انگُورون رِي بيل رو مِثال
15
پرڀُو يسُوع آپرَي چيلون نَي ڪھيو ڪہ، ”انگُورون رِي ݾاچِي بيل ھُون ھون ھانَ مھارو پِتا باگائِي ھَي۔ 2 جڪو ٽاݪِي مھَي ۾ ھَي، پڻ اُوئي ۾ ڦل ڪونھي لاگتو، اُوئي نَي او باڍَي ھَي ھانَ جڪو ٽاݪِي ڦل ڏَي ھَي اُوئي نَي او ڇونگَي ھَي ڪہ وڌيڪ ڦل لاگَي۔ 3 پڻ جڪو باتون مھَي ٿونَي ݾُڻائَي ھَي، اُوئون ݾون ٿي آڇا اُوجݪا ھويا ھو۔ 4 ٿي مھَي ۾ رو ھانَ ھُون ٿون ۾ رون۔ ڪَي ڀِي ٽاݪِي ۾ اُترِي توڻي ڦل ڪونھي لاگتو، جترِي توڻي او بيل ۾ لاگوڙِي نِي ھووَي۔ اِيئي نمُونَي جي ٿي مھَي ۾ ڪونھي رو، تو ٿون ۾ ڪو ڀِي ڦل ڪونھي لاگَي۔ 5 انگُورون رِي بيل ھُون ھون ھانَ ٿي ٽاݪَي ھو۔ جڪو مھَي ۾ رَي ھَي ھانَ ھُون اُوئي ۾ رون ھون، تو او تموم گھڻو ڦل ڏَي ھَي، ڪيونڪہ ٿي مھَي ݾون ڌار ھوئي ڪئين ڪونھي ڪري ݾگھتا۔ 6 جي ڪُڻ مھَي ۾ ڪونھي ريتو، تو او ٽاݪِي آݪِي ڪار اُڇلايو جاوَي ھَي۔ اھڙَي ٽاݪَي ݾُوڪي جاوَي ھَي ھانَ مِنک اُوئون نَي ڀيڙَي ڪري باݾڏي ۾ نوکَي ھَي ھانَ او ٻَݪي جاوَي ھَي۔ 7 جي ٿي مھَي ۾ رو ھانَ مھارَي باتون ٿون ۾ رَي، تو پَڇي جڪو وڻَي او مونگو، تو ٿونرَي ݾارُو ھوئي جاشَي۔ 8 جڏي ٿي تموم گھڻو ڦل ڏيئو ھو، تو اِيئي ݾون خبر پڙَي ھَي ڪہ ٿي مھارا چيلا ھو ھانَ اِيئي ݾون مھارَي پِتا رِي مھما ظاھر ھوشَي۔ 9 جون پِتا مھَي ݾون پريم ڪيئو ھَي، اِيئوج مھَي ڀِي ٿون ݾون پريم ڪيئو ڪہ ٿي ڀِي مھارَي پريم ۾ رو۔ 10 جي ٿي مھارَي حُڪمون تي بيتا ريشو، تو مھارَي پريم ۾ ريشو۔ جون ھُون آپرَي پِتا رَي حُڪمون تي بُوئو ھانَ اُوئي رَي پريم ۾ رون ھون۔ 11 مھَي اَي باتون ٿونَي اِيئي رَي ڪري ݾُڻائَي ڪہ مھارِي خُوشِي ٿون ۾ ھووَي ھانَ ٿونرِي خُوشِي پُورِي ھووَي۔ 12 مھارو اَي حُڪم ھَي ڪہ جون مھَي ٿون ݾون پريم ڪيئو، ٿي ڀِي ھيڪَي ٻيجَي ݾون پريم ڪرو۔ 13 اِيئي ݾون وڌيڪ ڪو ڀِي پريم ڪونھي ڪرتو ڪہ او آپرَي دوستون رَي ݾارُو آپرِي جان ڏَي۔ 14 جي ٿي مھارَي حُڪمون تي بو ھو، تو مھارا دوست ھو۔ 