Jelu te pansot ari alam laot
13
Baroꞌ ku medaꞌ adai sikoꞌ jelu pansot ari alam laot. Jelu nyaꞌ bepalaꞌ tujoh abaꞌ betanok sepuloh. De ugaꞌ palaꞌ ya detules nama ngau melicak Tuhan Allah abaꞌ de ugaꞌ tanok ya adai suteꞌ mahkuta. 2 Jelu te ku pedaꞌ nyaꞌ upa macan tutol, kaki ya upa kaki bruang, abaꞌ mulot ya upa mulot singa. Ku medaꞌ naga nyaꞌ mereꞌ ke jelu nyaꞌ ugaꞌ penalah ya abaꞌ mereꞌ kuasa te ma besai ngau jelu nyaꞌ mrintah. 3 Ku medaꞌ palaꞌ jelu nyaꞌ te sigeꞌ adai bakal besai te tauꞌ munoh ya, uleh bakal nyaꞌ semoh. Ugaꞌ urang de dunia ampal medaꞌ bakal nyaꞌ tauꞌ semoh kebaꞌ sidaꞌ nerudi jelu nyaꞌ. 4 Sidaꞌ nyemah naga nyaꞌ nema ya udah mereꞌ kuasa ke jelu nyaꞌ. Abaꞌ sidaꞌ nyemah jelu nyaꞌ gaꞌ blumaꞌ madah, “Niseꞌ te kuat upa jelu toꞌ! Niseꞌ te talah beperang ngelawan ya!”5 Jelu nyaꞌ dengaꞌ becakap sumong abaꞌ melicak Tuhan Allah. Abaꞌ ya dengaꞌ mrintah selamaꞌ empat puloh dua bulan. 6 Baroꞌ ya belaboh melicak Tuhan Allah, melicak nama Tuhan Allah abaꞌ teban te jalai Tuhan Allah diyau abaꞌ melicak ugaꞌ urang te diyau de sruga. 7 Ya dengaꞌ beperang ngelawan urang te deempu Tuhan Allah abaꞌ ngalah sidaꞌ. Abaꞌ ya debereꞌ kuasa mrintah ugaꞌ suku, baasa, negara, abaꞌ bansa. 8 Ugaꞌ urang te diyau de dunia kaꞌ nyemah jelu nyaꞌ, sidaꞌ nyaꞌ kebala urang te nama ya nadai detules alam Kitab Kehidopan belaboh ari dunia depulah. Kitab nyaꞌ Kitab Anak Dumba te udah desemeleh.
9 Kebaꞌ nyaꞌ sapa kitaꞌ te bepeneng, tinga ke brita toꞌ,
10 “Sapa urang te udah deatoh Tuhan depenyara,
pesti urang nyaꞌ depenyara.
Abaꞌ sapa urang te udah deatoh Tuhan debunoh ngau pedang,
pesti urang nyaꞌ debunoh ngau pedang.”
Kebaꞌ nyaꞌ urang te deempu Tuhan Allah alah sabar abaꞌ setia.
Jelu te pansot ari alam bumi
11 Udah nyaꞌ ku medaꞌ sikoꞌ jelu te kebukai pansot ari alam bumi. Jelu nyaꞌ betanok dua upa tanok anak dumba abaꞌ goꞌ ya munyi goꞌ naga. 12 Ya debereꞌ kuasa te sama abaꞌ jelu te semaru, abaꞌ ya mulah ugaꞌ utai de mua jelu te semaru nyaꞌ. Ngau kuasa nyaꞌ, ya ngasoh ugaꞌ urang te diyau de bumi nyemah jelu te semaru. Jelu te semaru nyaꞌ jelu te empu bakal besai te tauꞌ munoh ya uleh nyau semoh. 13 Jelu te kedua nyaꞌ mulah kebala tana te nyaroh, sampai ya nuron api ari langet ke bumi de mua ugaꞌ urang. 14 Ya nesat ugaꞌ urang te diyau de bumi ngau kebala tana te nyaroh te depulah ya de mua jelu te semaru. Abaꞌ ya nyuroh urang te diyau de bumi mulah pentek jelu te semaru, te udah depantap ngau pedang uleh tubah idop. 15 Tuhan Allah ngengaꞌ jelu te kedua ngidop pentek nyaꞌ, nyaꞌ nyuroh pentek nyaꞌ tauꞌ becakap abaꞌ nyuroh munoh kebala urang te ngai nyemah ya. 16 Jelu te kedua nyaꞌ mukong ugaꞌ urang nerimaꞌ tana. Bayek urang te bepangkat bayek te nadai bepangkat, bayek te kaya, bayek te misken, bayek ulon bayek te ukai ulon alah nerimaꞌ tana de jari kanan enteꞌ nadai de dai sidaꞌ. 17 Peroꞌ urang te nerimaꞌ tana nama jelu nyaꞌ enteꞌ nadai angka nama jelu nyaꞌ mah te tauꞌ bejual beli, bukai ari nyaꞌ niseꞌ te tauꞌ.
18 Kebaꞌ te penteng ditoꞌ pemanai: Sapa te panai, ya tauꞌ ngitong angka jelu nyaꞌ nema angka nyaꞌ angka sikoꞌ ensia, abaꞌ angka nyaꞌ nam ratos nam puloh nam.