قُضات 20

بنيامين قبيلَي نَي سزا

پَڇي دان ݾون لي بير سبع شھر ھانَ جِلعاد رَي علائقَي ݾُوڌا اِسرائيلي قوم را ݾجائِي مِنک نڪريا ھانَ پرميشوَر آگھي ھيڪ من ھوئي مِصفا شھر ۾ ڀيڙا ھويا۔ ‏2 پَڇي اِسرائيلي قوم را ݾردار ھانَ ݾجائِي قبيلَي آݪا ايشوَر رِي مَنڊلِي ۾ ڀيڙا ھويا۔ اِيئون ۾ چار لَک مِنک تلوار ھلاوڻ را ڪاريگر ھتا۔ ‏3 جڏي بنيامين قبيلَي ݾُڻيو ڪہ اِسرائيلي مِنک مِصفا شھر ۾ آيا ھَي۔

اِسرائيلي ھيڪَي ٻيجَي ݾون پُوڇڻ لاگا ڪہ،”اَي بُڇڙو ڪوم ڪَي ڪيئو ھَي؟“ ‏4 اِيئي تي لاوِي جڪَي رِي ٻونھِي نَي قتل ڪِي ھتِي، اُوئي بݪتِي ڏينِي ڪہ،”ھُون آپرِي ٻونھِي ڀيڙو بنيامين قبيلَي رَي جِبع شھر ۾ رات ريوَڻ گيو ھتو۔ ‏5 پَڇي رات رو جِبع شھر رَي مِنکون اُوئي گھر رَي چوڌاري حملو ڪيئو ھانَ او مھنَي قتل ڪرتا۔ اُوئون مھارِي ٻونھِي ݾون زورِي زنا ڪيئو ھانَ او مُئِي رِي۔ ‏6 پَڇي اُوئون مھارِي ٻونھِي را ٽُڪڙا ٽُڪڙا ڪري اُوئون نَي اِسرائيليون رِي وِراثت رَي ݾجَي علائقون ۾ ميليا، ڪيونڪہ اُوئون اِسرائيليون ۾ شرارت ڪِي ھانَ بُڇڙو ڪوم ڪيئو۔ ‏7 اي اِسرائيليون، ٿي ݾجائِي ھڻون مشورو ڪري صلاح ڏيئو۔“

‏8 پَڇي او ݾجائِي اُٺيا ھانَ ڀيڙون ھوئي ڪھيو ڪہ،”مھون ۾ ڪو ڀِي آپرَي تنٻُو جون آپرَي گھري پاڇو ڪونھي جاوَي۔ ‏9 اِيئي رَي ڪري ھڻون مھي پُکو گھاتي مِنکون نَي جِبع شھر تي حملو ڪرڻ رَي ݾارُو چُونڊشون ‏10 ھانَ مھي اِسرائيليون رَي ݾجَي قبيلون ݾون ݾئو ۾ ڏَݾ مِنک، ھزار ۾ ݾئو ھانَ ڏَݾ ھزار ۾ ھيڪ ھزار مِنک چُونڊشون ڪہ اَي ݾجائِي ٻاٽِي پُگاوَي۔ باقي ݾجائِي بنيامين قبيلَي رَي شھر جِبع ݾون جنگ ڪرڻ جاوَي ڪہ اُوئي بي عِزتي رو بدلو لَي، جڪو اِسرائيليون ۾ ھوئِي ھَي۔“ ‏11 اِيئي تي ݾجَي اِسرائيليون جِبع شھر تي حملو ڪرڻ رَي ݾارُو آپت ۾ ٻڌِي ڪِي۔

