مَسيح رو پرچار
2
اي وِشواسيون، جڏي ھُون پيلڪو گُھمرو ٿون ڪڍي آيو، تو مھَي ٿون ۾ ايشوَر رَي ڀيد رو پرچار موٽَي موٽَي ٻول ھانَ ڏاھپ ݾون ڪونھي ڪيئو۔ 2 جڏي ھُون ٿون ڪڍي ھتو، تو مھَي اَي فيصلو ڪيئو ھتو ڪہ ھُون ٿونَي رُگو يسُوع مَسيح، پڻ اُوئي رو ݾُولِي تي ٻَليدون ھوئڻ رَي بارَي ۾ ݾُڻائين۔ 3 ھُون ڪمزور حالت ۾ ٻيئاجتو ھانَ ڏڪتو ٿون ڪڍي آيو۔ 4 مھارو پرچار ھانَ باتون تموم گھڻَي سادَي ھتَي، پڻ او پويتر آتما رِي قُدرت ݾون ثابت ھوئَي 5 ڪہ ٿونرَي وِشواس رو بُنياد اِنسونِي ڏاھپ تي نا، پڻ ايشوَر رِي قُدرت تي ھووَي۔ايشوَر رِي ڏاھپ
6 ڏاھپ آݪَي باتون آپي اُوئي ٽيم ڪرون ھون، جڏي آپي پڪو وِشواس راکڻ آݪون ڀيڙا ھوئون ھون ھانَ اَي ڏاھپ اِيئي جگت رِي ڪونھي ھانَ نَڪو اِيئي جگت رَي مِٽڻ آݪَي اَگووڻون رِي ھَي۔ 7 پڻ مھي تو ايشوَر رَي ڏاھپ آݪَي او باتون ڪرون ھون، جڪو ڀيد آݪِي ڪار لِڪيوڙَي ھَي۔ اَي ڏاھپ، ايشوَر جگت ٺاوڻ ݾون پيل، آپڻَي مونَ مرتبَي رَي ݾارُو راکِي ھَي۔ 8 اِيئي ڏاھپ نَي دُنيا رَي ڪَي ڀِي اَگووڻ ݾمجھو ڪونھي، ڪيونڪہ جي او ݾمجھي جائُون تو، تو مھما آݪَي پرڀُو يسُوع نَي ݾُولِي تي ٻَليدون ڪونھي ڪرون تو۔ 9 جون يسعياھ نبِي رَي شاستر ۾ لِکيوڙو ھَي ڪہ،
”نَڪو ڪَي اونک ڏيٺو،
نَڪو ڪَي ڪونَ ݾُڻيو
ھانَ نَڪو اِنسون رِي ݾوچ ۾ آيو،
اُوئي نَي ايشوَر اُوئون رَي ݾارُو تيار ڪيئو،
جڪو ايشوَر ݾون پريم ڪرَي ھَي۔“
10 پڻ اَي ايشوَر آپون تي آپرِي آتما ݾون ظاھر ڪيئو، ڪيونڪہ اُوئي رِي آتما نَي ھر ھيڪ بات رِي خبر ھَي اترِي توڻي ڪہ ايشوَر را ڀيد ڀِي۔ 11 جھڙَي نمُونَي اِنسون رَي من رِي ڪينَي ڀِي خبر ڪونھي، اُوئيج نمُونَي ايشوَر رَي پويتر آتما ݾون ٽاݪ ڪو ڀِي ايشوَر را ڀيد اوݪکي ڪونھي ݾگھتو۔ 12 آپون نَي دُنياوِي آتما نا، پڻ او آتما ملِي ھَي، جڪو ايشوَر رَي طرفون ھَي ڪہ آپي ايشوَر رَي ڏينوڙَي باتون ݾمجھون۔
13 آپي اَي ڏاھپ دُنياوِي ݾمجھ ݾون نا، پڻ اُوئون آکرون ݾون ݾُڻائُون ھون، جڪو پويتر آتما ݾيکايا ھَي۔ اِيئي نمُونَي آپي پويتر آتما رو ڀيد اُوئون مِنکون نَي ݾُڻائُون ھون، جڪون ڪڍي ايشوَر رِي آتما ھَي۔ 14 جڪَي ڪڍي ايشوَر رِي آتما ڪونھي، او ايشوَر رَي آتما رَي باتون ڪونھي منتو، ڪيونڪہ او ݾمجَھي ھَي ڪہ اَي بي وقوفي آݪَي باتون ھَي۔ او اُوئون باتون نَي پَرکي ڀِي ڪونھي ݾگھتو، ڪيونڪہ او باتون رُگو ايشوَر رَي پويتر آتما ݾون پَرکي ݾگھون ھون۔ 15 جڪَي ڪڍي ايشوَر رِي آتما ھَي، او ݾجَي باتون پَرکَي ھَي، پڻ اُوئي نَي ڪو ٻيجو پَرکي ڪونھي ݾگھتو۔ 16 جون يسعياھ نبِي رَي شاستر ۾ لِکيوڙو ھَي ڪہ،
”ڪَي پرميشوَر را خيال اوݪکيا؟
ڪُڻ اُوئي نَي ݾيکاشَي؟“
پڻ آپون ڪڍي مَسيح رِي ݾمجھ ھَي۔