سيمسُون رو غزا شھر رو در ڀونگڻ
16
پَڇي سيمسُون غزا شھر ڏيݾا گيو ھانَ اوٿ اُوئي ھيڪ ڀُونڏِي لُگائِي ڏيٺِي، تو او اُوئي ڪڍي گيو۔ 2 جڏي غزا شھر رَي مِنکون نَي خبر پڙِي ڪہ سيمسُون ايٿ آيو ھَي، تو اُوئون اُوئي گھر تي گھيرو ڪيئو ھانَ ݾجِي رات شھر رَي در ڪڍي لِڪي ٻيٺا۔ او ݾجِي رات ماٺ ڪري ٻيٺا رھيا ھانَ ݾوچو ڪہ ڏِن اُگتي مھي اُوئي نَي ماري ڇوڙشون۔ 3 سيمسُون آڌِي رات توڻي اوٿج ݾُوتو رھيو ھانَ پَڇي آڌِي رات رو اُٺي شھر رَي در تي آيو ھانَ پُورَي در نَي اُکوڙي آپرَي ڪونڌَي تي کڻي اُوئي جبل رِي چوٽِي تي لي گيو، جڪو حبرُون شھر رَي ݾومھو ھَي۔سيمسُون ھانَ دليلا
4 پَڇي ڪئينڪہ ٽيم ݾون پَڇي، سيمسُون سُورق وادِي ڏيݾا گيو۔ اوٿ اُوئي نَي ھيڪِي ڇوڪرِي ݾون پريم ھويو، جڪَي رو نون دليلا ھتو۔ 5 فلستِي قوم رَي ݾردارون دليلا ڪڍي جائي ڪھيو ڪہ، ”تُو اُوئي نَي ڦوݾڙائي پُوڇ ڪہ اُوئي رِي طاقت رو راز ڪھڙو ھَي ھانَ مھي اُوئي نَي ڪيڪر جھالون ھانَ ڪيڪر اُوئي نَي ٻونڌي ڪمزور ڪرون؟ اِيئي رَي بدلَي مھون ۾ ھر ھيڪ مِنک ٿنَي چوندِي را اِگيارَي ݾئو ݾِڪا ڏيشَي۔“
6 پَڇي دليلا سيمسُون نَي ڪھيو ڪہ، ”تُو مھربونِي ڪري مھنَي ݾُڻا ڪہ ٿارِي طاقت رو راز ڪِي ھَي ھانَ ٿنَي ڪيڪر ٻونڌي ڪمزور ڪري ݾگھيجَي ھَي؟“ 7 سيمسُون اُوئي نَي ڪھيو ڪہ، ”جي مھنَي جِنارون رَي ݾات تازَي رگون ݾون ٻونڌَي جڪو ݾُڪايوڙَي نِي ھووَي، تو ھُون عام مِنکون آݪِي ڪار ڪمزور ھوئي جائين۔“
8 پَڇي فلستيون را ݾردار جِنارون رَي ݾات تازَي رگون جڪو ݾُڪايوڙَي ڪونھي ھتَي، او لي دليلا ڪڍي آيا ھانَ اُوئي اُوئون ݾون سيمسُون نَي ٻونڌيو۔ 9 دليلا ڪئينڪہ مِنکون نَي لِڪ ۾ ڪمرَي ۾ ٻيݾاڙيا ھتا۔ پَڇي اُوئي سيمسُون نَي ڪھيو ڪہ، ”اي سيمسُون، فلستِي ٿَي تي حملو ڪرڻ آيا ھَي۔“ اِيئي تي اُوئي اُوئون رگون نَي اِيئون توڙئَي جھڙو ڏورو ٻَݪي راک ھووَي ھَي۔ اِيئي نمُونَي سيمسُون رِي طاقت رو راز ڪونھي کُليو۔
10 پَڇي دليلا سيمسُون نَي ڪھيو ڪہ، ”جو ٿَي مھَي ݾون ڪُوڙ ٻولي دوکو ڪيئو۔ ھمَي مھربونِي ڪري مھنَي ݾُڻا ڪہ ٿنَي ڪَي ݾون ٻونڌي ݾگھيجَي ھَي؟“ 11 سيمسُون دليلا نَي ڪھيو ڪہ، ”جي مھنَي ݾَڦا نُوئَي رنڍوڙيون ݾون ٻونڌيو جاوَي، جڪو ڪڏي ڀِي اِستعمال ڪونھي ھوئَي، تو ھُون عام مِنک آݪِي ڪار ڪمزور ھوئي جائين۔“