15 آج ݾون پَڇي ھُون ٿونَي غُلوم ڪونھي ڪونھ، ڪيونڪہ غُلوم نَي خبر ڪونھي ڪہ اُوئي رو مالڪ ڪِي ڪرَي پڙيو۔ پڻ آج ݾون ھُون ٿونَي دوست ڪونھ ھون، ڪيونڪہ جڪو باتون مھَي آپرَي پِتا ݾون ݾُڻئَي، او ݾجَي ٿونَي ݾُڻائَي رَي۔ 16 ٿون مھنَي ڪونھي چُونڊيو، پڻ مھَي ٿونَي چُونڊيا ھَي ھانَ اَي ذميوارِي ڏينِي ڪہ ٿونرَي زندگَي ڦلدار ھووَي ھانَ ٿونرو اَي ڦل ھميشا توڻي رَي۔ پَڇي ٿي پِتا ݾون مھارَي نون ݾون جڪو ڀِي مونگشو، تو او ٿونَي ملشَي۔ 17 ھُون ٿونَي اَي حُڪم ڏيئون ھون ڪہ ٿي ھيڪَي ٻيجَي ݾون پريم ڪرتا رو۔“مِنکون رِي پرڀُو يسُوع رَي چيلون ݾون نفرت
18 پرڀُو يسُوع ڪھيو ڪہ، ”جي دُنيا را مِنک ٿون ݾون نفرت ڪرَي ھَي، تو ياد راکو ڪہ ٿون ݾون پيل اُوئون مھَي ݾون ڀِي نفرت ڪِي ھَي۔ 19 جي ٿي دُنيا را ھويا ھووَنت، تو دُنيا را مِنک ٿونَي آپرا ݾمجھي پريم ڪرنت، پڻ ٿي اِيئي جگت را ڪونھي ھو، ڪيونڪہ مھَي ٿونَي چُونڊيا ھَي اِيئي رَي ڪري دُنيا را مِنک ٿون ݾون نفرت ڪرَي ھَي۔ 20 او بات ياد راکو جڪو مھَي ٿون ݾون ڪِي ھتِي ڪہ ڪو ڀِي غُلوم آپرَي مالڪ ݾون موٽو ڪونھي۔ جي اُوئون مھنَي ڏُک ڏينا ھَي، تو او ٿونَي ڀِي ضرُور ڏُک ڏيشَي۔ جي اُوئون مھارِي بات منِي، تو ٿونرِي بات ڀِي منشَي۔ 21 پڻ او ݾجو ڪئين مھارَي نون رَي ڪري ٿون ݾون ڪرشَي، ڪيونڪہ او اُوئي نَي ڪونھي اوݪکتا جڪَي مھنَي ميليو ھَي۔ 22 جي ھُون نِي آيو ھووَنت، ھانَ اُوئون نَي نِي ݾُڻايو ھووَنت، تو او پاپي ڪونھي ھويا ھووَنت، پڻ ھمَي اُوئون ڪڍي پاپ ڪرڻ رو ڪو ڀِي بھانو ڪونھي۔ 23 جڪو مھَي ݾون نفرت ڪرَي ھَي، تو او مھارَي پِتا ݾون ڀِي نفرت ڪرَي ھَي۔ 24 جي ھُون اُوئون ۾ او پرچا نِي ڪرون تو، جڪو ٻيجَي ڪونھي ڪيئا، تو او پاپي ڪونھي ھوئون تو، پڻ ھمَي اُوئون مھارا ڪوم ڏيٺا ھَي، تو ڀِي او مھَي ݾون ھانَ مھارَي پِتا ݾون نفرت ڪرَي ھَي۔ 25 اَي اِيئي رَي ڪري ھويو ڪہ او بات پُورِي ھووَي جڪو اُوئون رَي پويتر شاستر ۾ لِکيوڙِي ھَي ڪہ،
’اُوئون مھَي ݾون ھرُوڀرُو نفرت ڪِي۔‘