سنتون را ڪوم 7

اِستيفِنس نَي ڌرمي پنچائيت رو ڏوھي ڪرڻ

پَڇي ايشوَر رَي پُوجاريون رَي ݾردار، اِستيفِنس ݾون پُوڇو ڪہ، ”ڪِي اَي باتون ݾاچَي ھَي؟“ ‏2 اِستيفِنس بݪتِي ڏينِي ڪہ، ”اي ڀايون ھانَ اَگووڻون، مھارِي بات ݾُڻو، موٽِي مھما آݪَي ايشوَر آپڻَي ڏاڏَي اڀراھيم نَي اُوئي ٽيم درشن ڏينو، جڏي او حاران شھر ۾ ريوَڻ ݾون پيل مسوپتاميا مُلڪ ۾ ريتو۔ ‏3 ايشوَر اُوئي نَي ڪھيو ڪہ، ’تُو آپرَي عزيزون ھانَ آپرَي مُلڪ نَي ڇوڙي اُوئي مُلڪ ۾ جا، جڪو ھُون ٿنَي بتائين۔‘ ‏4 پَڇي او آپرو مُلڪ يعني ڪسديون رو مُلڪ ڇوڙي حاران شھر ۾ ريوَڻ لاگو۔ پَڇي اُوئي رَي ٻاپ رَي مرڻ ݾون پَڇي ايشوَر اُوئي نَي اِيئي مُلڪ ۾ لي آيو، جيٿ ٿي اَڃون توڻي رو ھو۔ ‏5 اُوئي ٽيم ايشوَر اُوئي نَي ايٿ ڪو ڀِي زمين ڪونھي ڏينِي، اترِي توڻي ڪہ پگ راکڻ رِي ڀِي جگھا ڪونھي ڏينِي۔ اُوئي ٽيم اڀراھيم رو ڪو ڀِي اولاد ڪونھي ھتو، پڻ تو ڀِي ايشوَر اَي واعدو ڪيئو ھتو ڪہ، ’ھُون اَي زمين ٿنَي ھانَ ٿَي ݾون پَڇي ٿارِي پيڙھِي نَي ھميشا رَي ݾارُو ڏئين۔‘ ‏6 ايشوَر اَي ڀِي ڪھيو ڪہ، ’ٿارِي پيڙھِي آݪا ڪَي ٻيجَي مُلڪ ۾ پرديسي آݪِي ڪار ريشَي۔ اوٿ را مِنک اُوئون نَي غُلوم ٺاشَي ھانَ اُوئون تي چار ݾئو ݾالون توڻي ظُلم ڪرشَي۔‘ ‏7 پَڇي ايشوَر اَي ڀِي ڪھيو ڪہ، ’جڪو قوم اُوئون نَي غُلوم ٺاشَي، ھُون اُوئون نَي سزا ڏئين۔ پَڇي او اوٿ ݾون نڪري آشَي ھانَ اِيئي جگھا تي آئي مھارِي ڀگتي ڪرشَي۔‘ ‏8 ايشوَر اڀراھيم ݾون وچن ڪيئو، جڪَي رو نِشون کَتنو ھتو۔ اِيئي رَي ڪري اڀراھيم آپرَي ڏيڪرَي اضحاق رَي جنم رَي آٺوين ڏِن اُوئي رو کَتنو ڪيئو۔ اضحاق ݾون يعقُوب جايو ھانَ اُوئي رو کَتنو ڪيئو، يعقُوب را ٻارھَي ڏيڪرا جايا ھانَ اُوئي اُوئون را ڀِي کَتنا ڪيئا۔ اُوئون ٻارھون ڏيڪرون ݾون آپڻا ٻارھَي قبيلا ھويا ھانَ ھر ھيڪ آپرَي آپرَي قبيلَي رو اَگووڻ ھتو۔

