سيمسُون رو جنم
13
اِسرائيلي قوم ڀڙي پرميشوَر آگھي پاپ ڪيئو ھانَ پرميشوَر اُوئون نَي چاليھ ݾال توڻي فلستيون رَي ھاٿ ۾ ڏينا۔2 اُوئي ٽيم صُرعا شھر ۾ دان قبيلَي رو ھيڪ مِنک ريتو، جڪَي رو نون منوحا ھتو۔ اُوئي رو ڪو ڀِي اولاد ڪونھي ھتو، ڪيونڪہ اُوئي رِي لُگائِي بونجڪِي ھتِي۔ 3 ھيڪ ڏِن پرميشوَر رَي فريشتَي اُوئي لُگائِي نَي درشن ڏي ڪھيو ڪہ، ”جو، ٿارو ڪو ڀِي اولاد ڪونھي، ڪيونڪہ تُو بونجڪِي ھَي، پڻ تُو اُميد ݾون ھوئِي ھانَ ٿنَي ڏيڪرو ھوشَي۔ 4 تُو آج ݾون پَڇي ڪڏي ڀِي انگُورون رو رس، جون ڪو ڀِي نشَي آݪِي شئي نِي پيئي ھانَ نِي ڪو پليت شئي کائي۔ 5 جو، تُو اُميد ݾون ھوئِي ھانَ ٿنَي ڏيڪرو ھوشَي ھانَ تُو ڪڏي ڀِي اُوئي را ماٿَي آݪا باݪ نِي ڪتري، ڪيونڪہ او ڇوڪرو ٿارَي پيٽ ۾ ايشوَر رو چُونڊيوڙو ھوشَي۔ او اِسرائيليون نَي فلستيون رَي ھاٿون ڇوڙاشَي۔“
6 پَڇي اُوئي لُگائِي آپرَي ڌڻِي نَي ڪھيو ڪہ، ”ايشوَر رو ھيڪ ٻونھو مھَي ڪڍي آيو، جڪَي رو رُوپ ايشوَر رَي فريشتَي جھڙو ھتو، اُوئي نَي ڏيکي ھُون ٻيئاجِي۔ مھَي اُوئي ݾون ڪونھي پُوڇو ڪہ، ’تُو ڪيٿ ݾون آيو ھَي؟‘ ھانَ نَڪو اُوئي مھنَي آپرو نون ݾُڻايو۔ 7 پڻ اُوئي مھنَي ڪھيو ڪہ، ’جو، تُو اُميد ݾون ھوئِي ھانَ ٿنَي ڏيڪرو ھوشَي۔ آج ݾون پَڇي تُو ڪڏي ڀِي انگُورون رو رس، جون ڪو ڀِي نشَي آݪِي شئي نِي پيئي ھانَ نِي پليت شئي کائي، ڪيونڪہ او ڇوڪرو ٿارَي پيٽ ݾون آپرَي مرڻ توڻي ايشوَر رو چُونڊيوڙو ھوشَي۔‘“
8 پَڇي منوحا پرميشوَر ݾون پراٿنا ڪِي ڪہ، ”اي مھارا مالڪ، ھُون ٿنَي مِنٿ ڪرو ھون ڪہ ٿارو ھيڪ ٻونھو جڪَي نَي ٿَي ميليو ھتو، او مھون ڪڍي ڀڙي آوَي ھانَ ݾُڻاوَي ڪہ مھي اُوئي ٻاݪ رِي ݾنڀال ڪيڪر ڪرون، جڪو پيدا ھوشَي۔“ 9 ايشوَر منوحا رِي پراٿنا ݾُڻِي ھانَ اُوئي رو فريشتو اُوئي لُگائِي ڪاڍي ڀڙي آيو جڏي او ٻنِي ۾ ھتِي، پڻ اُوئي ٽيم اُوئي رو ڌڻِي اُوئي ڀيڙو ڪونھي ھتو۔ 10 او لُگائِي ڇيڪِي ناٺِي ھانَ جائي آپرَي ڌڻِي نَي ݾُڻايو ڪہ، ”جو، اَي اوج ٻونھو ھَي جڪو اُوئي ڏِن مھَي ڪڍي آيو ھتو، آج ڀڙي اُوئي مھنَي درشن ڏينو ھَي۔“ 11 اِيئي تي منوحا اُٺيو ھانَ آپرِي لُگائِي لاري گيو ھانَ اُوئي ٻونھَي رَي نيڙو آئي ڪھيو ڪہ، ”ڪِي تُو اوج ھَي، جڪو اِيئي لُگائِي ݾون ٻوليو ھتو؟