وِشواسيون را فيصلا
6
جي ٿون ۾ ڪَي ھيڪَي وِشواسي رو ٻيجَي وِشواسي ݾون جھيڙو ھووَي، تو ٿونرِي ڪھڙِي جُرت ڪہ ٿي آپرَي فيصلَي رَي ݾارُو وِشواسيون نَي ڇوڙي غير وِشواسيون ڪڍي جائو؟ 2 ڪِي ٿونَي خبر ڪونھي ڪہ ايشوَر را مِنک، دُنيا رو فيصلو ڪرشَي؟ جي ٿي دُنيا رو فيصلو ڪرشو، تو ڪِي ٿون ۾ اترِي عقل ڪونھي ڪہ ٿي نِنڪَي نِنڪَي باتون را فيصلا آپ ڪرو؟ 3 ڪِي ٿونَي خبر ڪونھي ڪہ آپي فريشتون را فيصلا ڪرشون؟ تو پَڇي ڪِي آپي دُنياوِي فيصلا ڪونھي ڪري ݾگھتا؟ 4 جي ٿون ۾ اھڙَي باتون ھَي، تو ٿي اُوئون مِنکون ڪڍي ڪيئون جائو ھو، جڪون رو وِشواسي مَنڊلِي ݾون ڪو ڀِي واسطو ڪونھي؟ 5 ھُون ٿونَي اَي بات شرميدا ڪرڻ رَي ݾارُو ڪونھ ھون۔ ڪِي واقعي ٿون ۾ ڪو ڀِي عقل آݪو ڪونھي جڪو آپرَي وِشواسي ڀايون رو فيصلو ڪرَي؟ 6 اَي ڪترَي ڏُک رِي بات ھَي ڪہ ھيڪ وِشواسي ڀائي، فيصلَي رَي ݾارُو ٻيجَي وِشواسي ڀائي نَي غير وِشواسيون ڪڍي لي جاوَي۔7 حقيقت ۾ ٿونرِي موٽَي ݾون موٽِي غلطِي اَي ھَي ڪہ ٿي ھيڪَي ٻيجَي تي ڪيس ڪرو ھو۔ جي ڪو ٿون ݾون بي اِنصافي ڪرَي پڙيو، تو اُوئي نَي اِيئوج ڪرڻ ڏيئو۔ جي ڪو ٿونَي دوکو ڏَي، تو اُوئي نَي ڀِي اِيئوج ڪرڻ ڏيئو۔ 8 اِيئي رَي بدلَي ٿي آپ آپرَي وِشواسي ڀايون ݾون بي اِنصافي ڪرو ھو ھانَ اُوئون ݾون دوکو ڪرو ھو۔ 9 ڪِي ٿونَي خبر ڪونھي ڪہ بُڇڙا مِنک ايشوَر رِي بادشاھي را بارݾ ڪونھي ھووَي؟ دوکو نِي کائو، ڪيونڪہ نَڪو زناڪار، نَڪو مُورتِي پُوجا آݪو، نَڪو بُڇڙو، نَڪو عياشِي، نَڪو لوڦر، 10 نَڪو چور، نَڪو لالچي، نَڪو شرابِي، نَڪو گاݪون ڏيوَڻ آݪو ھانَ نَڪو ٻيجون رو حق کاوڻ آݪو، ݾُرگ ۾ جائي ݾگھَي۔ 11 اَگي ٿون ۾ ڪئين اھڙاج ھتا، پڻ ھمَي ٿي پرڀُو يسُوع مَسيح رَي نون ھانَ آپڻَي ايشوَر رِي آتما ݾون ڌوئيجي پويتر ھويا ھو ھانَ نيڪ ڪيئوڙا ھو۔
آپرَي ݾَرير ݾون ايشوَر رِي مھما
12 مھارَي ݾارُو ھر ھيڪ شئي جائز تو ھَي، پڻ ݾجَي فائدَي آݪَي ڪونھي۔ مھارَي ݾارُو ھر ھيڪ شئي جائز تو ھَي، پڻ ھُون ڪيرو ڀِي غُلوم ڪونھي ھوئون۔ 13 ٿون ۾ ڪئينڪہ مِنک ڪَي ھَي ڪہ، ”کاڌو پيٽ رَي ݾارُو ھانَ پيٽ کاڌَي رَي ݾارُو ھَي۔“ پڻ ايشوَر اَي ٻيئي مِٽائي ڇوڙشَي، ݾَرير زنا رَي ݾارُو نا، پڻ پرميشوَر رِي شيوا رَي ݾارُو ھَي ھانَ اوج آپڻَي ݾَرير رو مالڪ ھَي۔ 14 ايشوَر، پرڀُو يسُوع نَي ڀڙي جيتو ڪيئو، اُوئيج نمُونَي او آپون نَي ڀِي آپرِي قُدرت ݾون ڀڙي جيتا ڪرشَي۔
15 ڪِي ٿونَي خبر ڪونھي ڪہ آپڻا ݾَرير مَسيح را عُضوا ھَي؟ تو ڪِي، ھُون مَسيح را عُضوا خراب لُگائِي جھڙا عُضوا ڪرون؟ ڪڏي ڀِي نا۔ 16 ڪِي ٿونَي خبر ڪونھي ڪہ جڪو خراب لُگائِي ڀيڙو ݾُوئَي ھَي، تو او اُوئي ݾون ھيڪ تن ھووَي ھَي؟ جون توريت شاستر ۾ لِکيوڙو ھَي ڪہ،
”او ٻيئي ھيڪ تن ھوشَي۔“
17 پڻ جڪو پرميشوَر ۾ پڪو رَي ھَي، تو او اُوئي ۾ ھيڪ آتما ھووَي ھَي۔
18 اِيئي رَي ڪري زنا ݾون اݪگا ناݾو، ڪيونڪہ مِنک جِترا ڀِي پاپ ڪرَي ھَي، تو او اُوئي رَي ݾَرير ݾون ٻاھر ھووَي ھَي، پڻ زناڪار آپرَي ݾَرير ݾون پاپ ڪرَي ھَي۔ 19 ڪِي ٿونَي خبر ڪونھي ڪہ ٿونرو ݾَرير پويتر آتما رو گھر ھَي، پويتر آتما ٿون ۾ رَي ھَي ھانَ اَي ايشوَر ٿونَي ڏينو ھَي؟ اِيئي رَي ڪري ٿي آپرا مالڪ نا، پڻ آپڻو مالڪ ايشوَر ھَي، 20 ڪيونڪہ ايشوَر ٿونرِي قيمت ڏي ٿونَي مول ليئا ھَي۔ ھمَي ٿي آپرَي ݾَرير ݾون ايشوَر رِي مھما ظاھر ڪرو۔