سائُول رو وِشواسي مَنڊليون نَي تنگ ڪرڻ
8
جڏي اِستيفِنس نَي ماري ڇوڙيو، تو سائُول ڀِي اِيئي بات ۾ خُوش ھتو۔اُوئيج ڏِن يروشلم شھر ۾ وِشواسي مَنڊلِي تي تموم گھڻو ظُلم ھوئڻ شرُوع ھويو۔ پَڇي سنتون ݾون ٽاݪ باقي ݾجائِي وِشواسي يھُوديا ھانَ سامريا صُوبَي ڏيݾا ناݾي گيا۔ 2 پَڇي ڪئينڪہ نيڪ مِنکون اِستيفِنس رو لاش لي جائي اُوئي نَي مٽِي حوالي ڪيئو ھانَ اُوئي رَي مرڻ تي تموم گھڻا روئڻ لاگا۔
3 سائُول وِشواسي مَنڊليون نَي مِٽاوڻ شرُوع ڪيئو۔ او گھرون ۾ جائي لُگايون ھانَ آڏميون نَي گيݾلي جيل ۾ گھاتتو۔
فِلپس رو سامريا صُوبَي ۾ پرچار
4 جڪو وِشواسي اِيئا اُوئا گيا، او جيٿ ڀِي گيا اوٿ پرڀُو يسُوع رو پرچار ڪرڻ لاگا۔ 5 پَڇي فِلپس سامريا صُوبَي رَي ھيڪَي شھر ۾ جائي مَسيح رَي بارَي ۾ پرچار ڪرڻ لاگو۔ 6 جڏي مِنکون فِلپس رو پرچار ݾُڻيو ھانَ اُوئي را پرچا ڏيٺا، تو ݾجائِي مِنک ڀيڙا ھوئي اُوئي رَي باتون ڌھيون ڏي ݾُڻڻ لاگا۔ 7 پَڇي تموم گھڻَي مِنکون ۾ ڀُوت رڙَي ڪري نڪريا ھانَ تموم گھڻا اَڌرنگا ھانَ لُولھا لنگڙا ݾاجا ھويا۔ 8 اَي جوئي اُوئي شھر را مِنک تموم گھڻا خُوش ھويا۔
9 اُوئي شھر ۾ ھيڪ شمعُون نون رو مِنک ھتو، جڪو سامريا صُوبَي رَي مِنکون نَي آپرَي جادُو ݾون حيرون ڪرتو ھانَ او ڪيتو ڪہ، ”ھُون موٽِي ھستِي ھون۔“ 10 نِنيا موٽا ݾجائِي اُوئي رَي باتون ڌھيون ݾون ݾُڻتا ھانَ اُوئي رَي بارَي ۾ اَي ڪيتا ڪہ اِيئي آڏمي نَي ايشوَر تموم گھڻِي طاقت ڏينِي ھَي۔ 11 او اُوئي رَي باتون ڌھيون ݾون ݾُڻتا، ڪيونڪہ اُوئي تموم گھڻَي ڏِنون ݾون آپرَي جادُو ݾون مِنکون نَي حيرون ڪيئا ھتا۔ 12 پڻ جڏي فِلپس، مِنکون ۾ ايشوَر رِي بادشاھي ھانَ يسُوع مَسيح رَي بارَي ۾ پرچار ڪيئو، تو تموم گھڻَي آڏميون ھانَ لُگايون وِشواس راکيو ھانَ پويتر سِنون ليوَڻ لاگا۔ 13 پَڇي شمعُون ڀِي فِلپس رو پرچار ݾُڻي پرڀُو يسُوع تي وِشواس راکيو۔ پَڇي اُوئي پويتر سِنون ليئو ھانَ فِلپس ڀيڙو رھيو۔ او موٽا موٽا پرچا ھانَ نِشون جوئي حيرون ھويو۔
