سائُول رو دائُود نَي تنگ ڪرڻ
19
پَڇي سائُول آپرَي ڏيڪرَي يُونتن ھانَ آپرَي ݾجَي نوڪرون نَي حُڪم ڏينو ڪہ،”دائُود نَي ماري ڇوڙو۔“ پڻ يُونتن دائُود ݾون تموم گھڻو پريم ڪرتو۔ 2 اِيئي تي يُونتن دائُود نَي ڪھيو ڪہ،”مھارو اَبا ٿنَي مراوڻ رَي ݾارُو ڪرَي ھَي، اِيئي رَي ڪري تُو ھوشيار رَي۔ تُو ݾووارَي ڪَي اھڙِي جگھا تي لِڪي ٻيݾي جڪَي رِي ڪينَي ڀِي خبر نِي ھووَي۔ 3 پَڇي ھُون آپرَي اَبا ڀيڙو اُوئي ٻنِي ۾ آئين، جيٿ تُو ھوئِي ھانَ ھُون آپ آپرَي اَبا ݾون ٿارَي بارَي ۾ بات ڪرين۔ او جڪو ڪئين ڪشَي، ھُون او ٿنَي ݾُڻائين۔“4 پَڇي يُونتن آپرَي ٻاپ سائُول آگھي دائُود رِي نيڪِي ڪري ڪھيو ڪہ،”بادشاھ، آپرَي ٻونھَي دائُود نَي ماري پاپي نِي ھو، ڪيونڪہ اُوئي ٿارو ڪو ڀِي ڏوھ ڪونھي ڪيئو، پڻ اُوئي ٿارَي ݾارُو تموم ݾُٺا ڪوم ڪيئا ھَي۔ 5 اُوئي آپرِي جان خطرَي ۾ ھڻي اُوئي فلستِي نَي قتل ڪيئو ھانَ پرميشوَر ݾجَي اِسرائيليون نَي تموم گھڻِي ڪاميابي ڏينِي۔ تُو اَي ݾجو ڪئين جوئي خُوش ھويو ھتو۔ ھمَي تُو ڪيئون دائُود نَي ماري ھيڪَي بي ڏوھي رو خُون آپ تي لَي ھَي؟“ 6 جڏي سائُول يُونتن رِي اَي بات ݾُڻِي، تو ݾونݾ لي ڪھيو ڪہ،”جيتَي پرميشوَر رو ݾونݾ، آج ݾون اُوئي نَي ڪو ڀِي مارَي ڪونھي۔“ 7 اِيئي تي يُونتن دائُود نَي ھيلو ڪري او ݾجَي باتون ݾُڻائَي۔ پَڇي يُونتن دائُود نَي سائُول ڪڍي لي گيو ھانَ اَگي آݪِي ڪار اُوئي رِي شيوا ڪرڻ لاگو۔
8 ھيڪَي گُھمرَي فلستيون ݾون جنگ ھوئِي، تو دائُود اُوئون ݾون جنگ ڪرڻ گيو۔ جڏي دائُود فلستيون تي حملو ڪيئو، تو فلستِي اُوئي ݾون ناݾي گيا۔
9 ھيڪ ڏِن جڏي سائُول آپرَي گھري ھاٿ ۾ ڀالو لي ٻيٺو ھتو، تو پرميشوَر رَي طرفون ھيڪ بُڇڙِي آتما اُوئي ۾ آئِي ھانَ دائُود بربط ساز بجاوتو پڙيو۔ 10 اِيئي تي سائُول آپرَي ڀالَي ݾون دائُود نَي ڀيت ۾ بينڌڻ رَي ݾارُو ڪرتو، پڻ دائُود آگھي ݾون ھٽي گيو ھانَ ڀالو جائي ڀيت ۾ لاگو۔ اُوئي رات دائُود بچي ناݾي گيو۔
11 پَڇي سائُول دائُود رَي گھري ڪئين مِنک ميليا ڪہ او اُوئي تي نظر راکَي ھانَ ݾاڪݪي اُوئي نَي ماري ڇوڙَي۔ اِيئي تي دائُود رِي لُگائِي ميڪل اُوئي نَي ڪھيو ڪہ،”جي تُو آپرِي جان بچاوڻ رَي ݾارُو آج رات ناݾي ڪونھي، تو ݾووارَي ضرُور ماريو جائِي۔“ 12 پَڇي ميڪل ھيڪِي درِي ݾون دائُود نَي ھيٺا اُتاريو ھانَ او بچي ناݾي گيو۔ 