يُونتن ھانَ دائُود رِي دوستي
18
جڏي دائُود سائُول ݾون باتون ڪري ھئو ڪيئو، تو يُونتن رو من دائُود ݾون لاگو ھانَ او اُوئي ݾون آپرِي جان ݾون وڌيڪ پريم ڪرڻ لاگو۔ 2 پَڇي سائُول اُوئي ڏِن ݾون دائُود نَي آپ ڪڍي راکيو ھانَ اُوئي نَي اُوئي رَي ٻاپ رَي گھري پاڇو جاوڻ ڪونھي ڏينو۔ 3 اِيئي تي يُونتن ھانَ دائُود ھيڪَي ٻيجَي ݾون وچن ڪيئو، ڪيونڪہ يُونتن اُوئي ݾون آپرِي جان ݾون ڀِي وڌيڪ پريم ڪرتو۔ 4 پَڇي يُونتن آپرو جُبو اُتاري دائُود نَي ڏينو ھانَ اُوئي ڀيڙو آپرو جنگِي لِباس، تلوار، ڪموڻ ھانَ ڪݪيون آݪو پَٽو ڀِي ڏينو۔ 5 سائُول دائُود نَي جيٿ ڀِي ميلتو، تو او آپرَي ڪوم ۾ ڪامياب ھوئي آوتو۔ پَڇي سائُول اُوئي نَي آپرِي فوج رو آفيسر راکيو ھانَ اَي بات ݾجِي اِسرائيلي قوم ھانَ سائُول رَي آفيسرون نَي ݾُٺِي لاگِي۔سائُول رو دائُود ݾون ݾاݪ ڪرڻ
6 جڏي دائُود اُوئي فلستِي نَي ماري پاڇو آوتو پڙيو، تو اِسرائيل رَي ݾجَي شھرون ݾون لُگائَي گاوتَي ھانَ ناچتَي خُوشِي ۾ دفلَي ھانَ بربط بجاوتَي، سائُول بادشاھ رَي اِستقبال رَي ݾارُو آئَي۔ 7 او لُگائَي ناچتَي اَي گاوتَي ڪہ،”سائُول تو ھزارون نَي ماريا، پڻ دائُود لَکون نَي۔“ 8 اِيئي تي سائُول نَي اَي بات خراب لاگِي ھانَ اُوئي ريݾ ۾ ڪھيو ڪہ،”اُوئون دائُود رَي ݾارُو لَکون ڪھيو، پڻ مھارَي ݾارُو رُگو ھزارون۔ دائُود نَي بادشاھي ݾون ٽاݪ ݾجو ڪئين تو ميليو رو، ھمَي اُوئي نَي ٻيجو ڪِي کپَي؟“ 9 اُوئي ڏِن ݾون پَڇي سائُول دائُود ݾون ݾاݪ ڪرڻ لاگو۔
10 پَڇي ٻيجَي ڏِن ايشوَر رَي طرفون بُڇڙِي آتما سائُول تي زور ݾون آئِي ھانَ او گھر ۾ زور ݾون رڙَي ڪرڻ لاگو۔ دائُود ھروز بربط بجاوتو ھانَ سائُول رَي ھاٿ ۾ ھيڪ ڀالو ھتو۔ 11 اِيئي تي سائُول اَي ݾوچي اُوئي نَي ڀالو ھڻيو ڪہ،”ھُون دائُود نَي ڀيت ۾ بينڌي ڇوڙين۔“ اِيئون ٻي گُھمرا ھويو، پڻ دائُود ٻي گُھمرا بچي گيو۔
12 پَڇي سائُول دائُود ݾون ٻيئاجو، ڪيونڪہ پرميشوَر سائُول نَي ڇوڙي دائُود ڀيڙو ھتو۔ 13 اِيئي تي سائُول دائُود نَي ڌار ڪري اُوئي نَي ھيڪ ھزار فوجيون رو آفيسر ٺاھيو ڪہ اُوئون رِي اَگووڻِي ڪرَي۔ 14 پرميشوَر دائُود ڀيڙو ھتو، اِيئي رَي ڪري او جڪو ڪئين ڪرتو ڪامياب ھوئي جاوتو۔ 15 جڏي سائُول ڏيٺو ڪہ دائُود ݾمجھداري ݾون ڪامياب ھووَي پڙيو، تو او اُوئي ݾون وڌيڪ ٻيئاجڻ لاگو۔ 16 پڻ ݾجائِي اِسرائيلي ھانَ يھُودا را مِنک دائُود ݾون پريم ڪرتا، ڪيونڪہ او اُوئون رو ݾُٺو اَگووڻ ھتو۔
سائُول رِي ڏيڪرِي ݾون دائُود رو بيئان
