مَسيح ۾ آزادي
5
مَسيح آپون نَي آزاد ريوَڻ رَي ݾارُو آزاد ڪرايا ھَي۔ اِيئي رَي ڪري اُوئي ۾ پڪا رو ھانَ ڀڙي غُلومي رِي پنجاݪِي ۾ نِي جوتروجو۔ 2 مھارِي بات ڌھيون ڏي ݾُڻو، ھُون پولُوس ٿونَي ڪونھ ھون ڪہ جي ٿي کَتنو ڪراشو، تو اُوئي رو ڪو ڀِي فائدو ڪونھي۔ 3 ھُون ٿونَي ݾاچِي ڪونھ ھون ڪہ جڪو ڀِي کَتنو ڪراوَي، تو اُوئي نَي پُورَي نمُونَي شريعت تي بيوَڻ کپَي۔ 4 ٿي جڪو شريعت تي نيڪ ھوئڻ رو ݾوچو ھو، مَسيح ݾون ڌار ھانَ ايشوَر رِي ڪِرپا ݾون اݪگا ھويا ھو۔ 5 مھي اِيئي اُميد رو پُورو ھوئڻ رو اِنتظار تموم گھڻَي شوق ݾون ڪرون ھون ڪہ پويتر آتما رَي وسيلَي وِشواس راکڻ ݾون نيڪ ھوشون۔ 6 ڪيونڪہ جڏي آپڻو وِشواس مَسيح يسُوع تي ھَي، تو پَڇي کَتنَي رو ڪو ڀِي فائدو ڪونھي ڪہ ڪرائُون جون نِي ڪرائُون، پڻ فائدو رُگو اُوئي وِشواس ݾون ھوشَي جڪو پريم راکڻ ݾون ھَي۔7 ٿي تو ݾُٺَي نمُونَي وِشواس تي بيتا پڙيا، تو پَڇي ڪَي ٿونَي ݾاچ تي بيوَڻ ݾون پاليا؟ 8 اَي ڪوم ايشوَر رَي طرفون ڪونھي، جڪَي ٿونَي ھيلو ڪيئو ھَي۔ 9 ٿوڙو کَمير، گويوڙو آٽو کَمير ڪري ڇوڙَي ھَي۔ 10 مھنَي پرڀُو ۾ ٿون تي ڀروسو ھَي ڪہ ٿي ٻيجَي نمُونَي رو ڪو ڀِي خيال ڪونھي ڪرتا، پڻ جڪو مِنک ٿونَي پريشون ڪرَي ھَي، ڀلي او ڪُڻ ڀِي ھووَي، اُوئي نَي سزا ملشَي۔ 11 اي وِشواسيون، جي ھُون اَڃون توڻي پرچار ڪرون ھون ڪہ کَتنو ضرُوري ھَي، تو پَڇي مھنَي اَڃون توڻي ڪيئون ڏُک ملَي ھَي؟ جي اِيئون ھويو ھووَنت، تو مِنک مَسيح رو ݾُولِي تي مرڻ رَي بارَي ۾ ݾُڻي ريݾ ڪونھي ڪرون تو۔ 12 جڪو ٿونَي کَتنَي رَي بارَي ۾ پريشون ڪرَي ھَي، اُوئون رَي ݾارُو ڀلو اَي ھَي ڪہ او آپ کدڙا ھوئي جاوَي۔
13 اي وِشواسيون، ٿي آزاد ريوَڻ رَي ݾارُو اَڻايوڙا ھو، پڻ آپرِي آزادي جِسموني خواھشون پُورَي ڪرڻ رَي ݾارُو اِستعمال نِي ڪرو، پڻ پريم ݾون ھيڪَي ٻيجَي رِي شيوا ڪرو۔ 14 ڪيونڪہ ݾجِي شريعت اِيئي ھيڪِي بات ۾ پُورِي ھووَي ھَي ڪہ،
”تُو آپرَي پاڙَي آݪَي ݾون آپ جِترو پريم ڪر۔“
15 جي ٿي ھيڪَي ٻيجَي نَي باڍو ھانَ کائو ھو، تو خبردار رھيا، ڪيٿ ھيڪَي ٻيجَي نَي نوکي برباد نِي ھوئي جائو۔
پويتر آتما ھانَ جِسموني خواھش
16 ھُون ٿونَي ڪونھ ھون ڪہ پويتر آتما رِي مرضِي تي بيتا رو، تو پَڇي ڪڏي ڀِي جِسموني خواھش پُورِي ڪونھي ھووَي۔ 17 ڪيونڪہ جِسموني خواھش پويتر آتما رَي خلاف ھَي ھانَ پويتر آتما جِسموني خواھشون رَي خلاف ھَي۔ ھمَي اَي ٻيئي ھيڪَي ٻيجَي را دُشمن ھَي، اِيئي رَي ڪري جڪو ڪئين ٿي آپرِي مرضِي ݾون ڪرڻ رو ݾوچو ھو، او ڪري ڪونھي ݾگھتا۔ 18 پڻ جي ٿي پويتر آتما رِي ھدايت تي بو ھو، تو شريعت ݾون آزاد ھو۔
19 ھمَي جِسموني خواھشون ظاھر ھَي، يعني زنا، پليتائِي، عياشِي، 20 مُورتِي پُوجا، جادُوگرِي، دُشمنِي، جھيڙا، مطلبي، ريݾ، لالچ، جُدائِي، پارٽِي بازِي، 21 بُگز، نشو، ناچ رنگ ھانَ اِيئون جھڙا ٻيجا ڪوم۔ مھَي اِيئون رَي بارَي ۾ پيل ڀِي ٿونَي ھوشيار ڪيئا ھتا ھانَ ھمَي ڀڙي خبردار ڪرون ھون ڪہ جڪو ڀِي اھڙا ڪوم ڪرشَي، تو او ايشوَر رِي بادشاھي ۾ ڪڏي ڀِي ڪونھي جاوَي۔
22 پڻ پويتر آتما رو ڦل پريم، خُوشِي، صُلح، صبر، مھربونِي، نيڪِي، وفادارِي، 23 نرم دِل ھانَ پرھيزگارِي ھَي۔ شريعت ڪڏي ڀِي اھڙَي ڪومون رَي خلاف ڪونھي۔ 24 ھمَي جڪو مَسيح يسُوع را ھَي، اُوئون آپرَي اِنسونِي خواھشون، اُوئي رِي مرضِي ھانَ خراب عادتون ݾُوڌو ݾُولِي ماٿَي چاڙھيو ھَي۔ 25 جي آپي پويتر آتما رَي ڪري جيتا ھون، تو اُوئي رِي مرضِي تي بيوَڻ کپَي۔ 26 آپي بڏائو ڪرڻ، ھيڪَي ٻيجَي نَي چِڙاوڻ ھانَ ھيڪَي ٻيجَي تي ݾاݪ راکڻ ڇوڙون۔