‏9 پَڇي يعقُوب را ڏيڪرا آپرَي ڀائي يُوسف ݾون ݾاݪ ڪرڻ لاگا ھانَ اُوئي نَي واپاريون نَي بيچي ڇوڙيو ھانَ واپاري اُوئي نَي غُلوم ٺائي مِصر مُلڪ ۾ لي گيا، پڻ ايشوَر اُوئي ڀيڙو ھتو۔ ‏10 ايشوَر يُوسف نَي ݾجَي ڏُکون ݾون بچايو ھانَ اُوئي نَي اھڙِي ݾمجھ ڏينِي ڪہ مِصر مُلڪ رَي بادشاھ فرعُون خُوش ھوئي اُوئي نَي مِصر مُلڪ رو موٽو وزير ھانَ آپرَي محل رو اَگووڻ ٺاھيو۔ ‏11 پَڇي ݾجَي مِصر مُلڪ ھانَ ڪنعان علائقَي ۾ ڏُڪاݪ پڙيو۔ مِنک تموم گھڻِي مُصيبت ۾ ھتا ھانَ آپڻَي ٻاپ ڏاڏون ڪڍي ڌون ختم ھوئي گيو۔ ‏12 جڏي يعقُوب نَي خبر پڙِي ڪہ مِصر مُلڪ ۾ ڌون ھَي، تو اُوئي آپرَي ڏيڪرون نَي ڌون مول ليوَڻ رَي ݾارُو پيلڪو گُھمرو اوٿ ميليا۔ ‏13 جڏي او ٻيجو گُھمرو مِصر مُلڪ ۾ گيا، تو يُوسف آپرَي ڀايون نَي آپرِي اوݪکوڻ ڪرائِي ھانَ فرعُون بادشاھ نَي ڀِي آپرَي خاندان رَي بارَي ۾ ݾُڻايو۔ ‏14 اُوئي ݾون پَڇي يُوسف آپرَي اَبا يعقُوب ھانَ ݾجَي گھر نَي مِصر مُلڪ ۾ اَڻايو، اَي ݾجائِي پنجھتر مِنک ھتا۔ ‏15 پَڇي يعقُوب مِصر مُلڪ ۾ ريوَڻ لاگو۔ اوٿج او ھانَ آپڻا ٻاپ ڏاڏا مري گيا۔ ‏16 پَڇي اُوئون را لاش سِڪم شھر ۾ لي جائي اُوئي مُڪومون ۾ ٻُوريا، جڪو ٻنِي اڀراھيم حمُور رَي ڏيڪرون ݾون مول لِي ھتِي۔

‏17 جڪو واعدو ايشوَر اڀراھيم ݾون ڪيئو ھتو، جڏي اُوئي رو پُورو ھوئڻ رو ٽيم آيو، تو مِصر مُلڪ ۾ آپڻا مِنک تموم گھڻا بڌڻ لاگا۔ ‏18 اُوئي ٽيم ٻيجو بادشاھ مِصر مُلڪ تي حڪُومت ڪرتو جڪو يُوسف نَي ڪونھي اوݪکتو۔ ‏19 اُوئي آپڻِي قوم نَي دوکو ڏينو ھانَ آپڻَي ٻاپ ڏاڏون ݾون اِترو تو ظُلم ڪيئو ڪہ اُوئون نَي آپرا ٻاݪيا گھرون ݾون ٻاھر نوکڻا پڙيا ڪہ او مري جاوَي۔ ‏20 اُوئون ڏِنون ۾ مُوسيٰ جايو جڪو تموم گھڻو ڦُوٽرو ھتو ھانَ تينون مھيڻون توڻي آپرَي اَبا رَي گھر ۾ نِنيو موٽو ھويو۔ ‏21 پڻ جڏي اُوئي نَي ڀِي نوکيو، تو فرعُون بادشاھ رِي ڏيڪرِي اُوئي نَي کڻيو ھانَ اُوئي نَي آپرو ڏيڪرو ڪري راکيو۔ ‏22 پَڇي مُوسيٰ مِصري قوم را ݾجائِي عِلم ݾيکيا۔ او ٻولڻ ھانَ ڪوم ۾ ھوشيار ھتو۔