12 پَڇي دليلا نُوئَي رنڍوڙَي لي اُوئون ݾون سيمسُون نَي ٻونڌيو ھانَ ڪھيو ڪہ، ”اي سيمسُون، فلستِي ٿَي تي حملو ڪرڻ آيا ھَي۔“ حملو ڪرڻ آݪا اَڃون ڪمرَي ݾون ٻاھر ڀِي ڪونھي نڪريا ھتا، تو سيمسُون اُوئون رنڍوڙيون نَي اِيئون توڙئَي جھڙَي او ڏورا ھووَي۔
13 پَڇي دليلا سيمسُون نَي ڪھيو ڪہ، ”جو، اَڃون توڻي ٿَي مھَي ݾون ڪُوڙ ٻولي دوکو ڪيئو۔ ھمَي تُو ݾُڻا ڪہ ٿنَي ڪئَي شئي ݾون ٻونڌي ݾگھيجَي ھَي؟“ اُوئي ڪھيو ڪہ، ”جي تُو مھارَي ماٿَي رَي باݪون رَي ݾات چوٽَي گاڀا ٺاوڻ آݪِي کُڏِي رَي کُوٽيون ۾ ٻونڌِي، تو ھُون عام مِنک آݪِي ڪار ڪمزور ھوئي جائين۔“ 14 اِيئي تي دليلا سيمسُون رَي ماٿَي رَي باݪون رَي ݾات چوٽَي گاڀا ٺاوڻ آݪِي کُڏِي رَي کُوٽيون ۾ زور ݾون ٻونڌي ڪھيو ڪہ،”اي سيمسُون، فلستِي ٿَي تي حملو ڪرڻ آيا ھَي۔“ پَڇي او اُونگ ݾون جاگيو ھانَ کُڏِي نَي رنڍوڙيون ݾُوڌو اُکوڙي ڇوڙِي۔ 15 پَڇي دليلا اُوئي نَي ڪھيو ڪہ، ”تُو ڪيڪر ڪَي ھَي تُو مھَي ݾون پريم ڪرَي ھَي، جڏي ڪہ ٿارو مھَي تي ڪو ڀِي ڀروسو ڪونھي۔ ٿَي تين گُھمرا مھنَي دوکو ڏينو ھانَ آپرِي طاقت رو راز ڪونھي ݾُڻايو۔“
16 دليلا اُوئي نَي ھروز پريشون ھانَ مجبُور ڪرتِي رئِي اترِي توڻي ڪہ اُوئي سيمسُون نَي حد ݾون وڌيڪ تنگ ڪيئو۔ 17 اِيئي تي سيمسُون آپرو راز ݾُڻايو ڪہ، ”مھَي ڪڏي ڀِي ماٿَي را باݪ ڪونھي ڪترايا، ڪيونڪہ ھُون آپرِي ما رَي پيٽ ݾون ايشوَر رو چُونڊيوڙو ھون۔ جي مھارَي ماٿَي را باݪ ڪتريا جاوَي، تو مھارِي طاقت ختم ھوئي جاشَي ھانَ ھُون عام مِنک آݪِي ڪار ڪمزور ھوئي جائين۔“ 18 دليلا ڏيٺو ڪہ سيمسُون آپرو راز ݾُڻايو رو، تو اُوئي فلستِي ݾردارون نَي ڪئي ميليو ڪہ، ”ھمَي ھيڪ گُھمرو ڀڙي آئو، ڪيونڪہ سيمسُون آپرو راز ݾُڻايو ھَي۔“ اِيئي تي فلستِي ݾردار چوندِي را ݾِڪا لي اُوئي ڪڍي آيا۔
19 پَڇي دليلا سيمسُون نَي آپرَي کوڙَي ۾ ݾُوئاݪيو ھانَ پَڇي ھيڪَي مِنک نَي ھيلو ڪرائي سيمسُون رَي ݾاتئي چوٽَي ڪترائَي۔ اِيئي تي سيمسُون ڪمزور ھويو ھانَ اُوئي رِي طاقت ختم ھوئي گئِي۔ 20 پَڇي دليلا ڪھيو ڪہ، ”اي سيمسُون، فلستِي ٿَي تي حملو ڪرڻ آيا ھَي۔“ اِيئي تي او اُونگ ݾون جاگيو ھانَ ڪھيو ڪہ، ”ھُون پيل آݪِي ڪار ٻاھر جائي آپرو آپنَي ڇوڙائين رو۔“ پڻ اُوئي نَي خبر ڪونھي ھتِي ڪہ پرميشوَر اُوئي نَي ڇوڙيو رو۔ 21 پَڇي فلستيون سيمسُون نَي جھاليو ھانَ اُوئي رَي اونکَي ڪاڍي اُوئي نَي غزا شھر ۾ لي آيا۔ سيمسُون نَي پيتل رَي ڏنڊا ٻيڙيون ݾون ٻونڌي جيل رَي تَھہ کونَي ۾ بند ڪيئو ڪہ اوٿ گھٽِي پيݾتو رَي۔ 22 سيمسُون را ماٿَي را باݪ ڪترڻ ݾون پَڇي او ڀڙي بڌڻ لاگا۔
