ٻيجَي قومون ۾ سنت پولُوس رو پرچار
3
اِيئي رَي ڪري ھُون پولُوس ٿون ٻيجَي قومون ۾ مَسيح يسُوع رو پرچار ڪرڻ رَي ڪري قيد ھون۔ 2 ٿون ݾُڻيو ھوشَي ڪہ ايشوَر ٿون ٻيجِي قوم رَي ݾارُو آپرِي ڪِرپا رو خاص ڪوم مھارَي حوالي ڪيئو ھَي۔ 3 ايشوَر آپرو اَي ڀيد مھَي تي ظاھر ڪيئو ھتو، جڪَي رَي بارَي ۾ مھَي پيل ٿوڙو ڪئين ٿونَي لِکيو ھَي۔ 4 او پڙھي ٿونَي خبر پڙشَي ڪہ ھُون مَسيح رو اَي ڀيد ڪترِي حد توڻي ݾمجھون ھون۔ 5 اگلَي زمونَي ۾ مِنکون نَي اَي ڀيد اِيئي نمُونَي ڪونھي ݾُڻايوڙو ھتو، پڻ ھمَي ايشوَر پويتر آتما رَي وسيلَي آپرَي سنتون ھانَ نياپو ݾُڻاوڻ آݪون تي ظاھر ڪيئو ھَي۔ 6 او ڀيد اَي ھَي ڪہ مَسيح يسُوع ۾ ٻيجَي قومون ڀِي اِسرائيليون ڀيڙَي خُوشِي رِي خبر رَي وسيلَي ايشوَر رِي ملڪيت را بارݾ ھويا ھَي ھانَ ھيڪَي ݾَرير را عُضوا ھَي ھانَ ايشوَر رَي واعدَي ۾ شامل ھَي۔7 ايشوَر رِي ڪِرپا رِي برڪت جڪو مھنَي اُوئي رِي قُدرت ݾون ملِي، جڪَي رَي ڪري ھُون خُوشِي رِي خبر ݾُڻاوڻ آݪو شيواداري ھويو۔ 8 ھُون ايشوَر رَي مِنکون ۾ ݾجون ݾون نِنيو ھون، تو ڀِي اُوئي مھَي تي ڪِرپا ڪِي ڪہ ھُون ٻيجَي قومون ۾ مَسيح رِي حد ݾون وڌيڪ آتمڪ برڪت رو پرچار ڪرون 9 ھانَ ݾجَي مِنکون تي اُوئي ڀيد رو مقصد ظاھر ڪرون، جڪو شرُوع ݾون ݾجَي شيون ٺاوڻ آݪَي ايشوَر ڪڍي لِڪيوڙو ھتو۔ 10 ايشوَر رِي مرضِي ھتِي ڪہ ھمَي وِشواسي مَنڊلِي رَي وسيلَي اُوئي رِي ھر نمُونَي رِي ݾمجھ رَي بارَي ۾ آڪاشِي اَگووڻون ھانَ اِختيار آݪون نَي خبر پڙَي۔ 11 اَي ھميشا اُوئي رِي مرضِي ھتِي جڪو اُوئي آپڻَي پرڀُو مَسيح يسُوع رَي وسيلَي پُورِي ڪِي۔ 12 ھمَي آپي اُوئي ۾ ھيڪ ھوئي ھانَ اُوئي تي وِشواس راکي پُورِي دليرِي ھانَ ڀروسَي ݾون ايشوَر ڪڍي آئي ݾگھون ھون۔ 13 اِيئي رَي ڪري ٿونَي مِنٿ ڪرون ھون ڪہ ھُون جڪو ڏُک ٿونرَي ڪري سھون پڙيو، اُوئون رَي ڪري ٿي ھِمت نِي ھارو، ڪيونڪہ اَي ٿونرَي فائدَي رَي ݾارُو ھَي۔
مَسيح رو پريم
14 اِيئي رَي ڪري ھُون آڪاشِي پِتا آگھي آپرا گوڏا کوڙون ھون، 15 ڪيونڪہ آڪاش ھانَ ڌرتي رو ھر ھيڪ خاندان اُوئي رَي نون ݾون ڪھيجشَي۔ 16 ھُون اُوئي ݾون پراٿنا ڪرون ھون ڪہ او آپرِي حد ݾون وڌيڪ مھما ݾون ٿونَي آپرَي پويتر آتما رَي وسيلَي ھِمت ڏَي ڪہ ٿي اَندر ݾون طاقت آݪا ھوئو 17 ھانَ وِشواس راکڻ رَي ڪري مَسيح ٿونرَي من ۾ رَي ڪہ ٿونرو پريم بَڻ رَي پاݪ ھانَ گھر رَي بُنياد آݪِي ڪار مضبُوط ھووَي۔ 18 ٿي ايشوَر رَي مِنکون آݪِي ڪار اَي جوڻي ݾگھو ڪہ مَسيح رو پريم ڪِترو ويڪرو، لونٻو، اُونچو ھانَ اُونڏو ھَي 19 ھانَ مَسيح رَي اُوئي پريم نَي جوڻي ݾگھو، جڪو ݾمجھ ݾون ٻاھر ھَي ڪہ ٿي ايشوَر رِي ھر ھيڪ خُوبِي ݾون ڀريجي جائو۔