سنتون را ڪوم 15

يروشلم شھر ۾ اِجلاس

پَڇي ڪئينڪہ مِنک يھُوديا صُوبَي ݾون انطاڪيا شھر ۾ آيا ھانَ وِشواسيون نَي اَي ݾيکاوڻ لاگا ڪہ، ”جترِي توڻي ٿي مُوسيٰ رَي شاستر تي کَتنو ڪونھي ڪرائو، تو ٿونَي مُگتي ڪونھي ملَي۔“ ‏2 اِيئي بات تي پولُوس ھانَ برنباس رِي اُوئون مِنکون ݾون تموم گھڻِي بَحث ھوئِي۔ پَڇي انطاڪيا شھر رِي وِشواسي مَنڊلِي فيصلو ڪيئو ڪہ پولُوس ھانَ برنباس ھانَ ڪئين ٻيجا مِنک يروشلم شھر ميليا جاوَي ڪہ اوٿ جائي سنتون ھانَ وِشواسي مَنڊلِي رَي اَگووڻون ݾون ملَي ھانَ اِيئي مسئلَي رو فيصلو ڪراوَي۔

‏3 پَڇي وِشواسي مَنڊلِي اُوئون نَي ميليا۔ جڏي او فنيڪي ھانَ سامريا علائقون ݾون جاوتا پڙيا، تو اوٿ اُوئون وِشواسيون نَي ݾُڻايو ڪہ ٻيجِي قوم رَي تموم گھڻَي مِنکون پرڀُو يسُوع تي وِشواس راکيو ھَي۔ اَي بات ݾُڻي، او ݾجائِي تموم گھڻا خُوش ھويا۔ ‏4 جڏي او يروشلم ۾ پُگا، تو اوٿ رِي وِشواسي مَنڊلِي، سنت ھانَ اَگووڻ اُوئون ݾون خُوشِي ݾون مِليا۔ اُوئون ݾجَي ڪوم رَي بارَي ۾ اُوئون نَي ݾُڻايو، جڪو ايشوَر اُوئون رَي وسيلَي ڪرايا ھتا۔ ‏5 پڻ ڪئينڪہ فريسي مِنک، جڪو وِشواسي ھويا ھتا، اُڀي ڪھيو ڪہ، ”ٻيجِي قوم آݪا جڪو وِشواسي ھووَي ھَي، اُوئون رو کَتنو ھوئڻ کپَي ھانَ اُوئون نَي مُوسيٰ رِي شريعت تي بيوَڻ رو حُڪم ڏيوَڻ کپَي۔“ ‏6 تو سنت ھانَ اَگووڻ اِيئي بات تي ݾوچ بيچار ڪرڻ رَي ݾارُو ڀيڙا ھويا۔ ‏7 پَڇي تموم گھڻَي بَحث ݾون پَڇي پطرس اُٺيو ھانَ اُوئون نَي ڪيوَڻ لاگو ڪہ، ”اي وِشواسيون، ٿونَي خبر ھَي ڪہ ڪئين ٽيم اَگي ايشوَر ٿون ۾ مھنَي اِيئي رَي ڪري چُونڊيو ڪہ ھُون ٻيجَي قومون نَي ڀِي خُوشِي رِي خبر ݾُڻائُون ڪہ او ڀِي پرڀُو يسُوع تي وِشواس راکَي۔ ‏8 ايشوَر جڪو من را ڀيد جوڻَي ھَي، اُوئي آپون آݪِي ڪار اُوئون نَي ڀِي پويتر آتما ڏينو ھانَ اِيئي بات رِي ثابُوتِي ڏينِي ڪہ اُوئي ٻيجَي قومون نَي ڀِي چُونڊيا ھَي۔ ‏9 ايشوَر آپون ۾ ھانَ اُوئون ۾ ڪو ڀِي فرق ڪونھي راکيو، ڪيونڪہ جڏي اُوئون پرڀُو يسُوع تي وِشواس راکيو، تو ايشوَر اُوئون را من آڇا اُوجݪا ڪيئا۔ ‏10 تو پَڇي ٿي ڪيئون ايشوَر رو آزمُوتو ليوَڻ رَي ݾارُو اُوئون چيلون تي اھڙا ڀار راکو ھو، جڪَي نَي مھورا ٻاپ ڏاڏا ڀِي کڻي ڪونھي ݾگھيا؟ ‏11 مھونَي پڪو وِشواس ھَي ڪہ جھڙَي نمُونَي اُوئون نَي پرڀُو يسُوع رِي ڪِرپا ݾون مُگتي ملشَي، اُوئيج نمُونَي آپون نَي ڀِي ملشَي۔“

