يُوحنا 14

ايشوَر ڪڍي جاوڻ رو مارگ

پرڀُو يسُوع آپرَي چيلون نَي ڪھيو ڪہ، ”ٿي آپرَي من ۾ گڻتِي نِي ڪرو، جھڙَي نمُونَي ٿي ايشوَر تي وِشواس راکو ھو، اُوئيج نمُونَي مھَي تي ڀِي وِشواس راکو۔ ‏2 مھارَي پِتا رَي گھر ۾ ريوَڻ رَي ݾارُو تموم گھڻِي جگھا ھَي۔ ھُون جائُون پڙيو ڪہ اوٿ جائي ٿونرَي ݾارُو جگھا تيار ڪرون۔ جي اِيئون ڪونھي، تو ھُون ٿونَي ݾُڻائي ڇوڙنت۔ ‏3 جڏي ھُون جائي ٿونرَي ݾارُو جگھا تيار ڪرين، تو پَڇي پاڇو آئي ٿونَي آپ ڀيڙا لي جائين ڪہ جيٿ ھُون ھون اوٿ ٿي ڀِي ھو۔ ‏4 جيٿ ھُون جائُون پڙيو اُوئي مارگ رِي ٿونَي خبر ھَي۔“ ‏5 اِيئي تي تُوما اُوئي نَي ڪھيو ڪہ، ”اي پرڀُو، مھونَي خبر ڪونھي ڪہ ٿي ڪيٿ جاشو، تو پَڇي مھونَي اُوئي مارگ رَي بارَي ۾ ڪيڪر خبر پڙشَي؟“ ‏6 پرڀُو يسُوع اُوئي نَي بݪتِي ڏينِي ڪہ، ”مارگ، ݾچائي ھانَ زندگِي ھُون ھون۔ مھارَي وسيلَي ݾون ٽاݪ ڪو ڀِي پِتا ڪڍي جائي ڪونھي ݾگھتو۔ ‏7 جي ٿون مھنَي اوݪکيو ھووَنت، تو مھارَي پِتا نَي ڀِي اوݪکيو ھووَنت، پڻ آج ݾون ٿي اُوئي نَي اوݪکشو ھانَ ٿون اُوئي نَي ڏيٺو رو۔“ ‏8 اِيئي تي فِلپس ڪھيو ڪہ، ”اي پرڀُو، مھونَي پِتا رو درشن ڪرائو، تو مھورَي ݾارُو اَي گھڻو ئِي ھَي۔“ ‏9 پرڀُو يسُوع اُوئي نَي ڪھيو ڪہ، ”فِلپس، ھُون اترَي ڏِنون ݾون ٿون ڀيڙو ھون، تو ڀِي تُو مھنَي ڪونھي اوݪکتو؟ جڪَي مھنَي ڏيٺو اُوئي پِتا نَي ڏيٺو، تو پَڇي تُو ڪيئون ڪَي ھَي ڪہ مھونَي پِتا رو درشن ڪرا۔ ‏10 ڪِي تُو وِشواس ڪونھي راکتو ڪہ ھُون پِتا ۾ ھون ھانَ پِتا مھَي ۾ ھَي؟ جڪو باتون ھُون ٿون ݾون ڪرون ھون، او آپرَي طرفون نا، پڻ پِتا مھَي ۾ رئي آپرا ڪوم ڪرَي ھَي۔ ‏11 مھارو وِشواس ڪرو ڪہ ھُون پِتا ۾ ھون ھانَ پِتا مھَي ۾ ھَي۔ جي ٿي مھارو وِشواس ڪونھي ڪرتا، تو گھٽ ۾ گھٽ اُوئون ڪومون رو تو وِشواس ڪرو جڪو ھُون ڪرون ھون۔ ‏12 ھُون ٿونَي ݾاچِي ڪونھ ھون ڪہ جڪو مھَي تي وِشواس راکَي ھَي، او ڀِي اھڙا ڪوم ڪرشَي جڪو ھُون ڪرون ھون، پڻ اِيئي ݾون ڀِي موٽا موٽا ڪوم ڪرشَي، ڪيونڪہ ھُون آپرَي پِتا ڪڍي جائُون پڙيو۔ ‏13 اِيئي رَي ڪري ٿي جڪو ڀِي مھارَي نون ݾون مونگشو، ھُون ٿونرَي ݾارُو اوج ڪرين ڪہ پِتا رِي مھما ڏيڪرَي رَي وسيلَي ڏيکيجَي۔ ‏14 جي ٿي مھارَي نون ݾون جڪو ڪئين مونگشو، تو ھُون اوج ڪرين۔“

