قُضات 7

جدعُون ھانَ تين ݾئو مِنک

پَڇي يربعل يعني جدعُون ھانَ اُوئي را ݾجائِي مِنک جڪو اُوئي ڀيڙا ھتا، او ݾاڪݪي تارھي اُٺيا ھانَ اُوئون عين حرود ندِي رَي پاݾَي ۾ آپرا تنٻُو لگايا۔ مديانيون آپرا تنٻُو اُوئون رَي اُتر ۾ مورا جبل رِي وادِي ۾ لگايا۔ ‏2 اِيئي تي پرميشوَر جدعُون نَي ڪھيو ڪہ، ”جڪو مِنک ٿَي ڀيڙا ھَي، او تموم گھڻا ھَي ھانَ مھارِي مرضِي ڪونھي ڪہ ھُون مديانيون نَي اِسرائيليون رَي ھاٿ ۾ ڏيئون، اِيئون نِي ھووَي ڪہ اِسرائيلي مھارَي ݾومھا بڏائو ڪري ڪَي ڪہ، ’مھون آپرِي طاقت ݾون آپرو آپنَي ڇوڙايا ھَي۔‘ ‏3 اِيئي رَي ڪري ھمَي تُو مِنکون نَي ڪَي ڪہ، ’جڪو ٻيئاجَي ھانَ ڏڪَي ھَي، او جِلعاد جبل ݾون پاڇو آپرَي گھري جاوَي۔‘“ اِيئي تي ٻاوِي ھزار مِنک پاڇا گيا ھانَ باقي ڏَݾ ھزار مِنک اوٿج رھيا۔

‏4 پَڇي پرميشوَر جدعُون نَي ڪھيو ڪہ، ”مِنک اَڃون ڀِي تموم گھڻا ھَي، اِيئي رَي ڪري تُو اُوئون نَي ڊنڍ ڪڍي ھيٺا لي جا ھانَ اوٿ ھُون اُوئون نَي ٿارَي ݾارُو آزمائين۔ جڪَي رَي بارَي ۾ ھُون ٿنَي ڪئين، رُگو اوج ٿَي ڀيڙو ھالشَي ھانَ جڪَي رَي بارَي ۾ ڪئين ڪہ او ٿَي ڀيڙو ڪونھي ھالَي، تو او ڪونھي جاوَي۔“ ‏5 پَڇي جدعُون مِنکون نَي ڊنڍ ڪڍي ھيٺا لي آيو۔ اِيئي تي پرميشوَر جدعُون نَي ڪھيو ڪہ، ”جڪو ڀِي آپرِي زِبون ݾون ڪُتَي آݪِي ڪار پوڻي پيئَي، تو تُو اُوئي نَي ھيڪَي پاݾَي اُڀاڙي ھانَ جڪو گوڏا کوڙي پوڻي پيئَي، تو اُوئي نَي ٻيجَي پاݾَي اُڀاڙي۔“ ‏6 اِيئي نمُونَي جڪون ڪُتَي آݪِي ڪار پوڻي پيئو، او ݾجائِي تين ݾئو مِنک ھتا ھانَ باقي ݾجون گوڏا کوڙي پوڻي پيئو۔ ‏7 پَڇي پرميشوَر جدعُون نَي ڪھيو ڪہ، ”جڪون تين ݾئو مِنکون ڪُتَي آݪِي ڪار پوڻي پيئو ھَي، ھُون اُوئون رَي وسيلَي ٿونَي ڇوڙائين ھانَ مدياني ٿارَي ھاٿ ۾ ڏئين۔ باقي ݾجائِي مِنک آپرَي آپرَي گھري ميل۔“ ‏8 پَڇي جدعُون اِسرائيليون ݾون کاوڻ پيئڻ رو سيمون ھانَ نَر ݾِينگا ليئا ھانَ پَڇي اُوئون نَي آپرَي آپرَي گھري ميليا، پڻ باقي تين ݾئو مِنک آپ ڀيڙا راکيا۔ مديانيون را تنٻُو ھيٺا وادِي ۾ ھتا۔

‏9 اُوئيج رات پرميشوَر جدعُون نَي ڪھيو ڪہ، ”اُٺ ھانَ ھيٺا مديانيون رَي تنٻُوئون ڏيݾا جا، ڪيونڪہ اُوئون نَي مھَي ٿارَي ھاٿ ۾ ڏينا ھَي۔ ‏10 پڻ جي تُو ھيٺا تنٻُوئون ڏيݾا جاوڻ ݾون ٻيئاجَي ھَي، تو تُو آپرو نوڪر فورا ڀيڙو لي جا ‏11 ھانَ او ݾجَي باتون ݾُڻ جڪو مدياني ڪَي پڙيا۔ اِيئي ݾون ٿَي ۾ اُوئون تي حملو ڪرڻ رِي ھِمت بڌي جاشَي۔“ پَڇي جدعُون آپرَي نوڪر فورا ڀيڙو مديانيون رَي تنٻُوئون ڏيݾا ھيٺا گيو، جيٿ فوجي اُڀوڙا ھتا۔ ‏12 مدياني، عماليقي ھانَ اُوگوڻَي را ݾجائِي مِنک تيڏون آݪِي ڪار وادِي ۾ پکڙيوڙا ھتا ھانَ اُوئون را اُونٺ ݾمُوندر رَي ڪپ رِي بيݪُو آݪِي ڪار تموم گھڻا ھتا۔ ‏13 جڏي جدعُون اوٿ پُگو، تو اُوئي ݾُڻيو ڪہ ھيڪ مِنک آپرَي ساٿِي نَي آپرَي ݾپنَي رَي بارَي ۾ ݾُڻاوَي پڙيو ڪہ، ”مھَي ݾپنَي ۾ ڏيٺو ڪہ جَئو رِي ھيڪ ٻاٽِي گِڙڪتِي آئِي ھانَ او مديانيون رَي تنٻُوئون نَي لاگِي، جڪَي ݾون تنٻُو بِکري ھيٺا کِريا۔“ ‏14 اِيئي تي اُوئي رَي ساٿِي ڪھيو ڪہ،”اَي اِسرائيلي مِنک يُوآس رِي تلوار ھَي، اِيئي ݾون ٽاݪ ٻيجو ڪئين ڪونھي۔ ايشوَر مديانيون ھانَ اُوئون رِي ݾجِي فوج نَي جدعُون رَي ھاٿ ڏينِي ھَي۔“

