Mlikat abaꞌ gulong kitab te met
10
Baroꞌ ku medaꞌ sikoꞌ mlikat kuat te kebukai turon ari sruga. Ya bejubah awan abaꞌ neraja de atau palaꞌ ya. Mua ya upa panas mataari abaꞌ kaki ya upa dua tiang api. 2 De jari ya adai gulong kitab met te tebukaꞌ. Kaki kanan ya betijak de laot, abaꞌ kaki kibaꞌ ya betijak de darat. 3 Baroꞌ ya ngangau kaya upa singa te merak. Udah ya ngangau, tujoh guntor nyaꞌ brawoh nyawot. 4 Udah tujoh guntor nyaꞌ begoꞌ, ku kaꞌ nyatat te ku tinga, uleh ku ninga ari sruga madah, “Tapok ke apa te depadah tujoh guntor nyaꞌ, abaꞌ adu mah nyatat nyaꞌ!”
5 Baroꞌ ku medaꞌ mlikat te kaki ya betijak de laot abaꞌ darat tadeꞌ teh ngangkat jari kanan ya ke langet tana ya besumpah. 6 Ya besumpah demi Tuhan Allah te idop sengabot, te mulah langet abaꞌ ugaꞌ te adai dealam nyaꞌ, bumi abaꞌ ugaꞌ te adai dealam nyaꞌ abaꞌ laot abaꞌ ugaꞌ te adai dealam nyaꞌ. Mlikat nyaꞌ madah, “Waktu nitauꞌ deulor ageꞌ! 7 Pas mlikat te ketujoh nyepu terompet ya, Tuhan Allah kaꞌ nemoꞌ te deamoꞌ Ya te bedau kalaꞌ depadah Ya ke urang. Ugaꞌ nyaꞌ kaꞌ tejadi upa te udah depadah Ya ke kebala nabi, playan Ya.”
8 Udah nyaꞌ ku ninga ageꞌ goꞌ te udah ku tinga ke ari sruga, madah ke ku, “Angkat, ameꞌ ke gulong kitab te tebukaꞌ de jari mlikat, te kaki diri de atau laot abaꞌ darat.” 9 Baroꞌ ku angkat ngusong mlikat nyaꞌ abaꞌ mintaꞌ ke ya, isaꞌ ya mreꞌ gulong kitab te engkaꞌ met nyaꞌ ke ku. Ya madah ke ku, “Ameꞌ abaꞌ pakai ke toꞌ. Toꞌ manis asa ilap de nyawa meh uleh ngasoh perot meh pedeh.” 10 Baroꞌ ku ngameꞌ gulong kitab te met nyaꞌ ari jari mlikat nyaꞌ, abaꞌ makai. De mulot ku manis asa ilap, uleh udah ku makai nyaꞌ, aja brasa perot ku pedeh. 11 Udah nyaꞌ ku daprintah, “Padah ageꞌ ke pesau ari Tuhan Allah tentang kebala bansa, negara, baasa, abaꞌ kebala raja.”