قُضات 21

بنيامين قبيلَي رَي ݾارُو لُگائَي

پَڇي اِسرائيلي قوم آݪا مِصفا شھر ۾ ڀيڙا ھويا ھانَ ݾجون ڀيڙون ھوئي ݾونݾ ليئو ڪہ،”آپون ۾ ڪو ڀِي آپرِي ڏيڪرِي رو بيئان بنيامين قبيلَي ۾ ڪونھي ڪرَي۔“ ‏2 پَڇي او بيت ايل شھر ۾ آيا ھانَ شام توڻي ايشوَر آگھي زور ݾون روتا رھيا۔ ‏3 اُوئون ڪھيو ڪہ،”اي پرميشوَر اِسرائيل را ايشوَر، اَي ڪيئون ھويو ڪہ آج مھورِي اِسرائيلي قوم رو ھيڪ قبيلو گُميجو رو؟“

‏4 پَڇي ٻيجَي ڏِن ݾاڪݪي تارھي اُٺيا ھانَ اُوئي جگھا تي ھيڪ ٻَليدون رِي جگھا ٺائِي ھانَ اوٿ ٻاݪڻ آݪا ٻَليدون ھانَ خيريت را ٻَليدون ڪيئا۔ ‏5 پَڇي اِسرائيليون ڪھيو ڪہ،”اِسرائيلي قوم ۾ ݾجَي قبيلون ۾ او ڪيو قبيلو ھَي، جڪو مھون ڀيڙو پرميشوَر رِي مَنڊلِي ۾ ڪونھي آيو؟“ ڪيونڪہ اُوئون ݾونݾ لي ڪھيو ھتو ڪہ،”جڪو مِصفا شھر ۾ پرميشوَر آگھي ڪونھي آوَي، تو اُوئي نَي ضرُور قتل ڪيئو جاوَي۔“ ‏6 اِيئي نمُونَي اِسرائيلي آپرَي ڀائي بنيامين قبيلَي رَي ڪري تموم گھڻا ڏُک ڪرڻ لاگا ھانَ ڪيوَڻ لاگا ڪہ،”آج مھورِي قوم رو ھيڪ قبيلو مھون ݾون ڌار ھويو رو ‏7 ھانَ اُوئي قبيلا را مِنک جڪو بچا ھَي آپي اُوئون رَي ݾارُو لُگائَي ڪيٿ ݾون لي آئُون؟ ڪيونڪہ آپون پرميشوَر آگھي ݾونݾ ليئو ھتو ڪہ، ’مھي آپرَي ڏيڪريون را بيئان اُوئون ۾ ڪونھي ڪرائُون۔‘“

‏8 پَڇي اِسرائيليون ڪھيو ڪہ،”آپون ۾ ڪيو قبيلو ھَي، جڪو پرميشوَر آگھي مِصفا شھر ۾ ڪونھي آيو؟“ پَڇي اُوئون نَي خبر پڙِي ڪہ جِلعاد علائقَي رَي يبيس شھر ݾون پرميشوَر رِي مَنڊلِي ۾ شامل ھوئڻ رَي ݾارُو ڪو ڀِي ڪونھي آيو، ‏9 ڪيونڪہ جڏي مِنکون نَي گِڻيا ھتا، تو جِلعاد علائقَي رَي يبيس شھر رَي مِنکون ۾ اوٿ ڪو ڀِي ڪونھي آيو ھتو۔ ‏10 پَڇي مَنڊلِي آݪون ٻارھَي ھزار جنگِي آڏميون نَي حُڪم ڏينو ڪہ،”جائو، جِلعاد علائقَي رَي يبيس شھر رَي مِنکون، لُگايون ھانَ ٻاݪون نَي تلوار ݾون قتل ڪرو ‏11 ھانَ اِيئون ڪريا ڪہ ݾجَي آڏميون ھانَ پرڻيوڙَي لُگائَي قتل ڪري ڇوڙيا۔“ ‏12 اُوئون جنگِي آڏميون نَي جِلعاد علائقَي رَي يبيس شھر ۾ چار ݾئو ݾَڦا ڪنوارَي ڇوڪرَي مِلئَي۔ پَڇي اُوئون ڇوڪريون نَي ڪنعان مُلڪ رَي سيلا شھر رَي تنٻُوئون ۾ لي آيا۔

