يُونتن رِي دائُود ݾون ھمدردِي
20
پَڇي دائُود راما شھر رَي نيوت علائقَي ݾون ناݾي يُونتن ڪڍي آيو ھانَ اُوئي نَي ڪھيو ڪہ،”مھَي ڪِي ڪيئو ھانَ مھارِي ڪھڙِي غلطِي ھَي؟ مھَي ٿارَي اَبا رو ڪھڙو ڏوھ ڪيئو جڪو مھارِي جان رو دُشمن ھويو رو؟“ 2 يُونتن اُوئي نَي ڪھيو ڪہ،”نا، اِيئون ڪونھي، ڪو ڀِي ٿنَي ڪونھي مارَي۔ نِنڪِي جون موٽِي بات، مھارو اَبا مھَي ݾون ڪڏي ڀِي ڪونھي لِڪاوتو۔ پَڇي مھارو اَبا اترِي موٽِي بات مھَي ݾون ڪيڪر لِڪاشَي؟ اَي ٿارو وھم ھَي۔“ 3 پڻ دائُود ݾونݾ لي ڪھيو ڪہ،”ٿارَي اَبا نَي خبر ھَي ڪہ تُو مھارو ݾُٺو دوست ھَي، اِيئي رَي ڪري اُوئي رِي مرضِي ڪونھي ڪہ اِيئي بات رِي خبر ٿنَي پڙَي ھانَ تُو پريشون ھووَي۔ جيتَي پرميشوَر ھانَ ٿارو ݾونݾ، ھمَي موت مھارَي نيڙِي ھَي۔“ 4 پَڇي يُونتن دائُود نَي ڪھيو ڪہ،”تُو جڪو ڪئين ڪئِي، ھُون اوج ٿارَي ݾارُو ڪرين۔“ 5 پَڇي دائُود يُونتن نَي ڪھيو ڪہ، ”جو، ݾووارَي نُوئَي چندر رو پَرٻ ھَي، اِيئي رَي ڪري مھنَي بادشاھ ڀيڙِي ٻاٽِي کاوڻِي پڙشَي، ھمَي تُو مھنَي موڪل ڏي ڪہ ھُون تين ڏِن رَي ݾارُو جائي ڪَي جھنگ ۾ لِڪون۔ 6 جي ٿارو اَبا مھارَي بارَي ۾ پُوڇَي، تو اُوئي نَي ڪئي ڪہ، ’دائُود مھَي ݾون آپرَي شھر بيت لحم ڏيݾا جاوڻ رِي موڪل مونگِي ھتِي، ڪيونڪہ اُوئي رو ݾجو خاندان ھر ݾال اوٿ ٻَليدون ڪرَي ھَي۔‘ 7 جي ٿارو ٻاپ ڪَي ڪہ، ’ٺيڪ ھَي۔‘ تو، تُو ݾمجھي ڪہ مھنَي ڪو ڀِي خطرو ڪونھي، پڻ جي اُوئي نَي تموم گھڻِي ريݾ آوَي، تو ݾمجھي ڪہ اُوئي مھنَي مارڻ رو اِرادو ڪيئو ھَي۔ 8 اِيئي رَي ڪري تُو مھربونِي ڪري مھَي ݾون ڀلائي ڪر، ڪيونڪہ ٿَي پرميشوَر آگھي مھَي ݾون وچن ڪيئو ھَي۔ جي مھارو ڪو ڏوھ ھَي، تو تُو آپ مھنَي ماري، پڻ مھنَي آپرَي ٻاپ رَي حوالي نِي ڪري۔“ 9 يُونتن ڪھيو ڪہ،”تُو اِيئون نِي ݾوچ۔ جي مھنَي خبر ھوئي ھووَنت ڪہ مھارو اَبا ٿنَي مارڻ رَي ݾارُو ڪرَي ھَي، تو ڪِي ھُون ٿنَي پيل ڪونھي ݾُڻائُون تو؟“ 10 پَڇي دائُود يُونتن نَي ڪھيو ڪہ،”جي ٿارَي اَبا نَي ريݾ آئِي، تو مھنَي ڪُڻ ݾُڻاشَي؟“ 11 اِيئي تي يُونتن دائُود نَي ڪھيو ڪہ،”آ، تو آپي ٻنِي تي ھالون۔“ پَڇي او ٻيئي ٻنِي ڏيݾا گيا۔ 12 پَڇي يُونتن دائُود نَي ڪھيو ڪہ،”پرميشوَر اِسرائيل رو ايشوَر آپڻو گواھ ھَي، ݾووارَي جون پَريون اندازن اِيئي ٽيم تي ھُون آپرَي اَبا رِي مرضِي اوݪکين رِي۔ جي ٿارَي بارَي ۾ اُوئي رِي ݾوچ ݾُٺِي ھَي، تو ھُون ڪينَي ميلي ٿنَي ضرُور ݾُڻائين۔ 