ڪِرنٿيون رَي نون پيلڪو خط
جَئي پرڀُو رِي
1
اَي خط مھَي پولُوس رَي طرفون ھَي، جڪو ايشوَر رِي مرضِي ݾون مَسيح يسُوع رَي بارَي ۾ پرچار ڪرڻ رَي ݾارُو اَڻايوڙو ھون ھانَ وِشواسي ڀائي سوسٿنيس رَي طرفون ڀِي ھَي۔ 2 مھي اَي خط ڪِرنٿس شھر رِي ايشوَر رِي وِشواسي مَنڊلِي رَي نون لِکون پڙيا، جڪو مَسيح يسُوع ۾ پويتر ڪيئوڙا ھانَ پويتر ھوئڻ رَي ݾارُو اَڻايوڙا ھَي۔ اَي خط اُوئون ݾجون رَي نون ھَي، جڪو جيٿ ڪيٿ آپڻَي ھانَ آپرَي پرڀُو يسُوع مَسيح رو نون لَي ھَي۔3 ٿونَي آپڻَي ايشوَر پِتا ھانَ پرڀُو يسُوع مَسيح رِي ڪِرپا ھانَ ݾُک مِلتو رَي۔
ايشوَر رو شُڪر
4 ھُون ھميشا ٿونرَي ݾارُو آپرَي ايشوَر رو شُڪر ڪرون ھون ڪہ اُوئي ٿون تي مَسيح يسُوع ۾ تموم گھڻِي ڪِرپا ڪِي ھَي 5 ھانَ ٿونَي ھر ھيڪ بات ݾمجھڻ ھانَ ݾيکاوڻ ۾ برڪت ڏينِي ھَي۔ 6 اَي اِيئي بات رو ثبُوت ھَي ڪہ مھَي ٿونَي مَسيح رَي بارَي ۾ جڪو ڪئين ݾُڻايو ھتو، او ݾاچ ھَي۔ 7 ھمَي ٿون ڪڍي ھر نمُونَي رِي برڪت ھَي ھانَ ٿي آپڻَي پرڀُو يسُوع مَسيح رَي پاڇَي آوڻ رَي اِنتظار ۾ ھو۔ 8 او ٿونَي آخر توڻي وِشواس ۾ پڪا راکشَي ڪہ آپڻَي پرڀُو يسُوع مَسيح رَي پاڇَي آوڻ آݪَي ڏِن ٿون تي ڪو ڀِي ڏوھ نِي ھووَي۔ 9 ايشوَر وفادار ھَي، جڪَي ٿونَي آپرَي ڏيڪرَي ھانَ آپڻَي پرڀُو يسُوع مَسيح ۾ ڀيڙا ھوئڻ رَي ݾارُو اَڻايا ھَي۔
وِشواسي مَنڊلِي ۾ پارٽِي بازِي
10 اي وِشواسيون، ھُون آپڻَي پرڀُو يسُوع مَسيح رَي نون ݾون ٿونَي مِنٿ ڪرون ھون ڪہ ٿي ݾجائِي ٻڌِي راکو ھانَ ٿي پارٽِي بازِي نِي ڪرو، پڻ ݾاچَي من ݾون ھيڪ ݾوچ ھانَ ھيڪ صلاح راکو۔ 11 ڪيونڪہ پيارَي وِشواسيون، مھنَي ٿونرَي بارَي ۾ ٻائِي خَلووَي رَي گھر ݾون خبر پڙِي ھَي ڪہ ٿي جھيڙا جھگڙا ڪرو ھو۔ 12 مھارَي ڪيوَڻ رو مطلب ھَي ڪہ ٿون ۾ ڪو ڪَي ھَي ڪہ،”ھُون پولُوس رو چيلو ھون۔“ ڪو ڪَي ھَي ڪہ،”ھُون اپلُوس رو۔“ ڪو ڪَي ھَي ڪہ،”ھُون ڪيفا يعني پطرس رو۔“ ھانَ ڪو ڪَي ھَي ڪہ،”ھُون مَسيح رو۔“ 13 ڪِي مَسيح بِݪائيجو رو؟ ڪِي ٿونرَي ݾارُو پولُوس نَي ݾُولِي ماٿَي چاڙھيو ھتو؟ ڪِي ٿون پولُوس رَي نون رو پويتر سِنون ليئو ھتو؟
14 ھُون ايشوَر رو شُڪر ڪرون ھون ڪہ مھَي ڪرسپُس ھانَ گَيُس ݾون ٽاݪ ٿون ۾ ڪينَي ڀِي پويتر سِنون ڪونھي ڏينو 15 ڪہ ڪو ڀِي اَي نِي ڪَي ڪہ اُوئي مھارَي نون ݾون پويتر سِنون ليئو ھَي۔ 16 ھاوي، مھَي اِستفناس رَي خاندان نَي پويتر سِنون ڏينو ھتو، پڻ مھارَي خيال ۾ اِيئون ݾون ٽاݪ مھَي ڪينَي ڀِي پويتر سِنون ڪونھي ڏينو، 17 ڪيونڪہ مَسيح مھنَي پويتر سِنون ڏيوَڻ رَي ݾارُو نا، پڻ خُوشِي رِي خبر ݾُڻاوڻ رَي ݾارُو ميليو ھَي۔ ھُون پرچار رو اَي ڪوم آپرِي ݾمجھ ݾون ڪونھي ڪرتو ڪہ مَسيح رِي ݾُولِي رِي قُدرت ڏيکيجَي۔