‏15 جڏي جدعُون او ݾپنو ھانَ اُوئي رو مطلب ݾُڻيو، تو اُوئي پرميشوَر آگھي شيش نِمايو۔ پَڇي او اِسرائيليون رَي تنٻُوئون ۾ پاڇو آيو ھانَ ڪھيو ڪہ،”اُٺو، ڪيونڪہ پرميشوَر مديانيون رِي ݾجِي فوج ٿونرَي ھاٿ ۾ ڏينِي ھَي۔“ ‏16 پَڇي جدعُون اُوئون تين ݾئو مِنکون را تين ٽولا ٺاھيا ھانَ ھر ھيڪ مِنک رَي ھاٿ ۾ ھيڪ ھيڪ نَر ݾِينگو ھانَ ھيڪ ھيڪ کالِي دِلو ڏينو۔ ھر ھيڪ دِلَي ۾ ھيڪ ھيڪ ڏِيئو ھتو۔ ‏17 پَڇي اُوئي مِنکون نَي ڪھيو ڪہ،”جوئو، جڏي ھُون دُشمنون رَي تنٻُوئون ڪڍي پُگون، تو ٿي مھنَي جوتا رھيا ھانَ جون ھُون ڪرون، ٿي ڀِي اِيئوج ڪريا۔ ‏18 جڏي ھُون ھانَ مھارا ݾجائِي ساٿِي نَر ݾِينگو بجاوَي، تو ٿي ڀِي تنٻُوئون رَي چوڌاري نَر ݾِينگا بجايا ھانَ نارا لگايا ڪہ، ’پرميشوَر رِي ھانَ جدعُون رِي جَئي جَئي ھووَي۔‘“

جدعُون رو مدياني قوم نَي ھراوڻ

‏19 پَڇي اندازن آڌِي رات رو جڏي ٻيجا پھريدار آيا، تو جدعُون آپرَي ݾئو مِنکون ڀيڙو مديانيون رَي تنٻُوئون نيڙو پُگو ھانَ اُوئون نَر ݾِينگا بجايا ھانَ او دِلا ڀونگيا، جڪو اُوئون رَي ھاٿ ۾ ھتا۔ ‏20 اِيئي نمُونَي باقي ٽولون ڀِي نَر ݾِينگا بجايا ھانَ دِلا ڀونگيا۔ پَڇي او ڏِيئا آپرَي کاٻَي ھاٿ ۾ ھانَ نَر ݾِينگا بجاوڻ رَي ݾارُو آپرَي ݾاجَي ھاٿ ۾ ليئا ھانَ زور ݾون نارا ھڻيا ڪہ، ”پرميشوَر ھانَ جدعُون رِي تلوار۔“ ‏21 پَڇي او مديانيون رَي تنٻُوئون رَي چوڌاري اُڀي رھيا ھانَ دُشمن را ݾجائِي فوجي ٻِي ۾ رڙَي ڪرڻ ھانَ ناݾڻ لاگا۔ ‏22 جدعُون را تين ݾئو مِنک نَر ݾِينگا بجاوتا رھيا ھانَ پرميشوَر اُوئون رَي تنٻُوئون ۾ اھڙِي گَڙ ٻَڙ گھاتِي ڪہ اُوئون آپت ۾ ھيڪَي ٻيجَي نَي تلوار ݾون ماري ڇوڙيا۔ اُوئون را ݾجائِي فوجي صريرات شھر ڏيݾا بيت سِطا شھر توڻي ھانَ طبات شھر رَي نيڙا ابيل محولا رِي حد توڻي ناݾي گيا۔ ‏23 پَڇي اِسرائيلي مِنک نفتالي، آشر ھانَ مُنسي قبيلون رَي حدون ݾون ڀيڙا ھويا ھانَ اُوئون مديانيون رو لارو ڪيئو۔

‏24 پَڇي جدعُون اِفرائيم رَي ݾجَي جابلُو علائقون ۾ نياپو ڏيوَڻ آݪا ميليا ڪہ، ”مديانيون ݾون مُقابلو ڪرڻ رَي ݾارُو ھيٺا آئو ھانَ اُوئون ݾون پيل اُوئون گھيڙون تي قبضو ڪرو، جڪو بيت برا ھانَ يردن دريا توڻي ھَي۔“ پَڇي ݾجائِي اِفرائيمي ڀيڙا ھويا ھانَ اُوئون گھيڙون تي قبضو ڪيئو، جڪو بيت برا ھانَ يردن دريا توڻي ھتا۔ ‏25 اُوئون ٻيئون مدياني ݾردارون عوريب ھانَ زئيب نَي جھالي اُوئون را ڪونڌا باڍيا۔ اِيئي رَي ڪري اُوئي جگھائون را نون عوريب رو جبل ھانَ زئيب رو انگُورون رو رس ڪاڍڻ آݪو ھود ھويو۔ اُوئون مديانيون رو لارو ڪيئو ھانَ يردن دريا پار ڪري عوريب ھانَ زئيب را باڍيوڙا ڪونڌا جدعُون ڪڍي لي آيا۔