4
سيموئيل رَي ڪھيوڙَي ݾجَي باتون اِسرائيليون ۾ پِکڙي گئَي۔وچن رِي ݾنڏُوڪ رو کوݾيجڻ
اُوئون ڏِنون ۾ اِسرائيلي فلستيون ݾون جنگ ڪرڻ گيا۔ اِسرائيليون ابن عزر علائقَي ۾ آپرا تنٻُو لگايا ھانَ فلستِي قوم ڀِي افيق علائقَي ۾ آپرا تنٻُو لگايا۔ 2 پَڇي فلستيون، اِسرائيليون تي حملو ڪري اُوئون نَي ھرايا ھانَ اُوئون را اندازن چار ھزار مِنک ميدون ۾ قتل ڪري ڇوڙيا۔ 3 پَڇي اِسرائيلي پاڇا آپرَي تنٻُوئون ۾ آيا، تو اُوئون رَي اَگووڻون ڪھيو ڪہ، ”آج پرميشوَر آپون نَي ڪيئون فلستيون ݾون ھرايا ھَي؟ آئو، آپي پرميشوَر رِي ݾنڏُوڪ سيلا شھر ݾون ايٿ لي آئُون ڪہ او آپڻَي بِچ ۾ ھووَي ھانَ او آپون نَي آپڻَي دُشمنون ݾون بچاوَي۔“ 4 اِيئي رَي ڪري اُوئون سيلا شھر ۾ مِنک ميليا ھانَ او اوٿ ݾون وچن رِي ݾنڏُوڪ لي آيا، جڪَي تي ڪروبيون رَي بِچ ۾ پرميشوَر رو جلوو ھتو۔ عيلي را ٻيئي ڏيڪرا حُفني ھانَ فينحاس ڀِي ݾنڏُوڪ ڀيڙا آيا۔
5 جڏي پرميشوَر رَي وچن رِي ݾنڏُوڪ اِسرائيليون رَي تنٻُو ۾ آئِي، تو ݾجَي اِسرائيليون تموم گھڻَي زور ݾون خُوشِي ݾون نارا لگايا، جڪَي ݾون زمين ھِلڻ لاگَي۔ 6 جڏي فلستيون اُوئون رو ھُل ݾُڻيو، تو ڪيوَڻ لاگا ڪہ، ”عبرانيون رَي تنٻُو ۾ اَي ڪھڙو موٽو ھُل ھَي؟“ اِيئي تي اُوئون نَي خبر پڙَي ڪہ پرميشوَر رَي وچن رِي ݾنڏُوڪ اُوئون رَي تنٻُوئون ۾ آئِي ھَي۔ 7 اِيئي تي فلستِي گھٻرائي ڪيوَڻ لاگا ڪہ، ”اُوئون رو ڏيوتا اُوئون رَي تنٻُوئون ۾ آيو ھَي ھانَ ھمَي مھون تي موٽِي مُصيبت آئِي ھَي، ڪيونڪہ اِيئي ݾون پيل اِيئون ڪڏي ڀِي ڪونھي ھويو۔“ 8 پَڇي او گھٻرائي ڪيوَڻ لاگا ڪہ،”ڪُڻ مھونَي اُوئون طاقت آݪون ڏيوتائون ݾون بچاشَي؟ اَي او ڏيوتا ھَي، جڪون مِصري قوم نَي رڻ پَٽ ۾ تموم گھڻَي آفتون ميلي ماريا ھتا۔ 9 اي فلستيون ھِمت نِي ھارو، پھلوون ھوئو ڪہ آپي عبرانيون را غُلوم نِي ھوئون، جھڙَي نمُونَي او پيل آپڻا غُلوم ھتا۔ اِيئي رَي ڪري پھلوون ھوئو ھانَ بِڙھو۔“
10 اِيئي تي فلستيون اِسرائيليون ݾون جنگ ڪِي ھانَ اُوئون اِسرائيليون نَي ھرايا۔ پَڇي اِسرائيلي آپرَي تنٻُوئون ڏيݾا ناٺا ھانَ تموم گھڻا مِنک ماريجا۔ اوٿ ٽيھ ھزار اِسرائيلي جنگِي مِنک ماريجا۔ 11 پَڇي فلستيون ايشوَر رَي وچن رِي ݾنڏُوڪ کوݾي لِي ھانَ عيلي را ٻيئي ڏيڪرا حُفني ھانَ فينحاس ڀِي ماريجا۔