ݾُولِي رو پرچار
18 ݾُولِي رو پرچار اُوئون رَي ݾارُو بي وقوفي ھَي، جڪون رو نتيجو ھميشا رِي موت ھَي، پڻ آپي جڪون نَي مُگتي ملِي ھَي، آپڻَي ݾارُو ايشوَر رِي قُدرت ھَي۔ 19 جون ايشوَر، شاستر ۾ ڪھيو ھَي ڪہ،
”ھُون عقل آݪون رِي عقل ختم ڪرين
ھانَ ڏاھون رِي ڏاھپ مِٽائين۔“
20 ھمَي ڪيٿ ھَي، عقل آݪا، ڌرمي گُرو ھانَ بَحث ڪرڻ آݪا؟ ڪِي ايشوَر، اِيئي دُنيا رِي ڏاھپ نَي بي وقوفي ڪونھي ڪھيو؟ 21 ڪيونڪہ ايشوَر آپرِي ڏاھپ ݾون اَي بتايو ڪہ اِنسون اُوئي نَي ڪڏي ڀِي آپرِي ݾمجھ ݾون اوݪکي ڪونھي ݾگھتو، اِيئي رَي ڪري اُوئي آپڻِي بي وقوفي آݪَي پرچار تي وِشواس راکڻ آݪون نَي مُگتي ڏينِي۔
22 يھُودي ثبُوت رَي ݾارُو نِشون ھانَ يُوناني ڏاھپ رِي تلاش ۾ رَي ھَي۔ 23 پڻ آپي اَي پرچار ڪرون ھون ڪہ مَسيح آپڻَي پاپون رَي ݾارُو ݾُولِي تي ٻَليدون ھويو۔ يھُودي اَي بات ݾُڻي ناراض ھووَي ھَي ھانَ ٻيجَي قومون رَي ݾارُو اَي بي وقوفي آݪِي بات ھَي۔ 24 پڻ جڪون نَي ايشوَر مُگتي ڏيوَڻ رَي ݾارُو اَڻايا ھَي، ڀلي او يھُودي ھووَي جون يُوناني، اُوئون رَي ݾارُو مَسيح، ايشوَر رِي قُدرت ھانَ ايشوَر رِي ڏاھپ ھَي۔ 25 ڪيونڪہ جڪو بات ايشوَر رِي بي وقوفي لاگَي ھَي، او اِنسون رِي ݾوچ ݾون وڌيڪ ݾمجھ آݪِي بات ھَي ھانَ جڪو بات ايشوَر رِي گھٽ لاگَي ھَي، او اِنسون رِي طاقت ݾون وڌيڪ طاقت آݪِي بات ھَي۔
26 اي وِشواسيون، اِيئي بات تي ڌھيون لگائو ڪہ جڏي ايشوَر ٿونَي اَڻايا، تو ٿي ڪھڙا ھتا۔ مِنکون رِي نظر ۾ ٿون ۾ تموم گھڻا ڏاھا، تموم گھڻا طاقت آݪا ھانَ تموم گھڻا اَمير ڪونھي ھتا۔ 27 پڻ اِيئي رَي بدلَي ايشوَر اُوئون نَي چُونڊيا جڪو دُنيا رِي نظر ۾ بي وقوف ھتا ڪہ ڏاھا شرميدا ھووَي ھانَ ايشوَر دُنيا را ڪمزور مِنک چُونڊيا ڪہ او طاقت آݪون نَي شرميدا ڪرَي۔ 28 اِيئي نمُونَي ايشوَر اُوئون نَي چُونڊيا جڪو دُنيا رِي نظر ۾ گھٽ ھانَ ڪئين ڪونھي ڪہ او ھستِي آݪون نَي گھٽ ڪرَي، 29 ڪہ ڪو ڀِي ايشوَر آگھي آپ تي بڏائو نِي ڪرَي۔ 30 اَي ايشوَر رَي طرفون ھَي ڪہ ٿي مَسيح يسُوع ۾ ھو، جڪو ايشوَر رَي طرفون آپڻَي ݾارُو ڏاھپ ھويو، جڪَي ݾون نيڪِي، پويتر ھوئڻ ھانَ مُگتي ملَي ھَي۔ 31 اِيئي رَي ڪري جون شاستر ۾ لِکيوڙو ھَي ڪہ،
”بڏائو ڪرڻ آݪو پرميشوَر تي بڏائو ڪرَي۔“