‏12 پَڇي اِسرائيليون بنيامين قبيلَي رَي طرفون ڪئينڪہ مِنکون نَي اَي ڪئي ميليا ڪہ،”ٿون ۾ اَي بُڇڙو ڪوم ڪيئون ھويو ھَي؟ ‏13 اِيئي رَي ڪري ھمَي جِبع شھر را بُڇڙا مِنک مھورَي حوالي ڪرو ڪہ مھي اُوئون نَي قتل ڪرون ھانَ اِسرائيليون ۾ بُڇڙائي ختم ڪرون۔“ پڻ بنيامين قبيلَي رَي مِنکون آپرَي اِسرائيلي ڀايون رِي بات ڪونھي ݾُڻِي۔ ‏14 اِيئي تي بنيامين قبيلَي آݪا آپرَي شھرون ݾون جِبع شھر ۾ ڀيڙا ھويا ڪہ اِسرائيليون ݾون جنگ ڪرَي۔ ‏15 بنيامين قبيلَي آݪا جڪو اُوئي ٽيم ڀيڙا ھويا ھتا، او اندازن ڇويھ ھزار مِنک ھتا جڪو تلوار ھلاوڻ را ڪاريگر ھتا۔ اِيئون ݾون ٽاݪ جِبع شھر ۾ ݾات ݾئو چُونڊيوڙا جنگِي مِنک ڀِي ھتا۔ ‏16 اِيئي ݾجَي مِنکون ۾ ݾات ݾئو کاٻيڙ نوجوان ھتا۔ اَي کڀوڻِي ھلاوڻ را ڪاريگر ھتا ھانَ نِنڪِي شئي تي ڀِي اُوئون رو نِشون ڪڏي ڀِي ڪونھي گُٿتو۔ ‏17 بنيامين قبيلَي ݾون ٽاݪ چار لَک تلوار ھلاوڻ آݪا اِسرائيلي ڀِي ھتا، جڪو ݾجائِي جنگِي مڙد ھتا۔

اِسرائيليون رِي بنيامين قبيلَي ݾون جنگ

‏18 پَڇي اِسرائيلي بيت ايل شھر ڏيݾا گيا ھانَ ايشوَر ݾون پُوڇو ڪہ،”بنيامين قبيلَي ݾون جنگ ڪرڻ رَي ݾارُو مھون ۾ پيل ڪُڻ جاشَي؟“ پرميشوَر ڪھيو ڪہ،”پيل يھُودا قبيلَي را مِنک جاشَي۔“

‏19 پَڇي اِسرائيلي ݾاڪݪي تارھي اُٺيا ھانَ جِبع شھر ݾومھا آپرا تنٻُو لگايا۔ ‏20 اِسرائيلي مِنک بنيامين قبيلَي ݾون جنگ ڪرڻ رَي ݾارُو نڪريا ھانَ جِبع شھر ۾ اُوئون ݾومھا آئي اُڀا۔ ‏21 پَڇي بنيامين قبيلَي آݪا جِبع شھر ݾون نڪريا ھانَ اُوئي ڏِن ٻاوِي ھزار اِسرائيليون نَي قتل ڪيئا۔ ‏22 پڻ اِسرائيلي بي ھِمت ڪونھي ھويا ھانَ ٻيجَي ڏِن اُوئي جگھا تي جائي اُڀا، جيٿ پيلڪَي ڏِن جنگ ڪرڻ رَي ݾارُو اُڀا ھتا۔

‏23 پَڇي اِسرائيلي بيت ايل شھر ۾ شام توڻي پرميشوَر آگھي روتا رھيا ھانَ اُوئون پرميشوَر ݾون پُوڇو ڪہ،”مھي آپرَي ڀائي بنيامين قبيلَي ݾون ڀڙي جنگ ڪرڻ جائُون، جون نا؟“ پرميشوَر ڪھيو ڪہ،”ھاوي، اُوئون ݾون جنگ ڪرڻ جائو۔“

