قُضات 11

اِفتاح قاضِي

اُوئي ٽيم جِلعاد علائقَي ۾ ھيڪ جنگِي مِنک ريتو، جڪَي رو نون اِفتاح ھتو۔ او ھيڪ ڀُونڏِي لُگائِي رو ڏيڪرو ھتو ھانَ اُوئي رَي ٻاپ رو نون جِلعاد ھتو۔ ‏2 جِلعاد رِي ٻيجِي لُگائِي ݾون ڀِي اُوئي را ڏيڪرا ھويا۔ جڏي او موٽا ھويا، تو اُوئون اِفتاح نَي اَي ڪئي گھر ݾون ٻاھر ڪاڍيو ڪہ، ”ٿنَي مھورَي ٻاپ رَي گھر ݾون ڪو ڀِي وِراثت ڪونھي ملَي، ڪيونڪہ تُو مھورو ݾَگو ڀائي ڪونھي۔“ ‏3 پَڇي اِفتاح آپرَي ڀايون ݾون ناٺو ھانَ جائي طوب علائقَي ۾ ريوَڻ لاگو۔ پَڇي رول مِنک اُوئي ڀيڙا شامل ھويا ھانَ او اُوئون ڀيڙو گُھمڻ ڦِرڻ لاگو۔

‏4 ڪئينڪہ ٽيم ݾون پَڇي عمُونيون اِسرائيليون ݾون جنگ شرُوع ڪِي ‏5 ھانَ جڏي او جنگ ڪرڻ لاگا، تو جِلعاد علائقَي را ڪئينڪہ مِنک اِفتاح نَي ليوَڻ رَي ݾارُو طوب علائقَي ۾ گيا۔ ‏6 اُوئون اِفتاح نَي ڪھيو ڪہ، ”تُو مھورو جنگِي اَگووڻ ھوئي مھون ڀيڙو بَي ڪہ آپي عمُوني قوم ݾون جنگ ڪرون۔“ ‏7 اِيئي تي اِفتاح اُوئون نَي ڪھيو ڪہ، ”ٿون مھَي ݾون نفرت ڪري مھنَي آپرَي ٻاپ رَي گھر ݾون تگڙيو ھانَ جڏي ٿون تي مُصيبت آئِي ھَي، تو ٿي مھَي ڪڍي ڪيئون آيا ھو؟“ ‏8 جِلعاد رَي اَگووڻون اِفتاح نَي ڪھيو ڪہ، ”مھي ٿَي ڪڍي اِيئي رَي ڪري آيا ھون ڪہ تُو مھون ڀيڙو ھالي عمُونيون ݾون جنگ ڪر ھانَ تُو جِلعاد رَي ݾجَي ريوَڻ آݪون تي مھورو ݾردار ھوئِي۔“ ‏9 اِيئي تي اِفتاح اُوئون نَي ڪھيو ڪہ، ”جي ٿي عمُونيون ݾون جنگ ڪرڻ رَي ݾارُو مھنَي پاڇو آپرَي گھري لي ھالو ھو ھانَ پرميشوَر عمُونيون نَي مھارَي حوالي ڪرَي، تو ڪِي ݾاچيلي ھُون ٿونرو ݾردار ھوئين؟“ ‏10 جِلعاد رَي اَگووڻون اُوئي نَي ڪھيو ڪہ، ”جون ٿَي ڪھيو ھَي، اِيئوج ھوشَي ھانَ اِيئي بات ۾ پرميشوَر آپڻو گواھ ريشَي۔“ ‏11 پَڇي اِفتاح جِلعاد رَي اَگووڻون ڀيڙو گيو ھانَ اوٿ رَي مِنکون اُوئي نَي آپرو اَگووڻ ھانَ ݾردار ٺاھيو۔ اِفتاح مِصفا شھر ۾ پرميشوَر آگھي آپرَي ݾجَي باتون ݾُڻائَي۔

