سيموئيل رو سائُول نَي چُونڊڻ
10
پَڇي سيموئيل تيل رِي ھيڪ ڪُپِي لِي ھانَ تيل سائُول رَي ماٿَي تي ڍوڙيو۔ پَڇي اُوئي نَي ميٺکِي ڏي ڪھيو ڪہ،”پرميشوَر ٿنَي چُونڊي آپرِي اِسرائيلي قوم رو اَگووڻ ٺاھيو ھَي۔ 2 آج جڏي تُو مھَي ݾون بَئير ھووَي، تو بنيامين قبيلَي رِي حد ۾ ضلضح شھر ۾ راخل رَي مُڪوم ڪڍي ٿنَي ٻي مِنک ڀيڙا ھوشَي۔ او ٿنَي ڪشَي ڪہ، ’جڪو گڏَي تُو جوئڻ گيو ھتو، او لاڌَي رَي۔ ھمَي ٿارو اَبا گڏيون رَي ݾارُو نا، پڻ ٿارَي ݾارُو پريشون ھَي ھانَ ڪَي پڙيو ڪہ ھُون آپرَي ڏيڪرَي رَي ݾارُو ڪِي ڪرون؟‘ 3 پَڇي جڏي تُو اوٿ ݾون آگھي جائي، تبُور رَي ميدون ۾ بلُوط رَي بَڻ ڪڍي پُگَي، تو اوٿ پُگي ٿنَي تين مِنک ڀيڙا ھوشَي، جڪو بيت ايل شھر ۾ ايشوَر رِي ڀگتي ڪرڻ جاوتا ھوشَي۔ اُوئون ۾ ھيڪَي ڪڍي تين ٻڪرِي را ڦَݪ، ٻيجَي ڪڍي تين ٻاٽَي ھانَ تيجَي ڪڍي انگُورون رَي رس رِي ڏيڙِي ھوشَي۔ 4 او ٿنَي نمسڪار ڪرشَي ھانَ پَڇي او ٿنَي ٻي ٻاٽَي ڀِي ڏيشَي، تُو او ٻاٽَي اُوئون ݾون لئي۔ 5 اِيئي ݾون پَڇي تُو جِبع يعني، ايشوَر رَي جبل تي جائي، جيٿ فلستيون رو پھرو ھَي۔ جڏي تُو شھر ۾ جائِي، تو اوٿ ٿنَي نبيون رو موٽو ٽولو ڀيڙو ھوشَي، جڪو ٻَليدون رَي جبل ݾون ھيٺو اُترتو ھوشَي ھانَ او اگڪٿَي ڪرتا ھوشَي۔ اُوئون ڪڍي بجاوڻ رَي ݾارُو تندُورو، دفلِي، بونݾلِي ھانَ بربط ساز ھوشَي۔ 6 اُوئي ٽيم پرميشوَر رِي آتما زور ݾون ٿَي ماٿَي اُترشَي ھانَ تُو ڀِي اُوئون ڀيڙو اگڪٿِي ڪرِي ھانَ تُو ݾَڦا بدليجي جائِي۔ 7 جڏي اَي نِشونَي پُورَي ھووَي، تو پَڇي جون ٿنَي ݾُٺو لاگَي او ڪري، ڪيونڪہ ايشوَر ٿَي ڀيڙو ھَي۔ 8 پَڇي تُو مھَي ݾون پيل جِلجال شھر ڏيݾا جائي۔ جو، ھُون اوٿ ٿَي ڪڍي آئين ڪہ ھُون ٻاݪڻ آݪو ھانَ خيريت رو ٻَليدون ڪرون۔ تُو ݾات ڏِن مھارو اِنتظار ڪري، پَڇي ھُون آئي ٿنَي ݾُڻائين ڪہ ٿنَي ڪِي ڪرڻو ھَي۔“9 پَڇي جڏي سائُول سيموئيل ݾون بَئير ھويو، تو ايشوَر سائُول رو من بدلايو، اُوئي ڏِن او ݾجَي نِشونَي ڀِي پُورَي ھوئَي۔ 10 جڏي سائُول ھانَ اُوئي رو نوڪر جِبع شھر ۾ آيا، تو اوٿ اُوئون نَي نبيون رو ھيڪ ٽولو ڀيڙو ھويو۔ پَڇي ايشوَر رِي آتما زور ݾون سائُول ماٿَي اُترِي ھانَ او ڀِي اُوئون ڀيڙو اگڪٿِي ڪرڻ لاگو۔ 11 اوٿ جڪو مِنک سائُول نَي اوݪکتا، جڏي اُوئون سائُول نَي نبيون ڀيڙو اگڪٿِي ڪرتَي ڏيٺو، تو آپت ۾ ڪيوَڻ لاگا ڪہ،”قيس رَي ڏيڪرَي نَي ڪِي ھويو؟ ڪِي، سائُول ڀِي نبيون ۾ ھيڪ نبِي ھَي؟“ 12 تو ھيڪَي مِنک ڪھيو ڪہ،”اِيئون ݾجون رو اَگووڻ ڪُڻ ھَي؟“ اِيئي رَي ڪري اَي ڪيتوڻو مشھُور ھويو ڪہ،”ڪِي، سائُول ڀِي نبيون ۾ ھيڪ نبِي ھَي؟“ 13 جڏي سائُول اگڪٿِي ڪري ھئو ڪيئو، تو او ٻَليدون رَي جبل تي گيو۔
