وچن رِي ݾنڏُوڪ فلستيون رَي شھرون ۾
5
فلستِي ايشوَر رَي وچن رِي ݾنڏُوڪ ابن عزر علائقَي ݾون کوݾي اشدُود شھر ۾ لي گيا۔ 2 فلستيون او ݾنڏُوڪ آپرَي ڏيوتا دجون رَي مندر ۾ اُوئي مُورتِي رَي پاݾَي ۾ راکِي۔ 3 پَڇي ݾاڪݪي تارھي اشدُود شھر رَي مِنکون اُٺي جويو ڪہ دجون ڏيوتا رِي مُورتِي پرميشوَر رَي وچن رِي ݾنڏُوڪ آگھي موڏَي توڻي ھيٺا کِري پڙِي ھَي۔ پَڇي اُوئون دجون ڏيوتا رِي مُورتِي پاڇِي آپرِي جگھا تي راکِي۔ 4 پَڇي ٻيجَي ڏِن ݾاڪݪي تارھي مِنکون اُٺي ڏيٺو ڪہ دجون ڏيوتا رِي مُورتِي ڀڙي پرميشوَر رَي وچن رِي ݾنڏُوڪ آگھي موڏَي توڻي ھيٺا کِري پڙِي ھَي۔ اِيئي گُھمرَي اُوئي رو ماٿو ھانَ ھاٿ مندر رَي در ڪڍي ڀاگوڙا ھتا ھانَ رُگو اُوئي رو ڌڙ بچوڙو ھتو۔ 5 اِيئي تي دجون ڏيوتا را پُوجاري ھانَ او ݾجائِي، جڪو اشدُود شھر ۾ دجون رَي مند ۾ آوتا۔ او آج توڻي مندر ۾ آپرا پگ ڪونھي راکتا۔6 پَڇي پرميشوَر اشدُود شھر آݪون رَي خلاف ھويو۔ پرميشوَر اشدُود شھر ھانَ اُوئي رَي چوڌاري گون رَي مِنکون ۾ گُوٻڙون آݪِي آفت ميلي اُوئون نَي برباد ڪرڻ لاگو۔ 7 جڏي اشدُود رَي مِنکون ڏيٺو، تو ڪيوَڻ لاگا ڪہ، ”اِسرائيل رَي ايشوَر رِي وچن رِي ݾنڏُوڪ ھمَي آپون ڪڍي نِي رَي، ڪيونڪہ ايشوَر آپڻَي ھانَ آپڻَي ڏيوتا دجون رَي خلاف ھَي۔“ 8 پَڇي اُوئون فلستِي قوم را ݾجائِي اَگووڻ ڀيڙا ڪري پُوڇو ڪہ، ”آپي اِيئي ݾنڏُوڪ رو ڪِي ڪرون؟“ اُوئون ڪھيو ڪہ، ”اَي ݾنڏُوڪ جات شھر ڏيݾا ميلو۔“ پَڇي او ݾنڏُوڪ اوٿ ݾون لي گيا۔ 9 جڏي او ݾنڏُوڪ جات شھر ۾ پُگِي، تو پرميشوَر اُوئي شھر رَي خلاف ھويو ھانَ شھر را ݾجائِي مِنک ٻيئاجي گيا۔ پَڇي شھر رَي نِنئي ݾون لي موٽَي توڻي ݾجون را گُوٻڙ نڪريا۔
10 پَڇي جات شھر رَي مِنکون او ݾنڏُوڪ عقرُون شھر ڏيݾا ميلِي۔ جڏي ݾنڏُوڪ عقرُون شھر ۾ پُگِي، تو اوٿ را مِنک رڙَي ڪري ڪيوَڻ لاگا ڪہ، ”ٿي اِسرائيل رَي ايشوَر رِي وچن رِي ݾنڏُوڪ مھون ڪڍي لي آيا ھو ڪہ مھونَي مارو۔“ 11 پَڇي اُوئون ڀڙي فلستِي اَگووڻون نَي ڀيڙا ڪري پُوڇو ڪہ، ”اِسرائيل رَي ايشوَر رِي وچن رِي ݾنڏُوڪ اُوئي رِي جگھا پاڇِي ميلو ڪہ آپي ھانَ آپڻا مِنک بچي جائُون۔“ ايشوَر رِي اِيئي آفت ݾون ݾجَي شھر ۾ موت رو ٻِي بڌي گيو ھَي۔ 12 جڪو مِنک مُوئا ڪونھي، او گُوٻڙ نڪرڻ رَي ڪري تڪليف ۾ پڙيا ھانَ اُوئي شھر رَي مِنکون رِي فرياد آڪاش توڻي پُگِي۔