‏12 پَڇي ݾجِي وِشواسي مَنڊلِي ماٺ ھوئِي ھانَ پولُوس ھانَ برنباس رَي باتون ݾُڻڻ لاگا ڪہ ايشوَر ڪيڪر اُوئون رَي ھاٿون ٻيجِي قوم ۾ تموم گھڻا پرچا ھانَ عجيب ڪوم ڪرايا ھَي۔ ‏13 جڏي او ماٺ ھويا، تو يعقُوب ڪيوَڻ لاگو ڪہ، ”اي وِشواسيون، مھارِي بات ݾُڻو، ‏14 شمعُون پطرس ھڻون ݾُڻايو ڪہ ايشوَر پيل ݾون ڪھڙَي نمُونَي ٻيجِي قوم تي نظر ڪِي ھانَ اُوئون ۾ ڀِي آپرَي ݾارُو مِنک چُونڊيا۔ ‏15 نبيون اَي باتون پيل ݾون شاستر ۾ ݾُڻائَي ڪہ،

‏16 پرميشوَر ڪَي پڙيو ڪہ،

’اِيئون باتون ݾون پَڇي ھُون پاڇو آئين

ھانَ دائُود رَي کِريوڙَي گھر نَي ٺائين۔

اُوئي رَي برباد ڪيئوڙَي ٽُڪڙون نَي ڀيڙا ڪرين

ھانَ اُوئي نَي ڀڙي ٺائي اُڀو ڪرين،

‏17 ڪہ ݾجَي ٻيجَي قومون آݪا،

جڪو مھارَي نون ݾون ڪھيجَي ھَي،

او مھنَي جووَي۔

‏18 اَي ھُون پرميشوَر ڪونھ ھون،

جڪو جگت رَي شرُوع ݾون اِيئون باتون رَي بارَي ۾ ݾُڻاوتو آئُون پڙيو۔‘

‏19 اِيئي رَي ڪري مھارو فيصلو اَي ھَي ڪہ آپي اُوئون نَي ڏُک نِي ڏيئون، جڪو ٻيجِي قوم ݾون ايشوَر تي وِشواس راکَي ھَي۔ ‏20 پڻ اُوئون نَي اَي ڀِي لِکي ميلو ڪہ او مُورتيون تي چاڙھيوڙا چڙھاوا نِي کاوَي، نِي زنا ڪرَي ھانَ نِي اھڙا گُھٽا ڏينوڙا جِنار کاوَي ھانَ نِي اُوئون رو لوئِي پيئَي، جون کاوَي، ‏21 ڪيونڪہ پِروڻَي زمونَي ݾون ھر ھيڪ شھر ۾ مُوسيٰ نبِي رَي شاستر رو پرچار ھوتو رھيو ھَي ھانَ او ھر ھيڪ پويتر ڏِن تي ڀگتي گھرون ۾ ݾُڻايو جاوَي ھَي۔“

ٻيجَي وِشواسي قومون رَي نون خط

‏22 پَڇي سنت ھانَ اَگووڻ ھانَ ݾجِي وِشواسي مَنڊلِي آݪا ڀيڙا ھويا ھانَ اُوئون اَي فيصلو ڪيئو ڪہ آپون ۾ ڪئين اھڙا مِنک چُونڊون، جڪو پولُوس ھانَ برنباس ڀيڙا انطاڪيا شھر ڏيݾا جاوَي۔ اُوئون يھُودا جڪَي نَي برسبا ڀِي ڪَي ھَي ھانَ سيلاس نَي چُونڊيو، ڪيونڪہ اُوئون رِي وِشواسي مِنک تموم گھڻِي عِزت ڪرتا۔ ‏23 اُوئون اَي لِکي اُوئون رَي ھاٿون ميليو ڪہ،