13 ميڪل دائُود رَي بِڇوڻَي تي ھيڪ بُت راکيو ھانَ اُوئي رَي ݾِروٿيئَي ٻڪريون رَي باݪون رو ٺاھيوڙو اوݾيݾو راکي اُوئي نَي چادر ݾون ڍڪيو۔ 14 جڏي سائُول را ميليوڙا مِنک دائُود نَي جھالڻ آيا، تو ميڪل اُوئون نَي ڪھيو ڪہ،”او بيمار ھَي۔“ 15 پَڇي سائُول ڀڙي ڪئين مِنک دائُود نَي جوئڻ رَي ݾارُو ميليا ھانَ اُوئون نَي ڪھيو ڪہ،”اُوئي نَي بِڇوڻَي ݾُوڌو کڻي مھَي ڪڍي لي آئو ڪہ ھُون اُوئي نَي ماري ڇوڙون۔“ 16 جڏي او مِنک دائُود رَي گھري گيا، تو ڏيٺو ڪہ بِڇوڻَي تي ھيڪ بُت پڙيو ھَي ھانَ اُوئي رَي ݾِروٿيئَي ٻڪريون رَي باݪون رو اوݾيݾو ھَي۔ 17 اِيئي تي سائُول ميڪل نَي ڪھيو ڪہ،”ٿَي مھنَي ڪيئو دوکو ڏينو ھانَ مھارو دُشمن بچائي نݾاڙيو؟“ پَڇي ميڪل سائُول نَي ڪھيو ڪہ،”دائُود مھنَي ڪھيو ھتو ڪہ، ’مھنَي جاوڻ ڏي، نِي تو ھُون ٿنَي ماري ڇوڙين۔‘“
18 پَڇي دائُود اوٿ ݾون ناݾي بچي گيو ھانَ او راما شھر ۾ سيموئيل ڪڍي گيو۔ اُوئي سيموئيل نَي او ݾجو ڪئين ݾُڻايو، جڪو سائُول اُوئي ݾون ڪيئو ھتو۔ اِيئي تي دائُود ھانَ سيموئيل نيوت علائقَي ۾ جائي ريوَڻ لاگا۔ 19 جڏي سائُول نَي خبر پڙِي ڪہ دائُود راما شھر ۾ نيوت علائقَي ۾ ھَي، 20 تو اُوئي دائُود نَي جھالڻ رَي ݾارُو ڪئين مِنک ميليا۔ اُوئون ڏيٺو ڪہ نبيون رو ھيڪ موٽو ٽولو اگڪٿِي ڪرَي پڙيو ھانَ سيموئيل اُوئون رو اَگووڻ ھَي۔ پَڇي ايشوَر رِي آتما سائُول رَي مِنکون ماٿَي اُترِي، تو او ڀِي اگڪٿِي ڪرڻ لاگا۔ 21 جڏي سائُول نَي اِيئي بات رِي خبر پڙِي، تو اُوئي ڪئين ٻيجا مِنک ميليا، تو او ڀِي اگڪٿِي ڪرڻ لاگا۔ اِيئي تي سائُول تيجو گُھمرو ڪئين ٻيجا مِنک ميليا، تو او ڀِي اگڪٿِي ڪرڻ لاگا۔ 22 پَڇي سائُول آپ راما شھر ڏيݾا گيو، جڏي او اُوئي موٽَي تلا تي پُگو، جڪو سيڪو رَي علائقَي ۾ ھَي۔ اوٿ سائُول پُوڇو ڪہ،”سيموئيل ھانَ دائُود ڪيٿ ھَي؟“ ڪَي اُوئي نَي ݾُڻايو ڪہ،”او راما شھر رَي نيوت علائقَي ۾ رَي ھَي۔“ 23 پَڇي اوٿ ݾون راما شھر رَي نيوت علائقَي ۾ گيو ھانَ ايشوَر رِي آتما اُوئي تي اُترِي ھانَ او اگڪٿِي ڪرتو راما شھر رَي نيوت علائقَي ۾ پُگو۔ 24 اُوئي ڀِي آپرا گاڀا اُتاريا ھانَ سيموئيل آگھي اگڪٿِي ڪرڻ لاگو۔ او ݾجو ڏِن ھانَ ݾجِي رات اُگھاڙو پڙيو رھيو، اِيئي رَي ڪري اَي ڪيتوڻو مشھُور ھويو ڪہ،”ڪِي، سائُول ڀِي نبيون ۾ ھيڪ نبِي ھَي؟“