سيموئيل رَي آخري باتون
12
پَڇي سيموئيل اِسرائيلي قوم نَي ڪھيو ڪہ،”جوئو، ٿون جڪو ڪئين ڪھيو، او مھَي ٿونرَي ݾارُو ڪيئو ھانَ ٿونرَي ݾارُو ھيڪ بادشاھ ڀِي راکيو۔ 2 ھمَي ھُون ڏوڪرو ھون ھانَ مھارا باݪ ڀِي آڇا ھويا را۔ مھَي جوانِي ݾون لي ھڻون توڻي ٿونرِي اَگووڻِي ڪِي ھَي۔ آج ݾون پَڇي سائُول ٿونرو بادشاھ ھَي ھانَ مھارا ڏيڪرا ڀِي ٿون ڀيڙا ھَي۔ 3 جي مھَي ڪيرو ڍگو جو گڏو کوݾيو ھَي، ڪَي ݾون ناحقِي ڪِي ھَي، ڪَي ݾون ظُلم ڪيئو ھَي، جون ڪَي ݾون رشوَت لي بي اِنصافي ڪِي ھَي، تو ھُون ٿون آگھي حاضر ھون۔ ٿي پرميشوَر ھانَ اُوئي رَي چُونڊيوڙَي بادشاھ آگھي مھنَي ݾُڻائو، تو ھُون ٿونَي اُوئي رو حِساب ڏئين۔“ 4 اِيئي تي اِسرائيليون ڪھيو ڪہ،”ٿَي نَڪو مھون ݾون ناحقِي ڪِي ھانَ نَڪو مھون تي ظُلم ڪيئو ھانَ نَڪو ڪَي ݾون ڪئين ليئو ھَي۔“ 5 پَڇي سيموئيل اُوئون نَي ڪھيو ڪہ،”پرميشوَر ھانَ اُوئي رو چُونڊيوڙو بادشاھ آج اِيئي بات را گواھ ھَي ڪہ مھَي ڪڍي ٿونرو ڪئين ڪونھي۔“ تو اُوئون ڪھيو ڪہ،”ھاوي، اَي مھورا گواھ ھَي۔“6 پَڇي سيموئيل مِنکون نَي ڪھيو ڪہ، ”او پرميشوَر ھَي جڪَي مُوسيٰ ھانَ ھارُون نَي چُونڊيا ھانَ او ٿونرا ٻاپ ڏاڏا مِصر مُلڪ ݾون ڪاڍي لي آيو۔ 7 ھمَي ڌھيون ڏي ݾُڻو، ھُون ٿونَي پرميشوَر آگھي، او ڀلائي را ڪوم ياد ڪرائُون، جڪو پرميشوَر ٿونرَي ݾارُو ھانَ ٿونرَي ٻاپ ڏاڏون رَي ݾارُو ڪيئا۔ 8 جڏي يعقُوب آپرَي خاندان ڀيڙو مِصر مُلڪ ۾ گيو، تو ٿونرَي ٻاپ ڏاڏون مِصريون رَي ظُلم رَي ڪري پرميشوَر نَي پُڪاريو، تو اُوئي مُوسيٰ ھانَ ھارُون نَي ميليا۔ او ٿونرَي ٻاپ ڏاڏون نَي مِصر ݾون ڪاڍي اِيئي جگھا تي لي آيو۔ 9 پڻ او مِنک پرميشوَر آپرَي ايشوَر نَي پونتريا، اِيئي رَي ڪري پرميشوَر اُوئون نَي حصُور شھر رَي بادشاھ رَي فوجي آفيسر سيسرا، فلستيون ھانَ موآب مُلڪ رَي بادشاھ رَي حوالي ڪيئا ھانَ اُوئون اِسرائيليون ݾون جنگ ڪِي۔“ 10 پَڇي اُوئون پرميشوَر نَي پُڪاري ڪھيو ڪہ،”مھون پاپ ڪيئو ھَي ھانَ پرميشوَر نَي ڇوڙي بعل ڏيوتائون ھانَ عستارات ڏيوِي رِي پُوجا ڪِي ھَي۔ ھمَي اي پرميشوَر، تُو مھونَي مھورَي دُشمنون ݾون ڇوڙا، تو مھي ٿارِي ڀگتي ڪرشون۔ 11 پَڇي پرميشوَر يربعل، برق، اِفتاح ھانَ مھنَي يعني، سيموئيل نَي ميليو ھانَ مھون ٿونَي ٿونرَي ݾجَي دُشمنون ݾون ڇوڙايا ھانَ ٿي آروم ݾون ريوَڻ لاگا۔ 12 پَڇي جڏي ٿون ڏيٺو ڪہ عمُونيون رو بادشاھ ناحس ٿون تي حملو ڪرڻ آيو ھَي، تو ٿون مھنَي ڪھيو ڪہ، ’مھورو ڀِي بادشاھ ھووَي، جڪو مھون تي بادشاھي ڪرَي۔‘ حقيقت ۾ ٿونرو بادشاھ، پرميشوَر ٿونرو ايشوَر ھتو۔“
