Inoꞌ abaꞌ jelu
17
Udah nyaꞌ ku medaꞌ sikoꞌ ari ketujoh mlikat te megai tujoh mangkok nyaꞌ datai ngusong ku abaꞌ madah, “Boh, ku kaꞌ nganyaꞌ ke direꞌ kati inoꞌ te kanyi nyaꞌ kaꞌ daukom, ya mah kuta besai nyaꞌ te dadiri semak kebala sungai. 2 Kebala raja de dunia baraꞌ abaꞌ ya, abaꞌ te diyau de bumi jadi mabok nema nginom angor baraꞌ nyaꞌ.”3 Baroꞌ Roh Tuhan Allah menoh ku abaꞌ mlikat nyaꞌ ngemaiꞌ ku ke tanah luah te baengkrangan. Diyaꞌ ku medaꞌ sikoꞌ inoꞌ dudok deatau sikoꞌ jelu warna mirah tuwai, de ugaꞌ tuboh ya adai kebala nama te ngau mlicak Tuhan Allah. Jelu nyaꞌ bepalaꞌ tujoh abaꞌ betanok sepuloh. 4 Inoꞌ nyaꞌ ngau baju te warna ungu abaꞌ mirah tuwai, abaꞌ delagaꞌ ngau kebala pelagaꞌ mas, kebala permata, abaꞌ mutiara. De jari ya nyaꞌ, ya megai suteꞌ cawan mas te penoh ngau kebala utai te najes abaꞌ kutor, tegal ari baraꞌ ya. 5 De dai ya datules suteꞌ gelar te nadai daketauꞌ urang apa reti. Gelar nyaꞌ, “Babel te besai, inai kebala inoꞌ te kanyi abaꞌ ugaꞌ utai te najes de dunia.” 6 Baroꞌ ku medaꞌ inoꞌ nyaꞌ mabok darah kebala urang te dabunoh, sidaꞌ nyaꞌ kebala urang te daempu Tuhan Allah abaꞌ kebala urang te setia besaksi tentang Isa Al Maseh.
Pas ku medaꞌ inoꞌ nyaꞌ, ku ma ampal. 7 Uleh mlikat nyaꞌ madah ke ku, “Ngapa meh ma ampal? Ku kaꞌ madah reti te bedau daketauꞌ urang tentang inoꞌ nyaꞌ abaꞌ jelu te datumpang ya nyaꞌ, nyaꞌ mah jelu te bepalaꞌ tujoh abaꞌ betanok sepuloh.
8 Jelu te udah meh pedaꞌ ke nyaꞌ gah adai, uleh entoꞌ niseꞌ. Uleh stegal ageꞌ ya kaꞌ pansot ari lubang te ma dalam abaꞌ kaꞌ daukom Tuhan Allah. Kebaꞌ kebala urang te idop de bumi, te nama ya niseꞌ datules alam Kitab Kehidopan sebedau dunia dapulah kaꞌ ampal enteꞌ medaꞌ jelu nyaꞌ. Nema jelu nyaꞌ udah adai, entoꞌ ya niseꞌ, uleh ya kaꞌ timol ageꞌ. 9 Kebaꞌ te penteng ditoꞌ pemanai. Tujoh palaꞌ nyaꞌ tujoh buket, teban inoꞌ nyaꞌ dudok. 10 Abaꞌ tujoh palaꞌ nyaꞌ gaꞌ tujoh raja: limaꞌ ari sidaꞌ udah laboh, sikoꞌ ageꞌ mrintah, abaꞌ sikoꞌ ageꞌ bedau datai. Enteꞌ ya datai jemah ya proꞌ mrintah stegal jaꞌ. 11 Abaꞌ jelu te meh pedaꞌ nyaꞌ gah adai, uleh entoꞌ niseꞌ, ya mah raja te kelapan. Ya sama mah upa ketujoh raja nyaꞌ gaꞌ, abaꞌ ya kaꞌ daukom Tuhan Allah. 12 Sepuloh tanok te ku pedaꞌ nyaꞌ mah sepuloh raja te bedau blaboh mrintah. Uleh sidaꞌ kaꞌ dabreꞌ kuasa stegal ngau mrintah jadi raja abaꞌ jelu nyaꞌ. 13 Kesepuloh raja toꞌ suteꞌ pemiker; ugaꞌ sidaꞌ nyerah hak abaꞌ kuasa sidaꞌ ke jelu nyaꞌ. 14 Sidaꞌ kaꞌ beperang ngelawan Anak Dumba nyaꞌ. Uleh Anak Dumba kaꞌ ngalah sidaꞌ. Nema Anak Dumba nyaꞌ Tuhan de atau kebala tuan abaꞌ Raja de atau kebala raja. Abaꞌ Ya kaꞌ pabaꞌ kebala te nrudi Ya te dapileh abaꞌ setia, nyaꞌ mah kebala urang te dakumai jadi empu Ya.”
15 Mlikat nyaꞌ madah ke ku gaꞌ, “Kebala sungai te direꞌ pedaꞌ nyaꞌ, teban inoꞌ te kanyi nyaꞌ dudok, nyaꞌ mah kebala bansa, kebala rakyat, kebala negara abaꞌ kebala baasa. 16 Sepuloh tanok te ku pedaꞌ abaꞌ jelu nyaꞌ kaꞌ areh ke inoꞌ te kanyi nyaꞌ. Sidaꞌ kaꞌ ngerampas kebala utai te daempu ya, abaꞌ ngengaꞌ ya telanyang. Sidaꞌ kaꞌ makai iseꞌ inoꞌ te kanyi nyaꞌ abaꞌ kaꞌ ngameꞌ api ngau nunu ya. 17 Tuhan Allah naroh kedekaꞌ alam ati sidaꞌ isaꞌ pengamoꞌ Ya datemoꞌ. Tuhan Allah ngasoh sidaꞌ sepiker nyerah pemrintah sidaꞌ ke jelu nyaꞌ, isaꞌ jelu nyaꞌ mrintah sampai ugaꞌ te depadah Tuhan Allah temoꞌ. 18 Inoꞌ te meh pedaꞌ ke nyaꞌ, nyaꞌ mah kuta besai te mrintah ugaꞌ kebala raja de bumi.”