سنتون را ڪوم 23

پولُوس يھُودي ڌرمي پنچائيت ڏيݾا ڌھيون ݾون جوئي ڪھيو ڪہ، ”مھارَي ڀايون، ھُون آج ڏِن توڻي ݾاچَي من ݾون ايشوَر رِي مرضِي تي بون پڙيو۔“ ‏2 ايشوَر رَي پُوجاريون رَي ݾردار حننيا، پولُوس ڪڍي اُڀوڙَي مِنکون نَي حُڪم ڏينو ڪہ، ”اِيئي رَي موڏَي تي ھيڪ ٿاپ ھڻو۔“ ‏3 تو پولُوس اُوئي نَي ڪھيو ڪہ، ”اي ٺَگ، ايشوَر ضرُور ٿنَي مارشَي۔ ٿنَي تو کپَي ڪہ تُو شريعت تي مھارو اِنصاف ڪر، پڻ تُو تو اُوئي رَي اُلٽ مھنَي مارڻ رو حُڪم ڏَي پڙيو۔“ ‏4 اِيئي تي پاݾَي ۾ اُڀوڙَي مِنکون پولُوس نَي ڪھيو ڪہ، ”ٿارِي اترِي ھِمت ڪہ تُو ايشوَر رَي پُوجاريون رَي ݾردار نَي گھٽ وڌ ڪَي؟“ ‏5 پولُوس بݪتِي ڏينِي ڪہ، ”ڀايون، مھنَي خبر ڪونھي ھتِي ڪہ اَي ايشوَر رَي پُوجاريون رو ݾردار ھَي، ڪيونڪہ شاستر ۾ لِکيوڙو ھَي ڪہ،

’آپرِي قوم رَي ݾردار نَي پِٽ نِي۔‘“

‏6 پولُوس نَي خبر ھتِي ڪہ پنچائيت ۾ ڪئين صدُوقي ھانَ ڪئين فريسي مِنک ھَي۔ اِيئي رَي ڪري پولُوس اُوئون نَي ڪھيو ڪہ، ”مھارَي ڀايون، مھارا ٻاپ ڏاڏا فريسي پَنٿ ݾون ھتا ھانَ ھُون ڀِي فريسي ھون۔ مھَي تي اَي ڪيس اِيئي رَي ڪري ھَي، ڪيونڪہ مھارو وِشواس ھَي ڪہ مُوئوڙا ڀڙي جيتا ھوشَي۔“ ‏7 جڏي اُوئون اَي بات ݾُڻِي، تو فريسي ھانَ صدُوقي مِنکون رو آپت ۾ جھيڙو شرُوع ھويو۔ اِيئي نمُونَي پنچائيت را ٻي ٽولا ھوئي گيا۔ ‏8 اَي بات اِيئي رَي ڪري ھوئِي ڪہ صدُوقي ڪيتا ڪہ مُوئوڙا ڪڏي ڀِي جيتا ڪونھي ھووَي ھانَ فريشتا ھانَ آتما ھائِي ڪونھي۔ پڻ فريسي مِنک اَي ݾجَي باتون منتا۔ ‏9 پَڇي جھيڙو بڌتو گيو ھانَ ڪئين ڌرمي گُرو جڪو فريسي ھتا، او جھيڙو ڪري ڪيوَڻ لاگا ڪہ، ”مھي اِيئي مِنک ۾ ڪو ڀِي ڏوھ ڪونھي ڏيکتا۔ ھوئي ݾگھَي ھَي ڪہ ڪَي آتما جون ڪَي فريشتَي اِيئي ݾون بات ڪِي ھووَي۔“ ‏10 پَڇي جڏي جھيڙو تموم گھڻو بڌڻ لاگو، تو فوج رو آفيسر ٻيئاجڻ لاگو ھانَ ݾوچڻ لاگو ڪہ اِيئون نِي ھووَي ڪہ اَي مِنک پولُوس نَي ماري ٽُڪڙا ٽُڪڙا ڪري ڇوڙَي۔ اِيئي رَي ڪري اُوئي آپرَي فوجيون نَي حُڪم ڏينو ڪہ، ”ھيٺا جائو، پولُوس نَي اوٿ ݾون زورِي ڪاڍي ڪوٽ ۾ لي آئو۔“ ‏11 پَڇي اُوئيج رات پرڀُو يسُوع، پولُوس نَي درشن ڏي ڪھيو ڪہ، ”ھِمت ڪر، ڪيونڪہ جون ٿَي يروشلم ۾ مھارِي گواھِي ڏينِي ھَي، اِيئوج ٿنَي رُوم شھر ۾ ڀِي مھارِي گواھِي ڏيوَڻِي ھَي۔“