اِفتاح رو سيحُون بادشاھ نَي نياپو

‏12 پَڇي اِفتاح عمُونيون رَي بادشاھ ڪڍي نياپو ڏيوَڻ آݪون نَي اَي ڪئي ميليا ڪہ، ”مھارِي ھانَ ٿارِي ڪو ڀِي دُشمنِي ڪونھي، تو پَڇي تُو مھارَي مُلڪ ۾ ڪيئون جنگ رَي ݾارُو آيو ھَي؟“ ‏13 اِيئي تي عمُونيون رَي بادشاھ اِفتاح رَي نياپو ڏيوَڻ آݪون نَي ڪھيو ڪہ، ”جڏي اِسرائيلي مِصر مُلڪ ݾون نڪريا ھتا، تو ارنون، يبوق ھانَ يردن دريا توڻي جڪو مھارو علائقو ھتو، او اِسرائيليون مھَي ݾون کوݾيو ھتو۔ جي ٿارِي مرضِي ھَي ڪہ صُلح ھووَي، تو اَي علائقو مھنَي پاڇو ڏي۔“ ‏14 اِفتاح ڀڙي اُوئون نياپو ڏيوَڻ آݪون نَي عمُونيون رَي بادشاھ ڪڍي ميليا ‏15 ھانَ ڪھيو ڪہ، ”اِسرائيليون نَڪو موآب رَي مُلڪ تي قبضو ڪيئو ھانَ نَڪو عمُونيون رَي مُلڪ تي، ‏16 پڻ جڏي اِسرائيلي مِصر مُلڪ ݾون نڪريا ھانَ رڻ پِٽ ݾون ھوتا قُلزم ݾمُوندر رَي نيڙا قادس شھر ۾ پُگا، ‏17 تو اُوئون ادُوم مُلڪ رَي بادشاھ ڪڍي اَي نياپو ڏي ميليو ڪہ، ’مھونَي آپرَي مُلڪ ݾون مَٽڻ ڏي۔‘ پڻ بادشاھ ڪونھي منيو۔ اِيئي نمُونَي اُوئون موآب مُلڪ رَي بادشاھ نَي ڀِي ڪھيو، پڻ او ڀِي ڪونھي منيو۔ اِيئي رَي ڪري اِسرائيلي قادس شھر ۾ رھيا۔ ‏18 پَڇي او رڻ پِٽ ݾون ھوتا ادُوم ھانَ موآب مُلڪ رَي ماٿلَي پاݾَي موٽو سفر ڪري آيا۔ پَڇي اُوئون موآب مُلڪ رَي اُوگوڻَي ھانَ ارنون ندِي رَي ٻيجَي پاݾَي آپرا تنٻُو لگايا۔ او موآب مُلڪ رِي حد ۾ داخل ڪونھي ھويا، ڪيونڪہ ارنون ندِي موآب مُلڪ رِي حد ۾ ھتِي۔ ‏19 پَڇي اِسرائيليون حشبُون شھر ۾ ريوَڻ آݪَي اموريون رَي بادشاھ سيحُون ڪڍي نياپو ڏيوَڻ آݪا ميلي ڪھيو ڪہ، ’مھربونِي ڪري مھونَي موڪل ڏي ڪہ مھي ٿارَي مُلڪ ݾون ھوئي آپرَي علائقون ڏيݾا جائُون۔‘ ‏20 پڻ سيحُون بادشاھ اِسرائيليون رو ڀروسو ڪونھي ڪيئو ھانَ نَڪو اُوئون نَي آپرَي مُلڪ ݾون لنگھڻ ڏينا، پڻ اُوئي آپرَي ݾجَي مِنکون نَي ڀيڙا ڪري يھص شھر ۾ تنٻُو لگائي اِسرائيليون ݾون جنگ ڪِي۔ ‏21 اِيئي تي پرميشوَر اِسرائيليون رَي ايشوَر، سيحُون شھر ھانَ اُوئي رَي ݾجَي مِنکون نَي اِسرائيليون رَي ھاٿ ۾ ڏينا۔ پَڇي اِسرائيليون اُوئي نَي ھرائي اوٿ رَي ريوَڻ آݪَي اموريون رَي ݾجَي مُلڪ تي قبضو ڪيئو۔ ‏22 اِسرائيليون ارنون دريا ݾون لي يبوق دريا توڻي ھانَ رڻ پِٽ ݾون لي يردن دريا توڻي اموريون رَي ݾجَي علائقَي تي قبضو ڪيئو۔ ‏23 اِيئي نمُونَي پرميشوَر اِسرائيل رَي ايشوَر، اِسرائيليون آگھي اموريون نَي اُوئون رَي مُلڪ ݾون ڪاڍيا۔ ڪِي ھمَي تُو اُوئي مُلڪ تي قبضو ڪري ݾگھِي؟ ‏24 جڪو علائقو ٿارو ڏيوتا ڪموس ٿنَي قبضو ڪرڻ رَي ݾارُو ڏَي، تو ڪِي تُو اُوئي تي قبضو ڪونھي ڪرَي؟ اِيئي رَي ڪري جڪون نَي پرميشوَر آپڻَي ايشوَر آپڻَي آگھي ڪاڍيا ھَي، مھي ڀِي اُوئون رَي مُلڪ تي قبضو ڪرشون۔ ‏25 ڪِي تُو آپرو آپنَي موآب مُلڪ رَي بادشاھ صفور رَي ڏيڪرَي بلق ݾون ݾُٺو ݾمجَھي ھَي؟ ڪِي اُوئي ڪڏي اِسرائيليون ݾون جھيڙو جون جنگ ڪِي؟ ‏26 جڏي اِسرائيلي قوم تين ݾئو ݾال حشبُون شھر ھانَ اُوئي رَي گون، عروعير شھر ھانَ اُوئي رَي گون ھانَ ارنون دريا رَي ڪپ رَي شھرون تي ريتا، تو ٿَي اُوئون ݾون آپرو علائقو ڪيئون ڪونھي ڇوڙايو؟ ‏27 مھَي ٿارو ڪو ڀِي ڏوھ ڪونھي ڪيئو پڻ جي تُو مھَي ݾون جنگ ڪرِي، تو اَي ݾُٺِي بات ڪونھي۔ ھمَي رُگو پرميشوَر اِنصاف ڪرَي، اوج آج اِسرائيليون ھانَ عمُونيون رَي بِچ ۾ اِنصاف ڪرشَي۔“ ‏28 پڻ عمُونيون رَي بادشاھ اِفتاح رِي اَي باتون جڪو اُوئي نياپو ڏي ڪھيو ھتو، او ڪونھي منئَي۔