سيمسُون رِي موت
23 پَڇي فلستيون را ݾردار ڀيڙا ھويا ڪہ آپرَي ڏيوتا دجون رَي ݾارُو ھيڪ موٽو ٻَليدون ڪرَي ھانَ خُوشَي ملھاوَي، ڪيونڪہ اُوئون رو ڪيوَڻ ھتو ڪہ، ”مھورَي ڏيوتا مھورَي دُشمن سيمسُون نَي مھورَي ھاٿ ۾ ڏينو ھَي۔“ 24 جڏي مِنکون سيمسُون نَي ڏيٺو، تو آپرَي ڏيوتا رِي بکوڻ ڪري ڪيوَڻ لاگا ڪہ، ”مھورَي ڏيوتا مھورَي دُشمن سيمسُون نَي مھورَي ھاٿ ۾ ڏينو ھَي، جڪَي مھورو مُلڪ برباد ڪيئو ھتو ھانَ مھون ۾ تموم گھڻا مِنک قتل ڪيئا ھتا۔“ 25 جڏي او تموم گھڻا خُوش ھويا، تو اُوئون ڪھيو ڪہ، ”سيمسُون نَي ايٿ ھيلو ڪرائو ڪہ آپي اُوئي رو تماشو جوئون۔“ پَڇي او سيمسُون نَي جيل ݾون ڪاڍي لي آيا ڪہ او اُوئي رو تماشو جووَي۔ اُوئون سيمسُون نَي ٻي ٿونڀون رَي بِچ ۾ اُڀاڙيو۔ 26 پَڇي سيمسُون اُوئي ڇوڪرَي نَي جڪو اُوئي رو ھاٿ جھالي اُڀو ھتو ڪھيو ڪہ، ”مھنَي اُوئون ٿونڀون ڪڍي لي جا، جڪَي تي اَي گھر ٺاھيوڙو ھَي ڪہ ھُون اُوئون ݾون ٽيڪ لگائُون۔“ 27 او گھر آڏميون ھانَ لُگايون ݾون ڀريجوڙو ھتو ھانَ فلستيون را ݾجائِي ݾردار ڀِي اوٿ ھتا۔ گھر رِي ڇِت تي اندازن تين ھزار مِنک ھتا، جڪو سيمسُون رو تماشو جوتا پڙيا۔ 28 پَڇي سيمسُون پرميشوَر نَي پُڪاري ڪھيو ڪہ، ”اي پرميشوَر مھارا مالڪ، ھُون ٿنَي مِنٿ ڪرون ھون ڪہ مھنَي ياد ڪر ھانَ دايا ڪري ھيڪ گُھمرو ڀڙي مھنَي طاقت ڏي ڪہ ھُون ھيڪج گُھمرو فلستيون ݾون آپرَي اونکيون رو بدلو لي ݾگھون۔“ 29 پَڇي سيمسُون اُوئون ٻيئون ئِي بِچ آݪَي ٿونڀون نَي جڪون تي گھر ٺاھيوڙو ھتو ھيڪَي نَي کاٻَي ھانَ ٻيجَي نَي ݾاجَي ھاٿ ݾون زور لگايو۔ 30 سيمسُون ڪھيو ڪہ، ”بيشڪ ھُون ڀِي فلستيون ڀيڙو مري جائُون۔“ پَڇي اُوئي پُورَي زور ݾون ڌِڪو ڏينو، تو او گھر اُوئون ݾردارون ھانَ ݾجَي مِنکون تي کِري گيو۔ اِيئي نمُونَي اُوئي مرتَي، اُوئي ݾون ڀِي وڌيڪ مِنک ماريا جِترا اُوئي جيتَي جِي ماريا ھتا۔ 31 پَڇي سيمسُون را ڀائي ھانَ اُوئي رَي خاندان را مِنک آيا ھانَ اُوئي رو لاش لي گيا۔ سيمسُون نَي صُرعا شھر ھانَ استال شھر رَي بِچ اُوئي رَي ٻاپ منوحا رَي مُڪومون ۾ ٻُوريو۔ سيمسُون اِسرائيليون رو بيݾ ݾال توڻي قاضِي رھيو۔