فريشتَي رِي اِسرائيليون ݾون بات
2
پرميشوَر رو فريشتو جِلجال شھر ݾون بوڪيم شھر ۾ آيو ھانَ اِسرائيليون نَي ڪھيو ڪہ،”ھُون ٿونَي مِصر مُلڪ ݾون ڪاڍي اِيئي مُلڪ ۾ لايون ھون، جڪَي رَي بارَي ۾ مھَي ٿونرَي ٻاپ ڏاڏون ݾون ݾونݾ ليئو ھتو ھانَ ڪھيو ھتو ڪہ، ’ھُون ٿون ݾون آپرو وچن ڪڏي ڀِي ڪونھي توڙون 2 ھانَ ٿي اُوئي مُلڪ ۾ ريوَڻ آݪون ݾون ڪو ڀِي وچن نِي ڪريا، پڻ اُوئون رَي ٺاھيوڙَي ٻَليدون رَي جگھائون ڀونگي ڇوڙيا۔‘ پڻ ٿون مھارو حُڪم ڪونھي منيو، 3 اِيئي رَي ڪري ھمَي ھُون ٿنَي ڪونھ ھون ڪہ ھُون او قومون ٿونرَي بِچ ݾون ڪونھي ڪاڍون، او ٿونرَي ݾارُو ڪونٽا ھانَ ٿي اُوئون رَي ڏيوتائون رِي پُوجا ڪرڻ رِي ڦاݾِي ۾ ڦاݾي جاشو۔“ 4 جڏي پرميشوَر رَي فريشتَي اِسرائيلي نَي اَي باتون ݾُڻائَي، تو ݾجائِي مِنک زور ݾون روئڻ لاگا۔ 5 اِسرائيليون اُوئي جگھا رو نون بوڪيم راکيو ھانَ اوٿ اُوئون پرميشوَر رَي ݾارُو ٻَليدون ڪيئو۔يشُوع رِي موت
6 جڏي يشُوع اِسرائيليون نَي بَئير ڪيئا، تو اُوئون ۾ ھر ھيڪ آپرِي آپرِي وِراثت ڏيݾا گيو ڪہ اُوئي تي قبضو ڪرَي۔ 7 جترِي توڻي يشُوع جيتو ھتو، اُتري توڻي اِسرائيلي پرميشوَر رِي ڀگتي ڪرتا رھيا ھانَ يشُوع رَي مرڻ ݾون پَڇي ٻيجا اَگووڻ ڀِي ھتا، جڪون نَي پرميشوَر رَي ڪومون رِي خبر ھتِي، جڪو پرميشوَر اِسرائيليون رَي ݾارُو ڪيئا ھتا۔ جترِي توڻي اَي اَگووڻ جيتا ھتا، اُتري توڻي ݾجائِي اِسرائيلي پرميشوَر رِي ڀگتي ڪرتا رھيا۔
8 پرميشوَر رو شيواداري يشُوع، جڪو نُونَ رو ڏيڪرو ھتو، او ھيڪ ݾئو ڏَݾ ݾال رِي عُمر ۾ مري گيو۔ 9 پَڇي اُوئون يشُوع نَي اُوئي رِي وِراثت آݪِي ٻنِي تِمناتا حرس ۾ ٻُوريو، جڪو اِفرائيم رَي جابلُو علائقَي ۾ جعس جبل رَي اُتر ۾ ھَي۔ 10 پَڇي اُوئي زمونَي رِي ݾجِي پيڙھِي آݪا مري گيا ھانَ اُوئون ݾون پَڇي ھيڪ ٻيجِي پيڙھِي پيدا ھوئِي، جڪو نَڪو پرميشوَر نَي اوݪکتِي ھانَ نَڪو اُوئون ڪومون نَي جڪو پرميشوَر اِسرائيليون رَي ݾارُو ڪيئا ھتا۔
اِسرائيليون رو پرميشوَر رِي ڀگتي نِي ڪرڻ
