يُوحنا 17

پرڀُو يسُوع رو آپرَي چيلون رَي ݾارُو پراٿنا

جڏي پرڀُو يسُوع اَي ݾجَي باتون ڪيئَي، تو اُوئي آڪاش ڏيݾا جوئي ڪھيو ڪہ، ”اي پِتا، او ٽيم آيو رو ڪہ تُو آپرَي ڏيڪرَي رِي مھما ظاھر ڪر ڪہ ڏيڪرو ٿارِي مھما ظاھر ڪرَي، ‏2 ڪيونڪہ ٿَي ݾجائِي مِنک مھارَي اِختيار ۾ ڏينا ھَي ڪہ ھُون اُوئون نَي اَمر جيوَن ڏيئون جڪو ٿَي مھنَي ڏينا ھَي۔ ‏3 او اَمر جيوَن اَي ھَي ڪہ او ٿَي ھيڪَي ݾاچَي ايشوَر نَي اوݪکَي ھانَ مھَي يسُوع مَسيح نَي ڀِي اوݪکَي جڪَي نَي ٿَي ميليو ھَي۔ ‏4 جڪو ڪوم ٿَي مھنَي ڏينو ھتو، او مھَي ڪيئو رو۔ مھَي ٿارو ݾجو ڪوم پُورو ڪري ڌرتي تي ٿارِي مھما ظاھر ڪِي ھَي۔ ‏5 اي پِتا، ھمَي تُو مھنَي آپرِي او مھما ڏي جڪو ھُون جگت رَي ٺھيجڻ ݾون پيل ٿَي ڀيڙِي راکتو۔ ‏6 مھَي ٿارو نون اِيئون مِنکون ۾ ظاھر ڪيئو ھَي جڪو ٿَي جگت ۾ مھارَي ݾارُو چُونڊيا ھتا۔ اَي مِنک ٿارا ھتا ھانَ ٿَي مھنَي ڏينا ھانَ اَي ٿارَي باتون تي بُوئا ھَي۔ ‏7 ھمَي اُوئون نَي خبر ھَي ڪہ ٿارَي ڪوم ھانَ ٿارَي باتون جڪو ٿَي مھنَي ڏينَي ھَي، او ݾجَي ٿارَي طرفون ھَي، ‏8 ڪيونڪہ جڪو باتون ٿَي مھنَي ݾُڻائَي ھتَي مھَي اِيئون نَي ݾُڻائَي رَي ھانَ اِيئون اُوئون باتون رو وِشواس ڪيئو ھَي۔ اِيئون نَي ݾاچ رِي خبر پڙِي ھَي ڪہ ھُون ٿارَي طرفون آيوڙو ھون، اِيئون وِشواس راکيو ھَي ڪہ ٿَي مھنَي ميليو ھَي۔ ‏9 ھُون اِيئي جگت رَي ݾارُو مِنٿ ڪونھي ڪرتو، پڻ اِيئون رَي ݾارُو مِنٿ ڪرون ھون جڪو مِنک ٿَي مھنَي ڏينا ھَي، ڪيونڪہ اَي ٿارا ھَي۔ ‏10 جڪو مِنک ٿَي مھنَي ڏينا ھَي، اَي ݾجائِي ٿارا ھَي ھانَ جڪو ٿارا ھَي، او ݾجائِي مھارا ھَي ھانَ اِيئون ۾ مھارِي مھما ظاھر ھوئِي ھَي۔ ‏11 ھُون ھمَي گھڻو ٽيم اِيئي جگت ۾ ڪونھي رون، پڻ ھمَي ٿَي ڏيݾا آئُون پڙيو پڻ اَي مِنک اِيئي جگت ۾ ريشَي۔ اي پويتر پِتا، تُو آپرَي اُوئي طاقت آݪَي نون رَي ڪري جڪو ٿَي مھنَي ڏينو ھَي، اِيئون رِي ݾنڀال ڪر ڪہ اَي ھيڪ ھووَي جون آپي ھيڪ ھون۔ ‏12 جترِي توڻي ھُون اِيئون ڀيڙو ھتو، مھَي ٿارَي اُوئي نون رِي طاقت ݾون اِيئون رِي ݾنڀال ڪِي۔ ھُون اِيئون نَي نُقصون ݾون بچاوتو رھيو رُگو اُوئي ھيڪَي رَي جڪو مرڻ رَي لائق ھتو ھانَ اِيئي نمُونَي شاستر رِي بات پُورِي ھوئِي ھَي۔ ‏13 ھمَي ھُون ٿَي ڪڍي پاڇو آئُون پڙيو۔ ھُون اَي باتون جگت ۾ رئي اِيئي رَي ڪري ڪونھ پڙيو ڪہ مھارَي چيلون را من خُوشِي ݾون ڀريجي جاوَي۔ ‏14 مھَي اِيئون نَي ٿارَي باتون ݾُڻائَي، پڻ دُنيا رَي مِنکون اِيئون ݾون دُشمنِي راکِي، ڪيونڪہ جون ھُون دُنيا رو ڪونھي، اَي ڀِي اِيئي دُنيا را ڪونھي۔ ‏15 ھُون اَي مِنٿ ڪونھي ڪرتو ڪہ تُو اِيئون نَي جگت ݾون ڌار ڪر، پڻ اِيئون نَي شيطون ݾون بچائي راک۔ ‏16 جھڙَي نمُونَي ھُون دُنيا رو ڪونھي اِيئي نمُونَي اَي ڀِي دُنيا را ڪونھي۔ ‏17 ٿارَي باتون ݾاچَي ھَي، اِيئي رَي ڪري اِيئون نَي پويتر ڪر۔ ‏18 جھڙَي نمُونَي ٿَي مھنَي جگت ۾ ميليو ھَي، اِيئي نمُونَي مھَي ڀِي اِيئون نَي جگت ۾ ميليا ھَي۔ ‏19 ھُون اِيئون رَي ݾارُو آپرو آپنَي ٿارَي نون رو ڪرون ھون ڪہ اَي ڀِي ݾچائي رَي وسيلَي پويتر ھوئي جاوَي۔ ‏20 ھُون رُگو اِيئون چيلون رَي ݾارُو مِنٿ ڪونھي ڪرتو، پڻ اُوئون ݾجون رَي ݾارُو ڀِي جڪو اِيئون رَي پرچار رَي ڪري مھَي تي وِشواس راکشَي۔ ‏21 اي پِتا، او ݾجائِي ھيڪ ھووَي۔ جون تُو مھَي ۾ ھَي ھانَ ھُون ٿَي ۾ ھون اِيئي نمُونَي او ڀِي آپون ۾ ھووَي ڪہ دُنيا را مِنک وِشواس راکَي ڪہ ٿَي مھنَي ميليو ھَي۔ ‏22 جڪو مھما ٿَي مھنَي ڏينِي ھَي، او مھما مھَي اِيئون نَي ڀِي ڏينِي ھَي ڪہ اَي ھيڪ ھووَي، جھڙَي نمُونَي آپي ھيڪ ھون۔ ‏23 جھڙَي نمُونَي ھُون اِيئون ۾ ھون ھانَ تُو مھَي ۾ ھَي، اِيئوج اَي ڀِي آپت ۾ پُورَي نمُونَي ھيڪ ھووَي ھانَ دُنيا نَي خبر پڙَي ڪہ ٿَي مھنَي ميليو ھَي ھانَ جھڙَي نمُونَي ٿَي مھَي ݾون پريم ڪيئو اِيئج نمُونَي اِيئون ݾون ڀِي ڪيئو ھَي۔ ‏24 اي پِتا، مھارِي مرضِي ھَي ڪہ جيٿ ھُون ھون، اوٿ اَي ڀِي مھَي ڀيڙا رَي جڪو ٿَي مھنَي ڏينا ھَي ڪہ اَي مھارِي اُوئي مھما نَي ڏيکَي جڪو ٿَي مھنَي ڏينِي ھَي، ڪيونڪہ ٿَي جگت رَي ٺھيجڻ ݾون پيل مھَي ݾون پريم ڪيئو۔ ‏25 اي نيڪ پِتا، دُنيا رَي مِنکون ٿنَي ڪونھي اوݪکيو، پڻ ھُون ٿنَي اوݪکون ھون ھانَ اِيئون نَي ڀِي خبر ھَي ڪہ ٿَي مھنَي ميليو ھَي۔ ‏26 مھَي اِيئون نَي ٿارَي نون رَي بارَي ۾ ݾُڻايو ھانَ ݾُڻاوتو رئين ڪہ جڪو پريم ٿَي مھَي ݾون ڪيئو، او اِيئون ۾ ڀِي ھووَي ھانَ ھُون اِيئون ۾ رون۔“