Tujoh bencana
16
Baroꞌ ku ninga goꞌ te sareng ari alam Rumah Kudos Tuhan Allah madah ketujoh mlikat nyaꞌ, “Angkat abaꞌ tuang ke iseꞌ tujoh mangkok te penoh peranseng Tuhan Allah nyaꞌ ke atau bumi!”2 Baroꞌ ku medaꞌ mlikat te semaru angkat abaꞌ nyiyoh iseꞌ mangkok ya ke bumi. Kebaꞌ ugaꞌ urang te ngau tana jelu nyaꞌ abaꞌ te nyemah pentek jelu nyaꞌ tacah empisaꞌ te jat abaꞌ parah amat.
3 Udah nyaꞌ ku medaꞌ mlikat te kedua nyiyoh iseꞌ mangkok ya ke laot. Kebaꞌ aiꞌ laot bebaleꞌ upa darah urang mati, nyaꞌ nyuroh kebala utai te idop de laot mati.
4 Baroꞌ ku medaꞌ mlikat te ketiga nyiyoh iseꞌ mangkok ya ke kebala sungai abaꞌ ke kebala mata aiꞌ. Kebaꞌ ugaꞌ sungai abaꞌ mata aiꞌ nyaꞌ bebaleꞌ jadi darah.
5 Ku ninga mlikat te bekuasa de aiꞌ madah ke Tuhan Allah,
“Wan te adai abaꞌ te udah adai, Wan te suci.
Wan ngukom ngau adel!
6 Nema sidaꞌ udah munoh urang te daempu Wan abaꞌ kebala nabi sampai darah sidaꞌ berayan diyaꞌ-ditoꞌ,
entoꞌ Wan ngasoh sidaꞌ nginom darah, abaꞌ nyaꞌ patot sidaꞌ asa!”
7 Udah nyaꞌ ku ninga goꞌ ari mesbah madah,
“O Tuhan, Allah te Ma bekuasa, kenaꞌ abaꞌ adel kebala ukom te Wan breꞌ!”
8 Udah nyaꞌ ku medaꞌ mlikat te keempat nyiyoh iseꞌ mangkok ya ke mataari, kebaꞌ pengangat mataari upa api ngagos ensia. 9 Ensia deangos ngau pengangat nyaꞌ, abaꞌ sidaꞌ ngutok nama Tuhan Allah, nema sidaꞌ tauꞌ badaꞌ Ya te bekuasa de ugaꞌ bencana nyaꞌ. Amat piyaꞌ sidaꞌ ngai nudi dusa sidaꞌ abaꞌ sidaꞌ ngai muji Tuhan Allah.
10 Udah nyaꞌ ku medaꞌ mlikat te kelimaꞌ nyiyoh iseꞌ mangkok ya ke bangku raja jelu te semaru. Kebaꞌ ugaꞌ teban te jalai jelu nyaꞌ mrintah bebaleꞌ petang. Gigi kebala urang sampai begeret ngasa pemedeh, 11 abaꞌ sidaꞌ ngutok Tuhan Allah de sruga nema pemedeh te sidaꞌ asa abaꞌ empisaꞌ te nacah sidaꞌ. Amat piyaꞌ sidaꞌ ngai gaꞌ badoꞌ mulah te jat.
12 Udah nyaꞌ ku medaꞌ mlikat te kenam nyiyoh iseꞌ mangkok ya ke sungai Eprat te besai nyaꞌ, baroꞌ rangkai mah sungai nyaꞌ, isaꞌ kebala raja ari timor tauꞌ bejalai mansaꞌ nyaꞌ. 13 Baroꞌ ku medaꞌ ari mulot naga, ari mulot jelu te semaru, abaꞌ ari mulot nabi palsua pansot tiga roh jat te upa kacong. 14 Sidaꞌ nyaꞌ kebala roh jat te tauꞌ mulah kebala utai te nyelah. Sidaꞌ angkat ngusong kebala raja de ugaꞌ dunia abaꞌ ngumpol kebala raja nyaꞌ isaꞌ abaꞌ beperang de ari besai Tuhan Allah te ma bekuasa nyidang ugaꞌ ensia.
15 Nadai mang-mang Tuhan madah, “Dinga kah! Ku kaꞌ datai upa pencuri! Betuah amat urang te slareh siap abaꞌ slareh beslawar baju nema sidaꞌ nadai bejalai telanyang abaꞌ nadai malu demua urang banyau!”
16 Udah nyaꞌ kebala roh te jat nyaꞌ ngumpol ugaꞌ kebala raja de dunia de suteꞌ teban te alam baasa Ibrani dasebot Harmagedon.
17 Udah nyaꞌ ku medaꞌ mlikat te ketujoh nyiyoh iseꞌ mangkok ya ke udara. Baroꞌ ku ninga goꞌ te sareng ari bangku raja te de Rumah Kudos Tuhan Allah madah, “Udah temoꞌ!” 18 Baroꞌ ku medaꞌ kilat bejelar-jelar abaꞌ goꞌ guntor bekaletop, abaꞌ adai gempa bumi te lampar kuat. Blaboh ari semaru ensia dapulah bedau kalaꞌ gempa bumi te penguat nyaꞌ. Nyaꞌ mah gempa bumi te paleng kuat. 19 Baroꞌ kuta te besai nyaꞌ belah tiga, abaꞌ ancor mah kebala kuta de ugaꞌ negara te nadai nglala Tuhan Allah. Baroꞌ Tuhan Allah ingat ke Babel kuta te besai nyaꞌ abaꞌ ya mreꞌ aiꞌ angor ari cawan peranseng Ya te ma amat ke kuta nyaꞌ. 20 Ugaꞌ pulau lenyau, abaꞌ ugaꞌ buket ayap. 21 Ujan es besai te pemerat limaꞌ puloh kilu laboh ari langet ningang kebala urang. Kebaꞌ sidaꞌ ngutok Tuhan Allah nema bencana nyaꞌ berat amat.