دائُود رو فلستِي مُلڪ ڏيݾا ناݾڻ
27
پَڇي دائُود آپرَي من ۾ ڪھيو ڪہ، ”ھُون ھيڪ ڏِن سائُول رَي ھاٿون ضرُور ماريو جائين۔ اِيئي رَي ڪري ݾُٺو ھَي ڪہ ھُون فلستيون رَي مُلڪ ڏيݾا ناݾي جائُون ڪہ سائُول ݾجَي اِسرائيل ۾ مھنَي جوئڻ ڇوڙَي ھانَ اِيئي نمُونَي ھُون اُوئي ݾون بچي جائين۔“ 2 پَڇي دائُود آپرَي ڇَي ݾئو مِنکون ڀيڙو جات شھر رَي بادشاھ اڪيس ڪڍي گيو، جڪو معُوڪ رو ڏيڪرو ھتو۔ 3 دائُود ھانَ اُوئي را مِنک آپرَي خاندان ݾُوڌا جات شھر ۾ اڪيس ڪڍي رھيا۔ دائُود رَي ٻيئي لُگائَي اخينوعم ھانَ ابيجيل ڀِي اُوئي ڀيڙَي ھتَي۔ اخينوعم جڪو يزرعيل شھر رِي ھتِي ھانَ ابيجيل جڪو پيل ڪرمل رَي ريوَڻ آݪَي نابال رِي لُگائِي ھتِي۔ 4 پَڇي سائُول نَي خبر پڙِي ڪہ دائُود جات شھر ڏيݾا ناݾي گيو ھَي، تو اُوئي ڪڏي ڀِي دائُود رِي تلاش ڪونھي ڪِي۔5 دائُود، اڪيس بادشاھ نَي ڪھيو ڪہ، ”جي ٿارِي مھَي تي دايا رِي نظر ھَي، تو مھنَي اِيئي مُلڪ رَي ڪَي ٻيجَي شھر ۾ ريوَڻ ڏي ڪہ ھُون اوٿ رون۔ ھُون ڪيئون اِيئي موٽَي شھر ۾ ٿَي ڀيڙو رون۔“ 6 اِيئي تي اڪيس، دائُود نَي صِقلاج شھر ڏينو۔ اِيئي رَي ڪري او شھر آج توڻي يھُودا رَي بادشاھ رو شھر ھَي۔ 7 پَڇي دائُود فلستيون رَي مُلڪ ۾ ھيڪ ݾال چار مھيڻا رھيو۔
8 اُوئي ٽيم دائُود ھانَ اُوئي رَي مِنکون جائي اُوئون علائقون تي حملو ڪيئو، جيٿ جسُوري، جزري ھانَ عماليقي قومون ريتَي۔ اَي قومون پِروڻَي زمونَي ݾون شُور علائقَي ݾون لي مِصر مُلڪ رِي حد توڻي ريتَي۔ 9 دائُود جڪون ڀِي علائقون تي حملو ڪرتو، تو او علائقا ݾَڦا برباد ڪري ڇوڙتو ھانَ ڪَي ڀِي لُگائِي جون آڏمي نَي جيتو ڪونھي ڇوڙتو۔ او اُوئون رَي رڍون ٻڪرَي، ڍگا، گڏا، اُونٺ ھانَ گاڀا لي پاڇو اڪيس ڪڍي آوتو۔ 10 اِيئي تي اڪيس اُوئي ݾون پُوڇتو ڪہ، ”آج ٿَي ڪيٿ ݾون مال کوݾيو؟“ تو دائُود ڪڏي ڪيتو ڪہ، ”يھُودا رَي ڏکڻ علائقَي ݾون۔“ ڪڏي ڪيتو ڪہ، ”يرحميليون رَي ڏکڻ علائقَي ݾون۔“ ھانَ ڪڏي ڪيتو ڪہ، ”قينيون رَي ڏکڻ علائقَي ݾون۔“ 11 دائُود جنگ رَي ٽيم اُوئون ۾ ڪَي ڀِي آڏمي جون لُگائِي نَي جيتا بچائي جات شھر ۾ ڪونھي لي آوتو۔ اُوئي ݾوچو ڪہ، ”ڪيٿ اِيئون نِي ھووَي ڪہ فلستيون نَي اِيئي بات رِي خبر پڙَي ڪہ ھُون اِسرائيليون تي حملو ڪونھي ڪرتو۔“ جترِي توڻي دائُود، فلستيون رَي مُلڪ ۾ رھيو، اُتري توڻي او اِيئوج ڪرتو رھيو۔ 12 پَڇي اڪيس، دائُود تي ڀروسو ڪري ݾوچو ڪہ، ”اِسرائيلي دائُود ݾون نفرت ڪرَي ھَي، اِيئي رَي ڪري ھمَي اَي ھميشا مھارو شيواداري ھوشَي۔“