13 جي مھنَي خبر پڙِي ڪہ مھارو اَبا ٿنَي مارڻ رو ݾوچَي ھَي ھانَ ھُون ٿنَي نِي ݾُڻائُون ھانَ ٿارِي بچاوڻ ۾ مدد نِي ڪرون، تو پرميشوَر مھنَي اِيئي ݾون وڌيڪ سزا ڏَي۔ پرميشوَر ٿَي ڀيڙو ھووَي، جھڙَي نمُونَي او پيل مھارَي اَبا ڀيڙو ھتو۔ 14 جترِي توڻي ھُون جيتو ھون، اُترِي توڻي تُو پرميشوَر آݪِي ڪار مھَي تي مھربون رئي ھانَ جي ھُون مري جائُون، 15 تو مھَي ݾون پَڇي مھارَي خاندان تي مھربون رئي۔ جڏي پرميشوَر ٿارا ݾجائِي دُشمن اِيئي دُنيا ݾون ختم ڪرَي، تو تُو اِيئوج ڪري۔“ 16 پَڇي يُونتن دائُود رَي خاندان رو ݾاٿ ڏيوَڻ رو وچن ڪيئو ھانَ ڪھيو ڪہ،”پرميشوَر دائُود رَي دُشمن ݾون بدلو لَي۔“ 17 پَڇي يُونتن دائُود ݾون پريم رَي ڪري ڀڙي ݾونݾ ليئو، ڪيونڪہ او اُوئي ݾون جان ݾون وڌيڪ پريم ڪرتو۔ 18 پَڇي يُونتن دائُود نَي ڪھيو ڪہ،”ݾووارَي نُوئَي چندر رو پَرٻ ھَي ھانَ جڏي تُو اوٿ ڪونھي ھووَي، تو مھارو اَبا ٿارو پُوڇشَي۔ 19 پَريون شام رو تُو ڇيڪو ھوئي اُوئي جگھا ݾون ھيٺو آئي لِڪي، جيٿ تُو پيل لِڪيوڙو ھتو۔ تُو اُوئي پٿر نيڙو ٻيݾي رئي جڪَي رو نون آزيل ھَي۔ 20 پَڇي ھُون اُوئي پاݾَي تين تير اھڙَي نمُونَي ھلائين، جھڙَي نمُونَي ھُون ڪَي شئي تي نِشون ھڻون پڙيو۔ 21 پَڇي ھُون ھيڪ ڇوڪرو ميلين ڪہ او جائي او تير جوئي لي آوَي۔ پَڇي ھُون ڇوڪرَي نَي ڪئين ڪہ،’جو، تير ٿارَي اِيئي پاݾَي پڙيا ھَي، جائي او لي آ۔‘ تو تُو مھَي ڪڍي آئي، ڪيونڪہ جيتَي پرميشوَر رو ݾونݾ، ٿارو ڀلو ھوشَي ھانَ خطرو ڪونھي ھووَي۔ 22 جي ھُون ڇوڪرَي نَي اَي ڪونھ ڪہ، ’تير ٿارَي اُوئي پاݾَي ھَي۔‘ تو تُو جائي، ڪيونڪہ پرميشوَر رِي مرضِي ھَي ڪہ تُو ايٿ ݾون بُوئو جاوَي۔ 23 پڻ جڪو واعدو آپون ھيڪَي ٻيجَي ݾون ڪيئو ھَي، پرميشوَر ھميشا اِيئون باتون رو گواھ ھووَي۔“24 پَڇي دائُود ٻنِي ۾ جائي لِڪي ٻيٺو۔ جڏي نُوئَي چندر رو پَرٻ آيو، تو بادشاھ ٻاٽِي کاوڻ ٻيٺو۔ 25 بادشاھ اَگي آݪِي ڪار ڀيت ڪڍي ٻيٺو۔ تو يُونتن ڀِي بادشاھ ݾومھو جائي ٻيٺو ھانَ ابنير ڀِي سائُول ڀيڙو ٻيٺو، پڻ دائُود رِي جگھا کالِي ھتِي۔ 26 سائُول اُوئي ڏِن ڪئين ڪونھي ڪھيو، ڪيونڪہ اُوئي ݾوچو ڪہ،”دائُود ڪَي بات ۾ پليت ھويو ھوشَي، اِيئي رَي ڪري او ڪونھي آيو۔ ݾاچيلي او پليت ھويو ھوشَي۔“ 27 پَرٻ رَي ٻيجَي ڏِن ڀِي دائُود رِي جگھا کالِي ھتِي۔ اِيئي تي سائُول آپرَي ڏيڪرَي يُونتن ݾون پُوڇو ڪہ،”يَسي رو ڏيڪرو ڪالھي ھانَ آج ٻاٽِي ڪيئون ڪونھي کاوڻ آيو؟“ 28 اِيئي تي يُونتن سائُول نَي ڪھيو ڪہ،”دائُود مھنَي مِنٿ ڪِي ھتِي ڪہ، ’مھنَي بيت لحم شھر جاوڻ رِي موڪل ڏي۔ 