عماليقيون ݾون جنگ
30
پَڇي تيجَي ڏِن جڏي دائُود ھانَ اُوئي را مِنک صِقلاج شھر ۾ پُگا، تو اُوئون ڏيٺو ڪہ عماليقيون ڏکڻ علائقَي ھانَ صِقلاج شھر تي حملو ڪيئو ھَي ھانَ صِقلاج شھر نَي ڀِي ٻاݪيو ھَي۔ 2 اُوئون ڪينَي ڀِي ماريو ڪونھي، پڻ ݾجَي لُگائَي جڪو اوٿ ھتَي، نِنيا موٽا ݾجائِي غُلوم ڪري لي گيا۔ 3 جڏي دائُود ھانَ اُوئي رَي مِنکون شھر ۾ آئي ڏيٺو ڪہ ݾجو شھر ٻَݪيو پڙيو ھَي ھانَ اُوئون رَي لُگائَي، ڏيڪرا ھانَ ڏيڪرَي کڻي لي گيا ھَي، 4 تو دائُود ھانَ اُوئي را مِنک اِترا رُونا ڪہ اُوئون ۾ وڌيڪ روئڻ رِي ھِمت ڪونھي رئِي۔ 5 او دائُود رَي ٻيئي لُگائَي، يعني اخينوعم ھانَ ابيجيل نَي ڀِي غُلوم ٺائي لي گيا۔6 دائُود را مِنک اُوئي نَي پٿر ھڻي مارڻ رَي باتون ڪرتا پڙيا، ڪيونڪہ او مِنک آپرَي ڏيڪرون ھانَ ڏيڪريون رَي ݾارُو تموم گھڻا پريشون ھتا۔ دائُود ڀِي تموم گھڻو پريشون ھتو، پڻ پرميشوَر، اُوئي رَي ايشوَر اُوئي نَي ھِمت ڏينِي۔ 7 پَڇي دائُود اخيملڪ رَي ڏيڪرَي ابي ياتر پُوجاري نَي ڪھيو ڪہ،”تُو پُوجاريون رِي واسڪوٽِي مھَي ڪڍي لي آ۔“ اِيئي تي ابي ياتر واسڪوٽِي دائُود ڪڍي لي آيو۔ 8 پَڇي دائُود پرميشوَر ݾون پُوڇو ڪہ،”جي ھُون عماليقيون رو لارو ڪرون، تو ڪِي تُو اُوئون نَي مھارَي حوالي ڪرِي؟“ پرميشوَر اُوئي نَي ڪھيو ڪہ،”تُو اُوئون لاري جا، ڪيونڪہ تُو ضرُور اُوئون توڻي پُگي جائِي ھانَ ݾجو ڪئين ڇوڙائي لي آئِي۔“
9 اِيئي تي دائُود ھانَ اُوئي را ڇَي ݾئو مِنک جڪو اُوئي ڀيڙا ھتا، بَئير ھويا ھانَ بسور ندِي تي پُگا۔ اُوئون ۾ جڪو ٿڪا ھتا، او اوٿج ٻيݾي رھيا۔ 10 پڻ دائُود چار ݾئو مِنکون ڀيڙو ندِي ٽِپي اُوئون رو لارو ڪرتو رھيو۔ باقي ٻي ݾئو مِنک جڪو ٿڪا ھتا، او بسور ندِي ٽِپي ڪونھي ݾگھيا ھانَ او لاري رئي گيا۔
11 پَڇي دائُود رَي مِنکون نَي ميدون ۾ ھيڪ مِصري مِنک پڙيوڙو مِليو، تُو اُوئي نَي کڻي دائُود ڪڍي لي آيا۔ اُوئون اُوئي نَي ٻاٽِي ھانَ پوڻي پيئاڙيو۔ 12 پَڇي اُوئون اُوئي نَي انجير رِي ھيڪ ٽڪِي ھانَ ٿوڙِي کيشميش کاوڻ رَي ݾارُو ڏينِي۔ جڏي اُوئي اَي کاڌو، تو اُوئي نَي ھِمت ملِي، ڪيونڪہ اُوئي تين ڏِن ھانَ تين راتون نَڪو ٻاٽِي کاڌِي نَڪو پوڻي پيئو ھتو۔ 13 پَڇي دائُود اُوئي ݾون پُوڇو ڪہ،”ٿارو مالڪ ڪُڻ ھَي ھانَ تُو ڪيٿ رو ھَي؟“ اُوئي ڪھيو ڪہ،”ھُون مِصري ھون ھانَ ھيڪَي عماليقي رو غُلوم ھون۔ مھارو مالڪ مھنَي ايٿ ڇوڙي گيو ھَي، ڪيونڪہ ھُون تينون ڏِنون ݾون بيمار ھون۔ 14 مھون ڪريتيون رَي ڏکڻ ، يھُودا رَي علائقَي ۾ ھانَ ڪالب رَي ڏکڻ ۾ ڦُر مار ڪِي ھانَ پَڇي صِقلاج شھر نَي ٻاݪيو ھتو۔“ 15 پَڇي دائُود اُوئي ݾون پُوڇو ڪہ،”ڪِي تُو مھنَي اُوئون ڦوروئون ڪڍي لي جائِي؟“ اُوئي ڪھيو ڪہ،”تُو مھنَي ايشوَر رو ݾونݾ ڏي ڪہ تُو مھنَي مارَي ڪونھي، نَڪو مھنَي مھارَي مالڪ رَي حوالي ڪرَي، تو ھُون ٿنَي اوٿ لي ھالين۔“
