شريعت ھانَ وِشواس
3
اي گِلتيون رَي بي عقل وِشواسيون، ڪَي ٿون تي جادُو ڪيئو ھَي؟ مھَي ٿونَي چِٽو ݾُڻايو ڪہ يسُوع مَسيح ٿونرَي پاپون رِي معافي رَي ݾارُو ݾُولِي تي مُوئو۔ 2 ھُون ٿون ݾون رُگو اَي پُوڇون ھون ڪہ ڪِي ٿونَي شريعت تي بيوَڻ ݾون پويتر آتما مِليو، جون وِشواس راکڻ ݾون؟ 3 ڪِي ٿي اِترا بي عقل ھو ڪہ پويتر آتما ݾون نُوئِي زندگِي شرُوع ڪري ھمَي اُوئي نَي اِنسونِي ڪوشش ݾون پُورِي ڪرڻ رو ݾوچو ھو؟ 4 ڪِي ٿون اِترا ڏُک ھرُوڀرُو برداش ڪيئا؟ پڻ ھوئي ݾگھَي اِيئي رو فائدو ھَي۔ 5 ايشوَر، جڪو ٿونَي پويتر آتما ڏَي ھَي ھانَ ٿون ݾون پرچا ڪراوَي ھَي، ڪِي او شريعت رَي ڪري جون خُوشِي رِي خبر ݾُڻڻ ھانَ وِشواس راکڻ رَي ڪري اِيئون ڪرَي ھَي؟6 اڀراھيم، ايشوَر تي ڀروسو راکيو، اِيئي رَي ڪري ايشوَر اُوئي نَي نيڪ مِنکون ۾ گِڻيو۔ 7 ھمَي ݾمجھو ڪہ جڪو وِشواس راکَي ھَي، حقيقت ۾ اوج اڀراھيم را اولاد ھَي۔ 8 جھڙَي نمُونَي پويتر شاستر ۾ اِيئي بات رِي اگڪٿِي ھَي ڪہ،
”ايشوَر ٻيجَي قومون نَي وِشواس راکڻ رَي ڪري نيڪ ڪرشَي۔“
او خُوشِي رِي خبر پيل اڀراھيم نَي ݾُڻائِي ڪہ،
”ٿارَي ڪري ٻيجَي ݾجَي قومون نَي برڪت ملشَي۔“
9 اڀراھيم وِشواس راکيو، اِيئي رَي ڪري اُوئي نَي برڪت ملِي۔ اِيئي نمُونَي جڪو مَسيح تي وِشواس راکَي ھَي، اُوئون نَي اڀراھيم ڀيڙِي برڪت ملَي ھَي۔
10 پڻ جڪو ڀِي شريعت تي بَئي نيڪ ھوئڻ رِي ڪوشش ڪرَي ھَي، اُوئون ݾجون تي لعنت ھووَي ھَي۔ ڪيونڪہ شاستر ۾ لِکيوڙو ھَي ڪہ،
”جي ڪُڻ اُوئي ݾجَي باتون تي ڪونھي بيتو،
جڪو مُوسيٰ رَي شاستر ۾ لِکيوڙَي ھَي،
او لعنتِي ھَي۔“
11 اَي بات چِٽِي ھَي ڪہ ڪو ڀِي شريعت تي ايشوَر رِي نظر ۾ نيڪ ڪونھي ھوتو، ڪيونڪہ لِکيوڙو ھَي ڪہ،
”نيڪ مِنک ايشوَر ݾون وفادار ريوَڻ ݾون جيتو ريشَي۔“
12 شريعت رو وِشواس ݾون ڪو ڀِي واسطو ڪونھي، پڻ لِکيوڙو ھَي ڪہ،
”جڪو شريعت تي بَي ھَي،
او اُوئي رَي ڪري جيتو ريشَي۔“
13 ھمَي مَسيح آپون نَي مول ليئا ھَي ھانَ شريعت رِي لعنت ݾون آزاد ڪرايا ھَي۔ مَسيح آپڻَي ݾارُو لعنتِي ھويو، ڪيونڪہ لِکيوڙو ھَي ڪہ،
”جڪو ڀِي لڪڙِي تي لٽاڪيو گيو، او لعنتِي ھَي۔“
14 اِيئي رَي ڪري ڪہ اڀراھيم نَي مِليوڙِي برڪت مَسيح يسُوع رَي وسيلَي ٻيجَي قومون توڻي پُگَي ھانَ آپون نَي وِشواس ݾون او پويتر آتما ملَي، جڪَي رو واعدو ڪيئوڙو ھَي۔
شريعت ھانَ ايشوَر را واعدا