14 پَڇي سائُول رَي ڪاڪَي سائُول ھانَ اُوئي رَي نوڪر ݾون پُوڇو ڪہ،”ٿي ڪيئا گيا ھتا؟“ سائُول ڪھيو ڪہ،”مھي گڏَي جوئڻ گيا ھتا، پڻ جڏي او ڪونھي لاڌَي، تو مھي سيموئيل ڪڍي گيا ھتا۔“ 15 پَڇي سائُول رَي ڪاڪَي ڪھيو ڪہ،”مھنَي ݾُڻائو، سيموئيل ٿونَي ڪِي ڪھيو؟“ 16 سائُول آپرَي ڪاڪَي نَي ڪھيو ڪہ، ”سيموئيل مھونَي چِٽو ݾُڻايو ڪہ گڏَي لاڌَي رَي۔“ پڻ سائُول بادشاھ ھوئڻ آݪِي بات آپرَي ڪاڪَي نَي ڪونھي ݾُڻائِي۔
سيموئيل رو سائُول نَي بادشاھ ٺاوڻ
17 پَڇي سيموئيل مِنکون نَي مِصفا شھر ۾ پرميشوَر ڪڍي اَڻايا۔ 18 سيموئيل اِسرائيلي قوم نَي ڪھيو ڪہ،”پرميشوَر اِسرائيل رو ايشوَر اَي ڪَي ھَي ڪہ، ’ھُون اِسرائيليون نَي مِصر مُلڪ ݾون ڪاڍي لي آيو ھانَ مھَي اُوئون نَي مِصري قوم ھانَ ݾجَي بادشاھون رَي ھاٿون ڇوڙايا، جڪو اُوئون تي ظُلم ڪرتا۔‘ 19 پڻ آج ٿون آپرَي ايشوَر نَي ڇوڙيو رو، جڪَي ٿونَي ݾجَي مُصيبتون ھانَ آفتون ݾون بچايا ھتا۔ پَڇي ٿون ڪھيو ڪہ، ’مھونَي ھيڪ بادشاھ کپَي۔‘ اِيئي رَي ڪري ھمَي آپرَي قبيلون ھانَ آپرَي خاندان رَي حِساب ݾون پرميشوَر آگھي حاضر ھوئو۔“
20 پَڇي سيموئيل اِسرائيل را ݾجائِي قبيلا پرميشوَر آگھي لي آيو۔ جڏي پُکو گھاتيو، تو او بنيامين قبيلَي رو نڪريو۔ 21 پَڇي سيموئيل بنيامين قبيلَي نَي اُوئون رَي خاندان رَي حِساب ݾون پرميشوَر ڪڍي لي آيو۔ جڏي پُکو گھاتيو، تو او مِطري قبيلَي رو نڪريو۔ پَڇي جڏي پُکو گھاتيو، تو او قيس رَي ڏيڪرَي سائُول رو نڪريو، پڻ جڏي سائُول نَي جويو، تو ڪونھي لاڌو۔ 22 پَڇي اُوئون پرميشوَر ݾون پُوڇو ڪہ،”ڪِي او آڏمي ايٿ ھَي؟“ پرميشوَر ڪھيو ڪہ،”جوئو، او تنٻُو ۾ لِڪيوڙو ھَي۔“ 23 اِيئي تي مِنک اُوئا ناٺا ھانَ جائي سائُول نَي لي آيا۔ جڏي سائُول اُوئون رَي بِچ ۾ اُڀو، تو اُوئي رو قد اِترو لونٻو ھتو ڪہ مِنک اُوئي رَي ڪونڌَي توڻي آوتا۔ 24 پَڇي سيموئيل مِنکون نَي ڪھيو ڪہ،”جوئو، جڪَي نَي پرميشوَر چُونڊيو ھَي اِيئي جھڙو ٻيجو ڪو ڀِي ڪونھي۔“ اِيئي تي ݾجائِي مِنک نارا ھڻڻ لاگا ڪہ،”بادشاھ رِي جَئي ھووَي۔“
25 پَڇي سيموئيل مِنکون نَي بادشاھي را قانُون ھانَ اصُول ݾُڻايا۔ پَڇي اَي ݾجَي باتون ڪِتاب ۾ لِکي اُوئي نَي پويتر تنٻُو ۾ راکيو۔ اِيئي ݾون پَڇي سيموئيل ݾجون نَي آپرَي آپرَي گھري ميليا۔ 26 سائُول ڀِي جِبع شھر ۾ آپرَي گھري گيو۔ سائُول ڀيڙا ڪئين دلير مِنک ڀِي گيا، جڪون را من ايشوَر بدلايا ھتا۔ 27 پڻ ڪئين بُڇڙا مِنک ڪيوَڻ لاگا ڪہ،”اَي مِنک مھونَي ڪيڪر بچاشَي؟“ اِيئي نمُونَي اُوئون سائُول نَي ڪئين ڪونھي ݾمجھو ھانَ اُوئي نَي تحفا ڀِي ڪونھي ڏينا، پڻ سائُول ماٺ ھتو۔