Pemrintah seribu taon
20
Baroꞌ ku medaꞌ sikoꞌ mlikat turon ari sruga megai anak kunci te ngau mukaꞌ lubang te ma dalam abaꞌ ya megai rantai te besai. 2 Ya nangkap naga, ular tuai nyaꞌ, nyaꞌ mah Ibles kepalaꞌ kebala sitan, kepalaꞌ roh jat. Mlikat masong ya selamaꞌ seribu taon, 3 abaꞌ muai ya ke alam lubang te ma dalam, baroꞌ nutop pintu abaꞌ ngunci lubang nyaꞌ. Abaꞌ mereꞌ kelaiꞌ de pintu lubang nyaꞌ. Mlikat nyaꞌ mulah piyaꞌ nema pintu nyaꞌ derot debukaꞌ, abaꞌ isaꞌ naga nyaꞌ nitauꞌ nesat ageꞌ kebala bansa selamaꞌ seribu taon. Udah seribu taon naga nyaꞌ kaꞌ delepas stegal.4 Baroꞌ ku medaꞌ kebala bangku raja abaꞌ sidaꞌ te dudok de bangku nyaꞌ. Sidaꞌ debereꞌ kuasa ngau nyidang. Ku medaꞌ gaꞌ semengat kebala urang te mati depancong ke palaꞌ nema sidaꞌ udah besaksi sapa Isa abaꞌ madah pesau Tuhan Allah. Sidaꞌ nyaꞌ te nadai nyemah jelu nyaꞌ abaꞌ pentek jelu nyaꞌ abaꞌ te nadai nerimaꞌ tana nyaꞌ de dai abaꞌ de jari sidaꞌ. Sidaꞌ nyaꞌ kaꞌ deidop ageꞌ abaꞌ mrintah jadi raja abaꞌ Al Maseh selamaꞌ seribu taon. 5 Toꞌ mah semaru Tuhan Allah ngidop urang mati nema kebala urang mati te kebukai nadai deidop ageꞌ sebedau seribu taon nyaꞌ mes. 6 Betuah amat kebala urang te semaru deidop ageꞌ Tuhan Allah. Sidaꞌ patot deempu Tuhan Allah abaꞌ nadai ngasa pemati te kedua uleh sidaꞌ kaꞌ jadi kebala imam te ngelayan Tuhan Allah abaꞌ Al Maseh, abaꞌ sidaꞌ kaꞌ mrintah abaꞌ Ya selamaꞌ seribu taon.
Ibles deukom
7 Udah mes masa seribu taon, Ibles kaꞌ delepas ari penyara. 8 Ya kaꞌ angkat nesat kebala bansa de ugaꞌ dunia. Kebala bansa nyaꞌ desebot Gog abaꞌ Magog. Ibles kaꞌ ngumpol kebala urang beperang abaꞌ pemayoh sidaꞌ upa engkrangan de laot.
9 Ku medaꞌ sidaꞌ pamar-piyar ke ugaꞌ dunia abaꞌ ngepong teban te jalai urang te deempu Tuhan Allah abaꞌ kuta te dekaseh Tuhan Allah. Uleh api ari langet turon ngangos sidaꞌ. 10 Baroꞌ Ibles te udah nesat kebala urang nyaꞌ, detibar ke alam laot api abaꞌ blirang, teban jelu te semaru abaꞌ nabi palsu detibar dulau. Diyaꞌ sidaꞌ kaꞌ daprisa tawas malam niseꞌ pemadoꞌ.
Ukom te pemadoꞌ
11 Udah nyaꞌ ku medaꞌ bangku raja te besai warna puteh abaꞌ Ya te dudok diyaꞌ. Bumi abaꞌ langet lenyau ari mua Ya abaꞌ niseꞌ pedaꞌ ageꞌ. 12 Abaꞌ ku medaꞌ kebala urang mati bebesai met diri de mua bangku raja nyaꞌ. Baroꞌ debukaꞌ kebala kitab abaꞌ debukaꞌ gaꞌ Kitab Kehidopan. Kebala urang desidang nunaꞌ apa te udah sidaꞌ pulah, nunaꞌ apa te adai detules alam kebala kitab nyaꞌ.
13 Ku medaꞌ laot nyerah kebala urang te mati de alam ya. Pemati abaꞌ Sebayan nyerah kebala urang te mati de alam ya, abaꞌ sidaꞌ desidang nunaꞌ apa te udah sidaꞌ pulah. 14 Baroꞌ Pemati abaꞌ Sebayan nyaꞌ detibar ke alam laot api. Nyaꞌ pemati te kedua: laot api. 15 Abaꞌ ngenap urang te nama ya niseꞌ detules alam Kitab Kehidopan, detibar ke alam laot api nyaꞌ.