Anak Dumba mukaꞌ metrai te ketujoh
8
Breta Anak Dumba nyaꞌ mukaꞌ metrai te ketujoh, te adai degulong kitab nyaꞌ, sruga sunyeꞌ niseꞌ goꞌ sama sekaleꞌ kurang lebeh setengah jam. 2 Baroꞌ ku medaꞌ tujoh mlikat te diri de mua Tuhan Allah, abaꞌ ke sidaꞌ debereꞌ tujoh uteꞌ trumpet.3 Baroꞌ mlikat te kebukai datai ngemaiꞌ sigeꞌ mangkok mas te ngau nunu kemenyan, diri de mua mesbah. Mlikat nyaꞌ mayoh debereꞌ kemenyan te kaꞌ detunu breta abaꞌ pradua ari ugaꞌ urang te deempu Tuhan Allah. Abaꞌ nyaꞌ depesemah ya de atau mesbah mas te de mua bangku raja nyaꞌ. 4 Baroꞌ asap kemenyan de mangkok te depegai mlikat abaꞌ pradua kebala urang te deempu Tuhan Allah, nikeꞌ ke mua Tuhan Allah. 5 Udah nyaꞌ mlikat nyaꞌ ngiseꞌ mangkok nyaꞌ ngau kerang api te deameꞌ ya ari mesbah, abaꞌ nibar ke bumi. Kebaꞌ meletop mah goꞌ guntor blumaꞌ kilat abaꞌ gempa bumi.
Empat trumpet te semaru desepu
6 Udah nyaꞌ tujoh mlikat te megai tujoh uteꞌ trumpet siap nyepu trumpet.
7 Mlikat te semaru nyepu trumpet ya. Baroꞌ ku medaꞌ ujan es abaꞌ api te becampor darah desiyoh ke bumi. Kebaꞌ ari tiga bagi bumi angos sebagi, ari tiga bagi kebala pon kayu angos sebagi, abaꞌ ugaꞌ rumpot te ijau angos ugaꞌ.
8 Udah nyaꞌ mlikat te kedua nyepu trumpet ya. Baroꞌ ku medaꞌ utai te upa buket besai te tengan detunu detibar ke alam laot. Sebagi ari tiga bagi laot bebaleꞌ jadi darah, 9 sebagi ari tiga bagi kebala utai te idop de laot mati abaꞌ sebagi ari tiga bagi kapal de laot ancor.
10 Udah nyaꞌ mlikat te ketiga nyepu trumpet ya. Baroꞌ ku medaꞌ piyanau besai te idop upa api pawai, laboh ari langet ningang sebagi ari tiga bagi kebala sungai abaꞌ mata aiꞌ de bumi. 11 Nama piyanau nyaꞌ Apsintos (reti ya “payet”.) Piyanau nyaꞌ ngasoh sebagi ari tiga bagi aiꞌ nyaꞌ payet, abaꞌ mayoh urang mati tegal nginom aiꞌ te payet nyaꞌ.
12 Udah nyaꞌ mlikat te keempat nyepu trumpet ya. Baroꞌ ku medaꞌ adai te mangkong sebagi ari tiga bagi mataari, sebagi ari tiga bagi bulan, sebagi ari tiga bagi kebala piyanau. Sebagi ari tiga bagi ugaꞌ kebala bena te de langet nyaꞌ jadi petang. Nyaꞌ te nyuroh sebagi ari tawas abaꞌ sebagi ari malam jadi petang.
13 Tengan ku medaꞌ ugaꞌ nyaꞌ, ku ninga goꞌ te sareng ari sikoꞌ burong lang te tengan trebai tingeꞌ, jakoꞌ ya, “Lampar pedeh! Lampar pedeh! Lampar pedeh sidaꞌ te diyau de bumi nema ageꞌ adai tiga igeꞌ trumpet te kaꞌ desepu mlikat te ke bukai!”