11 پَڇي اِسرائيلي قوم پرميشوَر رِي نافرمونِي ڪري پاپ ڪيئو ھانَ بعل ڏيوتائون رِي پُوجا ڪرڻ لاگا۔ 12 اُوئون پرميشوَر آپرَي ٻاپ ڏاڏَي رَي ايشوَر نَي ڦِٽو ڪيئو، جڪو اُوئون نَي مِصر مُلڪ ݾون ڪاڍي لي آيو ھتو۔ اُوئون آپ ڀيڙا ريوَڻ آݪَي غير قومون رَي ڏيوتائون رِي پُوجا ڪِي ھانَ اُوئون آگھي شيش نِمايو۔ اِيئي نمُونَي اُوئون پرميشوَر نَي ريݾ ڏيرائِي۔ 13 اُوئون پرميشوَر رِي ڀگتي ڪرڻ ڇوڙي بعل ڏيوتا ھانَ عستارات ڏيوِي رِي پُوجا ڪِي۔ 14 اِيئي رَي ڪري پرميشوَر رو ڪھر اِسرائيلي قوم تي ڀڙڪيو ھانَ اُوئي اُوئون نَي اھڙَي دُشمنون رَي حوالي ڪيئا، جڪو اُوئون نَي ڦُرتا ريتا۔ پَڇي پرميشوَر اِسرائيليون نَي اُوئون رَي آݾَي پاݾَي رَي دُشمنون رَي حوالي ڪيئا ھانَ او آپرَي دُشمنون رو مُقابلو ڪري ڪونھي ݾگھيا۔ 15 پرميشوَر اِسرائيليون نَي ڦِٽا ڪيئا، اِيئي رَي ڪري او جيٿ ڀِي جاوتا، تو او آپرَي دُشمنون ݾون ھاريجي جاوتا۔ جون پرميشوَر ڪھيو ھتو ھانَ اُوئون ݾون ݾونݾ ليئو ھتو۔ اِيئي نمُونَي او تموم گھڻَي مُصيبتون ۾ ڦاݾي گيا۔
پرميشوَر رو آپرا قاضِي چُونڊڻ
16 پَڇي پرميشوَر اِسرائيلي قوم رَي ݾارُو قاضِي راکيا، جڪون اُوئون نَي ڦُرڻ آݪون ݾون ڇوڙايا۔ 17 پڻ اِسرائيليون قاضيون رِي بات ڪونھي منِي ھانَ او پرميشوَر ݾون بي وفا ھوئي ٻيجَي ڏيوتائون رِي پُوجا ڪِي۔ او تموم ڇيڪا اُوئي مارگ ݾون گُھمرا ھويا، جڪَي تي اُوئون را ٻاپ ڏاڏا بيتا ھانَ اُوئون پرميشوَر رو حُڪم ڪونھي منيو، جھڙَي نمُونَي اُوئون را ٻاپ ڏاڏا منتا۔ 18 جڏي ڀِي اِسرائيلي آپرَي دُشمنون ھانَ ڏُک ڏيوَڻ آݪون رَي ڪري روتا، تو پرميشوَر نَي اُوئون تي دايا آوتِي۔ اِيئي رَي ڪري پرميشوَر اُوئون رَي ݾارُو قاضِي راکتو ھانَ او اُوئي ڀيڙو ھوتو۔ پرميشوَر قاضِي رَي جيتَي جِي اِسرائيليون نَي اُوئون رَي دُشمنون ݾون ڇوڙاوتو۔ 19 پڻ جڏي او قاضِي مري جاوتو، تو اِسرائيلي گُھمرا ھوئي ٻيجَي ڏيوتائون رِي پُوجا ڪرتا۔ او آپرَي ٻاپ ڏاڏون ݾون ڀِي وڌيڪ خراب ھوئي جاوتا۔ اِيئي نمُونَي او اُوئون ڏيوتائون رِي پُوجا ڪرتا ھانَ اُوئون آگھي جُھڪتا۔ 20 اِيئي رَي ڪري پرميشوَر رو ڪھر اِسرائيليون تي ڀڙڪيو ھانَ اُوئي ڪھيو ڪہ،”اِيئي قوم نافرمونِي ڪري مھارو او وچن توڙيو ھَي، جڪَي رو حُڪم مھَي اُوئون رَي ٻاپ ڏاڏون نَي ڏينو ھتو۔ 21 ھمَي ھُون او قومون ڪونھي تگڙون، جڪو يشُوع رَي مرڻ ݾون پَڇي اِيئي مُلڪ ۾ رھيا ھَي۔ 22 ھُون اِسرائيليون نَي اُوئون قومون رَي وسيلَي آزمائين ڪہ او آپرَي ٻاپ ڏاڏون آݪِي ڪار مھارَي مارگ تي بيشَي، جون نا۔“ 23 اِيئي نمُونَي پرميشوَر اُوئون قومون نَي اِسرائيليون ڀيڙا ريوَڻ ڏينا ھانَ اُوئون نَي تگڙڻ ۾ دير ڪونھي ڪِي ھانَ نَڪو اُوئون نَي يشُوع رَي حوالي ڪيئا۔