16 جڏي مِصري دائُود نَي اوٿ لي گيو، تو ڏيٺو ڪہ چارئي پاݾَي مِنک ئِي مِنک ھتا، جڪو کوݾيوڙَي مال رو جشن ملھاوتا پڙيا ھانَ کاوتا پيتا پڙيا۔ اَي مال اُوئون فلستيون رَي مُلڪ ھانَ يھُودا رَي علائقَي ݾون کوݾيو ھتو۔ 17 پَڇي دائُود رات رَي پيلڪَي پھر ݾون لي ٻيجَي ڏِن شام توڻي اُوئون نَي قتل ڪرتو رھيو۔ اُونٺون تي ݾَوار ھوئي ناݾڻ آݪَي چار ݾئو مِنکون ݾون ٽاݪ، باقي ݾجائِي ماريجا۔ 18 پَڇي دائُود عماليقيون ݾون او ݾجو ڪئين ڇوڙايو، جڪو او ڦُري لي آيا ھتا ھانَ آپرَي ٻيئي لُگائَي ڀِي ڇوڙائَي۔ 19 اُوئون رِي ڪو ڀِي شئي گُم ڪونھي ھوئِي، نَڪو نِنڪِي نَڪو موٽِي، نَڪو ڏيڪرا، ڏيڪرَي، نَڪو ٻيجو ڪو اھڙو سيمون، جڪو او کوݾي لي گيا ھتا۔ دائُود، او ݾجو ڪئين پاڇو لي آيو۔ 20 دائُود ݾجَي رڍون ٻڪرَي ھانَ ڍگا، ڍگَي لي آيو۔ اِيئون ݾون ٽاݪ دائُود را مِنک عماليقيون رو مال اَي ڪئي لي آيا ڪہ،”اَي ڦُر رو مال دائُود رو ھَي۔“
ڦُر رو مال بِݪاوڻ
21 پَڇي دائُود اُوئون ٻي ݾئو آڏميون ڪڍي آيو، جڪو بسور ندِي تي ٿڪي لاري رھيا ھتا۔ او دائُود ھانَ اُوئون رَي مِنکون ݾون مِلڻ آيا۔ جڏي دائُود اُوئي رَي نيڙو پُگو، تو اُوئون نَي نمسڪار ڪھيو۔ 22 اِيئي تي دائُود ڀيڙا جاوڻ آݪَي مِنکون ۾ بيڪار ھانَ بُڇڙَي مِنکون ڪھيو ڪہ،”مھون جڪو ڪئين ڇوڙايو ھَي، او ليوَڻ رَي ݾارُو اَي مھون ڀيڙا ڪونھي ھاليا ھتا، اِيئي رَي ڪري مھي اِيئون نَي کوݾيوڙَي مال ۾ ڪو ڀِي حِصو ڪونھي ڏيئون۔ او رُگو آپرَي لگائَي ھانَ ٻاݪ لي جاوَي۔“
23 پڻ دائُود ڪھيو ڪہ،”اي مھارَي ڀايون، اِيئون نِي ڪرو۔ اَي ݾجو ڪئين پرميشوَر آپون نَي ڏينو ھَي، اُوئي آپون نَي بچايا ھانَ اُوئي اُوئون ڦوروئون نَي آپڻَي حوالي ڪيئا، جڪو آپڻَي شھر تي حملو ڪرڻ آيا ھتا۔ 24 ٿونرِي اَي بات ڪُڻ منشَي؟ ڪيونڪہ جِترو حِصو جنگ ۾ بِڙھڻ آݪون رو ھووَي ھَي، اِترو اُوئون رو ڀِي ھووَي ھَي، جڪو سيمون ڪڍي رَي ھَي، اِيئي رَي ڪري ٻيئون رو حِصو برابر ھَي۔“ 25 دائُود اُوئي ڏِن ݾون اِسرائيل رَي ݾارُو اَي اصُول ھانَ قانُون ٺاھيو، جڪو آج توڻي پڪو ھَي۔
26 جڏي دائُود صِقلاج شھر ۾ پاڇا آيو، تو يھُودا را اَگووڻ جڪو اُوئي را دوست ھتا، اُوئون نَي ڀِي کوݾيوڙَي مال ۾ ڪئين ڏي ڪھيو ڪہ،”اَي پرميشوَر رَي دُشمنون رَي مال ۾ ٿونرَي ݾارُو تحفو ھَي۔“ 27 دائُود اَي تحفا اُوئون مِنکون نَي ميليا، جڪو اِيئون شھرون ۾ ريتا، بيت ايل، ڏکڻ ڏيݾا رامات، يتير، 28 عروعير، سِفموت، اِستموع، 29 رڪِل، يرحميلِي را شھر، قينيون را شھر، 30 حُرما، بورعاسان، عتاڪ 31 ھانَ اُوئون ڪڍي جڪو حبرُون شھر ۾ ريتا۔ اُوئون ݾجون علائقون ۾ ڀِي تحفا ميليا، جيٿ دائُود ھانَ اُوئي را مِنک ريتا۔