قُضات 8

مدياني قوم رِي ھار

اِيئي ݾون پَڇي اِفرائيمي مِنکون جدعُون نَي ڪھيو ڪہ، ”ٿَي مھون ݾون اِيئون ڪيئون ڪيئو ڪہ جڏي تُو مديانيون ݾون جنگ ڪرڻ گيو ھتو، تو مھونَي ڪيئون ڪونھي ھيلو ڪرايو؟“ اِيئي نمُونَي اُوئون جدعُون ݾون جھيڙو ڪيئو۔ ‏2 پڻ جدعُون اُوئون نَي ڪھيو ڪہ، ”جڪو ڪئين ٿون ڪيئو، اُوئي رَي مُقابلَي ۾ مھَي ڪئين ڪونھي ڪيئو۔ اِفرائيميون انگُورون را ڇُگا باڍڻ ݾون پَڇي جڪو انگُور ڀيڙا ڪيئا، او اُوئي ݾجِي پوک ݾون ݾُٺا ھَي، جڪو ابيعزر ڀيڙا ڪيئا۔ ‏3 ايشوَر مدياني قوم را ݾردار عوريب ھانَ زئيب نَي ٿونرَي حوالي ڪيئا۔ ڪِي مھَي ٿون آݪِي ڪار اِيئون ڪئين ڪيئو؟“ جڏي اُوئون جدعُون رَي اَي باتون ݾُڻئَي، تو اُوئون رِي ريݾ گھٽ ھوئِي۔

‏4 پَڇي جدعُون ھانَ اُوئي رَي تين ݾئو مِنکون يردن دريا پار ڪيئو۔ او تموم گھڻا ٿڪوڙا ھتا، پڻ تو ڀِي دُشمنون رو لارو ڪرتا رھيا۔ ‏5 جڏي او سُڪات شھر ۾ پُگا، تو جدعُون اوٿ رَي مِنکون نَي ڪھيو ڪہ، ”اِيئون مِنکون نَي ٻاٽِي ڏيئو جڪو مھَي ڀيڙا ھَي، ڪيونڪہ اَي تموم گھڻا ٿڪوڙا ھَي۔ مھي مديان مُلڪ رَي ٻيئون بادشاھون زبح ھانَ ضلمنع رو لارو ڪرون پڙيا۔“ ‏6 سُڪات شھر رَي ݾردارون ڪھيو ڪہ، ”مھي ٿنَي ھانَ ٿارَي ساٿيون نَي ٻاٽِي ڪيئون ڏيئون؟ ڪِي ٿون زبح ھانَ ضلمنع نَي جھاليو رو؟“ ‏7 جدعُون ڪھيو ڪہ، ”جڏي پرميشوَر اَي ٻيئي بادشاھ زبح ھانَ ضلمنع مھارَي ھاٿ ۾ ڏيشَي، تو ھُون رڻ پَٽ رَي ڪونٽون آݪَي ٽاݪيون ݾون ٿونرِي کال اُتاري ڇوڙين۔“ ‏8 پَڇي او مِنک اوٿ ݾون فنوايل شھر ڏيݾا گيا ھانَ اوٿ رَي مِنکون ݾون ڀِي ٻاٽِي مونگِي ھانَ فنوايل شھر آݪون اوج ڪھيو، جڪو سُڪات شھر آݪون ڪھيو ھتو۔ ‏9 جدعُون فنوايل شھر آݪون نَي ڀِي ڪھيو ڪہ، ”جڏي ھُون صحيح سلامت پاڇو آئين، تو اَي مينار نوکي ڇوڙين۔“

‏10 اُوئي ٽيم زبح ھانَ ضلمنع آپرِي اندازن پنڌرَي ھزار فوج ڀيڙا قرقُور شھر ۾ ھتا، ڪيونڪہ رُگو اِتراج فوجي ݾجَي اُوگوڻَي ݾون آيوڙِي فوج ۾ بچا ھتا ھانَ ھيڪ لَک بيݾ ھزار تلوار ھلاوڻ آݪا فوجي ماريجا۔ ‏11 اِيئي تي جدعُون اُوئون رو اُوئي مارگ ݾون لارو ڪيئو، جيٿ ݾون تنٻُوئون ۾ ريوَڻ آݪا مِنک بيتا۔ اَي مارگ نُبح ھانَ يُگبھا شھرون رَي اُوگوڻَي ڏيݾا ھتو۔ اُوئي حملو ڪري اُوئون رِي فوج نَي قتل ڪيئو، ڪيونڪہ او لاپرواھ ھتا۔ ‏12 مديان را ٻيئي بادشاھ زبح ھانَ ضلمنع ناݾڻ لاگا، پڻ جدعُون اُوئون رو لارو ڪري اُوئون نَي جھاليا ھانَ ݾجِي فوج ٻيئاجي ناݾي گئِي۔

