Babel ruboh
18
Udah nyaꞌ ku medaꞌ sikoꞌ mlikat bukai turon ari sruga. Ya adai kuasa te besai, abaꞌ sinar te lampar trang, nyaꞌ te ngasoh ugaꞌ bumi tampak. 2 Ngau goꞌ te sareng ya ngangau,“Udah ruboh! Udah ruboh kuta Babel te besai nyaꞌ!
Diyaꞌ nyau jadi teban kebala sitan abaꞌ kebala roh najes diyau.
Abaꞌ diyaꞌ nyau jadi teban jalai kebala burong te najes besarang abaꞌ jelu te dekareh diyau.
3 Kuta Babel ngemaiꞌ ugaꞌ bansa mulah dusa abaꞌ napsu cabol kuta Babel nyaꞌ upa aiꞌ angor te nyuroh sidaꞌ mabok abaꞌ mulah kebala utai te jaiꞌ!
Kebala raja de dunia baraꞌ abaꞌ ya,
abaꞌ kebala urang te bedagang de bumi jadi kaya tegal napsu ya te nadai talah tat nyaꞌ.”
4 Baroꞌ ku ninga goꞌ te kebukai ari sruga madah,
“O kebala urang te daempu Ku!
Rari ke kitaꞌ ari kuta nyaꞌ
isaꞌ kitaꞌ nadai nunaꞌ kebala dusa ya,
abaꞌ isaꞌ kitaꞌ nadai kenaꞌ ukom abaꞌ ya!
5 Nema dusa ya brugoꞌ datai ke langet,
abaꞌ Tuhan Allah ingat ke pemenyat ya.
6 Pulah ke ya upa te udah dapulah ya ke kitaꞌ;
balas kedua kaleꞌ lipat apa te udah dapulah ya.
Ageh ke aiꞌ angor ngau ya dua kaleꞌ lebeh bisa ari aiꞌ angor te deageh ke urang bukai.
7 Pulah ke ya pemedeh abaꞌ tusah te sama abaꞌ pemesai abaꞌ pemiwah te udah ya asa.
Nema ya slareh madah direꞌ ya,
‘Ku toꞌ ratu te mrintah!
Ku ukai balu abaꞌ ku nadai ngamoꞌ ngasa tusah!’
8 Tegal penyumong ya nyaꞌ kebaꞌ alam sari ya kaꞌ detacah sampar, tusah, abaꞌ lapar.
Abaꞌ ya kaꞌ detunu ngau api, nema Tuhan Allah te ngukom ya nyaꞌ kuat.”
9 Kebala raja de dunia te baraꞌ abaꞌ ya te ngasa idop miwah abaꞌ ya kaꞌ nyabak abaꞌ bakenang asa sidaꞌ medaꞌ asap api te nunu ya. 10 Sidaꞌ kaꞌ diri jaoh nema sidaꞌ takot tacah pemedeh nyaꞌ. Sidaꞌ madah,
“Lampar pemedeh kuta besai toꞌ!
Lampar pemedeh kuta Babel te kuat!
Alam sejam jaꞌ ukom meh udah dakreja!”
11 Kebala urang te bedagang da bumi nyabak abaꞌ bakenang tegal inoꞌ nyaꞌ, nema niseꞌ ageꞌ urang te meli kebala barang te dajual sidaꞌ. 12 Niseꞌ ageꞌ te meli mas, pirak, permata, mutiara, kayen lenan alos, kayen ungu, kayen sutera, abaꞌ kayen mirah tuwai, bemacam utai te dapulah ari kayu te bau nyamai, bemacam utai te dapulah ari ngeleꞌ gajah, abaꞌ bemacam kayu te mahal, ari temaga, besi, abaꞌ batu pualam, 13 kulet kayu manes abaꞌ rempah-rempah, kebala kayu te bau wangi, mur abaꞌ kemenyan, angor abaꞌ binyak saiton, tepong abaꞌ ganom, sapi abaꞌ dumba, kuda abaꞌ kereta, kebala ulon abaꞌ kebala urang te detangkap sidaꞌ jalai sidaꞌ perang. 14 Kebala urang te bedagang madah ke inoꞌ nyaꞌ,
“Ugaꞌ te kaꞌ deꞌ empu kah nyau niseꞌ ageꞌ,
abaꞌ kebala te miwah abaꞌ bayek
udah lenyau ari deꞌ
abaꞌ nyaꞌ nadai temu ageꞌ!”
