Nanyi kebala urang te menang
15
Udah nyaꞌ ku medaꞌ adai utai te ma nyelah de sruga. Ku medaꞌ adai tujoh mlikat te ngemaiꞌ tujoh bencana te pemadoꞌ. Nyaꞌ mah bencana te pemadoꞌ nema udah nyaꞌ Tuhan Allah nadai ranseng ageꞌ. 2 Udah nyaꞌ ku medaꞌ utai te upa laot kaca bekamoh api. Ku medaꞌ gaꞌ kebala urang te udah menang ngelawan jelu te semaru abaꞌ patong ya, abaꞌ angka jelu nyaꞌ. Kebala urang te menang nyaꞌ diri de tisi laot kaca blumaꞌ megai kecapi te dabreꞌ Tuhan Allah ke sidaꞌ. 3 Abaꞌ sidaꞌ menanyi lagu Musa, playan Tuhan Allah, abaꞌ lagu Anak Dumba. Goꞌ lagu nyaꞌ munyi pitoꞌ,“Besai abaꞌ luar biasa te dakreja Wan
O Tuhan Allah te ma bekuasa
Adel abaꞌ kenaꞌ jalai Wan!
O Raja kebala bansa!
4 Sapa te nadai hormat ke Wan Tuhan?
abaꞌ sapa te nadai nyunyong tingeꞌ nama Wan?
Wan mah te suci,
abaꞌ kebala bansa kaꞌ datai nyemah Wan
nema kebala te dapulah Wan, adel dapedaꞌ ugaꞌ urang.”
Tujoh mlikat abaꞌ tujoh mangkok te penoh peranseng Tuhan Allah
5 Udah nyaꞌ ku medaꞌ urang mukaꞌ Rumah Kudos Tuhan Allah, nyaꞌ mah Kemah Kesaksian de sruga. 6 Baroꞌ ku medaꞌ tujoh mlikat te ngemaiꞌ tujoh bencana pansot ari Rumah Kudos Tuhan Allah. Sidaꞌ ngau selawar baju te puteh breseh abaꞌ bejelar, abaꞌ dada sidaꞌ dalilet kayen mas. 7 Udah nyaꞌ ku medaꞌ sikoꞌ ari empat mahklok nyaꞌ nyuaꞌ tujoh igeꞌ mangkok mas ketujoh mlikat nyaꞌ. Kebala mangkok nyaꞌ penoh peranseng Tuhan Allah, te jong idop sengabot. 8 Ku medaꞌ Rumah Kudos Tuhan Allah nyaꞌ penoh uleh asap ari sinar Ya te lampar trang abaꞌ kuasa Ya. Abaꞌ niseꞌ urang te tauꞌ tamaꞌ ke alam Rumah Kudos Tuhan Allah nyaꞌ sebedau bencana ari tujoh mlikat nyaꞌ badoꞌ.