سائُول ھانَ اُوئي رَي ڏيڪرون رِي موت
31
پَڇي فلستيون اِسرائيليون ݾون جنگ ڪِي ھانَ اِسرائيلي فلستيون آگھي ناݾي گيا ھانَ او جِلبوعا جبل تي ماريجا۔ 2 پَڇي فلستيون سائُول ھانَ اُوئي رَي ڏيڪرون رو لارو ڪيئو ھانَ سائُول رَي ڏيڪرون يُونتن، ابينداب ھانَ ملڪيشوَع نَي ڀِي ماري ڇوڙيو۔ 3 اَي جنگ سائُول رَي ݾارُو تموم گھڻِي مُصيبت آݪِي ھتِي۔ پَڇي ڪئين تير ھلاوڻ آݪون سائُول نَي ڏيٺو، تو اُوئي نَي زخمي ڪيئو۔ 4 پَڇي سائُول آپرا جنگِي ھٿيار کڻڻ آݪَي مِنک نَي ڪھيو ڪہ،”آپرِي تلوار ݾون مھنَي مار، ڪيٿ اِيئون نِي ھووَي ڪہ بِنا کَتنَي آݪا آوَي ھانَ مھارِي بي عِزتي ڪري مھنَي مارَي۔“ پڻ او تموم گھڻو ٻيئاجو، اِيئي رَي ڪري اُوئي اِيئون ڪونھي ڪيئو۔ پَڇي سائُول آپرِي تلوار لي آپ اُوئي ماٿَي کِريو۔ 5 جڏي جنگِي ھٿيار کڻڻ آݪَي ڏيٺو ڪہ ھمَي سائُول مُوئو رو، تو او ڀِي آپرِي تلوار ماٿَي کِريو ھانَ مري گيو۔ 6 اِيئي نمُونَي سائُول، اُوئي را تينئي ڏيڪرا، اُوئي را جنگِي ھٿيار کڻڻ آݪو ھانَ اُوئي را ݾجائِي مِنک ھيڪئِي ڏِن مري گيا۔7 جڏي وادِي رَي ٻيجَي پاݾَي اُوئون اِسرائيليون جڪو يردن دريا رَي ٻيجَي پاݾَي ھتا، اَي ڏيٺو ڪہ اِسرائيلي ناݾي گيا ھَي، سائُول ھانَ اُوئي را ڏيڪرا ڀِي مُوئا را، تو او ڀِي آپرا شھر ڇوڙي ناݾي گيا۔ پَڇي فلستِي آئي اُوئون شھرون ۾ ريوَڻ لاگا۔
8 ٻيجَي ڏِن جڏي فلستِي مُوئوڙَي اِسرائيليون رِي ڦُر ڪرڻ آيا، تو ڏيٺو ڪہ سائُول ھانَ اُوئي را تينئي ڏيڪرا جِلبوعا جبل تي مُوئا پڙيا ھَي۔ 9 پَڇي اُوئون سائُول رِي نَݾ باڍِي ھانَ اُوئي را جنگِي گاڀا ڀِي اُتاريا ھانَ آپرَي مُلڪ رَي مِنکون نَي ميلي ڪھيو ڪہ، ”ٿي جائي اُوئون رَي مندرون ھانَ اُوئون رَي مِنکون ۾ اَي خبر ݾُڻائو۔“ 10 فلستيون سائُول را جنگِي گاڀا عستارات ديوِي رَي مندر ۾ راکيا ھانَ اُوئي رو لاش بيت شان شھر رِي ڀيت تي ٽونگيو۔
11 پَڇي جِلعاد علائقَي رَي يبيس شھر رَي مِنکون اَي ݾُڻيو، جڪو فلستيون سائُول ݾون ڪيئو ھتو، 12 تو اُوئون را ݾجائِي جنگِي مِنک اُٺيا ھانَ رات رو جائي سائُول ھانَ اُوئي رَي ڏيڪرون را لاش بيت شان رِي ڀيت ݾون اُتاري لي آيا ھانَ يبيس شھر ۾ جائي اُوئون رَي لاش نَي باݾڏي ڏينو۔ 13 پَڇي اُوئون رَي ھاڏکَي يبيس شھر ۾ لوَي رَي بَڻ ھيٺا ٻُورئَي ھانَ پَڇي ݾاتون ڏِنون توڻي روزا راکيا۔