‏24 پَڇي اِسرائيلي ٻيجَي ڏِن ڀڙي بنيامين قبيلَي ݾون جنگ ڪرڻ رَي ݾارُو نيڙا آيا۔ ‏25 اُوئي ڏِن بنيامين قبيلَي را مِنک اُوئون ݾون جنگ ڪرڻ رَي ݾارُو جِبع شھر ݾون نڪريا ھانَ اڍارَي ھزار اِسرائيليون نَي قتل ڪيئا، جڪو تلوار ھلاوڻ را ڪاريگر ھتا۔ ‏26 پَڇي اِسرائيلي بيت ايل شھر ۾ آيا ھانَ پرميشوَر آگھي روتا رھيا ھانَ اُوئي ڏِن شام توڻي روزو راکيو۔ اُوئون پرميشوَر آگھي ٻاݪڻ آݪا ٻَليدون ھانَ خيريت را ٻَليدون ڀِي ڪيئا۔ ‏27 اِسرائيليون پرميشوَر ݾون پُوڇو ڪہ،”مھي ڪِي ڪرون؟“ ڪيونڪہ اُوئون ڏِنون ۾ ايشوَر رِي وچن رِي ݾنڏُوڪ ڀِي اوٿج ھتِي۔ ‏28 اُوئي ٽيم ھارُون رَي ڏيڪرَي اليعزر رو ڏيڪرو فينحاس ايشوَر رو پُوجاري ھتو۔ اُوئي پرميشوَر ݾون پُوڇو ڪہ،”مھي آپرَي ڀائي بنيامين قبيلَي ݾون ھيڪ گُھمرو ڀڙي جنگ ڪرڻ جائُون، جون نا؟“ تو پرميشوَر ڪھيو ڪہ،”جائو، ݾووارَي ھُون ٿونَي او ٿونرَي ھاٿ ۾ ڏئين۔“

‏29 پَڇي اِسرائيليون جِبع شھر رَي چوڌاري آپرا مِنک لِڪائي ٻيݾاڙيا۔ ‏30 او تيجَي ڏِن بنيامين قبيلَي تي حملو ڪرڻ رَي ݾارُو اَگي آݪِي ڪار جِبع شھر ݾومھا اُڀا۔ ‏31 بنيامين قبيلَي را مِنک اُوئون ݾون جنگ ڪرڻ نڪريا ھانَ بِڙھتا بِڙھتا شھر ݾون اݪگا ميدون ۾ آيا، جيٿ ھيڪ مارگ بيت ايل شھر ھانَ ٻيجو جِبع شھر ڏيݾا جاوَي ھَي۔ اُوئون اَگي آݪِي ڪار اِسرائيليون نَي مارڻ شرُوع ڪيئو ھانَ اُوئون را اندازن ٽيھ مِنک قتل ڪيئا۔ ‏32 پَڇي بنيامين قبيلَي آݪون ڪھيو ڪہ،”او اَگي آݪِي ڪار مھون ݾون ھاريجا را۔“ اِيئي تي اِسرائيليون ڪھيو ڪہ،”آئو، آپي ناݾون ھانَ اِيئون نَي شھر ݾون اݪگا موٽَي مارگ توڻي لي ھالون۔“ ‏33 پَڇي ݾجَي اِسرائيلي آپرِي جگھا ݾون اُٺيا ھانَ بعل تمر جگھا رَي نيڙا جنگ ڪرڻ رَي ݾارُو اُڀا۔ پَڇي اُوئيج ٽيم او اِسرائيلي جڪو جِبع شھر رَي ٻاھر لِڪيوڙا ھتا، او ڀِي آپرِي جگھا ݾون نڪريا۔ ‏34 ݾجِي اِسرائيلي قوم ݾون ڏَݾ ھزار چُونڊيوڙَي مِنکون جِبع شھر تي حملو ڪيئو ھانَ جنگ بڌتِي گئِي۔ بنيامين قبيلَي نَي خبر ڪونھي ھتِي ڪہ اُوئون تي تموم گھڻِي مُصيبت آوڻ آݪِي ھَي۔ ‏35 پرميشوَر بنيامين قبيلَي نَي اِسرائيليون آگھي ھرايو۔ اُوئي ڏِن اِسرائيليون بنيامين قبيلَي را پنجويھ ھزار ھيڪ ݾئو تلوار ھلاوڻ آݪا ڪاريگر قتل ڪيئا۔ ‏36 پَڇي بنيامين قبيلَي نَي خبر پڙِي ڪہ او جنگ ھاريا ھَي۔ اِسرائيليون اُوئون تي ڀروسو ڪيئو، جڪون نَي اُوئون جِبع شھر رَي آݾَي پاݾَي لِڪائي ٻيݾاڙيا ھتا، اِيئي رَي ڪري او بنيامين قبيلَي رَي آگھي ݾون پاڇا ھٽيا۔