”اي وِشواسيون، ٿي جڪو ٻيجِي قوم آݪا ھو، انطاڪيا شھر ھانَ سُوريا ھانَ ڪِلڪيا صُوبون ۾ رو ھو، ݾجون نَي مھون ڀايون يعني سنتون ھانَ اَگووڻون رَي طرفون جَئي پرڀُو رِي۔ ‏24 مھون ݾُڻيو ھَي ڪہ مھون ۾ ڪئينڪہ مِنک بِنا پُوڇي ٿون ڪڍي آيا ھتا ھانَ اُوئون ٿونَي آپرَي باتون ݾون پريشون ڪيئا ھانَ ٿونرا من ڏُکايا ھتا۔ ‏25 اِيئي رَي ڪري مھون ݾجون صلاح ڪري اَي فيصلو ڪيئو ھَي ڪہ ڪئينڪہ مِنک چُونڊون ھانَ ٿون ڪڍي آپرَي پيارَي ڀايون برنباس ھانَ پولُوس ڀيڙا ميلون۔ ‏26 اَي ٻيئي اھڙا مِنک ھَي، جڪون آپرَي زندگَي آپڻَي پرڀُو يسُوع مَسيح رَي ݾارُو خطرَي ۾ گھاتي ڇوڙئَي ھَي۔ ‏27 اِيئي رَي ڪري مھون يھُودا ھانَ سيلاس نَي ميليا ھَي۔ او ڀِي ݾاگي باتون ٿونَي ݾُڻاشَي۔ ‏28 ڪيونڪہ پويتر آتما رِي مدد ݾون مھون اَي فيصلو ڪيئو ھَي ڪہ اِيئون ضرُوري باتون ݾون ٽاݪ ٻيجو ڪو ڀِي ڀار ٿون تي نِي راکون۔ ‏29 ٿي مُورتيون تي چاڙھيوڙَي شيون نِي کايا ھانَ نِي لوئِي پيئا، جون کايا ھانَ اھڙا جِنار نِي کايا، جڪون نَي گُھٽا ڏينوڙا ھووَي ھانَ نِي زنا ڪريا۔ جي ٿي اِيئون شيون ݾون اݪگا ريشو، تو ٿونرَي ݾارُو ڀلو ھوشَي۔ ايشوَر ٿونَي ݾاجا ݾُورا راکَي۔“

‏30 پَڇي او بَئير ھويا ھانَ او انطاڪيا شھر ۾ پُگا۔ اوٿ وِشواسي مَنڊلِي نَي ڀيڙِي ڪري اُوئون نَي خط ڏينو۔ ‏31 جڏي اُوئون او خط پڙھيو، تو اُوئون نَي ھِمت ملِي ھانَ او تموم گھڻا خُوش ھويا۔ ‏32 يھُودا ھانَ سيلاس جڪو آپ نبِي ھتا، وِشواسيون نَي تموم گھڻَي باتون ݾمجھائي اُوئون رو وِشواس پڪو ڪيئو۔ ‏33 او اُوئون ڀيڙا ڪئين ڏِن اوٿ رھيا ھانَ پَڇي وِشواسيون نَي خير خيريت رِي پراٿنا ݾون اُوئون نَي بَئير ڪيئا۔ يھُودا آپرَي مِنکون ڏيݾا پاڇو گيو، جڪون اُوئون نَي ميليا ھتا۔ ‏34 [پڻ سيلاس آپرِي مرضِي ݾون اوٿج رھيو۔]

‏35 پولُوس ھانَ برنباس انطاڪيا شھر ۾ رھيا ھانَ ٻيجَي تموم گھڻَي مِنکون ڀيڙا پرڀُو يسُوع رَي باتون ݾيکاوتا ھانَ پرچار ڪرتا رھيا۔

پولُوس ھانَ برنباس رو آپت ۾ ضِد ھانَ ڌار ھوئڻ

‏36 ڪئينڪہ ڏِنون ݾون پَڇي پولُوس، برنباس نَي ڪھيو ڪہ، ”جترَي شھرون ۾ آپون پرڀُو يسُوع رَي باتون رو پرچار ڪيئو ھتو، ھال اوٿ ھالي وِشواسيون رِي خبر چار لي آئُون۔“ ‏37 برنباس رِي مرضِي ھتِي ڪہ يُوحنا مرقس نَي ڀِي آپ ڀيڙو لي ھالَي۔ ‏38 پڻ پولُوس ڪھيو ڪہ، ”جڪو مِنک پمفليا صُوبَي ۾ آپون نَي ڇوڙي گيو ھتو ھانَ پرچار رَي ݾارُو آپون ڀيڙو ڪونھي ھاليو، ھمَي آپي اھڙَي مِنک نَي ڪيڪر ڀيڙو لي ھالون؟“ ‏39 اِيئي تي اُوئون رو آپت ۾ اِترو تو ضِد ھويو ڪہ او ھيڪَي ٻيجَي ݾون ڌار ھوئي گيا۔ برنباس، يُوحنا مرقس نَي لي ٻيڙَي ۾ چڙھي ڪُپرس ٻيٽ ڏيݾا بَئير ھويو۔ ‏40 پڻ پولُوس، سيلاس نَي ليئو ھانَ وِشواسيون اُوئون نَي پرميشوَر رَي ھاٿ ۾ ڏينو ڪہ او اُوئون تي ڪِرپا ڪرَي۔ پَڇي او اوٿ ݾون بَئير ھويا۔ ‏41 پولُوس سُوريا ھانَ ڪِلڪيا صُوبَي ݾون ھوتو، وِشواسي مَنڊليون ۾ مِنکون رَي وِشواس نَي پڪو ڪرتو گيو۔