پولُوس نَي مارڻ رِي رِٿا

‏12 جڏي ڏِن اُگو، تو يھُوديون ڀيڙا ھوئي رِٿا ڪري ݾونݾ ليئو ڪہ، ”جترِي توڻي مھي پولُوس نَي مارون ڪونھي، اُترِي توڻي مھي نَڪو کائُون نَڪو پيئون۔“ ‏13 اِيئي رِٿا ۾ چاليھ ݾون وڌيڪ يھُودي ڀيڙا ھتا۔ ‏14 اُوئون ايشوَر رَي موٽَي پُوجاريون ھانَ يھُودي اَگووڻون نَي جائي ڪھيو ڪہ، ”مھون ݾونݾ ليئو ھَي ڪہ جترِي توڻي مھي پولُوس نَي مارون نِي، اُترِي توڻي مھي نَڪو کائُون نَڪو پيئون۔ ‏15 اِيئي رَي ڪري ٿي ھانَ پنچائيت آݪا مِلي فوج رَي آفيسر نَي مِنٿ ڪرو ڪہ پولُوس ݾون ڀڙي باتون پُوڇڻ رَي ݾارُو ٿون پنچائيت آݪون ڪڍي ميلَي۔ مھي ݾنڀريوڙا ريشون ھانَ اُوئي رَي پُگڻ ݾون پيل مارگ ۾ اُوئي نَي ماري ڇوڙشون۔“ ‏16 پڻ جڏي پولُوس رَي ڀوڻيجَي نَي اِيئي بات رِي خبر پڙِي، تو اُوئي ڪوٽ ۾ جائي پولُوس نَي ݾُڻايو۔ ‏17 اِيئي تي پولُوس ھيڪَي آفيسر نَي ھيلو ڪرائي ڪھيو ڪہ، ”اِيئي نوجوان نَي موٽَي آفيسر ڪڍي لي جا، ڪيونڪہ اَي اُوئي ݾون بات ڪرشَي۔“ ‏18 پَڇي آفيسر اُوئي نوجوان نَي فوج رَي موٽَي آفيسر ڪڍي لي گيو ھانَ اُوئي نَي ڪھيو ڪہ، ”قيدي پولُوس مھنَي ھيلو ڪرايو ھانَ مِنٿ ڪِي ڪہ اِيئي نوجوان نَي ٿون ڪڍي لي آئُون، ڪيونڪہ او ٿون ݾون ڪئين بات ڪرشَي۔“ ‏19 تو فوج رَي موٽَي آفيسر نوجوان رو ھاٿ جھالي اُوئي نَي ھيڪَي پاݾَي لي گيو ھانَ پُوڇو ڪہ، ”ݾُڻا، ڪھڙِي بات ھَي؟“ ‏20 اُوئي بݪتِي ڏينِي ڪہ، ”يھُوديون آپت ۾ ھيڪ ھوئي فيصلو ڪيئو ھَي ڪہ او ٿنَي مِنٿ ڪرَي ڪہ ݾاڪݪي پولُوس نَي موٽِي پنچائيت ڪڍي پُوڇا گاڇا رَي ݾارُو اَڻاوَي۔ ‏21 پڻ ٿي اُوئون رِي بات نِي منيا، ڪيونڪہ چاليھ ݾون وڌيڪ مِنک پولُوس تي حملو ڪرڻ رَي ݾارُو لِڪي ٻيٺا ھَي۔ اُوئون باݾ باݾي ݾونݾ ليئو ھَي ڪہ جترِي توڻي مھي پولُوس نَي مارون نِي، اُترِي توڻي نَڪو کائُون نَڪو پيئون۔ اِيئي رَي ڪري ھمَي او تيار ھَي ھانَ رُگو ٿونرو فيصلَي رو اِنتظار ھَي۔“ ‏22 اَي بات ݾُڻي فوج رَي موٽَي آفيسر نوجوان نَي اَي حُڪم ڏينو ڪہ، ”ڪينَي ڀِي نِي ݾُڻائي ڪہ ٿَي اَي بات مھنَي ݾُڻائِي ھَي۔“ پَڇي اُوئي نوجوان نَي ميلي ڇوڙيو۔

