Goꞌ nanyi de sruga muji Tuhan Allah
19
Baroꞌ udah nyaꞌ ku ninga goꞌ munyi kebala urang mayoh begoꞌ sareng ari sruga, jakoꞌ sidaꞌ,“Puji Tuhan Allah!
Allah kita nyaꞌ mah Tuhan Allah te nyelamat kita, te patot dajunyong tingeꞌ abaꞌ Ya te bekuasa.
2 Nema Ya slareh nyidang ngau adel abaꞌ kenaꞌ.
Entoꞌ Tuhan Allah udah ngukom inoꞌ te ma kanyi nyaꞌ,
te udah ngerusak bumi ngau dusa baraꞌ te dapulah ya nyaꞌ,
abaꞌ Tuhan Allah mah te udah malas darah kebala playan Ya ke inoꞌ te kanyi nyaꞌ.”
3 Urang mayoh nyaꞌ madah ageꞌ:
“Puji Tuhan Allah!
Asap api te ngangos kuta besai nyaꞌ niseꞌ pemadoꞌ.”
4 Dua puloh empat pemimpen abaꞌ empat mahlok nyaꞌ tesungkor nyemah Tuhan Allah te dudok de atau bangku raja nyaꞌ, abaꞌ madah,
“Amen, Puji Tuhan Allah.”
5 Kebaꞌ tedinga goꞌ ari bangku raja nyaꞌ madah:
“Puji Tuhan Allah kita,
o ugaꞌ kitaꞌ te ngelayan Ya,
bayek ugaꞌ kitaꞌ te bepangkat abaꞌ nadai bepangkat
te hormat ke Ya!”
Gawai Anak Dumba
6 Baroꞌ ku ninga munyi goꞌ urang mayoh amat, munyi goꞌ aiꞌ terjon abaꞌ munyi goꞌ pletop guntor. Goꞌ nyaꞌ madah,
“Puji Tuhan Allah!
Nema Tuhan Allah kita, Te Ma Kuasa udah jadi raja.
7 Boh ugaꞌ kita gaga abaꞌ berami,
abaꞌ muji Ya!
Nema nyau senta ari gawai Anak Dumbaa,
abaꞌ inoꞌ te kaꞌ degawaib nyaꞌ udah nyiap direꞌ.
8 Tuhan Allah udah mreꞌ baju ke inoꞌ nyaꞌ te dapulah ari kayen lenan alos te puteh breseh abaꞌ bekilat!”
(Baju lenan alos nyaꞌ pemulah te kenaꞌ kebala urang te daempu Tuhan Allah.)
9 Baroꞌ mlikat nyaꞌ madah ke ku, “Tules ke lah utai toꞌ: Betuah amat mah sidaꞌ te dakumai datai ke gawai Anak Dumba nyaꞌ.” Mlikat nyaꞌ madah ageꞌ, “Te ku padah ke toꞌ bamat ari Tuhan Allah.” 10 Baroꞌ ku tesungkor de kaki mlikat nyaꞌ kaꞌ nyemah ya, uleh ya madah ke ku, “Nang mulah piyaꞌ! Ku toꞌ playan Tuhan Allah sama upa meh, abaꞌ kebala menyadeꞌ meh te seiman, te madah pengajar te kenaꞌ te deajar Isa. Proꞌ Tuhan Allah mah te patot meh semah. Nema Pengajar te kenaꞌ te udah deanyaꞌ Isa nyaꞌ mah te nyuroh umat Tuhan Allah talah madah pesau ari Tuhan Allah.”
Te numpang kuda puteh
11 Baroꞌ ku medaꞌ sruga tebukaꞌ abaꞌ pedaꞌ sikoꞌ kuda puteh. Nama te numpang de ya nyaꞌ, “Setia abaꞌ Kenaꞌ.” Ya nyidang abaꞌ beperang ngau adel. 12 Mata Ya upa jelar api abaꞌ de palaꞌ Ya mayoh mahkuta. De Ya adai datules suteꞌ nama, uleh proꞌ Ya kedireꞌ mah te tauꞌ badaꞌ nama nyaꞌ. 13 Abaꞌ Ya ngau jubah te udah decalop ke alam darah abaꞌ nama Ya dasebot, “Pemadah Tuhan Allah.” 14 Abaꞌ ugaꞌ pasukan te de sruga nrudi Ya, sidaꞌ numpang kuda puteh abaꞌ ngau baju lenan alos te puteh breseh. 15 Ari alam mulot Ya pansot sebilah pedang tajam abaꞌ ngau pedang nyaꞌ Ya kaꞌ ngalah kebala bansa abaꞌ Ya kaꞌ mrintah sidaꞌ ngau tungkat besi. Ya kaꞌ merah angor alam teban te ngau merah angor. Teban nyaꞌ kebarat pranseng Tuhan Allah Te Ma Kuasa. 16 De jubah Ya abaꞌ de pa Ya adai datules nama upa pitoꞌ, “Raja de atau kebala raja, Tuhan de atau kebala tuan.”
Jelu nyaꞌ abaꞌ nabi palsu datibar ke alam laot api
17 Baroꞌ udah nyaꞌ ku medaꞌ sikoꞌ mlikat diri de mataari abaꞌ ya ngangau ngau goꞌ te sareng ugaꞌ kebala burong te trebai de langet, jakoꞌ ya, “Boh kitoꞌ begugoꞌ makai abaꞌ ngeramai gawai besai te udah deageh Tuhan Allah. 18 Ayoh pakai ke kebala bangkai raja, kebala kepalaꞌ prajuret abaꞌ prajuret. Pakai ke kebala bangkai kuda abaꞌ kebala te numpang kuda nyaꞌ, bangkai ugaꞌ urang, bayek urang te bibas bayek ulon, bayek bangkai kebala urang te bepangkat bayek te nadai bepangkat.”
19 Baroꞌ ku medaꞌ jelu te semaru abaꞌ ugaꞌ kebala raja de bumi abaꞌ kebala prajuret sidaꞌ udah begugoꞌ kaꞌ beperang ngelawan Urang te numpang kuda nyaꞌ abaꞌ kebala prajuret Ya. 20 Uleh jelu nyaꞌ abaꞌ nabi palsu detangkap. Nabi palsu nyaꞌ mah te udah mulah kebala utai te nyaroh de mua jelu nyaꞌ. Ngau utai te nyaroh nyaꞌ ya nesat kebala urang te udah nrimaꞌ tana ari jelu nyaꞌ abaꞌ te udah nyemah pentek jelu nyaꞌ. Snikoꞌ datibar idop-idop ke alam laot api te bawoh uleh blirang. 21 Ugaꞌ kebala prajuret jelu nyaꞌ dabunoh ngau pedang te pansot ari mulot Urang te numpang kuda nyaꞌ abaꞌ kebala burong segai makai bangkai sidaꞌ.