فِلپيون رَي نون خط
تعارف
اَي خط سنت پولُوس فِلپي شھر رِي وِشواسي مَنڊلِي نَي اندازن سن 60 ݾون 62 عيسوِي رَي بِچ ۾ لِکيو ھتو۔ سنت پولُوس پرچار رَي ٻيجَي سفر ۾ مَڪدُونيا صُوبَي رَي فِلپي شھر ۾ اَي پيلڪِي وِشواسي مَنڊلِي ٺائِي ھتِي۔ سنت پولُوس اَي خط اُوئي ٽيم لِکيو جڏي او قيد ۾ ھتو۔ اَي اھڙو ٽيم ھتو جڏي ٻيجا پرچار ڪرڻ آݪا سنت پولُوس رَي خلاف ھتا۔ او اِيئي بات ۾ پريشون ھتو، ڪيونڪہ وِشواسي مَنڊلِي ۾ ڪُوڙا پرچار ڪرڻ آݪا ڀِي پرچار رو ڪوم ڪرتا پڙيا۔
سنت پولُوس اِيئي خط ۾ فِلپي شھر رِي وِشواسي مَنڊلِي رو شُڪريو ادا ڪرَي ھَي ڪہ اُوئون ضرُورت رَي ٽيم اُوئي رِي مدد ڪِي۔ او اُوئون نَي مشورو ڏَي ھَي ڪہ ڏُکون ھانَ تڪليفون ۾ ھِمت راکَي ھانَ اَي ڀِي مِنٿ ڪرَي ھَي ڪہ مَسيح جھڙو نمُونو راکو، مطلبي نِي ھوئو ھانَ بڏائو نِي ڪرو۔ سنت پولُوس اُوئون نَي خُوشِي ھانَ تسلِي رَي بارَي ۾ ڀِي لِکَي ھَي جڪو ايشوَر رَي طرفون ملَي ھَي۔
اِيئي خط رَي خاص باتون اَي ھَي يعني خُوشِي، ڀروسو، ٻڌِي، وِشواس ھانَ نيڪِي ݾون بيوَڻ۔ اِيئي ݾون فِلپي شھر رِي وِشواسي مَنڊلِي رَي ݾارُو سنت پولُوس رَي ݾاچَي ھانَ موٽَي پريم رِي خبر پڙَي ھَي۔
خاص مضمُون
جَئي پرڀُو رِي ھانَ پراٿنا 1:1-11
پولُوس رو آپرَي بارَي ۾ ݾُڻاوڻ 1:12-26
پرڀُو يسُوع لاري بيوَڻ 1:27-2:18
تيمٿيس ھانَ اِپفروديتُس 2:19-30
دُشمنون ھانَ خطرون رَي بارَي ۾ ݾُڻاوڻ 3:1-4:9
پولُوس ھانَ اُوئي را دوست 4:10-20
آخري باتون 4:21-23