پولُوس نَي گوَرنر فِيلڪس ڪڍي ميلڻ

‏23 پَڇي فوج رَي موٽَي آفيسر ٻيئون آفيسرون نَي اَڻايا ھانَ اُوئون نَي ڪھيو ڪہ، ”ٻي ݾئو فوجي، ستر گھوڙا ݾَوار ھانَ ٻي ݾئو ڀالا ھلاوڻ آݪا ݾنڀائو۔ اُوئون نَي آج رات نَئو بَجي قيصريا صُوبَي ڏيݾا جاوڻو ھَي۔“ ‏24 اُوئي اَي حُڪم ڀِي ڏينو ڪہ، ”پولُوس رَي ݾارُو ݾَوارِي ݾنڀرائو ھانَ اُوئي نَي صُوبَي رَي گوَرنر فِيلڪس ڪڍي ݾنڀالي پُگائو۔“ ‏25 پَڇي فوج رَي موٽَي آفيسر اُوئون رَي ھاٿون اَي خط ڀِي ميليو ڪہ، ‏26 ”ڪلوديس لُوسياس رَي طرفون صُوبَي رَي گوَرنر جناب فِيلڪس نَي نمسڪار۔ ‏27 اِيئي مِنک نَي يھُوديون جھاليو ھانَ اِيئي نَي مارڻ آݪا ھتا، پڻ جڏي مھنَي خبر پڙِي ڪہ اَي رُومي شھري ھَي، تو ھُون فوجي لي گيو ھانَ اِيئي نَي ڇوڙائي لي آيو۔ ‏28 ڪيونڪہ ھُون جانچ ڪرڻ رَي ݾارُو ڪرتو ڪہ او اُوئي تي ڪھڙو ڏوھ لگاوَي ھَي، اِيئي رَي ڪري ھُون اُوئي نَي يھُوديون رِي موٽِي پنچائيت ۾ لي گيو۔ ‏29 اوٿ مھنَي خبر پڙِي ڪہ او آپرِي شريعت رَي باتون تي اُوئي نَي ڏوھي ڪرَي پڙيا۔ پڻ اِيئي اھڙو ڪو ڀِي ڪوم ڪونھي ڪيئو، جڪَي رَي ڪري اِيئي نَي موت جون قيد رِي سزا ڏينِي جاوَي۔ ‏30 پَڇي جڏي مھنَي خبر پڙِي ڪہ اِيئي نَي مارڻ رِي رِٿا ھوئِي ھَي، تو مھَي يڪدم اَي فيصلو ڪيئو ڪہ اِيئي نَي ٿون ڪڍي ميلون۔ مھَي اِيئي تي الزوم ھڻڻ آݪون نَي ڀِي ٿون ڪڍي ميليا ھَي ڪہ او آپرَي باتون ݾُڻاوَي۔“

‏31 پَڇي فوجيون اُوئي رَي حُڪم تي پولُوس نَي آپ ڀيڙو ليئو ھانَ راتو رات اُوئي نَي اَنتِپترس شھر ۾ پُگايو۔ ‏32 پَڇي ٻيجَي ڏِن او فوجي ڪوٽ ڏيݾا پاڇا گيا ھانَ گھوڙَي ݾَوار پولُوس نَي آگھي ڪري لي گيا۔ ‏33 اُوئون قيصريا صُوبَي ۾ پُگي گوَرنر نَي او خط ڏينو ھانَ پولُوس نَي ڀِي اُوئي رَي حوالي ڪيئو۔ ‏34 پَڇي صُوبَي رَي گوَرنر خط پڙھي پولُوس ݾون پُوڇو ڪہ، ”تُو ڪئَي صُوبَي رو ھَي؟“ پولُوس اُوئي نَي بݪتِي ڏينِي ڪہ، ”ھُون ڪِلڪيا صُوبَي رو ھون۔“ ‏35 پَڇي گوَرنر ڪھيو ڪہ، ”ھُون ٿارو فيصلو اُوئي ٽيم ڪرين، جڏي ٿي تي الزوم ھڻڻ آݪا، او ڀِي ايٿ ھووَي۔“ پَڇي اُوئي حُڪم ڏينو ڪہ، ”پولُوس نَي ھيروديس بادشاھ رَي ٺاھيوڙَي ڪوٽ ۾ قيد راکو۔“