Goꞌ nanyi de sruga muji Tuhan Allah
19
Udah nyaꞌ ku ninga munyi goꞌ kebala urang mayoh begoꞌ sareng ari sruga, jakoꞌ sidaꞌ,“Puji Tuhan Allah!
Allah kita nyaꞌ mah Tuhan Allah te nyelamat kita, te patot dejunyong tingeꞌ abaꞌ Ya te bekuasa.
2 Nema Ya selareh nyidang ngau adel abaꞌ kenaꞌ.
Entoꞌ Tuhan Allah udah ngukom inoꞌ te ma kanyi nyaꞌ,
te udah ngerusak bumi ngau dusa baraꞌ te depulah ya nyaꞌ,
abaꞌ Tuhan Allah mah te udah malas darah kebala pelayan Ya ke inoꞌ te kanyi nyaꞌ.”
3 Baroꞌ urang mayoh nyaꞌ madah ageꞌ,
“Puji Tuhan Allah!
Asap api te ngangos kuta besai nyaꞌ niseꞌ pemadoꞌ.”
4 Dua puloh empat pemimpen abaꞌ empat mahlok nyaꞌ, tesungkor nyemah Tuhan Allah te dudok de atau bangku raja nyaꞌ, abaꞌ madah,
“Amen, Puji Tuhan Allah.”
5 Kebaꞌ tedinga goꞌ ari bangku raja nyaꞌ madah,
“Puji ke Tuhan Allah kita,
o ugaꞌ kitaꞌ te ngelayan Ya,
ugaꞌ kitaꞌ bebesai met
te hormat ke Ya!”
Gawai Anak Dumba
6 Baroꞌ ku ninga munyi goꞌ urang te lampar mayoh, munyi goꞌ aiꞌ terjon abaꞌ munyi goꞌ pletop guntor. Goꞌ nyaꞌ madah,
“Puji Tuhan Allah!
Nema Tuhan Allah kita, Te Ma Kuasa udah jadi raja.
7 Boh ugaꞌ kita gaga abaꞌ berami,
abaꞌ muji Ya!
Nema nyau senta ari gawai Anak Dumba,a
abaꞌ inoꞌ te kaꞌ degawaib nyaꞌ udah nyiap direꞌ.
8 Tuhan Allah udah mereꞌ baju ke inoꞌ nyaꞌ te depulah ari kayen lenan alos te puteh breseh abaꞌ bekilat!”
(Baju lenan alos nyaꞌ pemulah te kenaꞌ kebala urang te deempu Tuhan Allah.)
9 Baroꞌ mlikat nyaꞌ madah ke ku, “Tules ke lah utai toꞌ: Betuah amat mah sidaꞌ te dekumai datai ke gawai Anak Dumba nyaꞌ.” Mlikat nyaꞌ madah ageꞌ, “Te ku padah ke toꞌ bamat ari Tuhan Allah.”
10 Baroꞌ ku tesungkor de kaki mlikat nyaꞌ kaꞌ nyemah ya, uleh ya madah ke ku, “Nang mulah piyaꞌ! Ku toꞌ pelayan Tuhan Allah sama upa meh, abaꞌ kebala menyadeꞌ meh te seiman, te madah pengajar te kenaꞌ te deajar Isa. Peroꞌ Tuhan Allah mah te patot meh semah. Nema pengajar te kenaꞌ te udah deanyaꞌ Isa nyaꞌ mah te nyuroh umat Tuhan Allah talah madah pesau ari Tuhan Allah.”
Te numpang kuda puteh
11 Baroꞌ ku medaꞌ sruga tebukaꞌ abaꞌ pedaꞌ sikoꞌ kuda puteh. Nama te numpang de ya nyaꞌ, “Setia abaꞌ Kenaꞌ.” Ya nyidang abaꞌ beperang ngau adel. 12 Mata Ya upa jelar api abaꞌ de palaꞌ Ya mayoh mahkuta. De Ya adai detules suteꞌ nama, uleh peroꞌ Ya kedireꞌ mah te tauꞌ badaꞌ nama nyaꞌ. 13 Abaꞌ Ya ngau jubah te udah decalop ke alam darah abaꞌ nama Ya desebot, “Pemadah Tuhan Allah.” 14 Abaꞌ ugaꞌ pasukan te de sruga nerudi Ya, sidaꞌ numpang kuda puteh abaꞌ ngau baju lenan alos te puteh breseh. 15 Ari alam nyawa Ya pansot sebilah pedang tajam, abaꞌ ngau pedang nyaꞌ Ya kaꞌ ngalah kebala bansa abaꞌ Ya kaꞌ mrintah sidaꞌ ngau tungkat besi. Ya kaꞌ merah angor alam teban te ngau merah angor. Teban nyaꞌ kebarat pranseng Tuhan Allah Te Ma Kuasa. 16 De jubah Ya abaꞌ de pa Ya adai detules nama upa pitoꞌ, “Raja de atau kebala raja, Tuhan de atau kebala tuan.”
Jelu abaꞌ nabi palsu detibar ke alam laot api
17 Udah nyaꞌ ku medaꞌ sikoꞌ mlikat diri de mataari abaꞌ ya ngangau ugaꞌ kebala burong te trebai de langet, jakoꞌ ya, “Boh kitoꞌ begugoꞌ makai abaꞌ ngeramai gawai besai te udah deageh Tuhan Allah. 18 Ayoh pakai ke bangkai kebala raja, kebala kepalaꞌ prajuret, abaꞌ kebala prajuret. Pakai ke kebala bangkai kuda abaꞌ kebala te numpang kuda nyaꞌ. Pakai ke bangkai ugaꞌ urang, bayek urang te bibas, bayek ulon, bayek urang te bepangkat, bayek urang te nadai bepangkat.”
19 Baroꞌ ku medaꞌ jelu te semaru abaꞌ ugaꞌ kebala raja de bumi abaꞌ kebala prajuret sidaꞌ udah begugoꞌ kaꞌ beperang ngelawan Urang te numpang kuda puteh abaꞌ kebala prajuret Ya. 20 Uleh jelu nyaꞌ abaꞌ nabi palsu detangkap. Nabi palsu nyaꞌ mah te udah mulah kebala utai te nyaroh de mua jelu nyaꞌ. Ngau utai te nyaroh nyaꞌ ya nesat kebala urang te udah nerimaꞌ tana ari jelu nyaꞌ abaꞌ te udah nyemah pentek jelu nyaꞌ. Senikoꞌ detibar idop-idop ke alam laot api te bawoh uleh blirang. 21 Ugaꞌ kebala prajuret jelu nyaꞌ debunoh ngau pedang te pansot ari nyawa Urang te numpang kuda puteh nyaꞌ, abaꞌ kebala burong segai makai bangkai sidaꞌ.