھوئي جاشَي۔

‏27 اِيئي بات رو خيال راکو ڪہ ٿونرو اُٺڻ ٻيݾڻ مَسيح رِي خُوشِي رِي خبر ݾُڻاوڻ رَي لائق ھووَي ڪہ ڀلي ھُون ٿونَي آئي جوئُون جون نِي جوئُون، تو ڀِي ٿونرَي بارَي ۾ اَي ݾُڻون ڪہ ٿي ھيڪِي آتما ۾ مضبُوط ھانَ پڪا ھو ھانَ ٿي ھيڪ من ھوئي سخت محنت ڪرو پڙيا ڪہ مِنکون ۾ خُوشِي رِي خبر رو وِشواس بڌتو جاوَي۔ ‏28 ھُون اَي ڀِي ݾُڻون ڪہ ٿي آپرَي دُشمنون ݾون ڪَي ڀِي بات ۾ ڪونھي ٻيئاجتا۔ اُوئون رَي ݾارُو اَي بربادي رو صاف نِشون ھَي پڻ ٿونرَي ݾارُو مُگتي رو، اَي ݾجو ڪئين ايشوَر رَي طرفون ھَي۔ ‏29 ڪيونڪہ مَسيح رَي ڪري ٿون تي اَي ڪِرپا ھوئِي ھَي ڪہ ٿي نِي رُگو اُوئي تي وِشواس راکو پڻ اُوئي رَي ڪري ڏُک ڀِي برداش ڪرو۔ ‏30 ٿي ڀِي خُوشِي رِي خبر رَي ڪري اوج سخت ڪوشش ڪرڻ ۾ شامل ھو جھڙَي نمُونَي مھنَي ڪرتَي ڏيٺو ھتو ھانَ ھڻون ڀِي ݾُڻو ھو ڪہ ھُون اِيئوج ڪرون ھون۔