ميڪا رَي مُورتَي
17
اِفرائيم رَي جابلُو علائقَي ۾ ھيڪ مِنک ريتو، جڪَي رو نون ميڪا ھتو۔ 2 ميڪا آپرِي ما نَي ڪھيو ڪہ، ”چوندِي را او اِگيارَي ݾئو ݾِڪا جڪو چورِي ھويا ھتا ھانَ مھَي ٿنَي اُوئون رَي ݾارُو لعنت ڏيتَي ݾُڻيو ھتو۔ جو، او ݾِڪا مھَي ڪڍي ھَي، ڪيونڪہ او مھَي ليئا ھتا۔“ اُوئي رِي ما ڪھيو ڪہ، ”اي مھارا ڏيڪرا، پرميشوَر ٿنَي برڪت ڏَي۔“ 3 پَڇي اُوئي چوندِي را اِگيارَي ݾئو ݾِڪا آپرِي ما نَي پاڇا ڏينا، پَڇي اُوئي رِي ما ڪھيو ڪہ، ”ھُون چوندِي را اَي ݾِڪا، آپرَي ڏيڪرَي رَي ڪري آپرَي ھاٿون پرميشوَر رَي نون را ڪري ٿنَي پاڇا ڏيئون ھون ڪہ تُو ھيڪ مُورتِي ٺڙائي اُوئي ماٿَي چوندِي لگاوَي۔“ 4 جڏي اُوئي او چوندِي را ݾِڪا آپرِي ما نَي ڏينا، تو اُوئي رِي ما چوندِي را ٻي ݾئو ݾِڪا ڪاريگر نَي ڏينا۔ ڪاريگر اُوئون چوندِي رَي ݾِڪون ݾون ھيڪ مُورتِي ٺائِي ھانَ ميڪا او مُورتِي آپرَي گھري لي آيو۔5 ميڪا رَي گھري ھيڪ مندر ھتو۔ اُوئي اِيئون ݾون ٽاݪ ڪئين ٻيجَي ڀِي مُورتَي ٺڙائَي۔ پَڇي اُوئي ھيڪ مُورتِي آپرِي صُورت تي ٺڙائِي ھانَ آپرَي ڏيڪرون ۾ ھيڪَي نَي چُونڊيو ڪہ او اُوئي رو شيواداري ھووَي۔
6 اُوئون ڏِنون ۾ اِسرائيليون رو ڪو ڀِي بادشاھ ڪونھي ھتو ھانَ جڪَي نَي جڪو صحيح لاگتو، اوج ڪرتو۔ 7 لاوِي قبيلَي رو ھيڪ نوجوان يھُودا قبيلَي رَي شھر بيت لحم ۾ ريتو۔ 8 او نوجوان يھُودا رَي بيت لحم شھر نَي ڇوڙي ڪيٿ ٻيجِي جگھا تي ريوَڻ رَي ݾارُو جگھا رِي تلاش ۾ ھتو۔ او سفر ڪرتو ڪرتو اِفرائيم رَي جابلُو علائقَي ݾون ميڪا رَي گھري آيو۔ 9 ميڪا اُوئي نَي ڪھيو ڪہ۔ ”تُو ڪيٿ ݾون آيو ھَي؟“ اُوئي ڪھيو ڪہ، ”ھُون لاوِي ھون ھانَ يھُودا رَي بيت لحم شھر ݾون آيو ھون۔ ھُون آپرَي ريوَڻ رَي ݾارُو جگھا رِي تلاش ۾ ھون۔“ 10 اِيئي تي ميڪا اُوئي نَي ڪھيو ڪہ، ”تُو مھارَي ٻاپ آݪِي ڪار ھَي۔ تُو مھارَي گھر ۾ پُوجاري ھوئي رَي، تو ھُون ٿنَي ھر ݾال چوندِي را ڏَݾ ݾِڪا، گاڀون رو جوڙو ھانَ ٻاٽِي ڏئين۔“ اِيئي نمُونَي او لاوِي ميڪا رَي گھري گيو۔ 11 لاوِي اُوئي ڀيڙو ريوَڻ رَي ݾارُو راضي ھويو ھانَ ميڪا اُوئي رَي ݾارُو اِيئون ھتو، جھڙو اُوئي رَي ڏيڪرون ۾ ھيڪ ڏيڪرو۔ 12 ميڪا اُوئي لاوِي نَي پُوجاري چُونڊڻ رَي ݾارُو راکيو ھانَ او ميڪا رَي گھري ريوَڻ لاگو۔ 13 اِيئي تي ميڪا ڪھيو ڪہ، ”ھمَي مھنَي خبر پڙِي ھَي ڪہ پرميشوَر مھَي ݾون ڀلائي ڪرشَي، ڪيونڪہ مھَي آپرَي ݾارُو ھيڪَي لاوِي نَي پُوجاري ٺاھيو ھَي۔“