“ اُوئي ڪھيو ڪہ، ”ھُون اوج ھون۔“ 12 پَڇي منوحا ڪھيو ڪہ، ”ايشوَر ڪرَي ڪہ ٿارِي اَي اگڪٿِي پُورِي ھووَي، پڻ مھونَي ݾُڻا ڪہ اُوئي ڇوڪرَي رِي زندگِي ڪھڙِي ھوشَي ھانَ او ڪھڙا ڪوم ڪرشَي؟“ 13 ايشوَر رَي فريشتَي منوحا نَي ڪھيو ڪہ، ”تُو اُوئي ݾجَي باتون رو خيال راکي، جڪو مھَي اِيئي لُگائِي نَي ݾُڻائَي ھَي۔ 14 اَي لُگائِي انگُورون رِي پوک ݾون ڪئين نِي کاوَي ھانَ نِي انگُورون رو رس پيئَي، نِي ڪو نشَي آݪِي شئي پيئَي ھانَ نِي پليت شئي کاوَي۔ اُوئي جڪو ڀِي حُڪم ڏينو ھَي، او اُوئي تي بَي۔“ 15 منوحا پرميشوَر رَي فريشتَي نَي ڪھيو ڪہ، ”مھربونِي ڪري تُو ڪئين ٽيم مھون ڪڍي رَي ڪہ مھي ٿارَي ݾارُو ڇيلو باڍي ٻاٽِي تيار ڪرائُون۔“ 16 پَڇي پرميشوَر رَي فريشتَي منوحا نَي ڪھيو ڪہ، ”جي تُو مھنَي آپ ڪڍي راکَي، تو ڀِي ھُون ٿارِي ٻاٽِي ڪونھي کائي ݾگھتو، پڻ جي ٿارِي مرضِي ھَي ڪہ تُو ٻاݪڻ آݪو ٻَليدون ڪرَي، تو تُو پرميشوَر رَي ݾارُو ڪر۔“ منوحا نَي خبر ڪونھي ھتِي ڪہ اَي ڪو پرميشوَر رو فريشتو ھَي۔ 17 پَڇي منوحا پرميشوَر رَي فريشتَي نَي ڪھيو ڪہ، ”ٿارو نون ڪِي ھَي؟ ڪہ جڏي ٿارَي باتون پُورَي ھووَي، تو مھي ٿارو شُڪر ڪرون۔“ 18 پرميشوَر رَي فريشتَي اُوئي نَي ڪھيو ڪہ، ”تُو مھارو نون ڪيئون پُوڇَي ھَي؟ مھارو نون ٿارِي ݾمجھ ݾون ٻاھر ھَي۔“ 19 اِيئي تي منوحا ڇيلو لي ھيڪَي موٽَي پٿر تي پرميشوَر رَي ݾارُو ٻاݪڻ آݪو ٻَليدون ڪيئو ھانَ ڪئين دون ڀِي ڏينو۔ فريشتَي منوحا ھانَ اُوئي رِي لُگائِي ݾومھو ھيڪ عجيب ڪوم ڪيئو 20 ڪہ جڏي ٻَليدون ݾون باݾڏي رِي جھاݪ آڪاش ڏيݾا اُٺِي، تو پرميشوَر رو فريشتو اُوئي جھاݪ ݾون ھوئي اُونچو بُوئو گيو۔ اَي ڏيکي منوحا ھانَ اُوئي رِي لُگائِي موڏَي توڻي ڌرتي تي کِريا۔ 21 پرميشوَر رَي فريشتَي منوحا ھانَ اُوئي رِي لُگائِي نَي ڀڙي ڪڏي درشن ڪونھي ڏينو۔ پَڇي منوحا نَي خبر پڙِي ڪہ او پرميشوَر رو فريشتو ھتو۔ 22 منوحا آپرِي لُگائِي نَي ڪھيو ڪہ، ”ھمَي آپي ضرُور مرشون، ڪيونڪہ آپون ايشوَر نَي ڏيٺو ھَي۔“ 23 اُوئي رِي لُگائِي اُوئي نَي ڪھيو ڪہ، ”جي پرميشوَر رِي اَي مرضِي ھَي ڪہ آپون نَي مارَي، تو آپڻو ٻاݪڻ آݪو ٻَليدون ھانَ آپڻو دون رو ٻَليدون ڪيئون قبُول ڪيئو ھانَ آپون نَي اَي ݾجَي باتون ڪيئون بتائَي ھانَ ݾُڻائَي۔“