Anak Dumba abaꞌ urang te deempu Ya
14
Baroꞌ udah nyaꞌ ku medaꞌ Anak Dumba nyaꞌ diri de atau buket Sion. Ku medaꞌ adai seratos empat puloh empat ribu urang te abaꞌ Ya. De dai sidaꞌ detules nama Ya abaꞌ nama Apai Ya. 2 Baroꞌ ku ninga goꞌ te sareng ari langet munyi goꞌ guroh aiꞌ terjon te besai abaꞌ munyi goꞌ pletop guntor te lampar sareng. Abaꞌ goꞌ te ku tinga ke nyaꞌ munyi goꞌ kecapi te tengan detebah urang. 3 De mua bangku raja te deklileng empat mahklok abaꞌ kebala pemimpen, ku ninga seratos empat puloh empat ribu urang menanyi suteꞌ lagu baru. Niseꞌ urang te tauꞌ belajar lagu baru nyaꞌ bukai ari seratos empat puloh empat ribu urang te udah detebos ari bumi. 4 Sidaꞌ nyaꞌ suci upa urang laki te nadai kalaꞌ bekamoh tinok abaꞌ urang inoꞌ. Sidaꞌ nunaꞌ Anak Dumba nyaꞌ kikai jaꞌ Ya angkat. Sidaꞌ detebos ari entara ensia te de bumi abaꞌ te semaru depesemah ke Tuhan Allah abaꞌ Anak Dumba. 5 Sidaꞌ nadai kalaꞌ ngemulaꞌ, abaꞌ niseꞌ penyalah sidaꞌ.Tiga mlikat
6 Udah nyaꞌ ku medaꞌ sikoꞌ mlikat te kebukai trebai tingeꞌ de langet. Mlikat nyaꞌ ngemaiꞌ Brita Bayek te niseꞌ pemadoꞌ te kaꞌ depadah ke ensia de bumi, ke ugaꞌ suku, bansa, negara abaꞌ baasa. 7 Mlikat nyaꞌ ngangau ngau goꞌ te sareng, “Hormat ke Tuhan Allah, abaꞌ puji ke Ya! Nema entoꞌ nyau senta Tuhan Allah nyidang ensia. Semah ke Ya te mulah langet, bumi, laot, abaꞌ ugaꞌ mata aiꞌ!”
8 Udah nyaꞌ ku medaꞌ mlikat te kedua nerudi mlikat te semaru, mlikat nyaꞌ ngangau, “Nyau ruboh! Nyau ruboh kuta Babel te besai nyaꞌ! Kuta nyaꞌ ngemaiꞌ kebala bansa laboh alam dusa. Napsu cabol kuta Babel nyaꞌ upa aiꞌ angor te nyuroh sidaꞌ mabok abaꞌ mulah kebala utai te jaiꞌ!”
9 Udah nyaꞌ ku medaꞌ sikoꞌ mlikat te ketiga nerudi dua mlikat nyaꞌ. Ya ngangau ngau goꞌ te sareng jakoꞌ ya, “Kebala urang te nyemah jelu nyaꞌ abaꞌ nyemah pentek, abaꞌ nerimaꞌ tana jelu nyaꞌ bayek te de dai bayek de jari sidaꞌ, 10 sidaꞌ nyaꞌ kaꞌ nerimaꞌ ukom Tuhan Allah, upa urang te nginom aiꞌ angor te masam te udah deslineꞌ ke alam cawan te penoh peranseng Ya. Ugaꞌ sidaꞌ nyaꞌ kaꞌ daprisa alam api abaꞌ blirang de mua kebala mlikat suci abaꞌ de mua Anak Dumba nyaꞌ. 11 Asap ari api te medeh sidaꞌ ngeruap niseꞌ pemadoꞌ. Upa piyaꞌ mah lah pemedeh te kaꞌ deasa sidaꞌ te nyemah jelu te semaru, te nyemah pentek jelu nyaꞌ, abaꞌ te nerimaꞌ tana nama jelu nyaꞌ. Sidaꞌ daprisa tawas malam niseꞌ lepa.”
12 Uleh te penteng ditoꞌ, urang te patoh ke printah Tuhan Allah abaꞌ setia ke Isa Al Maseh alah sabar.
13 Baroꞌ ku ninga goꞌ ari sruga madah, “Tules ke toꞌ: Betuah amat kebala urang te mati tengan sidaꞌ setia pecayaꞌ ke Isa!”
Sawot Roh Kudos, “Auꞌ amat mah nyaꞌ! Sidaꞌ kaꞌ blepa ari ugaꞌ kreja sidaꞌ abaꞌ sidaꞌ kaꞌ nerimaꞌ upah ari apa te udah sidaꞌ kreja.”
Bumi deketau
14 Udah nyaꞌ ku medaꞌ adai sikoꞌ urang te upa Anak Ensia dudok de atau awan puteh. Urang nyaꞌ ngau mahkuta mas, abaꞌ megai sebilah aret te tajam. 15 Baroꞌ ku medaꞌ sikoꞌ mlikat te kebukai pansot ari Rumah Kudos Tuhan Allah. Mlikat nyaꞌ ngangau Urang te dudok de atau awan nyaꞌ jakoꞌ ya, “Kinang ke aret Wan nyaꞌ abaꞌ ketau ke entoꞌ. Senta ngetau nyau datai nema ganom de bumi nyau mudoh!” 16 Baroꞌ Ya te dudok de atau awan nyaꞌ nginang aret Ya ke bumi, abaꞌ ngetau ugaꞌ ganom te de bumi.
17 Udah nyaꞌ ku medaꞌ mlikat te kebukai pansot ari Rumah Kudos Tuhan Allah te de sruga. Mlikat nyaꞌ sigeꞌ megai sebilah aret te tajam. 18 Baroꞌ ku medaꞌ sikoꞌ mlikat te kebukai te nyaga api pansot ari mesbah. Ya ngangau mlikat te megai aret te tajam nyaꞌ jakoꞌ ya, “Kinang ke aret meh nyaꞌ abaꞌ uleh ke kebala buah angor de bumi, nema kebala buah nyaꞌ nyau mudoh!” 19 Udah nyaꞌ mlikat nyaꞌ nginang aret ya ke bumi nguleh kebala buah angor nyaꞌ, baroꞌ ya nibar buah angor nyaꞌ ke teban te ngau merah angor. Teban nyaꞌ kebarat peranseng Tuhan Allah. 20 Kebala buah angor nyaꞌ de perah de luar kuta ngau cara detijak alam badah te ngau merah, abaꞌ ari teban te ngau merah nyaꞌ pansot darah branyot upa sungai te panyai tiga ratos kilumiter, abaꞌ te dalam amper dua miter.