‏13 پَڇي يُوآس رو ڏيڪرو جدعُون جنگ ڪري حرس جبل رِي چاڙھِي ݾون پاڇو آيو ‏14 ھانَ اُوئي سُڪات شھر رَي ھيڪَي نوجوان نَي جھالي اُوئي ݾون پُوڇو، تو اُوئي سُڪات شھر رَي ݾتھتر ݾردارون ھانَ اَگووڻون را نون جدعُون نَي لِکي ڏينا۔ ‏15 پَڇي او سُڪات شھر آݪون ڪڍي پاڇو آئي ڪيوَڻ لاگو ڪہ، ”زبح ھانَ ضلمنع نَي جوئو، جڪون رَي بارَي ۾ ٿون مھَي تي ھاݾا ڪري ڪھيو ھتو ڪہ، ’مھي ٿنَي ھانَ ٿارَي ٿڪوڙَي ساٿيون نَي ٻاٽِي ڪيئون ڏيئون؟ ڪِي ٿون زبح ھانَ ضلمنع نَي جھاليو رو؟‘“ ‏16 پَڇي جدعُون سُڪات شھر رَي اَگووڻون نَي جھاليا ھانَ ڪونٽون آݪَي ٽاݪيون ݾون ماري سزا ڏينِي۔ ‏17 اِيئي ݾون پَڇي جدعُون فنوايل شھر رو مينار نوکيو ھانَ اُوئي شھر ۾ ريوَڻ آݪون نَي قتل ڪيئا۔

‏18 پَڇي جدعُون زبح ھانَ ضلمنع ݾون پُوڇو ڪہ، ”جڪو مِنک ٿون تبُور رَي جبل تي قتل ڪيئا ھتا، او مِنک ڪھڙا ھتا؟“ اُوئون ڪھيو ڪہ،”جھڙو تُو ھَي، او ڀِي اھڙاج ھتا ھانَ او ݾجائِي اھڙا ڏيکيجتا جھڙا شھزادا۔“ ‏19 پَڇي جدعُون ڪھيو ڪہ، ”او مھارا ݾَگا ڀائي ھتا۔ جيتَي پرميشوَر رو ݾونݾ، جي ٿون اُوئون نَي جيتا ڇوڙيا ھووَنت، تو ھُون ڀِي ٿونَي جيتا ڇوڙون تو۔“ ‏20 پَڇي اُوئي آپرَي موٽَي ڏيڪرَي يتر نَي ڪھيو ڪہ، ”اُٺ ھانَ اِيئون نَي قتل ڪر۔“ پڻ اُوئي آپرِي تلوار ٻِي ۾ ڪونھي ڪاڍِي، ڪيونڪہ او اَڃون ٻاݪ ھتو۔ ‏21 پَڇي زبح ھانَ ضلمنع ڪھيو ڪہ، ”جي تُو ڏاڍو مِنک ھَي، تو تُو آپ مھونَي مار۔“ اِيئي تي جدعُون اُٺي زبح ھانَ ضلمنع نَي قتل ڪيئا ھانَ اُوئون رَي اُونٺون رَي ڪونڌون ݾون چوندِي را ھار اُتاري ليئا۔