‏13 پَڇي ݾجِي مَنڊلِي، بنيامين قبيلَي آݪون نَي جڪو رمون جبل تي ھتا صُلح رو نياپو ميليو۔ ‏14 پَڇي بنيامين قبيلَي را مِنک پاڇا آيا ھانَ اِسرائيليون جِلعاد علائقَي يبيس شھر ݾون جيتَي لايوڙَي ڇوڪرَي اُوئون نَي ڏينَي، پڻ او ڇوڪرَي اُوئون رَي ݾارُو ٿوڙَي ھتَي۔

‏15 اِسرائيليون نَي بنيامين قبيلَي رَي ڪري ڏُک ھويو، ڪيونڪہ پرميشوَر اُوئون نَي ھيڪَي ٻيجَي ݾون ڌار ڪيئا ھتا۔ ‏16 پَڇي مَنڊلِي را اَگووڻ ڪيوَڻ لاگا ڪہ،”جڪو آڏمي بچا ھَي، اُوئون رَي ݾارُو لُگائَي ڪيٿ ݾون لي آئُون، ڪيونڪہ بنيامين قبيلَي رَي ݾجَي لُگائَي ماريجَي رَي؟“ ‏17 پَڇي اِسرائيليون ڪھيو ڪہ،”بنيامين قبيلَي رَي ݾارُو وِراثت ضرُوري ھَي، اِيئون نِي ھووَي ڪہ اَي قبيلو آپون ݾون ڌار ھوئي جاوَي۔ ‏18 آپي آپرَي ڏيڪريون را بيئان اُوئون ݾون ڪونھي ڪرائي ݾگھتا، ڪيونڪہ آپون آپت ۾ ݾونݾ ليئو ھتو ڪہ، ’جڪو ڀِي بنيامين قبيلَي نَي آپرِي ڏيڪرِي ڏيشَي، تو او لعنتِي ھوشَي۔‘“

‏19 پَڇي اِسرائيليون ڪھيو ڪہ،”ھر ݾال سيلا شھر ۾ پرميشوَر رو پَرٻ ھووَي ھَي۔ سيلا شھر بيت ايل شھر رَي ڏکڻ ۾، لبونا شھر رَي اُوگوڻَي ھانَ اُوئي موٽَي مارگ رَي اُتر ۾ ھَي، جڪو بيت ايل شھر ݾون سِڪم شھر ڏيݾا جاوَي ھَي۔“ ‏20 پَڇي اُوئون بنيامين قبيلَي نَي اَي حُڪم ڏينو ڪہ،”جائو ھانَ انگُورون رَي باگون ۾ لِڪي ٻيݾو۔ ‏21 ٿي جوتا رھيا ڪہ جڏي سيلا شھر رَي ڇوڪرَي اِيئي پَرٻ تي ناچڻ جاوَي، تو ٿون ۾ ھر ھيڪ آڏمي نڪري آپرَي ݾارُو ھيڪ ھيڪ ڇوڪرِي جھالي آپرَي گھري لي جاوَي۔ ‏22 جڏي اُوئون را ٻاپ جون ڀائي مھون ݾون شڪايت ڪرڻ آشَي، تو مھي اُوئون نَي ڪشون ڪہ، ’ٿي مھورَي ڪري بنيامين قبيلَي تي مھربونِي ڪرو، ڪيونڪہ مھي اِيئي جنگ ۾ اُوئون ݾجون رَي ݾارُو لُگائَي لائي ڪونھي ݾگھيا۔ اِيئي ۾ ٿونرو ڪو ڀِي ڏوھ ڪونھي، ڪيونڪہ ٿون آپرَي ڏيڪرَي آپرِي مرضِي ݾون ڪونھي ڏينَي۔‘“ ‏23 پَڇي بنيامين قبيلَي آݪون اِيئوج ڪيئو ھانَ جڏي ڇوڪرَي پَرٻ تي ناچتَي پڙئَي، تو اُوئون آڏميون ۾ ھر ھيڪ آپرَي ݾارُو ھيڪ ھيڪ ڇوڪرِي جھالي آپرِي وِراثت ڏيݾا گيو ھانَ او شھر ڀڙي ٺائي اوٿ ريوَڻ لاگا۔ ‏24 پَڇي اِسرائيلي اوٿ ݾون آپرَي آپرَي قبيلَي ھانَ گھرون ڏيݾا بَئير ھويا ھانَ ھر ھيڪ آپرِي وِراثت ڏيݾا گيو۔

‏25 اُوئون ڏِنون ۾ اِسرائيليون رو ڪو ڀِي بادشاھ ڪونھي ھتو ھانَ جڪَي نَي جڪو ڀلو لاگتو، اوج او ڪرتو۔