‏23 پَڇي جڏي مُوسيٰ چاليھ ݾالون رو ھويو، تو اُوئي نَي آپرَي ڀايون يعني اِسرائيلي قوم رو حال احوال ليوَڻ رو خيال آيو۔ ‏24 جڏي اُوئي ھيڪَي مِصري مِنک نَي اِسرائيلي تي ظُلم ڪرتَي ڏيٺو، تو اُوئي رِي مدد ڪِي ھانَ اُوئي ظُلمي مِصري مِنک ݾون بدلو ليوَڻ رَي ݾارُو اُوئي نَي ماري ڇوڙيو۔ ‏25 اُوئي ݾوچو ڪہ، ’مھارا ڀائي اَي بات ݾمجھي جاشَي ڪہ ايشوَر اُوئون نَي مھارَي وسيلَي ڇوڙاشَي۔‘ پڻ ڪو ڀِي اُوئي رِي بات ڪونھي ݾمجھو۔ ‏26 پَڇي ٻيجَي ڏِن مُوسيٰ ٻيئون اِسرائيلي قوم آݪون نَي آپت ۾ بِڙھتا ڏيٺا، تو اُوئون نَي ٺاوڻ رِي ڪوشش ڪرڻ لاگو ھانَ اُوئون نَي ڪھيو ڪہ، ’مھارِي بات ݾُڻو، ٿي تو آپت ۾ ڀائي ھو۔ آپت ۾ ڪيئون بِڙھيجو ھو؟‘ ‏27 پڻ اُوئون ۾ جڪو ٻيجَي ݾون بِڙھتو پڙيو، اُوئي مُوسيٰ نَي ڌِڪو ڏي ڪھيو ڪہ، ’ڪِي تُو مھورو اَگووڻ جون جَج ھَي؟ ‏28 ڪِي تُو مھنَي ڀِي اِيئون مارِي، جون ٿَي ڪالھي اُوئي مِصري نَي ماريو ھتو؟‘ ‏29 جڏي مُوسيٰ اَي بات ݾُڻِي، تو اوٿ ݾون ناٺو ھانَ جائي مديان مُلڪ ۾ پرديسي آݪِي ڪار ريوَڻ لاگو۔ اوٿج اُوئي بيئان ڪيئو ھانَ اُوئي را ٻي ڏيڪرا جايا۔

‏30 چاليھ ݾالون ݾون پَڇي مُوسيٰ، ايشوَر رو فريشتو سينا جبل رَي رڻ پَٽ ۾ باݾڏي رِي جھاݪ آݪِي ڪار ھيڪَي ٻُوٺَي ۾ ڏيٺو۔ ‏31 مُوسيٰ اَي جوئي حيرون ھويو ھانَ اُوئي نَي چِٽو جوئڻ رَي ݾارُو نيڙو گيو، تو اُوئي پرميشوَر رو آواز ݾُڻيو ڪہ، ‏32 ’ھُون اوج ايشوَر ھون جڪَي نَي ٿارا ٻاپ ڏاڏا، اڀراھيم، اضحاق ھانَ يعقُوب منتا۔‘ تو مُوسيٰ ڏڪڻ لاگو ھانَ اُوئي ٻُوٺَي نَي جوئڻ رِي ھِمت ڪونھي ڪِي۔ ‏33 پرميشوَر اُوئي نَي ڪھيو ڪہ، ’آپرَي پگون ݾون جُتا اُتار، ڪيونڪہ جڪِي جگھا تي تُو اُڀو ھَي، او پويتر ڌرتي ھَي۔ ‏34 مھَي مِصر مُلڪ ۾ آپرِي چُونڊيوڙِي قوم تي ظُلم ھوتا ڏيٺا ھَي ھانَ اُوئون را ݾُڏڪا ڀِي ݾُڻيا ھَي۔ اِيئي رَي ڪري ھُون اُوئون نَي آزاد ڪراوڻ رَي ݾارُو آيو ھون۔ ھمَي تياري ڪر، ھُون ٿنَي مِصر مُلڪ ڏيݾا ميلون پڙيو۔‘ ‏35 اَي اوج مُوسيٰ ھَي جڪَي رِي بات آپڻَي ٻاپ ڏاڏون ڪونھي منِي ھانَ ڪھيو ڪہ، ’ڪِي تُو مھورو اَگووڻ جون جَج ھَي؟‘ پڻ ايشوَر اُوئي نَي اَگووڻ ھانَ آزاد ڪراوڻ آݪو ٺائي اُوئي فريشتَي رَي وسيلَي ميليو، جڪو ٻݪتَي ٻُوٺَي ۾ ڏيکيجڻ ۾ آيو ھتو۔ ‏36 اُوئي مُوسيٰ اِسرائيلي قوم نَي مِصر مُلڪ ݾون ڪاڍيا ھانَ اُوئي مِصر مُلڪ، قُلزم ݾمُوندر ھانَ رڻ پَٽ ۾ چاليھ ݾالون توڻي پرچا ھانَ عجيب ڪوم بتايا۔ ‏37 اَي اوج مُوسيٰ ھَي جڪَي اِسرائيلي قوم نَي ڪھيو ھتو ڪہ، ’ايشوَر ٿونرِي قوم ݾون مھَي جھڙو ھيڪ نبِي ميلشَي۔‘ ‏38 جڏي رڻ پَٽ ۾ ݾجِي اِسرائيلي قوم ڀيڙِي ھتِي، تو اِيئج مُوسيٰ آپڻَي ٻاپ ڏاڏون ھانَ اُوئي فريشتَي ڀيڙو ھتو، جڪَي سينا جبل تي مُوسيٰ ݾون باتون ڪيئَي۔ اِيئي مُوسيٰ نَي ايشوَر رَي طرفون زندگِي رو مارگ بتاوڻ آݪا حُڪم مِليا ڪہ او آپون توڻي اُوئون نَي پُگاوَي۔ ‏39 پڻ آپڻَي ٻاپ ڏاڏون مُوسيٰ رِي بات ڪونھي منِي ھانَ اُوئي نَي ڦِٽو ڪيئو ھانَ اُوئون رَي من ۾ مِصر مُلڪ پاڇا جاوڻ رو خيال آيو۔ ‏40 پَڇي اُوئون ھارُون نَي ڪھيو ڪہ، ’مھونَي خبر ڪونھي ڪہ مُوسيٰ جڪو مھونَي مِصر مُلڪ ݾون ڪاڍي لي آيو ھَي، ھمَي او ڪيٿ ھَي؟ اِيئي رَي ڪري تُو مھورَي ݾارُو اھڙو ڏيوتا ٺا، جڪو مھورِي اَگووڻِي ڪرَي۔‘ ‏41 تو اُوئون ھيڪ ٽوگھڙَي رِي مُورتِي ٺائِي ھانَ اُوئي رَي ݾارُو ٻَليدون ڪيئا ھانَ پَڇي آپرَي ھاٿون رِي ٺاھيوڙِي مُورتِي رَي ݾارُو خُوشِي ڪرڻ لاگا۔ ‏42 اِيئي رَي ڪري ايشوَر اُوئون ݾون آپرو مونڏو ڦيرايو ھانَ اُوئون نَي ڦِٽا ڪيئا ڪہ او جائي ݾُورج، چندر ھانَ تارون رِي پُوجا ڪرَي۔ جون نبيون رَي شاستر ۾ لِکيوڙو ھَي ڪہ،