جدعُون رِي مُورتِي

‏22 پَڇي اِسرائيليون جدعُون نَي ڪھيو ڪہ، ”ٿَي مھونَي مدياني قوم رَي ھاٿون ڇوڙايا ھَي، اِيئي رَي ڪري تُو مھون تي بادشاھي ڪر۔ ٿَي ݾون پَڇي ٿارو ڏيڪرو ھانَ اُوئي ݾون پَڇي ٿارو پوترو مھون تي بادشاھي ڪرَي۔“ ‏23 اِيئي تي جدعُون اُوئون نَي ڪھيو ڪہ، ”نَڪو ھُون ٿون تي بادشاھي ڪرون ھانَ نَڪو مھارو ڏيڪرو، پڻ پرميشوَر ٿون تي بادشاھي ڪرشَي۔“ ‏24 پَڇي جدعُون اُوئون نَي ڪھيو ڪہ، ”مھربونِي ڪري ٿون ۾ ھر ھيڪ مِنک آپرَي کوݾيوڙَي باݪڪَي مھنَي ڏَي۔“ اَي مِنک اِسماعيلي قبيلَي را ھتا۔ اِيئي رَي ڪري ݾونَي رَي باݪڪَي پيرتا۔ ‏25 اُوئون ڪھيو ڪہ،”مھي خُوشِي ݾون باݪڪَي ڏيوَڻ رَي ݾارُو تيار ھون۔“ پَڇي اُوئون ھيڪ چادر بِڇائِي ھانَ ݾجون آپرَي کوݾيوڙَي باݪڪَي اُوئي ماٿَي راکئَي۔ ‏26 جدعُون ݾونَي رَي جڪو باݪڪَي مونگئَي ھتَي، او وزن ۾ اندازن بيݾ ڪِلو ھتَي۔ اِيئي ݾون ٽاݪ چوندِي را ھار، جُھوٻريا ھانَ مدياني بادشاھون را بيڱڻائي گاڀا، جڪو اُوئون را پيريوڙا ھتا ھانَ ڪئين قيمتي ݾوڪڙڪَي ڀِي ھتَي، جڪو اُوئون رَي اُونٺون رَي ڪونڌون ۾ ھتَي۔ ‏27 جدعُون ݾونَي رَي باݪڪيون ݾون آپرِي ھيڪ مُورتِي ٺڙائِي ھانَ او آپرَي شھر عُفرا ۾ لي جائي اُڀِي ڪرائِي۔ پَڇي ݾجَي اِسرائيليون پرميشوَر ݾون بي وفائِي ڪري اُوئي مُورتِي رِي پُوجا ڪرڻ لاگا۔ اِيئي نمُونَي او مُورتِي جدعُون ھانَ اُوئي رَي ݾجَي خاندان رَي ݾارُو ڦاݾِي ھوئِي۔

‏28 اِيئي نمُونَي مديانيون اِسرائيليون ݾون اھڙِي ھار کاڌِي ڪہ اُوئون ۾ ڪڏي ڀِي اِسرائيليون ݾون بِڙھڻ رِي ھِمت ڪونھي ھوئِي۔ جدعُون رَي زمونَي ۾ اُوئي مُلڪ ۾ چاليھ ݾال امن رھيو۔

جدعُون رِي موت

‏29 پَڇي يُوآس رو ڏيڪرو يربعل آپرَي گھري جائي ريوَڻ لاگو۔ ‏30 جدعُون رَي تموم گھڻَي لُگائَي ھتِي ھانَ اُوئي را ستر ݾَگا ڏيڪرا ھتا۔ ‏31 اُوئي رِي ھيڪ ٻونھِي ڀِي ھتِي، جڪو سِڪم شھر ۾ ريتِي، اُوئي ݾون ڀِي ھيڪ ڏيڪرو ھويو، جڪَي رو نون اُوئي ابيملڪ راکيو۔ ‏32 يُوآس رو ڏيڪرو جدعُون تموم گھڻِي عُمر رو ھوئي مُوئو۔ پَڇي اُوئي نَي اليعزر رَي شھر عُفرا ۾ اُوئي رَي ٻاپ رَي مُڪومون ۾ ٻُوريو۔ ‏33 جدعُون رَي مرڻ ݾون پَڇي اِسرائيلي قوم پرميشوَر ݾون بي وفائِي ڪِي ھانَ بعل ڏيوتائون رِي پُوجا ڪرڻ لاگا ھانَ بعل بريت نَي آپرو ڏيوتا ٺاھيو۔ ‏34 اِسرائيليون پرميشوَر آپرَي ايشوَر نَي ڦِٽو ڪيئو، جڪَي اُوئون نَي ھر نمُونَي رَي ݾجَي دُشمنون ݾون ڇوڙايا ھتا۔ ‏35 اِسرائيليون او ݾُٺا ڪوم ياد ڪونھي راکيا جڪو يربعل، يعني جدعُون رَي خاندان اُوئون رَي ݾارُو ڪيئا ھتا۔