17 پَڇي سائُول دائُود نَي ڪھيو ڪہ،”جي تُو مھارَي ݾارُو دليرِي ݾون پرميشوَر رِي جنگ بِڙھِي، تو جو، ھُون آپرِي موٽِي ڏيڪرِي ميرب رو بيئان ٿَي ݾون ڪرائين۔“ سائُول رِي مرضِي ھتِي ڪہ دائُود مھارَي ھاٿون نا، پڻ فلستيون رَي ھاٿون ماريجَي۔ 18 دائُود سائُول نَي ڪھيو ڪہ،”اِسرائيل ۾ مھارَي ٻاپ رِي ڪو ڀِي حيثيت ڪونھي، ھُون ڪُڻ ھون جڪو بادشاھ رو جوئين ھوئون؟“ 19 پڻ جڏي ميرب رَي بيئان رو ٽيم آيو، تو سائُول آپرِي ڏيڪرِي رو بيئان دائُود ݾون نا، پڻ عدري ايل ݾون ڪرايو جڪو محولا شھر رو ھتو۔
20 سائُول رِي ڏيڪرِي ميڪل دائُود نَي پسند ڪرتِي۔ جڏي سائُول نَي اِيئي بات رِي خبر پڙِي، تو او تموم گھڻو خُوش ھويو۔ 21 پَڇي سائُول ݾوچو ڪہ،”ھُون آپرِي ڏيڪرِي دائُود نَي ڏئين ڪہ او اُوئي رَي ݾارُو مُصيبت ھووَي ھانَ دائُود فلستيون رَي ھاٿون ماريجَي۔“ اِيئي رَي ڪري سائُول ڀڙي دائُود نَي ڪھيو ڪہ،”آج مھارِي مرضِي ھَي ڪہ تُو مھارو جوئين ھو۔“ 22 پَڇي سائُول آپرَي نوڪرون نَي حُڪم ڏينو ڪہ،”ٿي دائُود ݾون آپرَي مُونھ بات ڪرو ھانَ اُوئي نَي ڪو ڪہ، ’جو، بادشاھ ٿَي ݾون خُوش ھَي ھانَ اُوئي را ݾجائِي نوڪر ڀِي ٿنَي پسند ڪرَي ھَي، اِيئي رَي ڪري تُو بادشاھ رِي ڏيڪرِي ݾون بيئان ڪر۔‘“ 23 پَڇي سائُول رَي نوڪرون دائُود نَي او ݾجِي بات ݾُڻائِي۔ دائُود اُوئون نَي ڪھيو ڪہ،”ھُون غريب ھُون ھانَ مھارِي ڪو ڀِي حيثيت ڪونھي۔ بادشاھ رو جوئين ھوئڻ ڪو نِنڪِي بات ھَي۔“ 24 پَڇي نوڪرون جائي سائُول نَي دائُود رَي ݾجَي باتون ݾُڻائَي۔ 25 پَڇي سائُول ڪھيو ڪہ،”ٿي دائُود نَي ڪھيا ڪہ، ’بادشاھ ٿَي ݾون ڪو ڀِي پَشا ڪونھي مونگتو، پڻ اُوئي رِي مرضِي ھَي ڪہ تُو ھيڪ ݾئو فلستِي ماري اُوئون رو کَتنو ڪري ھانَ اُوئون رِي کال لي آ، تو بادشاھ رَي دُشمنون ݾون بدلو ليئو جاوَي۔‘“ سائُول رِي مرضِي ھتِي ڪہ دائُود فلستيون رَي ھاٿون ماريجَي۔ 26 جڏي اُوئون نوڪرون دائُود نَي او باتون ݾُڻائَي، تو او بادشاھ رو جوئين ھوئڻ رَي ݾارُو راضي ھويو۔ اَڃون توڻي راکيوڙا ڏِن پُورا ڪونھي ھويا ھتا، 27 تو دائُود آپرَي مِنکون ڀيڙو گيو ھانَ ٻي ݾئو فلستِي قتل ڪري اُوئون رَي کَتنَي آݪَي کالون بادشاھ نَي لائي ڏينِي ڪہ بادشاھ رو جوئين ھووَي۔ پَڇي سائُول آپرِي ڏيڪرِي ميڪل رو بيئان دائُود ݾون ڪرايو۔
28 سائُول اَي جوئي ݾمجھو ڪہ پرميشوَر دائُود ڀيڙو ھَي ھانَ اُوئي رِي ڏيڪرِي ميڪل دائُود نَي پسند ڪرَي ھَي۔ 29 اِيئي تي سائُول دائُود ݾون اَڃون ڀِي وڌيڪ ٻيئاجڻ لاگو ھانَ مرڻ توڻي دائُود رو دُشمن رھيو۔ 30 جڏي ڀِي فلستِي فوجي آفيسر جنگ رَي ݾارُو آوتا، تو دائُود سائُول رَي ݾجَي نوڪرون رَي مُقابلَي ۾ وڌيڪ ݾمجھداري ݾون ڪوم ڪرتو، جڪَي ݾون اُوئي رِي عِزت اَڃون ڀِي وڌيڪ ھوئڻ لاگِي۔