’اي اِسرائيلي قوم آݪون،

ٿون چاليھ ݾال رڻ پَٽ ۾،

جڪو ڀيٽائون ھانَ ٻَليدون ڪيئا،

او مھارَي ݾارُو ڪونھي ھتا۔

‏43 پڻ ٿي تو مولڪ ڏيوتا رو تنٻُو

ھانَ رفان ڏيوتا رِي تارَي آݪِي مُورتِي

آپ ڀيڙِي راکتا،

ٿون او پُوجا رَي ݾارُو ٺاھئَي ھتَي۔

ھمَي ھُون ٿونَي بابل مُلڪ ݾون ڀِي اݪگا ميلين۔‘

‏44 مھورَي ٻاپ ڏاڏون ڪڍي رڻ پَٽ ۾ ايشوَر رو پويتر تنٻُو ھتو۔ اُوئي نَي اِيئوج ٺاھيو جھڙَي نمُونَي ايشوَر، مُوسيٰ نَي حُڪم ڏينو ھتو۔ ‏45 او تنٻُو مھورَي ٻاپ ڏاڏون نَي اُوئون رَي بُوڍيون ݾون مِليو ھتو۔ پَڇي جڏي او يشُوع ڀيڙا آيا، تو او تنٻُو ڀِي ڀيڙو لي آيا۔ پَڇي ايشوَر ھݪَي ھݪَي اُوئي ٻيجَي قومون نَي اُوئون رَي مُلڪ ݾون ٻاھر ڪاڍي ڇوڙيا ھانَ مھورَي ٻاپ ڏاڏون اُوئي مُلڪ تي قبضو ڪيئو۔ او پويتر تنٻُو دائُود رَي ٽيم توڻي اُوئون ڪڍي ھتو۔ ‏46 ايشوَر دائُود بادشاھ تي ڪِرپا ڪِي۔ اُوئي ايشوَر ݾون موڪل مونگِي ڪہ، ’ھُون اِسرائيلي قوم رَي ݾارُو ٿارو گھر ٺڙائُون۔‘ ‏47 پڻ اِيئون ڪونھي ھويو، پڻ سُليمون بادشاھ ايشوَر رو گھر ٺڙايو۔ ‏48 حقيقت ۾ پرميشوَر، اِنسون رَي ھاٿ رَي ٺاھيوڙَي گھرون ۾ ڪونھي ريتو۔ اِيئي رَي ڪري او آپرَي نبِي رَي وسيلَي اَي ڪَي ھَي ڪہ،

