اُجاݪَي ۾ بيوَڻ
5
ڪيونڪہ ٿي ايشوَر را پيارا ٻاݪ ھو، اِيئي رَي ڪري ٿي اُوئي رَي نمُونَي تي بو۔ 2 ٿي پريم ݾون زندگِي گُذارو، جھڙَي نمُونَي مَسيح آپون ݾون پريم ڪري آپڻَي ݾارُو آپرو آپنَي خُوشبودار ڀيٽ آݪِي ڪار ايشوَر آگھي ٻَليدون ھوئڻ رَي ݾارُو ڏي ڇوڙيو۔3 ڪيونڪہ ٿي ايشوَر را نيڪ مِنک ھو، اِيئي رَي ڪري ٿون ۾ زنا، ھر نمُونَي رو بُڇڙو ڪوم ھانَ لالچ نِي ھوئڻ کپَي۔ 4 ٿون ۾ بي شرمِي آݪَي باتون، بيڪار باتون ھانَ ڪِنَي باتون نِي ھوئڻ کپَي، ڪيونڪہ اَي صحيح ڪونھي، پڻ ايشوَر رو شُڪر ڪرڻ کپَي۔ 5 ٿونَي ݾُٺَي نمُونَي خبر ھَي ڪہ زناڪار، جون حرومڪار جون لالچي جڪو مُورتيون رَي پُوجاري رَي برابر ھَي، اھڙا مِنک مَسيح ھانَ ايشوَر رِي بادشاھي را بارݾ ڪڏي ڀِي ڪونھي ھووَي۔
6 خبردار، ڪو ڀِي ٺَگِي ڪري ٿونَي دوکو نِي ڏَي، ڪيونڪہ اھڙَي باتون رَي ڪري نافرمونون تي ايشوَر رو ڪھر ھووَي ھَي۔ 7 اِيئي رَي ڪري اُوئون رَي ڪومون ۾ شامل نِي ھوئو۔ 8 ڪيونڪہ پيل ٿي اھڙَي مِنکون جھڙا ھتا، جڪو پاپ رَي انڌارَي ۾ ريتا، پڻ ھمَي ٿي پرڀُو رَي اُجاݪَي ۾ ھو، اِيئي رَي ڪري ٿي اُجاݪَي ۾ بيوَڻ آݪون جھڙا ھوئي آپرَي زندگَي گُذارو۔ 9 [ڪيونڪہ اُجاݪَي رو ڦل ھر نمُونَي رِي ڀلائي، نيڪِي ھانَ ݾاچ ھَي۔] 10 اَي اوݪکڻ رِي ڪوشش ڪرتا رو ڪہ پرميشوَر نَي ڪِي پسند ھَي 11 ھانَ انڌارَي آݪَي اجائَي ڪومون ݾون ڪو ڀِي واسطو نِي راکو، پڻ اُوئون نَي ظاھر ڪرو۔ 12 ڪيونڪہ جڪو ڪوم او لِڪ ڇُپ ۾ ڪرَي ھَي، اُوئون رَي بارَي ۾ بات ڪرڻ ڀِي شرم رِي بات ھَي۔ 13 ݾجَي شيون جڪو اُجاݪَي ۾ آوَي ھَي، او ظاھر ھوئي جاوَي ھَي، 14 ڪيونڪہ اُجاݪو ھر ھيڪ شئي نَي ظاھر ڪرَي ھَي۔ اِيئي رَي ڪري ڪھيو جاوَي ھَي ڪہ،
”اي ݾُوتوڙا جاگ
ھانَ مُوئوڙون ݾون جيتو ھو،
تو مَسيح رو اُجاݪو ٿَي تي چمڪشَي۔“
15 اِيئي رَي ڪري ڌھيون ڏي جوئو ڪہ ڪيڪر بو ھو۔ نادونَ آݪِي ڪار نا، پڻ ڏاھون آݪِي ڪار بو۔ 16 نيڪِي ڪرڻ ۾ دير نِي ڪرو، ڪيونڪہ زمونو خراب ھَي۔ 17 اِيئي رَي ڪري نادونَ نِي ھوئو، پڻ پرميشوَر رِي مرضِي ݾمجھو۔