15 Kebala urang te bedagang nyau kaya nema bejual de kuta toꞌ. Sidaꞌ kaꞌ diri jaoh nema sidaꞌ takot tacah pemedeh nyaꞌ. Sidaꞌ kaꞌ nyabak abaꞌ bakenang, 16 baroꞌ sidaꞌ madah,
“Adoh, lampar pemedeh, lampar pemedeh, kuta besai toꞌ!
Sengket eh ya ngau selawar kayen lenan alos,
kayen ungu, abaꞌ kayen mirah tuwai;
sengket ya penoh ngau kebala pelagaꞌ mas,
permata, abaꞌ mutiara!
17 Uleh alam sejam jaꞌ, mis lenyau mah kebala pengaya ya nyaꞌ!”
Ugaꞌ nakhoda, penumpang, abaꞌ anak buah kapal, abaꞌ ugaꞌ urang te bapencareꞌ de laot diri ari jaoh. 18 Pas sidaꞌ medaꞌ asap api te ngangos kuta nyaꞌ, sidaꞌ kaꞌ mangkis, “Nadai kalaꞌ adai kuta bukai upa kuta te besai toꞌ!” 19 Kebaꞌ sidaꞌ ngamor abos de palaꞌ sidaꞌ ngau tana sidaꞌ bakenang, udah nyaꞌ nyabak abaꞌ mangkes-nguwes,
“Adoh, lampar pemedeh, lampar pemedeh kuta te besai toꞌ!
Pengaya ya nyaꞌ nyau nyuroh ugaꞌ urang te empu kebala kapal de laot jadi kaya!
Uleh alam sejam jaꞌ, mis lenyau mah ugaꞌ kebala utai!”
20 Adai goꞌ ari sruga madah ageꞌ, “O sruga, gaga kah medaꞌ kuta toꞌ nyau ruboh! O urang te daempu Tuhan Allah, kebala rasol, abaꞌ kebala nabi, gaga kah. Nema Tuhan Allah udah ngukom kuta nyaꞌ ngau malas apa te dapulah ya nyaꞌ ke kitaꞌ.”
Babel nadai ngamoꞌ bangket ageꞌ
21 Udah nyaꞌ sikoꞌ mlikat te kuat ngangkat sigeꞌ batu besai, te pemesai batu te ngau ngileng ganom. Baroꞌ ya nikam batu nyaꞌ ke alam laot blumaꞌ madah,
“Upa toꞌ mah kuta Babel te besai nyaꞌ,
kaꞌ datikam kaya
sampai nadai temu ageꞌ.
22 O Babel, niseꞌ tinga ageꞌ, suleng, trumpet, abaꞌ kebala musek te kebukai de kuta toꞌ,
niseꞌ ageꞌ urang te panai betukang ditoꞌ,
abaꞌ niseꞌ ageꞌ goꞌ pengileng.
23 Niseꞌ ageꞌ pansau lampu ditoꞌ,
abaꞌ niseꞌ ageꞌ goꞌ penganten te laki abaꞌ te inoꞌ de kuta toꞌ.
Kebala urang te bedagang de kuta toꞌ urang te tepanang de bumi,
abaꞌ ugaꞌ bansa udah kenaꞌ tipu ngau ilmu siher kuta toꞌ.”
24 Babel deukom nema de alam kuta nyaꞌ udah datemu darah kebala nabi abaꞌ darah urang te daempu Tuhan Allah, abaꞌ darah ugaꞌ urang te udah debunoh de atau bumi.