14 جڏي يروشلم شھر ۾ سنتون اَي ݾُڻيو ڪہ سامريا صُوبَي آݪون ايشوَر رَي باتون تي وِشواس راکيو ھَي، تو اُوئون پطرس ھانَ يُوحنا نَي اُوئون وِشواسيون ڪڍي ميليا۔ 15 پطرس ھانَ يُوحنا اوٿ جائي اُوئون وِشواسيون رَي ݾارُو پراٿنا ڪِي ڪہ ايشوَر اُوئون نَي پويتر آتما ڏَي، 16 ڪيونڪہ اُوئي ٽيم اُوئون وِشواسيون نَي پويتر آتما ڪونھي مِليو ھتو ھانَ اُوئون رُگو پرڀُو يسُوع رَي نون رو پويتر سِنون ليئو ھتو۔ 17 پَڇي پطرس ھانَ يُوحنا اُوئون رَي ماٿَي تي ھاٿ راکيو ھانَ ايشوَر اُوئون نَي پويتر آتما ڏينو۔
18 جڏي شمعُون ڏيٺو ڪہ سنتون رَي ھاٿ راکڻ ݾون پويتر آتما ملَي ھَي، تو اُوئي سنتون نَي پَشا ڏي ڪھيو ڪہ، 19 ”مھنَي اِختياري ڏيئو ڪہ ھُون جڪَي ماٿَي ھاٿ راکون، تو اُوئي نَي پويتر آتما ملَي۔“ 20 پطرس اُوئي نَي بݪتِي ڏينِي ڪہ، ”تُو ھانَ ٿارا رُپيا نرگ ۾ جاوَي۔ ٿنَي ڪِي لاگَي ھَي ڪہ جڪو تحفو ايشوَر مھونَي ڏينو ھَي، تُو او رُپيون ݾون لي ݾگھَي ھَي؟ 21 ايشوَر نَي خبر ھَي ڪہ ٿارَي من ۾ کوٽ ھَي، اِيئي رَي ڪري مھورَي اِيئي ڪوم ۾ ٿارو ڪو ڀِي واسطو ڪونھي۔ 22 اِيئي تي تُو اِيئي پاپ ݾون توبھون ڪر ھانَ پرميشوَر ݾون پراٿنا ڪر، ھوئي ݾگھَي ھَي ڪہ پرميشوَر ٿنَي اِيئي بُڇڙَي اِرادَي رِي معافي ڏَي۔ 23 مھنَي لاگَي ھَي ڪہ تُو ݾاݪ ھانَ لالچ ݾون ڀريجوڙو ھَي ھانَ تُو بُڇڙائي ۾ ڦاٿوڙو ھَي۔“ 24 تو شمعُون ڪھيو ڪہ، ”مھارَي ݾارُو پرميشوَر ݾون پراٿنا ڪرو ڪہ جڪو باتون ٿون ڪيئَي ھَي، اُوئون ۾ ھيڪ ڀِي مھَي تي نِي آوَي۔“
25 پَڇي پطرس ھانَ يُوحنا پرڀُو يسُوع رِي گواھِي ڏي ھانَ پرميشوَر رَي باتون رو پرچار ڪري يروشلم شھر ۾ پاڇا گيا۔ مارگ ۾ جاوتي بِݪا او سامريا صُوبَي رَي تموم گھڻَي گون ۾ پرڀُو يسُوع رَي بارَي ۾ خُوشِي رِي خبر رو پرچار ڪرتا گيا۔
فِلپس ھانَ اِٿوپيا مُلڪ رو وزير
26 پَڇي پرميشوَر رَي فريشتَي فِلپس نَي ڪھيو ڪہ، ”اُٺِي ھانَ ڏکڻ ڏيݾا رڻ پَٽ ۾ اُوئي مارگ تي جا، جڪو يروشلم شھر ݾون غزا شھر ڏيݾا جاوَي ھَي۔“ 27 پَڇي فِلپس اُٺيو ھانَ اُوئي علائقَي ڏيݾا بَئير ھويو۔ مارگ ۾ اُوئي ھيڪَي مِنک نَي ڏيٺو، جڪو اِٿوپيا مُلڪ رو ھتو ھانَ او کدڙو ھتو۔ او اِٿوپيا مُلڪ رِي روڻِي ڪنداڪي رَي خزونَي رو وزير ھتو۔ او يروشلم شھر ۾ ڀگتي تي گيو ھتو۔ 