18 شراب پيئي مَست نِي ھوئو، ڪيونڪہ اِيئي ݾون اِنسون عياشِي ۾ پڙَي ھَي، پڻ پويتر آتما ݾون ڀرپُور ھوتا جائو 19 ھانَ آپت ۾ زبُور، ڀجن ھانَ آتمڪ گيت گائي من ݾون پرڀُو رِي بکوڻ ڪرتا رو۔ 20 ھميشا ھر ھيڪ بات ۾ آپڻَي پرڀُو يسُوع مَسيح رَي نون ݾون ايشوَر پِتا رو شُڪر ڪرتا رو۔
ڌڻِي ھانَ لُگائِي
21 مَسيح رو ٻِي راکي ڌڻِي ھانَ لُگائِي ھيڪَي ٻيجَي رِي مرضِي تي بَي۔ 22 اي لُگايون، جھڙَي نمُونَي ٿي پرميشوَر رو ڪھيو منو ھو، اُوئيج نمُونَي آپرَي ڌڻِي رَي ڪيوَڻ ۾ رو۔ 23 ڪيونڪہ ڌڻِي آپرِي لُگائِي رو اِيئون مالڪ ھَي، جون مَسيح وِشواسي مَنڊلِي رو مالڪ ھَي ھانَ اُوئي رو بچاوڻ آݪو ھَي۔ 24 اِيئي رَي ڪري جھڙَي نمُونَي وِشواسي مَنڊلِي مَسيح رو ڪيوَڻ منَي ھَي، اِيئوج ٿي ڀِي آپرَي ڌڻِي رو ڪيوَڻ منو۔
25 اي ڌڻيون، ٿي ڀِي آپرِي لُگائِي ݾون اھڙو پريم راکو، جھڙو مَسيح وِشواسي مَنڊلِي ݾون پريم ڪيئو ھانَ اُوئي رَي ݾارُو آپ ٻَليدون ھويو۔ 26 اُوئي اَي اِيئي رَي ڪري ڪيئو ڪہ او اُوئي نَي خُوشِي رِي خبر رَي وسيلَي پوڻي ݾون سِنون ڏي ھانَ صاف ڪري پويتر ڪرَي 27 ھانَ ھيڪ مھما آݪِي مَنڊلِي ٺائي آپ آگھي حاضر ڪرَي، جڪَي تي ڪو ڀِي داگ، گُھنج جون ڪو ڀِي ٻيجِي اھڙِي شئي نِي ھووَي، پڻ او پويتر ھانَ بي عيب ھووَي۔ 28 اِيئي نمُونَي ڌڻيون نَي ڀِي آپرَي لُگايون ݾون آپرَي ݾَرير جِترو پريم ڪرڻ کپَي۔ جڪو آپرِي لُگائِي ݾون پريم راکَي ھَي، تو او آپرو آپ ݾون پريم راکَي ھَي۔ 29 ڪو ڀِي مِنک آپرَي ݾَرير ݾون نفرت ڪونھي ڪرتو، پڻ اُوئي نَي اِيئون کݪاوَي پياڙَي ھانَ پاڙَي ھَي، جھڙَي نمُونَي مَسيح مَنڊلِي نَي۔ 30 ڪيونڪہ وِشواسي مَنڊلِي اُوئي رو ݾَرير ھَي ھانَ آپي اُوئي را عُضوا ھون۔ 31 پويتر شاستر ۾ لِکيوڙو ھَي ڪہ،
”اِيئي رَي ڪري آڏمي آپرَي ما ٻاپ نَي ڇوڙي،
آپرِي لُگائِي ڀيڙو ريشَي
ھانَ او ٻيئي ھيڪ تن ھوشَي۔“