‏49 ’آڪاش مھارو تخت ھَي

ھانَ ڌرتي مھارَي پگون رِي ݾندلِي ھَي۔

تو ٿي مھارَي ݾارُو ڪھڙو گھر ٺاشو؟

جون مھارَي آروم رِي جگھا ڪئِي ھَي؟

‏50 ڪِي اَي ݾجَي شيون مھَي ڪونھي ٺائَي؟‘“

‏51 پَڇي اِستيفِنس اَي ڀِي ڪھيو ڪہ، ”ٿي ضدي مِنک ھو۔ نَڪو ٿي ايشوَر رِي بات من ۾ راکتا ھانَ نَڪو تو ٿي ايشوَر رِي بات ڌھيون ݾون ݾُڻتا۔ ٿي آپرَي ٻاپ ڏاڏون آݪِي ڪار ھميشا پويتر آتما رَي خلاف ڪوم ڪرو ھو۔ ‏52 نبيون ۾ اھڙو ڪيو ھَي، جڪَي نَي ٿونرَي ٻاپ ڏاڏون ڏُک نِي ڏينو ھووَي؟ ٿونرَي ٻاپ ڏاڏون اُوئون نَي ڀِي ماري ڇوڙيا، جڪون ايشوَر رَي نيڪ ٻونھَي رَي آوڻ رِي اگڪٿِي ڪِي ھتِي ھانَ ٿون اُوئي نَي ڀِي جھلائي مرائي ڇوڙيو۔ ‏53 ٿونَي شريعت، فريشتون رَي وسيلَي ملِي، پڻ ٿي اُوئي تي ڪونھي بُوئا۔“

اِستيفِنس نَي پٿرون ݾون مارڻ

‏54 جڏي ڌرمي پنچائيت اِستيفِنس رَي اَي باتون ݾُڻئَي، تو اُوئون نَي تموم گھڻِي ريݾ آئِي ھانَ اُوئي تي ڏونت پيݾَڻ لاگا۔ ‏55 پڻ اِستيفِنس پويتر آتما ݾون ڀريجي آڪاش ڏيݾا جويو، تو ايشوَر اُوئي نَي درشن ڏينو ھانَ اُوئي پرڀُو يسُوع نَي ايشوَر رَي ݾاجَي پاݾَي اُڀوڙو ڏيٺو۔ ‏56 اِيئي تي اِستيفِنس مِنکون نَي ڪھيو ڪہ، ”جوئو، ھُون آڪاش نَي کُليوڙو ڏيکون پڙيو ھانَ مُنش پُتر عِزت ھانَ اِختياري ݾون ايشوَر رَي ݾاجَي ھاٿ اُڀو ھَي۔“ ‏57 اَي بات ݾُڻي ڌرمي پنچائيت آݪا زور ݾون ھُل ڪرڻ لاگا ھانَ آپرا ڪونَ بند ڪري ڇوڙيا ھانَ ݾجائِي ڀيڙا ھوئي اِستيفِنس نَي مارڻ رَي ݾارُو ناٺا۔ ‏58 او اُوئي نَي شھر ݾون ٻاھر لي گيا ھانَ ٺُپ مارڻ رَي ݾارُو پٿر ھڻڻ لاگا۔ اِستيفِنس رَي خلاف ڪُوڙِي گواھِي ڏيوَڻ آݪون آپرا گاڀا سائُول نون رَي ھيڪَي نوجوان رَي پگون ۾ راکيا۔ ‏59 جڏي او اِستيفِنس نَي پٿر ھڻتا پڙيا، تو او پراٿنا ڪرتو پڙيو ڪہ، ”اي پرڀُو يسُوع، مھارِي آتما نَي قبُول ڪر۔“ ‏60 پَڇي اِستيفِنس آپرا گوڏا کوڙي زور ݾون ڪھيو ڪہ، ”اي پرڀُو، اِيئي بات رو ڏوھ اِيئون تي نِي لگائي۔“ اَي ڪئي اُوئي دم ڏينو۔