13 پَڇي سيموئيل ڪھيو ڪہ،”جوئو، ھمَي اَي ٿونرو بادشاھ ھَي، جڪَي نَي ٿون چُونڊيو ھَي ھانَ جڪَي رَي بارَي ۾ ٿون ڪھيو ھتو۔ اَي بادشاھ پرميشوَر ٿونَي ڏينو ھَي۔ 14 ٿونرَي ݾارُو ݾُٺو ھَي ڪہ ٿي پرميشوَر رو ٻِي راکي پرميشوَر رِي ڀگتي ڪرو، اُوئي رو حُڪم منو ھانَ ڪڏي ڀِي اُوئي رِي نافرمونِي نِي ڪرو۔ ٿونرو بادشاھ جڪو ٿون ماٿَي بادشاھي ڪرَي ھَي، ٿي پرميشوَر آپرَي ايشوَر لاري بيتا رھيا۔ 15 پڻ جي ٿي پرميشوَر رو حُڪم ڪونھي منو ھانَ اُوئي رِي نافرمونِي ڪرشو، تو پرميشوَر ٿونرَي خلاف ھوشَي، جھڙَي نمُونَي او ٿونرَي ٻاپ ڏاڏون رَي خلاف ھتو۔ 16 ھمَي ٿي پرميشوَر رَي اِيئي موٽَي ڪوم تي ڌھيون لگائو، جڪو او ٿون آگھي ڪرشَي۔ 17 ڪِي ھڻون ڪڻڪ رو لٻارو ڪونھي؟ پڻ ھُون پرميشوَر ݾون پراٿنا ڪرين ڪہ باڏݪ گرجَي ھانَ مي آوَي، تو پَڇي ٿونَي خبر پڙشَي ڪہ ٿون آپرَي ݾارُو پرميشوَر ݾون بادشاھ مونگي موٽو ڏوھ ڪيئو ھَي۔“
18 پَڇي سيموئيل پراٿنا ڪِي ھانَ پرميشوَر اُوئي رِي پراٿنا ݾُڻِي۔ پَڇي اُوئيج ڏِن باڏݪ گرجا ھانَ مي آيو۔ اَي جوئي ݾجائِي مِنک پرميشوَر ھانَ سيموئيل ݾون تموم گھڻا ٻيئاجڻ لاگا۔ 19 پَڇي ݾجَي مِنکون سيموئيل نَي ڪھيو ڪہ،”تُو پرميشوَر آپرَي ايشوَر ݾون مھون ٻونھون رَي ݾارُو پراٿنا ڪر ڪہ مھي مرون نِي، ڪيونڪہ مھون آپرَي ݾارُو بادشاھ مونگي ھيڪ ٻيجو ڏوھ ڪيئو ھَي۔“
20 پَڇي سيموئيل مِنکون نَي ڪھيو ڪہ،”ٻيئاجو نِي، ٿون ڏوھ تو ڪيئو ھَي، پڻ تو ڀِي پرميشوَر لاري بَيا ھانَ پُورَي دِل ݾون اُوئي رِي ڀگتي ڪريا۔ 21 ٿي ڏيوتائون رِي پُوجا نِي ڪريا، جڪو نَڪو ٿونَي فائدو ڏَي ھانَ نَڪو ٿونَي بچاوَي، ڪيونڪہ او رُگو ڪُوڙا ھَي۔ 22 پرميشوَر آپرَي قُدرت آݪَي نون رَي ڪري آپرَي مِنکون نَي ھيکلا ڪونھي ڇوڙَي، ڪيونڪہ اُوئي آپرِي مرضِي ݾون ٿونَي آپرِي قوم ٺاھيا ھَي۔ 23 ھمَي رئِي مھارِي بات، ھُون تو ٿونرَي ݾارُو پرميشوَر ݾون پراٿنا ڪرتو رئين ڪہ پرميشوَر رو ڏوھي نِي ھوئون۔ ھُون ٿونَي صحيح ھانَ ݾِڌو مارگ بتاوتو رئين۔ 24 آج ݾون ٿي پرميشوَر ݾون ٻيئاجتا رھيا ھانَ آپرَي پُورَي دِل ھانَ وفادارِي ݾون اُوئي رِي ڀگتي ڪريا ھانَ ياد راکيا، پرميشوَر ٿونرَي ݾارُو موٽا موٽا ڪوم ڪيئا ھَي۔ 25 پڻ جي ٿي بُڇڙائي ڪرتا ريشو، تو ٿي ھانَ ٿونرو بادشاھ برباد ھوئي جاشو۔“