پويتر آتما ڏيوَڻ رو واعدو

‏15 پرڀُو يسُوع ڪھيو ڪہ، ”جي ٿي مھَي ݾون پريم ڪرو ھو، تو مھارَي حُڪمون تي بيتا رو۔ ‏16 ھُون پِتا نَي مِنٿ ڪرين ڪہ او ٿون ڪڍي ھيڪ ٻيجو مددگار ميلَي، جڪو ھميشا ٿون ڀيڙو ريشَي۔ ‏17 او مددگار، پويتر آتما ھَي جڪو ايشوَر رَي بارَي ۾ ݾچائي ݾُڻاشَي۔ دُنيا را مِنک اُوئي نَي لي ڪونھي ݾگھتا، ڪيونڪہ او نَڪو اُوئي نَي ڏيکَي ھانَ نَڪو اُوئي نَي اوݪکَي، پڻ ٿي اُوئي نَي اوݪکو ھو ھانَ او ٿون ڀيڙو رَي ھَي ھانَ ٿون ۾ ريشَي۔ ‏18 ھُون ٿونَي يتيم ڪونھي ڇوڙون، پڻ ھُون پاڇو ٿون ڪڍي آئين۔ ‏19 ٿوڙِي دير رَي ݾارُو دُنيا را مِنک مھنَي ڪونھي ڏيکَي، پڻ ٿي مھنَي ڏيکشو، ڪيونڪہ جون ھُون جيتو ھون ٿي ڀِي جيتا ريشو۔ ‏20 اُوئي ڏِن ٿونَي خبر پڙشَي ڪہ ھُون آپرَي پِتا ۾ ھون ھانَ ٿي مھَي ۾ ھو ھانَ ھُون ٿون ۾ ھون۔ ‏21 جڪَي نَي مھارَي حُڪمون رِي خبر ھَي ھانَ اُوئون تي بَي ھَي، اوج مھَي ݾون پريم ڪرَي ھَي، مھارو پِتا اُوئي ݾون پريم ڪرشَي ھانَ ھُون ڀِي اُوئي ݾون پريم ڪرين ھانَ آپرو آپنَي اُوئي تي ظاھر ڪرين۔“ ‏22 اِيئي تي يھُودا اِسڪريُوتِي نا، پڻ ٻيجَي يھُودا، پرڀُو يسُوع نَي ڪھيو ڪہ، ”اي پرڀُو، ڪھڙِي بات رَي ڪري ٿي آپنَي مھون تي ظاھر ڪرشو، پڻ دُنيا رَي مِنکون تي ڪونھي ڪرو؟“ ‏23 پرڀُو يسُوع اُوئي نَي بݪتِي ڏينِي ڪہ، ”جڪو ڀِي مھَي ݾون پريم ڪرشَي، تو او مھارَي باتون تي بيشَي ھانَ مھارو پِتا اُوئي ݾون پريم ڪرشَي۔ ھُون ھانَ پِتا ٻيئي اُوئي ڪڍي آشون ھانَ اُوئي ڀيڙا ريشون۔ ‏24 جڪو مھَي ݾون پريم ڪونھي ڪرتو، او مھارَي باتون تي ڪونھي بيتو۔ جڪو باتون ٿي ݾُڻو پڙيا او باتون مھارَي طرفون نا، پڻ مھارَي پِتا رَي طرفون ھَي جڪَي مھنَي ميليو ھَي۔ ‏25 مھَي اَي ݾجَي باتون ٿون ڀيڙو رئي ڪيئَي، ‏26 پڻ مھارو پِتا او مددگار يعني پويتر آتما مھارَي نون ݾون ميلشَي۔ او ٿونَي ݾجَي باتون ݾيکاشَي ھانَ او ݾجَي باتون ڀِي ياد ڪراشَي، جڪو مھَي ٿون ݾون ڪيئَي ھَي۔ ‏27 ھُون ٿونَي تسلِي ڏي جائُون پڙيو۔ ھُون ٿونَي اھڙِي تسلِي ڪونھي ڏيتو جھڙِي تسلِي دُنيا را مِنک ڏَي ھَي، پڻ ھُون آپ ٿونَي تسلِي ڏيئون ھون، اِيئي رَي ڪري ٿي گڻتِي نِي ڪرو ھانَ نِي ٻيئاجو۔ ‏28 مھَي ٿونَي ھڻون ڪھيو ھتو ڪہ، ’ھُون جائُون پڙيو ھانَ ٿون ڪڍي پاڇو آئين۔‘ جي ٿونرو مھَي ݾون پريم ھووَنت، تو ٿي خُوش ھويا ھووَنت، ڪہ ھُون پِتا ڪڍي جائُون پڙيو، ڪيونڪہ پِتا مھَي ݾون موٽو ھَي۔ ‏29 اَي بات ھوئڻ ݾون پيل مھَي ٿونَي ݾُڻايو رو، اِيئي رَي ڪري جڏي اِيئون ھووَي، تو ٿي مھَي تي وِشواس راکيا۔ ‏30 آج ݾون پَڇي ھُون ٿون ݾون وڌيڪ باتون ڪونھي ڪرون، ڪيونڪہ اِيئي دُنيا رو ݾردار آوَي پڙيو ھانَ اُوئي رو مھَي تي ڪو ڀِي اِختيار ڪونھي۔ ‏31 ھُون اوج ڪرون ھون جڪو پِتا مھنَي حُڪم ڏَي ھَي ڪہ دُنيا رَي مِنکون نَي خبر پڙَي ڪہ ھُون پِتا ݾون پريم ڪرون ھون۔ اُٺو، ھمَي ايٿ ݾون ھالون۔“