Inoꞌ abaꞌ naga
12
Baroꞌ ku medaꞌ tana te nyelah de langet. Adai urang inoꞌ te beselawar baju mataari diri de atau bulan abaꞌ ngau mahkuta duablas piyanau. 2 Inoꞌ nyaꞌ tengan nganong abaꞌ mangkes-nguwes ngasa pemedeh nema ya nyau kaꞌ beranak.3 Udah nyaꞌ pedaꞌ tana te kebukai de langet. Adai sikoꞌ naga besai warna mirah upa diyong api. Naga nyaꞌ adai tujoh palaꞌ abaꞌ sepuloh tanok. Ngenap palaꞌ ya adai mahkuta. 4 Ikoꞌ naga nyaꞌ ngiret sebagi ari tiga bagi kebala piyanau de langet abaꞌ nibar kebala piyanau nyaꞌ ke bumi.
Baroꞌ naga nyaꞌ diri de mua urang inoꞌ te nyau kaꞌ beranak nyaꞌ nema ya kaꞌ sintak nelan Miyak te nyau kaꞌ adai nyaꞌ.
5 Inoꞌ nyaꞌ ngadai Miyak laki te kaꞌ mrintah ugaꞌ bansa de bumi ngau tungkat besi. Naga nyaꞌ balang nelan Miyak nyaꞌ nema Miyak nyaꞌ nyau derampas abaꞌ debaiꞌ ke Tuhan Allah ke mua bangku raja teban penudok Tuhan Allah. 6 Baroꞌ inoꞌ nyaꞌ rari ke teban te jaoh ari urang, teban te udah deageh Tuhan Allah ngau ya. Diyaꞌ ya deintu selamaꞌ seribu dua ratos nam puloh ari.
Naga dekalah
7 Udah nyaꞌ de sruga adai perang. Mikhael abaꞌ kebala mlikat ya perang ngelawan naga abaꞌ kebala mlikat ya. 8 Sidaꞌ perang, uleh naga abaꞌ mlikat ya kalah kebaꞌ sidaꞌ nitauꞌ diyau ageꞌ de sruga. 9 Naga besai nyaꞌ abaꞌ kebala mlikat ya debuai ke bumi. Naga nyaꞌ mah ular tuai te degelar Ibles abaꞌ te degelar Satana te nesat ugaꞌ urang de dunia.
10 Baroꞌ ku ninga goꞌ te sareng ari sruga madah,
“Entoꞌ mah senta Tuhan Allah nyelamat urang te deempu Ya!
Entoꞌ Ya nganyaꞌ kuasa Ya ngau mrintah jadi Raja!
Entoꞌ Al Maseh, Raja penyelamat te dedanyi Tuhan Allah, nganyaꞌ kuasa Direꞌ!
Nema Ibles te nudoh kebala kawan seiman kita betawas malam de mua Tuhan Allah, udah debuai ari sruga.
11 Kebala kawan seiman kita udah ngalah ya ngau kuasa darah Anak Dumba
abaꞌ ngau pesau te kenaꞌ te depadah sidaꞌ ke urang.
Sidaꞌ sampai kaꞌ mereꞌ idop sidaꞌ, sangop sidaꞌ berani mati.
12 Kebaꞌ nyaꞌ ugaꞌ kitaꞌ te diyau de sruga alah gaga.
Uleh kitaꞌ te diyau de bumi abaꞌ de laot lampar ngasa pemedeh.
Nema Ibles udah datai ngusong kitaꞌ.
Ya sau amat nema ya tauꞌ badaꞌ enteꞌ waktu ya nadai mayoh ageꞌ.”
Naga ngagaꞌ inoꞌ te beranak
13 Breta naga nyaꞌ sadar enteꞌ ya udah debuai ke bumi, ya ngagaꞌ inoꞌ te udah ngadai Miyak laki nyaꞌ. 14 Uleh inoꞌ nyaꞌ debereꞌ dua sayap burong lang te besai isaꞌ ya tauꞌ trebai ke teban te jaoh ari urang, de teban te udah deageh ke ya. De teban nyaꞌ mah ya deintu selamaꞌ tiga taon stengah, abaꞌ diyaꞌ ya jaoh ari naga nyaꞌ. 15 Baroꞌ naga nyaꞌ mabu ari nyawa ya aiꞌ te pemesai sungai bong ke inoꞌ nyaꞌ, isaꞌ inoꞌ nyaꞌ anyot. 16 Uleh bumi nalau inoꞌ nyaꞌ. Bumi mukaꞌ nyawa direꞌ abaꞌ nelan ugaꞌ aiꞌ te debabu naga nyaꞌ. 17 Kebaꞌ sau amat mah naga nyaꞌ ke inoꞌ nyaꞌ. Ya angkat merang kebala anak inoꞌ nyaꞌ te kebukai, sidaꞌ nyaꞌ kebala urang te patoh ke Printah Tuhan Allah abaꞌ setia madah pesau te kenaꞌ sapa Isa nyaꞌ. 18 Naga nyaꞌ diri de tisi laot.