اِسرائيليون رِي جيت

‏37 پَڇي جڪو مِنک شھر رَي آݾَي پاݾَي لِڪي ٻيٺا ھتا، اُوئون اوچتو جِبع شھر تي حملو ڪري ݾجَي شھر رَي مِنکون نَي تلوار ݾون ماري ڇوڙيا۔ ‏38 اِسرائيليون اُوئون لِڪيوڙَي مِنکون نَي اَي نِشون ݾُڻايو ڪہ،”جڏي ٿي شھر تي حملو ڪرو، تو شھر ۾ تموم گھڻو ڌُونئو ڪريا۔“ ‏39 جڏي اِسرائيلي پاڇا ھٽتا پڙيا، تو بنيامين قبيلَي اِسرائيليون را اندازن ٽيھ مِنک قتل ڪيئا ھتا۔ اُوئون ݾوچو ڪہ مھون اُوئون نَي پيل آݪِي ڪار ھرايا ھون۔ ‏40 جڏي شھر ݾون تموم گھڻو ڌُونئو نڪريو، تو بنيامين قبيلَي آݪو لاري پاڇل ڦوري جويو ڪہ ݾجَي شھر ݾون ڌُونئو نڪري آڪاش ڏيݾا جاوَي پڙيو۔ ‏41 پَڇي اِسرائيلي پاڇا ڦِريا ھانَ بنيامين قبيلَي رَي مِنکون اُوئون نَي ݾومھا ڏيکي تموم گھڻا گھٻرايا ھانَ خبر پڙِي ڪہ مھي تموم گھڻِي مُصيبت ۾ ھون۔ ‏42 پَڇي او اِسرائيليون آگھي ݾون رڻ پَٽ ڏيݾا ناٺا، پڻ اِسرائيليون اُوئون رو لارو ڪيئو ھانَ اِسرائيلي مِنک جڪو شھر ۾ ھتا، اُوئون ڀِي بنيامين قبيلَي تي حملو ڪري اُوئون نَي قتل ڪيئا۔ ‏43 پَڇي اُوئون بنيامين قبيلَي نَي چوڌاري ڦِري آيا ھانَ اُوئون نَي جِبع شھر رَي ݾومھو اُوگوڻَي ڏيݾا آروم رَي جگھائون توڻي اُوئون رو لارو ڪيئو ھانَ اُوئون نَي قتل ڪيئا۔ ‏44 اِيئي نمُونَي بنيامين قبيلَي را اڍارَي ھزار جنگِي آڏمي قتل ھويا۔ ‏45 پَڇي جڪو بچا، او رڻ پَٽ ۾ رمون جبل ڏيݾا ناٺا، پڻ اِسرائيليون موٽَي مارگون تي اُوئون را پونچ ھزار ٻيجا مِنک تلوار ݾون ماريا۔ پَڇي جِدوم شھر توڻي اُوئون رو لارو ڪرتا، اُوئون ۾ ٻي ھزار ٻيجا مِنک قتل ڪيئا۔ ‏46 اُوئي ڏِن بنيامين قبيلَي را پنجويھ ھزار مِنک ماريجا، اَي ݾجائِي تلوار ھلاوڻ را ڪاريگر ھانَ جنگِي مِنک ھتا۔ ‏47 پڻ اُوئون ۾ ڇَي ݾئو مِنک پاڇا ڦِري رڻ پَٽ ۾ رمون جبل ڏيݾا ناٺا ھانَ چار مھيڻا اوٿج رھيا۔

‏48 اِسرائيليون ڀڙي بنيامين قبيلَي تي حملو ڪيئو۔ اُوئون شھر رَي ݾجَي مِنکون، جِنارون ھانَ جڪو ڀِي اُوئون رَي ݾومھو آيو، اُوئي نَي تلوار ݾون ماري ڇوڙيو۔ پَڇي ݾجَي شھر نَي باݾڏي ڏينو۔