28 او آپرِي گھوڙا گاڏِي تي پاڇو آپرَي مُلڪ ڏيݾا جاوتو پڙيو ھانَ يسعياھ نبِي رو شاستر پڙھتو جاوتو پڙيو۔ 29 پويتر آتما فِلپس نَي ڪھيو ڪہ، ”نيڙو جا ھانَ اُوئي گھوڙا گاڏِي ڀيڙو بَي۔“ 30 تو فِلپس ناݾي اُوئي ڪڍي گيو ھانَ اُوئي نَي يسعياھ نبِي رو شاستر پڙھتَي ݾُڻيو۔ پَڇي فِلپس اُوئي ݾون پُوڇو ڪہ، ”ڪِي تُو جڪو پڙھَي پڙيو، او ݾمجَھي ڀِي ھَي؟“ 31 اُوئي ڪھيو ڪہ، ”جترِي توڻي ڪو ݾمجھاوڻ آݪو نِي ھووَي، تو ھُون ھاڦي ڪيڪر ݾمجھي ݾگھون ھون؟“ پَڇي اُوئي فِلپس نَي مِنٿ ڪِي ڪہ، ”مھربونِي ڪري آئي مھَي ڀيڙو ٻيݾ۔“ 32 شاستر ۾ جڪو اُوئي پڙھيو، او اَي ھتو ڪہ،
”مِنک اُوئي نَي رڍ آݪِي ڪار باڍڻ رَي ݾارُو لي گيا،
جون گھيٽو آپرَي باݪ ڪترڻ آݪَي آگھي، ماٺ ڪري اُڀو رَي ھَي،
اِيئج نمُونَي اُوئي آپرو مونڏو ڪونھي کوليو۔
33 اُوئي نَي بي عِزتو ڪيئو ھانَ اُوئي نَي اِنصاف ڪونھي مِليو۔
اُوئي رِي پيڙھِي ۾ ڪُڻ ھوشَي، جڪو اُوئي رَي بارَي ۾ ݾُڻاشَي؟
ڪيونڪہ ڌرتي تي اُوئي رِي زندگِي مِٽائِي جاوَي ھَي۔“
34 پَڇي وزير فِلپس نَي ڪھيو ڪہ، ”مھربونِي ڪري مھنَي ݾُڻا، اَي نبِي آپرَي بارَي ۾ بات ڪرَي پڙيو، جون ڪَي ٻيجَي رَي بارَي ۾؟“ 35 اِيئي تي فِلپس شاستر رِي اُوئيج بات ݾون شرُوع ڪيئو ھانَ اُوئي نَي پرڀُو يسُوع رَي بارَي ۾ خُوشِي رِي خبر ݾُڻائِي۔ 36 جڏي او بيتا بيتا ھيڪ اھڙِي جگھا تي پُگا، جيٿ پوڻي ھتو، تو وزير ڪھيو ڪہ، ”جو، ايٿ پوڻي ڀِي ھَي، ھمَي مھنَي ڪُڻ پويتر سِنون ليوَڻ ݾون پالشَي؟“ 37 [پَڇي فِلپس ڪھيو ڪہ، ”جي تُو ݾاچَي من ݾون وِشواس راکَي ھَي، تو تُو پويتر سِنون لي ݾگھَي ھَي۔“ اُوئي ڪھيو ڪہ، ”ھُون وِشواس راکون ھون ڪہ يسُوع مَسيح، ايشوَر رو ڏيڪرو ھَي۔“]
38 پَڇي وزير گھوڙا گاڏِي نَي اُڀڻ رو حُڪم ڏينو۔ او گھوڙا گاڏِي ݾون اُتري پوڻي ۾ گيا ھانَ فِلپس اُوئي نَي پويتر سِنون ڏينو۔ 39 جڏي او پوڻي ݾون ٻاھر نڪريا، تو پرميشوَر رو آتما فِلپس نَي اوٿ ݾون کڻي لي گيو ھانَ وزير ڀڙي فِلپس نَي ڪونھي ڏيٺو ھانَ او خُوش ھوئي آپرو مارگ جھالي بُوئو گيو۔ 40 پَڇي فِلپس اشدُود شھر ۾ پُگو ھانَ بيتو بيتو اوٿ رَي ݾجَي شھرون ۾ پرڀُو يسُوع رو پرچار ڪرتو ڪرتو قيصريا شھر ۾ پُگو۔