اِفتاح رِي جيت

‏29 پَڇي پرميشوَر رِي آتما اِفتاح تي اُترِي۔ اِيئي تي اِفتاح مُنسي قبيلَي ھانَ جِلعاد علائقَي ݾون لنگھي جِلعاد رَي شھر مِصفا ۾ آيو ھانَ اوٿ ݾون عمُونيون ڏيݾا گيو۔ ‏30 اِفتاح پرميشوَر نَي ݾونݾ ڏي ڪھيو ڪہ، ”جي تُو عمُوني قوم نَي مھارَي حوالي ڪرَي، ‏31 تو پَڇي جڏي ھُون صحيح سلامت پاڇو آئين، تو اُوئي ٽيم پيل جڪو ڀِي نڪري مھَي ݾون مِلڻ آشَي، تو او پرميشوَر رَي نون رو ھوشَي ھانَ ھُون اُوئي رو ٻاݪڻ آݪو ٻَليدون ڪرين۔“ ‏32 پَڇي اِفتاح دريا رَي اُوئي پاݾَي عمُونيون ݾون جنگ ڪرڻ گيو ھانَ پرميشوَر اُوئون نَي اُوئي رَي ھاٿ ۾ ڏينا۔ ‏33 اِفتاح عروعير شھر ݾون منيت شھر ھانَ ابيل ڪراميم شھر توڻي عمُونيون نَي قتل ڪري اُوئون رَي بيݾ شھرون تي قبضو ڪيئو۔ اِيئي نمُونَي اِسرائيليون عمُوني قوم نَي ھرايو۔

اِفتاح رِي ڏيڪرِي

‏34 پَڇي جڏي اِفتاح مِصفا شھر ۾ پاڇو آپرَي گھري آيو، تو اُوئي رِي ڏيڪرِي ناچتِي ھانَ دفلِي بجاوتِي اُوئي ݾون مِلڻ ٻاھر آئِي۔ اِفتاح رِي ھيڪج ڏيڪرِي ھتِي ھانَ اُوئي ݾون ٽاݪ اُوئي رو ٻيجو ڪو ڀِي اولاد ڪونھي ھتو۔ ‏35 جڏي اِفتاح آپرِي ڏيڪرِي نَي ڏيٺِي، تو اُوئي ڏُک ۾ آپرا گاڀا ڦاڙي ڪھيو ڪہ، ”اي مھارِي ڏيڪرِي، ٿَي مھنَي برباد ڪيئو رو ھانَ تُو ڀِي اُوئون ۾ ھيڪ ھَي جڪو مھنَي ڏُک ڏَي ھَي، ڪيونڪہ مھَي پرميشوَر رو ݾونݾ ليئو ھَي، جڪو ھُون ڀونگي ڪونھي ݾگھتو۔“ ‏36 اُوئي رِي ڏيڪرِي ڪھيو ڪہ، ”اي مھارا اَبا، ٿَي پرميشوَر رو ݾونݾ ليئو ھَي، اِيئي رَي ڪري تُو آپرَي ݾونݾ تي مھَي ݾون اِيئوج ڪر، ڪيونڪہ پرميشوَر ٿارَي دُشمن عمُونيون ݾون ٿارو بدلو ليئو ھَي۔“ ‏37 پَڇي اُوئي آپرَي ٻاپ نَي ڪھيو ڪہ، ”مھارَي ݾارُو اِترو ڪر ڪہ مھنَي ٻي مھيڻا موھلت ڏي ڪہ ھُون آپرَي ݾاٿڻڪيون ڀيڙِي جبلون ماٿَي جائي آپرَي ڪنوارِي مرڻ تي ڏُک ڪرون۔“ ‏38 پَڇي اُوئي رَي ٻاپ اُوئي نَي ٻي مھيڻون رِي موھلت ڏينِي ھانَ او آپرَي ݾاٿڻڪيون ڀيڙِي جبلون ماٿَي آپرَي ڪنوارِي مرڻ تي ماتم ڪرتِي رئِي۔ ‏39 پَڇي ٻيئون مھيڻون ݾون پَڇي، او آپرَي ٻاپ ڪڍي پاڇِي آئِي ھانَ اُوئي ݾون اِيئوج ڪيئو، جون اُوئي پرميشوَر ݾون ݾونݾ ليئو ھتو۔ اَي ڇوڪرِي ڪنوارِي ھتِي ھانَ اُوئي ٽيم ݾون اِسرائيلي قوم ۾ اَي ريت شرُوع ھوئِي ‏40 ھانَ ھر ݾال اِسرائيلي قوم رَي ڇوڪرَي چار ڏِن جائي جِلعاد رَي ڏيڪرَي اِفتاح رِي ڏيڪرِي رِي ياد ۾ ڏُک رَي ڪري ماتم ڪرتَي۔