15 اي وِشواسيون، ھُون ٿونَي دُنياوِي مِثال ڏيئون ھون ڪہ جڏي ٻي مِنک ڪَي بات رَي بارَي ۾ ھيڪ ھوئي وچن ڪرَي ھَي، تو ڪو ھيڪ اُوئي نَي ختم ڪري ڪونھي ݾگھتو ھانَ نَڪو ڪُڻ اُوئي نَي گھٽ جون وڌ ڪري ݾگھتو۔ 16 ايشوَر را واعدا ڀِي اھڙا ھَي، جڪو اُوئي اڀراھيم ھانَ اُوئي رِي پيڙھِي ݾون ڪيئا ھَي۔ شاستر اَي ڪونھي ڪيتو ڪہ ݾجِي پيڙھِي ݾون، جڪَي رو مطلب ھَي تموم گھڻا مِنک، پڻ او ڪَي ھَي ڪہ ٿارِي پيڙھِي ݾون، جڪَي رو مطلب ھيڪ مِنک ھانَ او مَسيح ھَي۔ 17 مھارو مطلب اَي ھَي ڪہ جڪو وچن ايشوَر اڀراھيم ݾون ڪيئو ھتو، شريعت جڪو چار ݾئو ٽيھ ݾالون ݾون پَڇي آئِي، او اُوئي وچن نَي مِٽائي ڪونھي ݾگھِي، نيتوڻي ايشوَر رَي واعدَي رو ڪو ڀِي فائدو ڪونھي ھوئون تو۔ 18 اِيئي رَي ڪري ايشوَر رِي اِيئي وِراثت رو بُنياد شريعت تي نا، پڻ واعدَي تي راکيوڙو ھَي، ڪيونڪہ ايشوَر اَي وِراثت آپرَي واعدَي رَي ڪري اڀراھيم نَي ڏينِي۔ 19 تو پَڇي شريعت رو مقصد ڪِي ھتو؟ شريعت ڏيوَڻ رو مقصد رُگو اَي ھتو ڪہ مِنکون نَي پاپون رِي خبر پڙَي، پڻ او شريعت رُگو اڀراھيم رِي پيڙھِي يعني يسُوع رَي آوڻ توڻي ھتِي، جڪَي رو واعدو ايشوَر ڪيئو ھتو۔ اَي شريعت، فريشتون رَي وسيلَي مُوسيٰ نَي ڏينِي گئِي، جڪو اِنسون ھانَ ايشوَر رو بِچاݪُو ھتو۔ 20 شريعت ڏيتي بِݪا ڪو نِي ڪو بِچاݪُو ھتو، پڻ جڏي ايشوَر اڀراھيم ݾون واعدو ڪيئو، تو بِچاݪُو ڪو ڀِي ڪونھي ھتو۔ 21 تو پَڇي ڪِي اِيئي رو مطلب اَي ھَي ڪہ شريعت، ايشوَر رَي واعدون رَي خلاف ھَي؟ ڪڏي ڀِي نا۔ جي شريعت زندگِي ڏيئون تو، تو پَڇي ݾجائِي شريعت تي بَئي نيڪ ھوئي جائُون تو۔ 22 شاستر ڪَي ھَي ڪہ،
”ݾجائِي پاپ رَي قيد ۾ ھَي، پڻ آزادي رو واعدو
رُگو يسُوع مَسيح تي وِشواس راکڻ ݾون ملَي ھَي۔“
وِشواس ݾون ايشوَر را ڏيڪرا ھوئڻ
23 وِشواس راکڻ ݾون پيل آپي شريعت را غُلوم ھتا۔ آپي اُوئي رَي قيد ۾ اُتري توڻي ھتا، جترِي توڻي وِشواس رو او مارگ ڏيکيجو ڪونھي، جڪو آوڻ آݪو ھتو۔ 24 اِيئي نمُونَي شريعت، مَسيح رَي آوڻ توڻي آپڻِي اَگووڻِي ڪِي ڪہ آپي مَسيح تي وِشواس راکڻ ݾون نيڪ ھوئون۔ 25 ھمَي جڏي وِشواس رو مارگ آيو رو، تو آپون نَي شريعت ھيٺا ريوَڻ رِي ضرُورت ڪونھي۔ 26 ڪيونڪہ ٿي ݾجائِي مَسيح يسُوع تي وِشواس راکڻ رَي ڪري ايشوَر را ٻاݪ ھو۔ 27 ٿون ݾجون مَسيح ۾ ھوئڻ رو پويتر سِنون لي مَسيح نَي نُوئَي گاڀون آݪِي ڪار پيريو ھَي۔ 28 ھمَي نَڪو ڪُڻ يھُودي رھيو، نَڪو يُوناني، نَڪو غُلوم، نَڪو آزاد، نَڪو آڏمي، نَڪو لُگائِي، ڪيونڪہ ٿي ݾجائِي مَسيح يسُوع ۾ ھيڪ ھو۔ 29 جي ٿي مَسيح را ھو، تو پَڇي اڀراھيم را اولاد ھو ھانَ ايشوَر رَي واعدَي تي بارݾ ڀِي ھو۔