عيلي رِي موت
12 اُوئي ڏِن بنيامين قبيلَي رو ھيڪ مِنک جنگ رَي ميدون ݾون ناݾي سيلا شھر ۾ پُگو ھانَ اُوئي ڏُک ۾ آپرا گاڀا ڦاڙيا ھانَ ماٿَي ۾ مٽِي گھاتِي۔ 13 جڏي او اوٿ پُگو، تو عيلي مارگ ۾ ڪُرسِي تي ٻيݾي اِنتظار ڪرتو پڙيو، ڪيونڪہ او ايشوَر رَي وچن رِي ݾنڏُوڪ رَي ݾارُو پريشون ھتو۔ پَڇي اُوئي مِنک شھر ۾ پُگي مِنکون نَي او ݾجو حال ݾُڻايو، تو ݾجائِي روئڻ لاگا۔ 14 جڏي عيلي روئڻ رو آواز ݾُڻيو، تو پُوڇو ڪہ، ”اَي ڪھڙو ھُل ھَي؟“ پَڇي اُوئي مِنک ڇيڪائِي ڪري او ݾجو حال عيلي نَي ݾُڻايو۔
15 اُوئي ٽيم عيلي رِي عُمر اَٺانوي ݾال ھتِي ھانَ او جوئي ڪونھي ݾگھتو، ڪيونڪہ اُوئي رِي نظر ڪمزور ھوئِي ھتِي۔ 16 اُوئي مِنک عيلي نَي ڪھيو ڪہ، ”ھُون ھڻون جنگ رَي ميدون ݾون ناݾي آيو ھون۔“ عيلي اُوئي ݾون پُوڇو ڪہ، ”اي مھارا ڏيڪرا، اوٿ رِي ڪھڙِي خبر ھَي؟“ 17 پَڇي اُوئي مِنک ڪھيو ڪہ، ”اِسرائيلي، فلستيون ݾون جنگ ھرائي گيا ھانَ تموم گھڻا مِنک ماريجا را۔ ٿارا ٻيئي ڏيڪرا حُفني ھانَ فينحاس ڀِي ماريجا را ھانَ ايشوَر رَي وچن رِي ݾنڏُوڪ ڀِي کوݾيجِي رِي۔“ 18 جڏي عيلي ݾنڏُوڪ رَي بارَي ۾ ݾُڻيو، تو او در رَي نيڙو آپرِي ڪُرسِي لاري جائي کِريو، جڪَي ݾون اُوئي رو ڪونڌو ڀاگو ھانَ او مري گيو، ڪيونڪہ او ڏوڪرو ھانَ جاڏو مِنک ھتو۔ عيلي چاليھ ݾال توڻي اِسرائيلي قوم رو قاضِي رھيو۔
فينحاس رِي لُگائِي رِي موت
19 اُوئي ٽيم عيلي رَي ڏيڪرَي فينحاس رِي لُگائِي اُميد ݾون ھتِي ھانَ ٻاݪ جِڻڻ رو ٽيم نيڙو ھتو۔ جڏي اُوئي ݾُڻيو ڪہ ايشوَر رَي وچن رِي ݾنڏُوڪ کوݾيجِي ھَي ھانَ اُوئي رو ݾُݾرو ھانَ ڌڻِي ٻيئي مُوئا را، تو اُوئي را ٻاݪ جِڻڻ را ڏوکن بڌيا ھانَ اُوئي نِمي ٻاݪ نَي جنم ڏينو۔ 20 جڏي او مرڻ آݪِي ھتِي، تو لُگايون اُوئي نَي ڪھيو ڪہ، ”تُو ٻيئاج نِي، ڪيونڪہ ٿارَي ڏيڪرو ھويو ھَي۔“ تو اُوئي نَڪو بݪتِي ڏينِي ھانَ نَڪو اُوئي بات تي ڌھيون ڏينو۔ 21 پَڇي اُوئي آپرَي ڏيڪرَي رو نون اَي ڪئي يڪبود راکيو ڪہ، ”اِسرائيل ݾون ايشوَر رِي مھما ختم ھوئِي رِي۔“ ڪيونڪہ وچن رِي ݾنڏُوڪ کوݾيجِي ھتِي ھانَ اُوئي رو ݾُݾرو ھانَ ڌڻِي ڀِي ماريجا ھتا۔ 22 پَڇي اُوئي ڪھيو ڪہ، ”اِسرائيل ݾون ايشوَر رِي مھما ختم ھوئِي رِي، ڪيونڪہ ايشوَر رَي وچن رِي ݾنڏُوڪ کوݾيجِي ھَي۔“