Trumpet te kelimaꞌ desepu
9
Udah nyaꞌ mlikat te kelimaꞌ nyepu trumpet ya. Baroꞌ ku medaꞌ sigeꞌ piyanau te udah laboh ke bumi. Adai urang te mereꞌ kunci ke piyanau nyaꞌ ngau ya nukang pintu lubang te ma dalam. 2 Udah nyaꞌ ya nukang pintu lubang te ma dalam abaꞌ asap tebal keluar ari nyaꞌ upa asap urang nunu uma te luwah. Mataari abaꞌ langet nadai pedaꞌ tegal asap ari lubang nyaꞌ. 3 Baroꞌ ari alam asap nyaꞌ pansot kebala buntak te turon ke bumi. Kebala buntak nyaꞌ desuroh tauꞌ nyengat upa kala. 4 Kebala buntak nyaꞌ derot ngerusak rumpot, kebala utai te tumoh, abaꞌ ugaꞌ kayu. Sidaꞌ peroꞌ sadi medeh ensia te niseꞌ cap Tuhan Allah de dai. 5 Kebala buntak nyaꞌ derot Tuhan Allah munoh ensia, uleh peroꞌ sadi mrisa ensia selamaꞌ limaꞌ bulan. Pemedeh te deasa nyaꞌ sama abaꞌ pemedeh sengat kala. 6 Selamaꞌ limaꞌ bulan nyaꞌ kebala urang ngigaꞌ cara kati akal isaꞌ tauꞌ mati, uleh sidaꞌ nitauꞌ mati. Sidaꞌ aja kaꞌ amat mati, uleh jong nadai mati-mati.7 Kebala buntak nyaꞌ upa medaꞌ kuda te siap ngau beperang. De atau palaꞌ sidaꞌ nyaꞌ adai utai te upa mahkuta mas. Mua sidaꞌ upa mua ensia. 8 Bok sidaꞌ upa bok urang inoꞌ, abaꞌ gigi sidaꞌ upa gigi singa. 9 Dada sidaꞌ detutop ngau utai te upa baju besi. Goꞌ sayap sidaꞌ munyi goꞌ kebala krita perang te detarek kebala kuda te beguai ke teban te jalai perang. 10 Kebala buntak nyaꞌ adai ikoꞌ te tauꞌ nyengat upa kala. Ngau ikoꞌ sidaꞌ te kuat sidaꞌ mrisa ensia selamaꞌ limaꞌ bulan. 11 Raja te mrintah sidaꞌ nyaꞌ mlikat te nyaga lubang te ma dalam. Nama raja nyaꞌ alam baasa Ibrani Abadon abaꞌ alam baasa Yunani Apolion (reti nama nyaꞌ “perusak”.) 12 Pemedeh te semaru udah temoꞌ, uleh ageꞌ adai lah dua uteꞌ pemedeh te kebukai te kaꞌ datai.
Trumpet te kenam desepu
13 Udah nyaꞌ mlikat te kenam nyepu trumpet ya. Baroꞌ ku ninga goꞌ te keluar ari empat tanok mesbah mas te de mua Tuhan Allah. 14 Goꞌ nyaꞌ madah ke mlikat te kenam nyaꞌ, “Lepas keempat mlikat te detamet Tuhan Allah de semak sungai Eprat te besai nyaꞌ!” 15 Kebaꞌ empat mlikat nyaꞌ udah deageh kusos delepas de jam, ari, bulan abaꞌ taon te udah deatoh Ya. Sidaꞌ delepas ngau munoh sebagi ari tiga bagi ugaꞌ ensia te de dunia. 16 Abaꞌ ku ninga sidaꞌ empu dua ratos juta prajuret te ngau kuda.
17 Depemedaꞌ ku nyaꞌ, adai mayoh kebala kuda abaꞌ kebala prajuret te ngau kuda nyaꞌ. Kebala prajuret te ngau kebala kuda nyaꞌ ngau baju besi te warna mirah bejelar, biru tuai abaꞌ kuneng upa batu blirang. Palaꞌ kebala kuda nyaꞌ upa palaꞌ singa, abaꞌ ari mulot sidaꞌ pansot api, asap, abaꞌ blirang. 18 Asap, api, abaꞌ blirang te pansot ari mulot kuda, nyaꞌ mah tiga bencana te munoh sebagi ari tiga bagi ensia te adai de dunia. 19 Penguat kebala kuda nyaꞌ adai de nyawa abaꞌ ikoꞌ sidaꞌ. Ikoꞌ sidaꞌ upa ular te bepalaꞌ abaꞌ ngau ikoꞌ nyaꞌ sidaꞌ medeh ensia.
20 Uleh ensia bukai te nadai mati kenaꞌ kebala bencana nyaꞌ, nadai gaꞌ nudi dusa te depulah sidaꞌ. Sidaꞌ niseꞌ pemadoꞌ nyemah kebala sitan abaꞌ kebala pentek te depulah ari mas, pirak, temaga, batu, abaꞌ kayu te nitauꞌ medaꞌ, nitauꞌ ninga abaꞌ te nitauꞌ bejalai. 21 Kebala sidaꞌ nyaꞌ ngai nesal abaꞌ ngai nudi kebala dusa sidaꞌ, sidaꞌ tubah munoh, encuri, ngau ilmu siher abaꞌ bekamoh tinok abaꞌ urang te ukai laki bini direꞌ.