29 مھربونِي ڪري مھنَي جاوڻ ڏي، ڪيونڪہ مھورَي خاندان نَي شھر ۾ ٻَليدون ڪرڻو ھَي ھانَ مھارَي ڀايون مھنَي اوٿ لازمِي اَڻايو ھَي۔‘ اِيئي رَي ڪري او ٿَي ڀيڙو ٻاٽِي کاوڻ ڪونھي آيو۔“ 30 اِيئي تي سائُول نَي يُونتن تي تموم گھڻِي ريݾ آئِي ھانَ اُوئي نَي ڪھيو ڪہ،”حرومِي، ڪِي مھنَي خبر ڪونھي ڪہ ٿَي دائُود رو ݾاٿ ڏينو ھَي؟ اَي ٿارَي ݾارُو ھانَ ٿارِي ما رَي ݾارُو بي عِزتي رِي بات ھَي۔ 31 ڪيونڪہ جترِي توڻي يَسي رو ڏيڪرو اِيئي دُنيا ۾ جيتو ھَي، اُترِي توڻي تُو ڪامياب ڪونھي ھووَي ھانَ نَڪو ٿارِي بادشاھي رَي۔ اِيئي رَي ڪري ھمَي مِنک ميل ھانَ اُوئي نَي مھَي ڪڍي لي آ، ڪيونڪہ ھمَي او ضرُور ماريو جاشَي۔“ 32 پَڇي يُونتن آپرَي ٻاپ سائُول نَي ڪھيو ڪہ،”اُوئي اھڙو ڪِي ڪيئو ھَي ڪہ او ماريو جاوَي؟“ 33 اِيئي تي سائُول اُوئي نَي ڀالو ھڻيو ڪہ اُوئي نَي مارَي۔ اِيئي ݾون يُونتن نَي خبر پڙِي ڪہ مھارو اَبا دائُود نَي مارڻ رو پڪو اِرادو ڪري ٻيٺو ھَي۔ 34 پَڇي يُونتن ريݾ ۾ ٻاٽِي آݪِي جگھا ݾون اُٺي بُوئو گيو۔ اُوئي ڏِن اُوئي ڪئين ڪونھي کاڌو، او دائُود رَي ݾارُو تموم گھڻو پريشون ھتو، ڪيونڪہ اُوئي رَي ٻاپ دائُود رِي بي عِزتي ڪِي ھتِي۔
35 پَڇي ݾاڪݪي يُونتن دائُود نَي ڏينوڙَي ٽيم تي ٻنِي تي گيو ھانَ ھيڪ ڇوڪرو ڀِي اُوئي ڀيڙو ھتو۔ 36 يُونتن اُوئي ڇوڪرَي نَي ڪھيو ڪہ،”ھُون تير ھلائُون ھون ھانَ تُو ناݾي جائي او لي آ۔“ جڏي او ڇوڪرو ناٺو، تو يُونتن اھڙو تير ھڻيو ڪہ او تير جائي اُوئي ڇوڪرَي ݾون آگھي کِريو۔ 37 پَڇي جڏي او ڇوڪرو اوٿ پُگو جڪَي پاݾَي يُونتن تير ھڻيو ھتو، تو اُوئي ڇوڪرَي نَي ھيلو ڪري ڪھيو ڪہ،”تير ٿارَي اُوئي پاݾَي ھَي۔“ 38 يُونتن اُوئي ڇوڪرَي نَي ڀڙي ڪھيو ڪہ،”ڇيڪو جا، اُڀ نِي۔“ اِيئي تي او ڇوڪرو تير کڻي آپرَي مالڪ ڪڍي آيو۔ 39 او ڇوڪرو اُوئي باتون رَي بارَي ۾ ڪئين ڪونھي جوڻتو، ڪيونڪہ رُگو دائُود ھانَ يُونتن نَي اِيئي رِي خبر ھتِي۔ 40 پَڇي يُونتن آپرا جنگِي ھٿيار اُوئي ڇوڪرَي نَي ڏي ڪھيو ڪہ،”اَي ھٿيار شھر ڏيݾا لي جا۔“ 41 جڏي او ڇوڪرو اوٿ ݾون گيو، تو دائُود اُوئي پٿر لاري ݾون ٻاھر نڪريو ھانَ تين گُھمرا جُھڪي شيش نِمايو۔ اُوئون ھيڪَي ٻيجَي نَي ميٺکَي ڏينَي ھانَ تموم گھڻا رُونا، پڻ دائُود يُونتن ݾون وڌيڪ رُونو۔ 42 پَڇي يُونتن دائُود نَي ڪھيو ڪہ،”خيريت ݾون جا، ڪيونڪہ مھون ٻيئون پرميشوَر رو ݾونݾ ليئو ھَي ڪہ، ’پرميشوَر آپڻَي ھانَ آپڻَي اولاد رَي بِچ ۾ ھميشا گواھ رَي۔‘“ پَڇي دائُود بَئير ھويو ھانَ يُونتن آپرَي شھر ڏيݾا پاڇو گيو۔