پولُوس ھانَ برنباس رو اڪنيم شھر ۾ پرچار
14
جڏي پولُوس ھانَ برنباس اڪنيم شھر ۾ پُگا، تو اوٿ ڀِي يھُوديون رَي ڀگتي گھرون ۾ گيا۔ اوٿ اُوئون اھڙو پرچار ڪيئو ڪہ تموم گھڻا يھُودي ھانَ يُوناني وِشواسي ھويا۔ 2 پڻ جڪون يھُوديون وِشواس ڪونھي راکيو، اُوئون ٻيجِي قوم آݪون نَي ڀڙڪايا ھانَ اُوئون نَي وِشواسيون رَي خلاف ڪيئا۔ 3 تو ڀِي پولُوس ھانَ برنباس تموم گھڻَي ڏِنون توڻي اوٿج رھيا ھانَ پرڀُو يسُوع تي وِشواس راکي دليرِي ݾون پرچار رو ڪوم ڪرتا رھيا۔ پرڀُو يسُوع اُوئون رَي ھاٿون پرچا ھانَ عجيب ڪوم ڪرائي اَي ثابت ڪرتو رھيو ڪہ اُوئي رِي ڪِرپا رَي باتون ݾاچَي ھَي۔ 4 پڻ شھر رَي مِنکون را ٻي ٽولا ھوئي گيا۔ ڪئينڪہ يھُوديون رَي پاݾَي ھانَ ڪئينڪہ سنتون رَي پاݾَي ھويا۔5 پَڇي يھُودي ھانَ ٻيجِي قوم آݪا اُوئون رِي بي عِزتي ڪرڻ لاگا ھانَ پٿر ھڻي مارڻ رَي ݾارُو آپرَي ݾردارون ݾُوڌا اُوئون تي حملو ڪرڻ آيا۔ 6 جڏي اُوئون نَي اَي خبر پڙِي، تو او لُڪانيا علائقَي رَي شھرون لُسترا ھانَ دربَي ھانَ اُوئون رَي آݾَي پاݾَي رَي علائقَي ڏيݾا ناݾي گيا۔ 7 اوٿ ڀِي او خُوشِي رِي خبر ݾُڻاوتا رھيا۔
پولُوس ھانَ برنباس رو لُسترا ھانَ دربَي شھر جاوڻ
8 لُسترا شھر ۾ ھيڪ مِنک ھتو، جڪو جنم ݾون پونگڙو ھتو ھانَ او ڪڏي ڀِي بَئي ڪونھي ݾگھتو۔ 9 او پولُوس رَي باتون ݾُڻتو پڙيو۔ جڏي پولُوس اُوئي نَي چِٽائي ڏيٺو ڪہ اُوئي رو اِترو وِشواس ھَي ڪہ او ݾاجو ھوئي ݾگھَي ھَي، 10 تو اُوئي نَي زور ݾون ڪھيو ڪہ، ”آپرَي پگون تي اُڀ۔“ تو او ٽِپ ڏي اُٺيو ھانَ بيوَڻ لاگو۔ 11 جڏي مِنکون پولُوس رو اَي ڪوم ڏيٺو، تو لُڪانيا ٻولِي ۾ زور ݾون ڪھيو ڪہ، ”مِنکون رَي رُوپ ۾ مھون ڪڍي ڏيوتا اُتري آيا ھَي۔“ 12 اُوئون برنباس نَي يُوناني ڏيوتا ”زيُوس“ ڪھيو ھانَ پولُوس نَي ”ھرميس“ ڏيوتا ڪھيو، ڪيونڪہ پولُوس ٻولڻ ۾ برنباس ݾون وڌيڪ ھتو۔
13 اُوئون رَي زيُوس ڏيوتا رو مندر شھر ݾون ٻاھر ھتو، اُوئي رو پُوجاري ڍگا ھانَ گُلون را ھار لي شھر رَي در تي آيو ڪہ مِنکون ڀيڙو ٻَليدون ڪرَي۔ 14 پڻ جڏي سنت برنباس ھانَ سنت پولُوس اَي ݾُڻيو، تو آپرا گاڀا ڦاڙيا ھانَ ناݾي مِنکون رَي بِچ ۾ گيا ھانَ زور ݾون ڪيوَڻ لاگا ڪہ، 15 ”ڀايون، ٿي اَي ڪِي ڪرو ھو؟ مھي ڀِي ٿون جھڙا اِنسون ھون ھانَ ٿونَي خُوشِي رِي خبر ݾُڻاوڻ آيا ھون ڪہ ٿي اَي ڪُوڙا ڏيوتا ڦِٽا ڪرو ھانَ اُوئي جيتَي ايشوَر نَي منو، جڪَي ݾجو ڪئين ٺاھيو ھَي، يعني آڪاش، ڌرتي، ݾمُوندر ھانَ جڪو ڪئين اُوئون ۾ ھَي۔ 16 اُوئي اگلَي زمونَي ۾ ݾجَي قومون نَي آپرِي آپرِي مرضِي تي بيوَڻ ڏينا۔ 17 تو ڀِي او ھميشا مِنکون تي مھربونِي ڪري آپرَي بارَي ۾ گواھِي ڏيتو رَي ھَي۔ او آڪاش ݾون ٿونرَي ݾارُو مي برݾاوَي ھَي ھانَ پوک رَي ݾارُو مُندون ھانَ ٿونَي ٻاٽِي ڏَي ھَي ھانَ ٿونرا من خُوشِي ݾون ڀرَي ھَي۔“ 18 اَي بات ڪري اُوئون تموم گھڻو زور ڏي مِنکون نَي آپرَي ݾارُو ٻَليدون ڪرڻ ݾون پاليا۔
19 پَڇي ڪئين يھُودي انطاڪيا ھانَ اڪنيم شھر ݾون آيا ھانَ مِنکون نَي آپرا ڪري پولُوس نَي پٿر ھڻيا۔ اُوئون اُوئي نَي مُوئوڙو ݾمجھو ھانَ گِيݾلتا شھر ݾون ٻاھر لي گيا۔ 20 پڻ جڏي چيلا آيا ھانَ اُوئي رَي چوڌاري اُڀا، تو او اُونچو اُٺيو ھانَ شھر ڏيݾا پاڇو آيو۔ پَڇي او ٻيجَي ڏِن برنباس ڀيڙو دربَي شھر ڏيݾا گيو۔
پولُوس ھانَ برنباس رو انطاڪيا شھر پاڇا جاوڻ
21 پولُوس ھانَ برنباس دربَي شھر ۾ خُوشِي رِي خبر ݾُڻائِي ھانَ تموم گھڻا مِنک پرڀُو يسُوع را چيلا ھويا۔ پَڇي او لُسترا، اڪنيم ھانَ انطاڪيا شھر پاڇا گيا۔ 22 او وِشواسيون نَي تسلِي ڏيتا ھانَ اَي ݾمجھاوتا ڪہ، ”پڪو وِشواس راکو، ڪيونڪہ اَي ضرُور ھَي ڪہ آپي تموم گھڻا ڏُک ڏيکي ايشوَر رِي بادشاھي ۾ جائُون۔“ 23 اُوئون ھر ھيڪ وِشواسي مَنڊلِي ۾ اُوئون رَي ݾارُو اَگووڻ چُونڊي راکيا ھانَ روزا راکي پراٿنا ڪِي ڪہ، ”پرڀُو يسُوع جڪَي تي اُوئون وِشواس راکيو ھَي، اوج اُوئون نَي ݾنڀالَي۔“
24 پَڇي پولُوس ھانَ برنباس پَسديا علائقون ݾون ھوئي پمفليا صُوبَي ۾ پُگا۔ 25 پِرگا شھر ۾ پرڀُو يسُوع رو پرچار ڪري اَتليا شھر ڏيݾا گيا۔ 26 پَڇي اوٿ ݾون ٻيڙَي ۾ چڙھي انطاڪيا شھر ڏيݾا گيا، جيٿ پيل اُوئون نَي اِيئي ڪوم رَي ݾارُو ايشوَر رِي ڪِرپا آݪَي ھاٿون ۾ ڏينا ھتا ھانَ ھمَي اُوئون اَي ڪوم پُورو ڪيئو ھتو۔
27 جڏي او انطاڪيا شھر ۾ پُگا، تو اُوئون وِشواسي مَنڊلِي رَي مِنکون نَي ڀيڙا ڪري اُوئي ݾجَي ڪوم رَي بارَي ۾ ݾُڻايو، جڪو ايشوَر اُوئون رَي ھاٿون ڪرايا ھتا ھانَ اُوئون اَي ڀِي ݾُڻايو ڪہ ايشوَر ٻيجَي قومون رَي ݾارُو در کوليو ھَي ڪہ او ڀِي وِشواسي ھووَي۔ 28 پَڇي پولُوس ھانَ برنباس تموم گھڻا ڏِن وِشواسيون ڪڍي اوٿج رھيا۔