اِسرائيليون رو آپرَي ݾارُو بادشاھ مونگڻ
8
جڏي سيموئيل ڏوڪرو ھويو، تو اُوئي آپرا ڏيڪرا اِسرائيليون رَي ݾارُو قاضِي راکيا۔ 2 سيموئيل رَي موٽَي ڏيڪرَي رو نون يُوئيل ھانَ نِنئي رو نون ابيا ھتو۔ اَي ٻيئي بيرسبع شھر ۾ قاضِي ھتا۔ 3 پڻ اُوئي را ڏيڪرا آپرَي ٻاپ رَي بتايوڙَي مارگ تي ڪونھي بُوئا، ڪيونڪہ او ھميشا آپرَي فائدَي رَي ݾارُو ݾوچتا۔ او تموم گھڻا لالچي ھتا، اِيئي رَي ڪري رشوَت لي غلط فيصلا ڪرتا۔4 اِيئي تي اِسرائيليون را ݾجائِي اَگووڻ ڀيڙا ھوئي راما شھر ۾ سيموئيل ڪڍي آيا 5 ھانَ اُوئي نَي ڪھيو ڪہ،”جو، تُو بُوڍو ھويو رو ھانَ ٿارا ڏيڪرا ٿارَي بتايوڙَي مارگ تي ڪونھي بيتا۔ ھمَي تُو ٻيجَي قومون آݪِي ڪار مھورَي ݾارُو ھيڪ بادشاھ چُونڊ ڪہ او مھون تي بادشاھي ڪرَي۔“ 6 جڏي سيموئيل اُوئون رِي اَي بات ݾُڻِي ڪہ،”تُو مھورَي ݾارُو ھيڪ بادشاھ چُونڊ، جڪو مھون تي بادشاھي ڪرَي۔“ تو اُوئي نَي اَي بات خراب لاگِي ھانَ اُوئي پرميشوَر ݾون پراٿنا ڪِي۔ 7 پَڇي پرميشوَر سيموئيل نَي ڪھيو ڪہ،”اَي مِنک جڪو ڪئين ٿنَي ڪَي، تُو اوج ڪر، ڪيونڪہ اُوئون ٿنَي نا، پڻ مھنَي ڇوڙيو ھَي ڪہ ھُون اُوئون رو بادشاھ نِي ھوئون۔ 8 جڏي ݾون ھُون اُوئون نَي مِصر مُلڪ ݾون ڪاڍي لايو ھون، اُوئي ڏِن ݾون لي آج توڻي او مھنَي ڇوڙي ٻيجَي ڏيوتائون رِي پُوجا ڪرتا آيا ھَي، ھمَي او ٿَي ݾون ڀِي اِيئوج ڪرَي پڙيا۔ 9 اِيئي رَي ڪري ھمَي تُو اُوئون رِي بات من، پڻ اُوئون نَي پُورَي نمُونَي خبردار ڪري اَي ݾُڻائي ڪہ جڪو بادشاھ ٿون ماٿَي بادشاھي ڪرشَي، او ٿون ݾون ڪيڪر بيشَي۔“
10 پَڇي سيموئيل پرميشوَر رَي اَي ݾجَي باتون اِسرائيليون نَي ݾُڻائَي، جڪو اُوئي ݾون آپرو بادشاھ مونگتا پڙيا۔ 11 سيموئيل ڪھيو ڪہ،”جڪو بادشاھ ٿون ماٿَي بادشاھي ڪرشَي، اُوئي رو طريقو اَي ھوشَي ڪہ او ٿونرا ڏيڪرا آپرَي گھوڙون رِي ݾنڀال ھانَ گھوڙون گاڏون را نوڪر راکشَي ھانَ او اُوئي رَي گھوڙون گاڏون آگھي ناݾشَي۔ 12 او اُوئون نَي ھزار ھزار فوج تي ھانَ پنجاھ پنجاھ آفيسرون تي راکشَي۔ او ڪَي ݾون ھَݪ کيڙاشَي ھانَ ڪَي ݾون لٻارو، ڪَي ݾون جنگِي ھٿيار ھانَ ڪَي ݾون آپرَي گھوڙون گاڏون رو ڪوم ڪراشَي۔ 13 او ٿونرَي ڏيڪريون ݾون عطر ٺڙاشَي ھانَ ݾيڌو ڪراشَي۔ 14 او ٿونرَي ٻنَي، انگُورون ھانَ زيتُون رَي باگون ݾون ݾُٺو حِصو آپرَي شيوادارون نَي ڏيشَي۔ 15 او ٿونرو ڌون ھانَ انگُورون رَي باگون رو ڏھون حِصو آپرَي وزيرون ھانَ شيوادارون نَي ڏيشَي۔ 16 او ٿونرَي ٻونھون، ٻونھيون، ھوشيار جوانون ھانَ گڏون ݾون آپرو ڪوم ڪراشَي۔ 17 او ٿونرَي رڍون ٻڪريون رو ڏھون حِصو ڀِي ليشَي ھانَ ٿي اُوئي را غُلوم ھوشو۔ 18 پَڇي اُوئي ڏِن ٿي آپرَي چُونڊيوڙَي بادشاھ رَي ڪري پرميشوَر نَي پُڪارشو، پڻ او ٿونرِي ڪونھي ݾُڻَي۔“
19 تو ڀِي مِنکون سيموئيل رِي بات ڪونھي ݾُڻِي ھانَ ڪھيو ڪہ،”نا، مھونَي بادشاھ کپَي، جڪو مھون تي بادشاھي ڪرَي 20 ھانَ مھي ڀِي ٻيجَي قومون آݪِي ڪار ھوئون ھانَ مھورو بادشاھ مھون تي حڪُومت ڪرَي ھانَ مھورَي آگھي بَئي مھورَي دُشمنون ݾون جنگ ڪرَي۔“ 21 پَڇي سيموئيل مِنکون رَي باتون ݾُڻئَي ھانَ جائي پرميشوَر نَي ݾُڻايو۔ 22 اِيئي تي پرميشوَر سيموئيل نَي ڪھيو ڪہ،”تُو اُوئون رِي بات من ھانَ اُوئون رَي ݾارُو ھيڪ بادشاھ راک۔“ پَڇي سيموئيل اِسرائيليون نَي ڪھيو ڪہ،”ٿي ݾجائِي آپرَي آپرَي شھر ڏيݾا پاڇا جائو۔“